നിലമ്പൂര്‍: നിലമ്പൂര്‍ ജില്ലാ ആശുപത്രിയിലെ ഒപി ടിക്കറ്റ് നിരക്ക് വര്‍ധന പിന്‍വലിക്കണമെന്ന് ആവശ്യപ്പെട്ട് യൂത്ത് കോണ്‍ഗ്രസ് ജില്ലാ ആശുപത്രിക്ക് മുന്നില്‍ നിരാഹാര സമരം തുടങ്ങി. നിലമ്പൂര്‍ മുനിസിപ്പല്‍ യൂത്ത് കോണ്‍ഗ്രസ് പ്രസിഡന്‍റ് സൈഫു ഏനാന്തി, ജില്ലാ ജനറല്‍ സെക്രട്ടറി ടി.എം.എസ്. ആസിഫ്, പാര്‍വീസ് ചന്തക്കുന്ന്, ഫിറോസ് മയ്യന്താന്നി എന്നിവരാണ് നിരാഹാരം കിടക്കുന്നത്.
സമരം യൂത്ത് കോണ്‍ഗ്രസ് മണ്ഡലം പ്രസിഡന്‍റ് അമീര്‍ പൊറ്റമ്മല്‍ ഉദ്ഘാടനം ചെയ്തു. മണ്ഡലം കോണ്‍ഗ്രസ് പ്രസിഡന്‍റ് അഡ്വ. ഷെറി ജോര്‍ജ് മുഖ്യപ്രഭാഷണം നടത്തി. ബ്ലോക്ക് കോണ്‍ഗ്രസ് ഭാരവാഹി എം.കെ. ബാലകൃഷ്ണന്‍, മണ്ഡലം കോണ്‍ഗ്രസ് ഭാരവാഹികളായ പട്ടിക്കാടന്‍ ഷാനവാസ്, റനീഷ് കവാട്, അനീഷ് കുളക്കണ്ടം, ഗിരീഷ് മോളൂര്‍ മഠത്തില്‍, സി.ടി. രാജു, സക്കീര്‍, മിശാല്‍, ഉബൈദ് രാമന്‍കുത്ത് തുടങ്ങിയവര്‍ പ്രസംഗിച്ചു. ഫീസ് വര്‍ധന പിന്‍വലിക്കും വരെ നിരാഹാര സമരം തുടരുമെന്ന് നേതാക്കള്‍ അറിയിച്ചു.