ADVERTISEMENT

ADVERTISEMENT

കെ. ജയവർമ ബാർ അസോസിയേഷൻ പ്രസിഡന്‍റ്

പത്തനംതിട്ട: ജില്ലാ ബാർ അസോസിയേഷൻ പ്രസിഡന്‍റായി കെ. ജയവർമയെയും സെക്രട്ടറിയായി ഡെന്നി ജോർജിനെയും തെരഞ്ഞെടുത്തു. ഷൈനി ജോർജാണ് ട്രഷറാർ.

ലാലു ജോൺ, തോമസ് ജോർജ് മരുതത്ത്, സി.ബി. രാജൻ, കെ.എ. മനോജ്, ബ്ലസൻ ജോർജ്, യദുകൃഷ്ണൻ, പി.എസ്. ഷജിൽ, യു. ആദർശ്, എ.ഫെഷീഖ്, ആതിര കൃഷ്ണൻ, അഷ്ന സുൽത്താന അഷ്റഫ്, ആര്യ സദാശിവൻ - എക്യൂട്ടീവ് കമ്മിറ്റിയംഗങ്ങൾ എന്നിവരെയും തെരഞ്ഞെടുത്തു.

ADVERTISEMENT

ഡിജിറ്റല്‍ ലൈബ്രറി ഉദ്ഘാടനം ഇന്ന്

റാന്നി: നോളജ് വില്ലേജ് പദ്ധതിയുടെ ഭാഗമായി റാന്നി എംഎസ്‌സി ഹയര്‍ സെക്കന്‍ഡറി സ്‌കൂളിന് എംഎല്‍എ ഫണ്ടില്‍നിന്നു നല്‍കിയ ഡിജിറ്റല്‍ ലൈബ്രറിയുടെ ഉദ്ഘാടനം ഇന്നു രാവിലെ 11ന് പ്രമോദ് നാരായണ്‍ എംഎല്‍എ നിര്‍വഹിക്കും. 12.5 ലക്ഷം രൂപയാണ് ഡിജിറ്റല്‍ ലൈബ്രറിക്കായി ചെലവഴിച്ചത്. പ്രശസ്തരായ എഴുത്തുകാരുടെ 2000ലധികം പുസ്തകങ്ങൾ (വോ ക്ലാസിക്ക്‌സ് ഉള്‍പ്പെടെ) ഉൾപ്പെടുന്നതാണ് ഡിജിറ്റല്‍ കോപ്പി. മെഡിക്കല്‍, എന്‍ജിനിയറിംഗ് എന്‍ട്രന്‍സ് പരിശീലനത്തിനുള്ള അമ്പതിനായിരം ചോദ്യോത്തരങ്ങള്‍ (ഫിസിക്‌സ്, കെമിസ്ട്രി, ബയോളജി, കണക്ക്), പിഎസ്‌സി, ബാങ്ക് ടെസ്റ്റ് എന്നിവയ്ക്കുള്ള ചോദ്യോത്തരങ്ങള്‍ അടങ്ങിയ ബുക്കുകള്‍ എന്നിവയും ഐഎഎസ് പ്രിലിമിനറി പരീക്ഷയ്ക്കുള്ള ചോദ്യബാങ്ക്, ഇംഗ്ലീഷ് ലാംഗ്വേജ് ലാബ്, സ്‌പോക്കണ്‍ ഇംഗ്ലീഷ് പരിശീലനത്തിനുള്ള ഓഡിയോ വീഡിയോകള്‍ തുടങ്ങിയവ ലാബില്‍ സജ്ജീകരിച്ചിട്ടുണ്ട്. ഒരേസമയം ആറു വിദ്യാര്‍ഥികള്‍ക്ക് ഉപയോഗിക്കാവുന്ന വിധത്തിലാണ് ഇവ സജ്ജീകരിച്ചിട്ടുള്ളത്.

