സ്വര്ണക്കടത്ത്; സുജിത് ദാസിനെതിരേ കസ്റ്റംസ് അന്വേഷണം
Tuesday, September 3, 2024 11:34 AM IST
തിരുവനന്തപുരം: സ്വര്ണക്കടത്ത് സംഘങ്ങളുമായി ബന്ധമുണ്ടെന്ന പി.വി.അന്വര് എംഎല്എയുടെ ആരോപണത്തിന് പിന്നാലെ പത്തനംതിട്ട മുന് എസ്പി എസ്.സുജിത് ദാസിനെതിരേ കസ്റ്റംസ് അന്വേഷണം. കസ്റ്റംസ് പ്രിവന്റീവ് കമ്മീഷണർ പത്മാവതിക്കാണ് അന്വേഷണ ചുമതല.
സുജിത് ദാസ് മലപ്പുറം എസ്പിയായിരുന്ന സമയത്ത് നിരവധി തവണ സ്വര്ണക്കടത്ത് പിടികൂടിയിട്ടുണ്ട്. ഇത്തരത്തില് പിടിച്ചെടുത്ത സ്വര്ണത്തിന്റെ അളവുകളില് മാറ്റമുണ്ടായിട്ടുണ്ടെന്നാണ് പ്രാഥമിക നിഗമനം. ഇത് വിശദമായി പരിശോധിക്കാനാണ് കസ്റ്റംസ് പ്രിവന്റീവ് വിഭാഗം തീരുമാനിച്ചിരിക്കുന്നത്.
സുജിത് ദാസിന്റെ കാലത്ത് പിടികൂടിയ സ്വര്ണക്കടത്ത് കേസുകള് വീണ്ടും അന്വേഷിക്കുമെന്നാണ് വിവരം. വിമാനത്താവളത്തില്നിന്ന് കസ്റ്റംസ് പരിശോധനയില് പിടിക്കപ്പെടാതെ പുറത്തെത്തുന്ന സ്വര്ണം പോലീസിന് എങ്ങനെയാണ് പിടികൂടാന് കഴിയുന്നതെന്ന കാര്യവും പരിശോധിക്കും.