വൈക്കത്ത് 52 വൈദ്യുതി പോസ്റ്റുകൾ തകർന്നു; നാലു ട്രാൻസ്ഫോർമർ തകരാറിലായി : Deepika.com Nattu Visesham

KOTTAYAM

വൈക്കത്ത് 52 വൈദ്യുതി പോസ്റ്റുകൾ തകർന്നു; നാലു ട്രാൻസ്ഫോർമർ തകരാറിലായി

Friday, May 10, 2024 7:26 AM IST

വൈക്കം: കഴിഞ്ഞ ദിവസം വൈകുന്നേരമുണ്ടായ കാറ്റിൽ മരങ്ങൾ വീണ് വൈക്കം നഗരത്തിൽ മാത്രം 52 വൈദ്യുത പോസ്റ്റുകൾ തകരുകയും നാലു ട്രാൻസ്ഫോർമർ തകരാറിലാക്കുകയും ചെയ്തു.

ഇതിൽ ഒരു ട്രാൻസ്ഫോർമർ പൂർണമായി നശിച്ചു. തകർന്ന ട്രാൻസ്ഫോർമറിനു മാത്രം നാലുലക്ഷം രൂപയോളം ചെലവുവരും. ആകെ 75 ലക്ഷത്തോളം രൂപയുടെ നഷ്ടമുണ്ടായതായാണ് പ്രാഥമിക വിലയിരുത്തൽ. തകരാർ പരിഹരിച്ച് വൈദ്യുതി പുനഃസ്ഥാപിക്കാൻ കെഎസ്ഇബി അധികൃതർ അക്ഷീണ യത്നമാണ് നടത്തുന്നത്.

ചെമ്പ് ഇലക്‌ട്രിക്കൽ സെക്‌ഷനിൽ വീടുകളിലേക്കും സ്ഥാപനങ്ങളിലേക്കും വൈദ്യുതി എത്തിക്കുന്ന 20 പോസ്റ്റുകളും 11 കെവി ലൈനിലെ അഞ്ച് പോസ്റ്റുകളും തകർന്നിരുന്നു. ഇവ മാറ്റി സ്ഥാപിച്ചു വൈദ്യുതി പുനഃസ്ഥാപിച്ചു.

തലയാഴത്ത് ഒരു പോസ്റ്റ് മാത്രമാണ് ഒടിഞ്ഞത്. മരം വൈദ്യുതി ലൈനിൽ വീണ് 20ഓളം സ്ഥലങ്ങളിൽ വൈദ്യുതി തടസപ്പെട്ടിരുന്നു. ഒടിഞ്ഞ പോസ്റ്റുകൾ അവിടെ കട്ട് ചെയ്ത് മറ്റിടങ്ങളിലെ വൈദ്യുതി പുനഃസ്ഥാപിക്കുന്ന നടപടികളാണ് പുരോഗമിക്കുന്നത്.

വ്യാപകമായി വൈദ്യുതി ലൈൻ തകരാറിലായതിനാൽപൂർണമായി വൈദ്യുതി ബന്ധം പുനഃസ്ഥാപിക്കാൻ രണ്ടു ദിവസമെങ്കിലും വേണ്ടി വരുമെന്ന് കെഎസ് ഇബി അധികൃതർ പറയുന്നു.