വള്ളം മറിഞ്ഞ് യുവാവ് മരിച്ചു

തിരുവല്ല: മീന്‍പിടിച്ച് മടങ്ങുന്നതിനിടെ യുവാവ് വള്ളം മറിഞ്ഞ് മരിച്ചു. വള്ളംകുളം ചെറുശേരി വീട്ടില്‍ രഞ്ജിത്ത് രാജേന്ദ്രൻ (35) ആണ് മരിച്ചത്. ഇന്നലെ രാത്രി 7.30ഓടെയാണ് അപകടം. കാവുങ്കല്‍ ജംഗ്ഷനു സമീപത്തെ ദാനപ്പള്ളി പാടശേഖരത്തില്‍ മീന്‍ പിടിക്കാന്‍ പോയി മടങ്ങവേ ഒഴുക്കില്‍പ്പെട്ട വള്ളം തലകീഴ് മറിയുകയായിരുന്നു. മറിഞ്ഞ വള്ളത്തോടൊപ്പം രഞ്ജിത്തും വെള്ളത്തിലേക്കു വീണു. മീന്‍ പിടിക്കാനായി ഇട്ടിരുന്ന വലയില്‍ കാല്‍ കുടുങ്ങിയ രഞ്ജിത്ത് മുങ്ങിത്താഴുകയായിരുന്നു. ഒപ്പമുണ്ടായിരുന്ന സുഹൃത്ത് നീന്തി രക്ഷപ്പെട്ടു. അപകടത്തില്‍നിന്ന് രക്ഷപ്പെട്ട സുഹൃത്താണ് നാട്ടുകാരെ വിവരം അറിയിക്കുന്നത്. നാട്ടുകാർ രഞ്ജിത്തിനെ തിരുവല്ല പുഷ്പഗിരി മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും മരിച്ചു. മൃതദേഹം മോര്‍ച്ചറിയിലേക്ക് മാറ്റി. പിക്കപ്പ് വാന്‍ ഡ്രൈവര്‍ ആയിരുന്നു മരിച്ച രഞ്ജിത്ത്.

പന്നായി-തേവേരി റോഡ് നിര്‍മാണത്തിന് ഏഴു കോടിയുടെ അനുമതി

തിരുവല്ല: തിരുവല്ല നിയോജകമണ്ഡലത്തിലെ കടപ്ര, നിരണം പഞ്ചായത്തുകളിലൂടെ കടന്നുപോകുന്ന പന്നായി-തേവേരി റോഡിന്‍റെ നിര്‍മാണത്തിന് ഏഴു കോടി രൂപ അനുവദിച്ചതായി മാത്യു ടി. തോമസ് എംഎല്‍എ അറിയിച്ചു. നവകേരള സദസിന്‍റെ ഭാഗമായി ഉയര്‍ന്നുവന്ന നിര്‍ദേശങ്ങള്‍ നടപ്പിലാക്കുന്നതിനായി കഴിഞ്ഞ ബജറ്റില്‍ ആയിരം കോടി രൂപ വകയിരുത്തിയിരുന്നു. ഇതിന്‍റെ ഭാഗമായി പത്തനംതിട്ട ജില്ലയില്‍ എല്ലാ മണ്ഡലത്തിലും ഏഴു കോടി വീതം എന്ന കണക്കില്‍ 35 കോടി രൂപ അനുവദിച്ചിട്ടുണ്ട്. നിയോജകമണ്ഡലങ്ങളിലെ എംഎല്‍എമാരുടെ നിര്‍ദേശം കണക്കിലെടുത്താണ് പദ്ധതികള്‍ തയാറാക്കി അനുമതി നല്‍കിയിട്ടുള്ളത്. ഇത് സംബന്ധിച്ച് പദ്ധതി നിര്‍വഹണ വിലയിരുത്തല്‍ നിരീക്ഷണ വകുപ്പാണ് ഉത്തരവിട്ടിട്ടുള്ളത്. ചെറിയ വെള്ളപ്പൊക്കം പോലും സാരമായി ബാധിക്കുന്ന പന്നായി-തേവേരി റോഡിന്‍റെ പുനര്‍നിര്‍മാണത്തോടെ മഴക്കാലത്തുണ്ടാകുന്ന യാത്രാക്ലേശത്തിന് പരിഹാരമാകും. ചെറിയ മഴയ്ക്കു പോലും വെള്ളം കയറി മുങ്ങിപ്പോകുന്ന റോഡിലെ താഴ്ന്ന പ്രദേശങ്ങള്‍ മണ്ണിട്ടുയര്‍ത്തി മെച്ചപ്പെട്ട രൂപത്തില്‍ ടാറിംഗ് നടത്തണമെന്നാണ് എംഎല്‍എ നവകേരള സദസില്‍ ആവശ്യപ്പെട്ടിരുന്നത്. പൊതുമരാമത്ത് നിരത്ത് വിഭാഗത്തിനാണ് നിര്‍മാണച്ചുമതല.

