ഷൊർണൂർ: ഡൽഹിയിൽ നടക്കുന്ന തൽസൈനിക് ക്യാമ്പിൽ ഈ വർഷവും പട്ടാമ്പി കോളജ് എൻസിസിക്ക് പങ്കാളിത്തം. തുടർച്ചയായി മൂന്നാം വർഷമാണ് കോളജിലെ എൻസിസി കേഡറ്റുകൾക്ക് ഈ അവസരം ലഭിക്കുന്നത്. രണ്ടാം വർഷ കൊമേഴ്സ് വിദ്യാർഥിയായ എം. നിരഞ്ജൻ ആണ് ഇത്തവണ തെരഞ്ഞെടുക്കപ്പെട്ടത്. വാണിയംകുളം മൂരിത്തൊടി അനിൽകുമാർ - ദീപ ദമ്പതികളുടെ മകനാണ് നിരഞ്ജൻ.
ഇന്ത്യയിലെ മുഴുവൻ സംസ്ഥാനങ്ങളിൽ നിന്നും കേന്ദ്ര ഭരണ പ്രദേശങ്ങളിൽ നിന്നും തെരഞ്ഞെടുക്കപ്പെടുന്ന കേഡറ്റുകളുടെ കഴിവുകൾ മാറ്റുരക്കുന്ന ക്യാമ്പ് ആണ് തൽസൈനിക് ക്യാമ്പ്. 81 കുട്ടികളാണ് ഇത്തവണ കേരളത്തെ പ്രതിനിധീകരിക്കുന്നത്. പ്രധാനമായും ആറ് ഇനങ്ങളിലാണ് മത്സരം. 12 വരെയാണ് ക്യാമ്പ്. ഹെൽത്ത് ആൻഡ് ഹൈജീൻ വിഭാഗത്തിലാണ് നിരഞ്ജൻ മാറ്റുരക്കുക.