കേരളത്തിലെ വിവിധ സർവകലാശാലകളിൽ പഠന വകുപ്പുകളിൽ നടത്തുന്ന ബിരുദാനന്തര ബിരുദ കോഴ്സുകളിലെ പ്രവേശനത്തിന് ഇപ്പോൾ അപേക്ഷിക്കാം. പ്രവേശന പരീക്ഷയുടെ അടിസ്ഥാനത്തിലാണ് അഡ്മിഷൻ.
* കാലടി ശ്രീ ശങ്കരാചാര്യ സംസ്കൃത സർവകലാശാല എംഎ, എംഎസ്‌സി, എംഎസ്ഡബ്ല്യു, എംപിഎഡ്, എംഎഫ്എ, പിജി ഡിപ്ലോമ പ്രോഗ്രാമുകളിലേക്ക് അപേക്ഷിക്കാം ഓണ്‍ലൈനിൽ അപേക്ഷിക്കേണ്ട അവസാന തീയതി ഏപ്രിൽ 29.
കാലടി മുഖ്യകേന്ദ്രത്തിനു പുറമേ തിരുവനന്തപുരം , പന്മന, ഏറ്റുമാനൂർ, തുറവൂർ, തൃശൂർ,തിരൂർ, കൊയിലാണ്ട ി, പയ്യന്നൂർ പ്രാദേശിക കേന്ദ്രങ്ങളിലുമായാണു കോഴ്സ് നടത്തുന്നത്.
മേയിൽ നടത്തുന്ന പ്രവേശന പരീക്ഷയുടേയും അഭിമുഖത്തിന്‍റെയും അടിസ്ഥാനത്തിലായിരിക്കും എംഎ, എംഎസ്‌സി, എംഎസ്ഡബ്ല്യൂ കോഴ്സുകളിലേക്കുള്ള അഡ്മിഷൻ. ബിരുദധാരികൾക്കും അവസാന വർഷക്കാർക്കും അപേക്ഷിക്കാം. എംഎ മ്യൂസിക്, ഡാൻസ്, തിയറ്റർ എന്നിവയ്ക്ക് എഴുത്തുപരീക്ഷ കൂടാതെ അഭിരുചി പരീക്ഷയും പ്രായോഗിക പരീക്ഷയും ഉണ്ടായിരിക്കും. എംപിഎഡിന് ഫിറ്റ്നസ്/പ്രാക്ടിക്കൽ പരീക്ഷ കൂടി പാസാവണം.
കാലടി മുഖ്യകേന്ദ്രത്തെക്കൂടാതെ തിരുവനന്തപുരം, പന്മന, ഏറ്റുമാനൂർ, തുറവൂർ, തൃശൂർ, തിരൂർ, കൊയിലാണ്ടി, പയ്യന്നൂർ പ്രാദേശിക കേന്ദ്രങ്ങളിലും പ്രവേശന പരീക്ഷാകേന്ദ്രം ഉണ്ടായിരിക്കും. കാലടി, തുറവൂർ, തിരൂർ, പയ്യന്നൂർ എന്നിവിടങ്ങളിലാണ് എംഎസ്ഡബ്ല്യു പ്രവേശന പരീക്ഷാകേന്ദ്രങ്ങൾ. എംപിഎഡ്/എംഎസ്‌സി/എംഎഫ്എ കോഴ്സുകളുടെ പ്രവേശന പരീക്ഷ കാലടി മുഖ്യകേന്ദ്രത്തിലായിരിക്കും നടത്തുക.
* കൽപ്പിത സർവകലാശാലാ പദവിയുള്ള അമൃത വിശ്വവിദ്യാ പീഠത്തിനു കീഴിലുള്ള കാമ്പസുകളിൽ ബിരുദ കോഴ്സുകൾക്കും ഇന്‍റഗ്രേറ്റഡ് ബിരുദാനന്തര ബിരുദ കോഴ്സുകൾക്കും അപേക്ഷിക്കാം. ബിരുദ കോഴ്സുകൾ: ബിഎ -ഇംഗ്ലീഷ്, മാസ് കമ്യൂണിക്കേഷൻ. ഇന്‍റഗ്രേറ്റഡ് ബിരുദാനന്തര ബിരുദ കോഴ്സുകൾ: എംഎസ്‌സി -ഫിസിക്സ്, കെമിസ്ട്രി, മാത്തമാറ്റിക്സ്. ബിരുദാനന്തര ബിരുദ കോഴ്സുകൾ: എംഎ-ഇംഗ്ലീഷ്, കമ്യൂണിക്കേഷൻ. എംഎസ്‌സി-ഫിസിക്സ്, കെമിസ്ട്രി, മാത്തമാറ്റിക്സ്, അപ്ലൈഡ് മാത്തമാറ്റിക്സ് ആൻഡ് ഡാറ്റാ അനലിറ്റിക്സ്.ബിരുദ കോഴ്സുകൾക്കും ഇന്‍റഗ്രേറ്റഡ് കോഴ്സുകൾക്കും മേയ് 10നകവും ബിരുദാനന്തര ബിരുദ കോഴ്സുകൾക്ക് ജൂണ്‍ 15നകവും അപേക്ഷിക്കണം.
