അയർലൻഡിൽ ഇന്ത്യൻ ഡ്രൈവർക്കു നേരേ ആക്രമണം
Wednesday, August 6, 2025 2:05 AM IST
ഡബ്ലിൻ: അയർലൻഡിലെ ഡബ്ലിനിൽ ഇന്ത്യൻ വംശജനായ ഡ്രൈവർക്കു നേരേ ആക്രമണം. ലഖ്‌വീർ സിംഗ് എന്നയാൾക്കാണ് മർദനമേറ്റത്. 23 വർഷമായി അയർലൻഡിൽ താമസിക്കുന്ന ലഖ്‌വീർ സിംഗ് ഒരു ദശകത്തിലേറെയായി കാബ് ഡ്രൈവറാണ്.
വെള്ളിയാഴ്ച ഡബ്ലിനിലെ പോപ്പിൻട്രീയിൽ രണ്ടു യുവാക്കൾ ലഖ്‌വീറിനെ മർദിക്കുകയായിരുന്നു. ലഖ്‌വീറിന്‍റെ കാറിൽ യാത്ര ചെയ്തവരാണ് ആക്രമണം നടത്തിയത്. നിങ്ങളുടെ സ്വന്തം രാജ്യത്തേക്കു മടങ്ങിപ്പോകണം എന്ന് ആക്രോശിച്ചുകൊണ്ടായിരുന്നു മർദനം.
അയർലൻഡിൽ ഇന്ത്യൻവംശജർക്കു നേരേ ആക്രമണങ്ങൾ വർധിച്ചുവരികയാണ്. തുടർന്ന് എംബസി ഇന്ത്യക്കാർക്കു മുന്നറിയിപ്പു നല്കിയിരുന്നു.