ഇന്നവേഷൻ ഇൻ സയൻസ് പെർസ്യൂട്ട് ഫോർ ഇൻസ്പയേഡ് റിസർച്ചി (ഇൻസ്പയർ) ന്റെ ഒരു ഘടകമായ സ്കോളർഷിപ് ഫോർ ഹയർ എഡ്യൂക്കേഷന് (എസ്എച്ച്ഇ-ഷീ) അപേക്ഷിക്കാം. 12ാം ക്ലാസ് മികച്ച നിലയിൽ പാസായി ബിഎസ്സി, ബിഎസ്സി (ഓണേഴ്സ്), നാലു വർഷത്തെ ബിഎസ്, അഞ്ചു വർഷത്തെ ഇന്റഗ്രേറ്റഡ് എംഎസ്സി, എംഎസ് കോഴ്സുകൾക്കു ചേർന്നിട്ടുള്ള വിദ്യാർഥികൾക്കാണു സ്കോളർഷിപ്പിന് അർഹത. ശാസ്ത്ര വിഷയങ്ങൾക്കാണ് ഈ സ്കോളർഷിപ്പുകൾ. എൻജിനിയറിംഗ്, മെഡിസിൻ, ടെക്നോളജി പഠനങ്ങൾക്കു പദ്ധതി ബാധകമല്ല.
എസ്എച്ച്ഇക്കു കീഴിൽ വർഷംതോറും 10,000 സ്കോളർഷിപ്പുകളാണു നൽകുന്നത്. ഇന്ത്യയിലെ വിവിധ അംഗീകൃത സംസ്ഥാന, കേന്ദ്ര ബോർഡുകളിൽ നിന്ന് 2019ൽ 12ാം ക്ലാസ് ജയിച്ചവരും ഇന്ത്യയിലെ ഏതെങ്കിലും അംഗീകൃത കോളജ് യൂണിവേഴ്സിറ്റി/സ്ഥാപനങ്ങളിൽ മൂന്നു വർഷത്തെ ബിഎസ്സി, ബിഎസ്സി (ഓണേഴ്സ്), നാല് വർഷത്തെ ബിഎസ്, കൂടാതെ അഞ്ച് വർഷത്തെ ഇൻറഗ്രേറ്റഡ് എംഎസ്സി/എംഎസ് പ്രോഗ്രാമുകളിൽ നാച്വറൽ/ബേസിക് സയൻസുകൾ പഠിക്കുന്നതുമായ കുട്ടികൾക്കു മാത്രമായി ഈ സ്കോളർഷിപ്പുകൾ പരിമിതപ്പെടുത്തിയിരിക്കുന്നു.
അർഹരായവർക്കു വർഷംതോറും 80,000 രൂപ സ്കോളർഷിപ്പ് ലഭിക്കും. പണമായി പ്രതിവർഷം 60,000 രൂപയും സമ്മർ ടൈം അറ്റാച്ച്മെന്റ് ഫീ ആയി 20,000 രൂപയുമാണു നൽകുന്നത്. ഇത് പ്രൊജക്ട് നടത്തുന്ന സ്ഥാപനത്തിനാണു നൽകുന്നത്.
പന്ത്രണ്ടാം ക്ലാസിലെ സംസ്ഥാന, സെൻട്രൽ ബോർഡ് പരീക്ഷയ്ക്ക് ഓരോന്നിനും കട്ട് ഓഫ് ത്രെഷോൾഡ് (ടോപ് 1%) മാർക്കിനു മുകളിലുള്ളവർ (കേരള- 97.25 % , സിബിഎസ്ഇ-94.40%, ഐസിഎസ്ഇ-96.00 %), നിർദിഷ്ട മത്സര പരീക്ഷകളിൽ ഏതെങ്കിലും നിശ്ചിത കട്ട് ഓഫ് റാങ്കിനുള്ളിലെ മികവ് കൂടാതെ വിവിധ സ്കോളർഷിപ്പുകളുടേയും മെഡലുകളുടേയും ജേതാക്കൾ എന്നിവരിൽ നിന്നാണ് അർഹരായവരെ തെരഞ്ഞെടുക്കുന്നത്. അപേക്ഷകർ ഇന്ത്യയിലെ ഏതെങ്കിലും അംഗീകൃത കോളജിൽ അഥവാ യൂണിവേഴ്സിറ്റിയിൽ എൻറോൾ ചെയ്തിരിക്കണം. ഡിസംബർ 31 നകം അപേക്ഷിക്കണം. വെബ്സൈറ്റ്: http://www.online-inspire.gov.in ഫോണ്: 01126568099.