മസ്കറ്റ്: ഒമാൻ മലങ്കര സുറിയാനി കത്തോലിക്കാ കൂട്ടായ്മയുടെ(ഒഎസ്എംസിസി) ആഭിമുഖ്യത്തിൽ ക്രിസ്മസ് - പുതുവത്സര ആഘോഷങ്ങൾ ഒമാനിൽ മസ്കറ്റിലെ റൂവി സെയിന്‍റ്സ് പീറ്റർ & പോൾ കത്തോലിക്കാ പള്ളിയുടെ പാരീഷ് ഹാളിൽ വച്ച് നടന്നു.
പ്രസിഡന്‍റ് സജി പി. ജേക്കബിന്‍റെ അധ്യക്ഷതയിൽ കൂടിയ പൊതുസമ്മേളനം, റൂവി സെയിന്‍റ്സ് പീറ്റർ & പോൾ കത്തോലിക്കാ പള്ളി വികാരി റവ. ഫാ. സ്റ്റീഫൻ ലൂയിസ് ഉത്ഘാടനം നിർവഹിച്ചു.
ഡയറക്‌ടർ റവ. ഫാ. വർഗീസ് വാലിക്കോടത്തിന്‍റെ പ്രാർഥനയോടെ ആരംഭിച്ച സമ്മേളനത്തിൽ റവ. ഫാ. തോമസ് വെട്ടിക്കാലായിൽ, റവ. ഫാ. ഡിയാഗോ സാരിയോ, യൂണിറ്റ് വൈസ് പ്രസിഡന്‍റുമാരായ നിബു മാത്യു(റൂവി), റോജി ടി. തോമസ്(ഗാല), സിനോജ് സാമുവൽ (സലാല), ബിനു ആലുവിള (നിസ്വ) എന്നിവർ ആശംസകൾ നേർന്നു.
സമ്മേളനത്തിന് ജനറൽ സെക്രട്ടറി റോണ തോമസ് സ്വാഗതവും ട്രഷറർ ബിജുമോൻ നന്ദിയും രേഖപ്പെടുത്തി. കുടുംബജീവിതത്തിന്‍റെ ഇരുപത്തിയഞ്ചാം വാർഷികം ആഘോഷിക്കുന്ന അഞ്ച് ദമ്പതികളെ ആദരിക്കുകയും 10, 12 ക്ലാസുകളിൽ ഉന്നത വിജയം നേടിയ കുട്ടികളെയും റൂവി പള്ളിയുടെ ആഭിമുഖ്യത്തിൽ നടത്തിയ ക്വിസ് മത്സരത്തിൽ ഒന്നാം സമ്മാനം കിട്ടിയ അംഗങ്ങളെയും മെറിറ്റ് അവാർഡുകൾ നൽകി അനുമോദിച്ചു.
റൂവി, ഗാല, നിസ്വ, സലാല, സോഹാർ യൂണിറ്റുകളുടെ കലാപരിപാടികൾ സമ്മേളനത്തിന് മാറ്റുകൂട്ടി. സമ്മേളനത്തിന്‍റെ കൺവീനർമാരായ ജോസഫ് മാത്യു, ജിജി വർഗീസ്, റൂവി, ഗാല, കമ്മിറ്റി അംഗങ്ങൾ പരിപാടികൾക്ക് നേതൃത്വം നൽകി.