ട്രാഫിക് സിഗ്നൽ പ്രവർത്തനരഹിതം: ഏഴംകുളത്ത് അപകടം

അടൂര്‍: ഏഴംകുളത്ത് ഗൂഗിള്‍ മാപ്പ് നോക്കി വന്ന കാര്‍ യാത്രികന്‍ അപകടത്തില്‍പ്പെട്ടു. ശനിയാഴ്ച രാത്രി 11ഓടെ ഏഴംകുളം ട്രാഫിക് സിഗ്‌നലിലാണ് അപകടമുണ്ടായത്. കൈപ്പട്ടൂര്‍-ഏഴംകുളം റോഡിലൂടെ കൊല്ലത്തിനു പോകുന്നതിനു വന്ന യാത്രക്കാരനായിരുന്നു കാറിലുണ്ടായിരുന്നത്. വഴി നിശ്ചയമില്ലാത്തതിനാല്‍ ഗൂഗിള്‍ മാപ്പ് നോക്കിയായിരുന്നു സഞ്ചാരം. അടുത്തയിടെ പണി തീര്‍ന്നുകിടന്ന റോഡിലൂടെ വന്ന യാത്രികന് ഏഴംകുളത്ത് നാലു റോഡുകള്‍ സംഗമിക്കുന്ന കവലയുണ്ടെന്ന് മനസിലായില്ല. കൊടുമണ്‍ ഭാഗത്തുനിന്ന് വേഗത്തില്‍ വന്ന് കെപി റോഡിലേക്ക് കയറിയ വാഹനത്തില്‍ പത്തനാപുരം റൂട്ടിലൂടെ വന്ന തമിഴ്നാട് രജിസ്ട്രേഷന്‍ ലോറി ഇടിക്കുകയായിരുന്നു. ഉപറോഡില്‍നിന്നു വന്നുകയറിയ വാഹനം കണ്ട് ലോറി ഡ്രൈവര്‍ പെട്ടെന്ന് ബ്രേക്കിട്ടെങ്കിലും കാറില്‍ ഇടിച്ചാണ് നിന്നത്. ഇടിയുടെ ആഘാതത്തില്‍ കാറിന്‍റെ മുന്‍ഭാഗം തകർന്നു. കൈപ്പട്ടൂര്‍-ഏഴംകുളം റോഡില്‍നിന്ന് കെപി റോഡിലേക്ക് പ്രവേശിക്കുന്ന ഭാഗത്ത് സിഗ്‌നല്‍ പ്രവര്‍ത്തനരഹിതമായിരുന്നു. ഇവിടെ നേരത്തേ വേഗനിയന്ത്രണത്തിന് ഹമ്പ് ഉണ്ടായിരുന്നു. റോഡ് നവീകരിച്ചതോടെ ഹമ്പ് ഇല്ലാതായി. സിഗ്‌നല്‍ ബോര്‍ഡുകളും സ്ഥാപിച്ചു വരുന്നതേയുള്ളൂ.