* നാനോ മെഡിസിൻ, നാനോ ടെക്നോളജി, മോളിക്യുളാർ മെഡിസിൻ എന്നിവയിൽ എംടെക് കോഴ്സിന് അപേക്ഷ ക്ഷണിച്ചു. എംഎസ്‌സി (ഫിസിക്സ്, കെമിസ്ട്രി, മെറ്റീരിയൽ സയൻസ്, ബയോടെക്നോളജി, ബയോ കെമിസ്ട്രി,ബയോ ഇൻഫർമാറ്റിക്സ്, സുവോളജി), ബിടെക് (ബയോടെക്നോളജി, കെമിക്കൽ, ബയോമെഡിക്കൽ) കോഴ്സുകൾ 60 ശതമാനം മാർക്കോടെ പാസായവർക്ക് നാനോ മെഡിസിൻ കോഴ്സിനും എംഎസ്‌സി (ഫിസിക്സ്, കെമിസ്ട്രി, മെറ്റീരിയൽ സയൻസ്), ബിടെക് (മെക്കാനിക്കൽ, ഇലക്‌ട്രിക്കൽ, ഇലക്ട്രോണിക്സ്, മെറ്റീരിയൽ സയൻസ്, കെമിക്കൽ) കോഴ്സുകൾ 60 ശതമാനം മാർക്കോടെ പാസായവർക്ക് നാനോ ടെക്നോളജി ആൻഡ് റിന്യുവബിൾ എനർജി കോഴ്സിനും ലൈഫ് സയൻസിൽ എംഎസ്‌സി, ബയോടെക്നോളജി, ബയോ ഇൻഫർമാറ്റിക്സ് എന്നിവയിൽ ബിടെക് അല്ലെങ്കിൽ എംബിബിഎസ്, ബിഡിഎസ്, ബിഫാം എന്നിവയിൽ 60 ശതമാനം മാർക്കു നേടിയവർക്ക് മോളിക്യുലാർ മെഡിസിൻ കോഴ്സിന് അപേക്ഷിക്കാം. അപേക്ഷിക്കേണ്ട അവസാന തീയതി മേയ് 20.
* കാലിക്കട്ട് യൂണിവേഴ്സിറ്റിയിൽ പഠനവകുപ്പുകളിലെ പിജി പ്രവേശന പരീക്ഷയ്ക്കും സ്വാശ്രയ സെന്‍ററുകൾ, അഫിലിയേറ്റഡ് കോളജുകൾ എന്നിവയിലെ പ്രവേശന പരീക്ഷ മുഖേനയുള്ള യുജി/പിജി പ്രവേശന പരീക്ഷയ്ക്കും ഓണ്‍ലൈൻ അപേക്ഷ ക്ഷണിച്ചു. സർവകലാശാലയുടെ പഠനവകുപ്പുകളിൽ എംഎഡ് ഒഴികെയുള്ള കോഴ്സുകളിലേക്ക് പ്രവേശനപരീക്ഷ മുഖേനയാണ് പ്രവേശനം. വിജ്ഞാപന പ്രകാരം വിവിധ കോഴ്സുകൾക്ക് നിഷ്കർഷിച്ചിട്ടുള്ള യോഗ്യതയുള്ളവർക്കും ഫലം കാത്തിരിക്കുന്നവർക്കും അപേക്ഷിക്കാം. ഏപ്രിൽ 12 വരെ ഫീസ് അടയ്ക്കാനും രജിസ്റ്റർ ചെയ്യാനും സൗകര്യമുണ്ടായിരിക്കും. ഒന്നിൽ കൂടുതൽ പ്രോഗ്രാമുകളിലേക്ക് അപേക്ഷിക്കുന്നവർ ഓരോ അധിക പ്രോഗ്രാമിനും 50 രൂപ വീതം അടയ്ക്കണം. അഫിലിയേറ്റഡ് കോളജുകളിലെ മാനേജ്മെന്‍റ് സീറ്റുകൾ ഉൾപ്പെടെ എല്ലാ വിഭാഗം സീറ്റുകളിലേക്കുമുള്ള പ്രവേശനം, പ്രവേശന പരീക്ഷാ റാങ്ക് ലിസ്റ്റിൽനിന്ന് മാത്രമായിരിക്കും.
