ദുലീപ് ട്രോഫി: മുഷീര് ഖാന് സെഞ്ചുറി; ഇന്ത്യ ബി പൊരുതുന്നു
Thursday, September 5, 2024 7:05 PM IST
ബംഗളൂരു: ദുലീപ് ട്രോഫി ക്രിക്കറ്റിൽ മുഷീര് ഖാന്റെ(105) സെഞ്ചുറി മികവിൽ ഇന്ത്യ ബി പൊരുതുന്നു. ഒന്നാം ദിനത്തിലെ കളി അവസാനിക്കുമ്പോൾ ഇന്ത്യ ബി 202/7 എന്ന നിലയിലാണ്.
ടോസ് നഷ്ടപ്പെട്ട് ബാറ്റിംഗിനെത്തിയ ഇന്ത്യ ബിക്ക് മോശം തുടക്കമായിരുന്നു. വമ്പൻ അടിക്കാരായ യശസ്വി ജയ്സ്വാള് (30), റിഷഭ് പന്ത് (7) എന്നിവര് നിരാശപ്പെടുത്തിയതോടെ ഒരു ഘട്ടത്തിൽ ടീം 94/7 എന്ന നിലയിലായിരുന്നു.
അവിടെ നിന്ന് നവ്ദീപ് സൈനിയെ(29) കൂട്ടുപിടിച്ച് മുഷീര് ഖാന് നടത്തിയ രക്ഷാപ്രവർത്തനമാണ് ടീമിനെ മാന്യമായ സ്കോറിലേക്ക് എത്തിച്ചത്. 227 പന്തുകള് നേരിട്ട മുഷീര് രണ്ട് സിക്സും 10 ഫോറിന്റെയും അകമ്പടിയോടെയാണ് 105 റൺസ് നേടിയത്.
ഇന്ത്യ എയ്ക്ക് വേണ്ടി ഖലീല് അഹമ്മദ്, അകാശ് ദീപ്, ആവേശ് ഖാന് എന്നിവര് രണ്ട് വിക്കറ്റ് വീതം വീഴ്ത്തി.