മഞ്ചേരി : സ്ഥല പരിമിതി മൂലം വികസനം വഴിമുട്ടി നില്‍ക്കുന്ന മഞ്ചേരി ഗവണ്‍മെന്‍റ് മെഡിക്കല്‍ കോളജിന് വേട്ടേക്കോട് കണ്ടെത്തിയ അമ്പത് ഏക്കര്‍ ഭൂമി ഏറ്റെടുക്കണമെന്ന ആവശ്യം പരിഗണിക്കാമെന്ന് മുഖ്യമന്ത്രി.
കഴിഞ്ഞ ദിവസം മുഖ്യമന്ത്രി തിരുവനന്തപുരത്ത് ജില്ലയിലെ എംഎല്‍എമാരുടെ യോഗം വിളിച്ചു ചേര്‍ത്തിരുന്നു. ഈ യോഗത്തിലാണ് അഡ്വ. യു.എ. ലത്തീഫ് എംഎല്‍എയുടെ ആവശ്യത്തിന് മുഖ്യമന്ത്രി പിണറായി വിജയന്‍റെ ഉറപ്പ്.
മഞ്ചേരി മെഡിക്കല്‍ കോളജില്‍ രാത്രികാല പോസ്റ്റുമോര്‍ട്ടം, രാത്രികാലങ്ങളില്‍ കെഎസ്ആര്‍ടിസി സര്‍വീസ്, മഞ്ചേരിയില്‍ എന്‍ജിനീയറിംഗ് കോളജ്, മഞ്ചേരി ഒലിപ്പുഴ റോഡിന്‍റെ പ്രവൃത്തികള്‍ വേഗമാക്കല്‍, മഞ്ചേരി സെന്‍ട്രല്‍ ജംഗ്ഷന്‍ വീതി കൂട്ടി ചെരണി വരെ റോഡ് പുനരുദ്ധാരണം നടത്തല്‍, കോളജുകളില്‍ വിവിധ കോഴ്സുകള്‍ അനുവദിക്കല്‍,
മണ്ഡലത്തിലെ മുഴുവന്‍ സര്‍ക്കാര്‍ വിദ്യാലയങ്ങളിലും പുതിയ ബാച്ചുകള്‍ അനുവദിക്കുന്നതോടൊപ്പം എടപ്പറ്റ പഞ്ചായത്തിലെ ഏക ഗവണ്‍മെന്‍റ് ഹൈസ്കൂളായ എടപ്പറ്റ ഹൈസ്കൂളിനെ ഹയര്‍ സെക്കന്‍ഡറിയാക്കി ഉയര്‍ത്തല്‍, മഞ്ചേരി ഗവണ്‍മെന്‍റ് പോളിടെക്നിക് കോളജില്‍ പുതിയ കോഴ്സുകള്‍ അനുവദിക്കല്‍, മഞ്ചേരി മെഡിക്കല്‍ കോളജില്‍ ഫോറന്‍സിക് വിഭാഗത്തില്‍ സീനിയര്‍ റസിഡന്‍റ് സര്‍ജന്‍ ഉള്‍പ്പെടെ വിവിധ തസ്തികകള്‍ സൃഷ്ടിക്കല്‍,
പയ്യനാട് എലമ്പ്രയില്‍ എല്‍പി സ്കൂള്‍ അനുവദിക്കല്‍, മഞ്ചേരി പുല്ലൂര്‍ ഗവണ്‍മെന്‍റ് യുപി സ്കൂള്‍ ഹൈസ്കൂളായി അപ്ഗ്രേഡ് ചെയ്യല്‍, മണ്ഡലത്തിലെ പൊതുമരാമത്ത് വകുപ്പിന് കീഴിലുള്ള റോഡുകളും ബിഎം ആന്‍ഡ് ബിസി ചെയ്ത് ഗതാഗത യോഗ്യമാക്കല്‍,
വിവിധ സ്കൂളുകള്‍ക്കും ആരോഗ്യ കുടുംബക്ഷേമ കേന്ദ്രങ്ങള്‍ക്കും കെട്ടിടം നിര്‍മിക്കല്‍, ചെരണി പാര്‍ക്ക് വിപുലീകരണം, മഞ്ചേരി പയ്യനാട് സ്റ്റേഡിയം അന്താരാഷ്ട്ര നിലവാരത്തില്‍ ഉയര്‍ത്തല്‍ തുടങ്ങി മണ്ഡലത്തിലെ വിവിധ ആവശ്യങ്ങള്‍ എംഎല്‍എ മുഖ്യമന്ത്രിക്ക് മുന്നില്‍ സമര്‍പ്പിച്ചു.