* കേരള സർവകലാശാല വിവിധ പഠന വകുപ്പുകളിലെ ബിരുദാനന്തര ബിരുദ കോഴ്സുകളിലേക്ക് അപേക്ഷ ക്ഷണിച്ചു. മേയ് 19ന് നടത്തുന്ന പ്രവേശന പരീക്ഷ വഴിയാണ് അഡ്മിഷൻ. അപേക്ഷിക്കേണ്ട അവസാന തീയതി ഏപ്രിൽ രണ്ട്. തിരുവനന്തപുരത്തും എറണാകുളത്തും പരീക്ഷാ കേന്ദ്രങ്ങളുണ്ട്. എംഎ, എംഎസ്‌സി, എംടെക്, എംസിജെ, എംബിഎ (ജനറൽ ആൻഡ് ടൂറിസം), എംഎൽഐഎസ്‌സി, എംഎസ്ഡബ്ല്യു, എംഎഡ്, എൽഎൽഎം, എംകോം (ജനറൽ, ഗ്ലോബൽ ബിസിനസ് ഓപ്പറേഷൻ) എന്നീ കോഴ്സുകളിലേക്കാണ് പ്രവേശനം.
എംഎ: ഇംഗ്ലീഷ് ലാംഗ്വേജ് ആൻഡ് ലിറ്ററേച്ചർ, ഹിന്ദി, മലയാളം ലാഗ്വേജ് ആൻഡ് ലിറ്ററേച്ചർ, അറബിക്, സംസ്കൃതം, റഷ്യൻ, ജർമൻ, ഭാഷാശാസ്ത്രം, ഫിലോസഫി, ഹിസ്റ്ററി, സോഷ്യോളജി, ഇക്കണോമിക്സ്, പൊളിറ്റിക്കൽ സയൻസ്, ഇസ്ലാമിക് ഹിസ്റ്ററി, മ്യൂസിക്, ആർക്കിയോളജി, വെസ്റ്റ് ഏഷ്യൻ സ്റ്റഡീസ്, പബ്ലിക് അഡ്മിനിസ്ട്രേഷൻ.
എംഎസ്‌സി: ബയോ കെമിസ്ട്രി, ബയോടെക്നോളജി, ജനിറ്റിക്സ് ആൻഡ് പ്ലാന്‍റ് ബ്രീഡിംഗ്, കെമിസ്ട്രി, അക്വാറ്റിക് ബയോളജി ആൻഡ് ഫിഷറീസ്, കംപ്യൂട്ടർ സയൻസ്, എൻവയണ്‍മെന്‍റൽ സയൻസസ്, ജിയോളജി, കംപ്യൂട്ടേഷണൽ ബയോളജി, ഡിമോഗ്രാഫി ആൻഡ് ബയോസ്റ്റാറ്റിസ്റ്റിക്സ്, ആക്ച്വൂറിയൽ സയൻസ്, മാത്തമാറ്റിക്സ്, ഫിസിക്സ്, സ്റ്റാറ്റിസ്റ്റിക്സ്, സുവോളജി, ഇന്‍റഗ്രേറ്റീവ് ബയോളജി, അപ്ലൈഡ് സൈക്കോളജി, ഡേറ്റ സയൻസ്, അപ്ലൈഡ് സ്റ്റാറ്റിസ്റ്റിക്സ് ആൻഡ് ഡേറ്റ അനലറ്റിക്സ്, ബയോഡൈവേഴ്സിറ്റി കണ്‍സർവേഷൻ.
എംടെക്: കംപ്യൂട്ടർ സയൻസ് (ഡിജിറ്റൽ ഇമേജ് കംപ്യൂട്ടിംഗ് സ്പെഷലൈസേഷൻ), ടെക്നോളജി മാനേജ്മെന്‍റ്, ഇലക്ട്രോണിക്സ് ആൻഡ് കമ്യൂണിക്കേഷൻ (ഒപ്റ്റോ ഇലക്ട്രോണിക്സ് ആൻഡ് ഒപ്റ്റിക്കൽ കമ്യൂണിക്കേഷൻ).