അങ്ങാടിപ്പുറം: നിലമ്പൂര്‍-ഷൊര്‍ണൂര്‍ റെയില്‍പാതയില്‍ രാത്രികാലങ്ങളില്‍ കൂടുതല്‍ വണ്ടികള്‍ ഓടിച്ച് യാത്രാദുരിതത്തിന് പരിഹാരം കാണണമെന്നും വൈകുന്നേരം എറണാകുളത്തു നിന്നു പുറപ്പെട്ട് ഷൊര്‍ണൂരില്‍ യാത്ര അവസാനിപ്പിക്കുന്ന എറണാകുളം-ഷൊര്‍ണൂര്‍ മെമു സര്‍വീസ് നിലമ്പൂരിലേക്ക് നീട്ടണമെന്നും എന്‍സിപിഎസ് ജില്ലാ പ്രസിഡന്‍റ് കെ.പി. രാമനാഥന്‍ പറഞ്ഞു.
നിലമ്പൂര്‍-ഷൊര്‍ണൂര്‍ റൂട്ടില്‍ രാത്രികാലങ്ങളില്‍ കൂടുതല്‍ വണ്ടികളോടിക്കണമെന്നും നിലമ്പൂര്‍-നഞ്ചന്‍കോട് പാത യാഥാര്‍ഥ്യമാക്കണമെന്നും റെയില്‍വേ ഗേറ്റ് എഫ്സിഐ റോഡ് നന്നാക്കി തെരുവുവിളക്കുകള്‍ സ്ഥാപിക്കണമെന്നും ആവശ്യപ്പെട്ട് എന്‍വൈസിഎസ് ജില്ലാ കമ്മിറ്റി അങ്ങാടിപ്പുറം റെയില്‍വെ സ്റ്റേഷനു മുന്നില്‍ നടത്തിയ ധര്‍ണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.എന്‍വൈസിഎസ് ജില്ലാ പ്രസിഡന്‍റ് ഷെബിന്‍ തൂത അധ്യക്ഷത വഹിച്ചു. ഇ.എ. മജീദ്, കെ.വി.ദാസ്, മധുസൂദനന്‍, ഭാസ്ക്കരന്‍നായര്‍, ഷാഹുല്‍ പൂപ്പലം എന്നിവര്‍ പ്രസംഗിച്ചു.