പുൽപ്പള്ളി: മുള്ളൻകൊല്ലി ഗ്രാമപഞ്ചായത്തിൽ ക്വാറികൾക്ക് ലൈസൻസ് അനുവദിക്കുന്നതുമായി ബന്ധപ്പെട്ട് ലക്ഷങ്ങളുടെ അഴിമതി ആരോപണങ്ങളിൽ മുങ്ങി നിൽക്കുന്ന മുള്ളൻകൊല്ലി പഞ്ചായത്ത് യുഡിഎഫ് ഭരണസമിതി രാജിവയ്ക്കണമെന്ന് സിപിഎം ആവശ്യപ്പെട്ടു.
ഇക്കാര്യം ഉന്നയിച്ച് മുള്ളൻകൊല്ലി, പാടിച്ചിറ ലോക്കൽ കമ്മിറ്റിയുടെ നേതൃത്വത്തിൽ ഗ്രാമപഞ്ചായത്ത് ഓഫീസിലേക്ക് മാർച്ചും ധർണയും നടത്തി. ഗ്രാമപഞ്ചായത്തിലെ ജനങ്ങളുടെ ജീവനും സ്വത്തിനും ഭീഷണിയായ ക്വാറി പ്രവർത്തനം പുനപരിശോധിക്കാൻ തയാറാകണമെന്നും പ്രശ്നത്തിൽ അടിയന്തരമായി സർവകക്ഷി യോഗം ചേരണമെന്നും മാർച്ചിൽ ആവശ്യപ്പെട്ടു. സിപിഎം പുൽപ്പള്ളി ഏരിയ സെക്രട്ടറി എം.എസ്. സുരേഷ് ബാബു ഉദ്ഘാടനം ചെയ്തു. കെ.കെ. ചന്ദ്രബാബു അധ്യഷത വഹിച്ചു. സി.പി. വിൻസെന്‍റ്, ജോബി കരോട്ടുക്കുന്നേൽ, പി.എ. മുഹമ്മദ്, പി.ജെ. പൗലോസ്, കലേഷ് എന്നിവർ പ്രസംഗിച്ചു.