ചോദ്യപേപ്പര്‍ ചോര്‍ച്ച: വീണ്ടും വീഡിയോയുമായി മുഖ്യപ്രതി : Deepika.com Kerala News |

Click here for detailed news of all items

ചോദ്യപേപ്പര്‍ ചോര്‍ച്ച: വീണ്ടും വീഡിയോയുമായി മുഖ്യപ്രതി

Wednesday, April 16, 2025 1:54 AM IST

കോഴിക്കോട്: വീണ്ടും യൂട്യൂബ് വീഡിയോയുമായി, ക്രിസ്മസ് പരീക്ഷയുടെ ചോദ്യപേപ്പര്‍ ചോര്‍ന്ന കേസിലെ മുഖ്യപ്രതിയായ എംഎസ് സൊല്യൂഷന്‍സ് സിഇഒ മുഹമ്മദ്‌ ഷുഹൈബ്. ചോദ്യ പേപ്പർ ചോർച്ച കേസിലെ ന്യായീകരണങ്ങളാണു പുതിയ വീഡിയോയിലുള്ളത്.

“മറ്റുള്ളവർ ചെയ്ത തെറ്റിനാണ് എന്നെ പ്രതിചേർത്തത്. എന്‍റെ കാർ സുഹൃത്ത് ഓടിച്ച് അപകടമുണ്ടാക്കിയാൽ തന്നെയും പ്രതിചേർക്കും. ചോദ്യപേപ്പർ ചോർച്ചയിൽ എന്നെ പ്രതി ചേർത്തതും അങ്ങനെ കണ്ടാൽ മതി” - യൂട്യൂബ് ചാനലിലൂടെ മുഹമ്മദ്‌ ഷുഹൈബ് പ്രതികരിച്ചു.

മൂന്നു മാസത്തിനു ശേഷമാണ് ഷുഹൈബ് വീണ്ടും വീഡിയോ ചെയ്യുന്നത്. ചോദ്യപേപ്പർ ചോർച്ച കേസിൽ ജാമ്യം കിട്ടിയതിനു പിറകെയാണു പുതിയ വീഡിയോ ചെയ്തിട്ടുള്ളത്. വിദ്യാര്‍ഥികള്‍ക്കൊപ്പമാണ് എന്നും നിന്നിട്ടുള്ളത്. മന്ത്രിക്കു പരാതി നൽകിയിരുന്നു. ഇത് ചില അധ്യാപകർക്ക് തന്നോട് ശത്രുത ഉണ്ടാക്കിയെന്നാണ് ഷുഹൈബ് പറയുന്നത്.

ലഹരി മാഫിയയ്ക്ക് ചില സ്കൂളുകളുമായും ട്യൂഷൻ സെന്‍ററുകളുമായും അടുപ്പമുണ്ടെന്ന് പറഞ്ഞതും ശത്രുത വർധിപ്പിച്ചുവെന്ന് ഷുഹൈബ് വീഡിയോയിൽ പറയുന്നു.

എംഎസ് സൊല്യൂഷൻസ് എന്ന സ്ഥാപനത്തിനു ചോദ്യപ്പേപ്പർ ചോർത്തി നൽകിയത് മലപ്പുറം മേൽമുറിയിലെ അൺ എയ്‌ഡഡ‍് സ്‌കൂളിലെ പ്യൂൺ അബ്ദുൾ നാസറാണെന്ന് ക്രൈം ബ്രാഞ്ച് കണ്ടെത്തിയിരുന്നു.

എംഎസ് സൊല്യൂഷൻസ് അധ്യാപകൻ ഫഹദിനു ചോദ്യപേപ്പർ ചോർത്തി നൽകിയത് ഇയാളാണെന്നായിരുന്നു കണ്ടെത്തല്‍. അബ്‌ദുൾ നാസർ ജോലി ചെയ്യുന്ന സ്‌കൂളിലാണു മുൻപ് ഫഹദ് ജോലി ചെയ്തിരുന്നത്. ഈ ബന്ധം മുൻനിർത്തിയാണ് ചോദ്യപേപ്പർ ചോർത്തിയത്. കേസില്‍ ഈ രണ്ട് അധ്യാപകരും ഷുഹൈബുമാണു പ്രതികളായിട്ടുള്ളത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.