കേരള ഹിന്ദുസ് ഓഫ് ന്യൂജേഴ്‌സി കുടുംബസായാഹ്നം നടത്തി
Thursday, February 13, 2020 7:47 PM IST
ന്യൂജേഴ്‌സി: കേരള ഹിന്ദുസ് ഓഫ് ന്യൂജേഴ്‌സി കുടുംബസായാഹ്നം സംഘടിപ്പിച്ചു. പാട്ടുകളും നൃത്തരൂപങ്ങളുമായി കുട്ടികളും യുവജനങ്ങളും ഒന്നുപോലെ പങ്കെടുത്ത പരിപാടിയിൽ മുതിര്‍ന്നവരുടെ ഒട്ടുംകുറയാതെയുള്ള കലാരൂപങ്ങള്‍ കാണികളില്‍ കൗതുകമുണര്‍ത്തി.

കെഎച്ച്എന്‍ജെ യുടെ നേതൃത്വനിരയിലെത്തിയാല്‍ സംഘടനയ്ക്കും സമൂഹത്തിനും വേണ്ടി എന്തു ചെയ്യും എന്ന ചോദ്യത്തിന് യുവജനങ്ങള്‍ നല്‍കിയ മറുപടികള്‍ ഏറെ ശ്രദ്ധ പിടിച്ചുപറ്റി. കള്‍ച്ചറല്‍ സെക്രട്ടറി റുബീന സുധര്‍മ്മന്‍, വൈസ്പ്രസിഡന്‍റ് രവികുമാര്‍, ട്രസ്റ്റിബോര്‍ഡ് അംഗം മാലിനി നായര്‍ എന്നിവരുടെ ഏകോപനത്തില്‍ നടന്ന പരിപാടികള്‍ക്ക് കാര്‍ത്തിക സംഗ്രാം, വിഷ്ണു നായര്‍ എന്നിവര്‍ അവതാരകരായി.

പ്രസിഡന്‍റ് സഞ്ജീവ്കുമാര്‍, സെക്രട്ടറി ഡോ. ലത നായര്‍, ട്രഷറര്‍ രഞ്ജിത് പിള്ള എന്നിവരുടെ നേതൃത്വത്തില്‍ നടന്ന വാർഷിക പൊതുയോഗം ജയ് കുള്ളമ്പില്‍ ചെയര്‍മാനായി ട്രസ്റ്റിബോര്‍ഡ് അംഗങ്ങളെ തെരഞ്ഞെടുത്തു. പൊങ്കാലയും വിഷുവും പിക്‌നിക്, യൂത്ത് ഡേകളും കര്‍ക്കിടകവാവും ഓണവും സരസ്വതീപൂജയും ജീവകാരുണ്യപ്രവര്‍ത്തനവുമായി വിപുലമായ പരിപാടികളാണ് കെ എച്ച് എന്‍ ജെ ഈ വർഷം വിഭാവനം ചെയ്തിരിക്കുന്നത്.

അതിലേക്ക് മലയാളിസമൂഹത്തിന്‍റെ സഹകരണവും പിന്തുണയും തുടര്‍ന്നും ഉണ്ടായിരിക്കണമെന്ന് പ്രസിഡന്‍റ് സഞ്ജീവ്കുമാര്‍, സെക്രട്ടറി ഡോക്ടര്‍ ലത നായര്‍ എന്നിവര്‍ അഭ്യര്‍ഥിച്ചു. കുടുംബസായാഹ്നത്തിന്‍റെ വിജയത്തിനുവേണ്ടി പ്രവര്‍ത്തിച്ച എല്ലാവര്‍ക്കും ട്രഷറര്‍ രഞ്ജിത് പിള്ള നന്ദി പറഞ്ഞു.

കെഎച്ച്എന്‍ജെ യുടെ വെബ്‌സൈറ്റ് http://KHNJ.US കുടുംബസംഗമത്തിന്‍റെ ഗ്രാന്‍ഡ് സ്‌പോണ്‍സര്‍ കൂടിയായ എംബിഎന്‍ ഫൗണ്ടേഷന്‍ ചെയര്‍മാന്‍ മാധവന്‍ നായര്‍ പ്രകാശനം ചെയ്തു.
Copyright @ 2022 , Rashtra Deepika Ltd.