അബാന്‍ മേല്‍പ്പാലം: നിര്‍മാണ പുരോഗതി വിലയിരുത്തി മന്ത്രി വീണാ ജോര്‍ജ്

പത്തനംതിട്ട: അബാന്‍ മേല്‍പ്പാല നിര്‍മാണ പുരോഗതി മന്ത്രി വീണാ ജോര്‍ജ് വിലയിരുത്തി. മേല്‍പ്പാലത്തിന്‍റെ പത്ത് സ്പാനുകളുടെ നിര്‍മാണം പൂര്‍ത്തിയായി. മറ്റു നിര്‍മാണങ്ങള്‍ ഉടന്‍ തുടങ്ങും. സര്‍വീസ് റോഡ് നിര്‍മാണം ആരംഭിച്ചു. ജല അഥോറിറ്റിയുടെയും കെഎസ്ഇബിയുടെയും യൂട്ടിലിറ്റി ഷിഫ്റ്റിംഗ് പ്രവൃത്തി പൂര്‍ത്തികരിച്ചു. കോഴഞ്ചേരി പുതിയ പാലത്തിന്‍റെ അവസാന സ്പാനിന്‍റെ നിര്‍മാണം തുടങ്ങി. മഞ്ഞനിക്കര-ഇലവുംതിട്ട-മുളക്കുഴ റോഡിലെ ഓമല്ലൂര്‍ ഭാഗത്തെ കലുങ്ക് നിര്‍മാണം പുരോഗമിക്കുന്നു. വയറപ്പുഴ പാലത്തിന്‍റെ പൈലിംഗ് പൂര്‍ത്തിയായി. കരയിലെ സ്ലാബ് ഷട്ടറിംഗ് ഡിസംബറില്‍ തീര്‍ക്കണമെന്ന് മന്ത്രി നിര്‍ദേശിച്ചു. അമ്പലക്കടവ്-മണ്ണാക്കടവ് എസ്‌സി നഗറിലേക്കുള്ള റോഡ് നിര്‍മാണം അവസാന ഘട്ടത്തിലാണ്. പത്തനംതിട്ട ജനറല്‍ ആശുപത്രി പുതിയ കെട്ടിടം വൈകാതെ പൂര്‍ത്തിയാകും. ദുരിതാശ്വാസ ക്യാമ്പുകളില്‍ സൗകര്യങ്ങള്‍ ഉറപ്പാക്കണം. സ്‌കൂള്‍, അങ്കണവാടികള്‍ക്ക് ഫിറ്റ്നസ് സര്‍ട്ടിഫിക്കറ്റ് ഉറപ്പാക്കണമെന്നും മന്ത്രി നിര്‍ദേശിച്ചു. പുറമറ്റം ആയുര്‍വേദ ആശുപത്രി കെട്ടിട നിര്‍മാണം അവസാനഘട്ടത്തിലാണെന്ന് മാത്യു ടി. തോമസ് എംഎല്‍എ പറഞ്ഞു. വഞ്ചിപ്പോട്ടില്‍ കടവ് പാലം, പുനര്‍നിര്‍മാണം നടക്കുന്ന തിരുവാറ്റ പാലം തുടങ്ങിയവയുടെ പുരോഗതി എംഎല്‍എ വിലയിരുത്തി. നവകേരള സദസ് നിര്‍ദേശങ്ങള്‍ അടിയന്തരമായി നടപ്പാക്കണമെന്ന് പ്രമോദ് നാരായണ്‍ എംഎല്‍ എ പറഞ്ഞു. ജില്ലയില്‍ മഴ തുടരുന്ന സാഹചര്യത്തില്‍ പഞ്ചായത്തുതല എമര്‍ജന്‍സി റെസ്പോണ്‍സ് ടീം പ്രവര്‍ത്തനം കൂടുതല്‍ ശക്തമാക്കണമെന്നും എംഎല്‍എ കൂട്ടിച്ചേര്‍ത്തു. സ്‌കൂള്‍ തുറക്കുന്ന സാഹചര്യത്തില്‍ തെരുവുനായ നിയന്ത്രണ നടപടി ഊര്‍ജിതമാക്കണമെന്ന് ആന്‍റോ ആന്‍റണി എംപിയുടെ പ്രതിനിധി തോപ്പില്‍ ഗോപകുമാര്‍ നിര്‍ദേശിച്ചു. ജില്ലാ കളക്ടര്‍ എസ്. പ്രേംകൃഷ്ണന്‍റെ അധ്യക്ഷതയില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, ജില്ലാ പ്ലാനിംഗ് ഓഫീസര്‍ എ.എസ്. മായ, വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

പെരുന്തേനരുവി ടൂറിസം വികസനത്തിന് ഏഴുകോടി

റാന്നി: പെരുന്തേനരുവി ടൂറിസം പദ്ധതിയുടെ വികസനത്തിനായി ഏഴു കോടി രൂപ അനുവദിച്ചതായി പ്രമോദ് നാരായണ്‍ എംഎല്‍എ അറിയിച്ചു. നവകേരള സദസില്‍ എംഎല്‍എ മുഖ്യമന്ത്രിക്ക് സമര്‍പ്പിച്ച വികസന പദ്ധതികളുടെ പട്ടികയില്‍ നിന്നാണ് പെരുന്തേനരുവി ടൂറിസം പദ്ധതി തെരഞ്ഞെടുത്തത്. പമ്പാനദിയിലെ പെരുന്തേനരുവി വെള്ളച്ചാട്ടം കേന്ദ്രീകരിച്ചുള്ള ബൃഹത്തായ ടൂറിസം പദ്ധതിയാണ് ആസൂത്രണം ചെയ്തിരിക്കുന്നത്. വെച്ചൂച്ചിറ, നാറാണംമൂഴി പഞ്ചായത്തുകള്‍ അതിര്‍ത്തി പങ്കിടുന്ന പമ്പാനദിയിലെ പെരുന്തേനരുവി വെള്ളച്ചാട്ടം കേന്ദ്രീകരിച്ചുള്ള പദ്ധതി ഇരു പഞ്ചായത്തുകളുടെയും സമഗ വികസനത്തിന് വഴിതെളിക്കും. പ്രതിദിനം നൂറുകണക്കിന് സഞ്ചാരികളാണ് ഇവിടെയെത്തി പ്രകൃതിയുടെ വന്യസൗന്ദര്യം ആസ്വദിച്ചു പോകുന്നത്. മുന്‍ സര്‍ക്കാരുകളുടെ കാലത്ത് ഇവിടെ വാഹനങ്ങള്‍ക്കുള്ള പാര്‍ക്കിംഗ് ഗ്രൗണ്ട്, കുട്ടികളുടെ കളിസ്ഥലം, അരുവിലേക്ക് ഇറങ്ങാനുള്ള പടിക്കെട്ടുകള്‍, കൈവരികള്‍, രണ്ടു കെട്ടിടങ്ങള്‍, വെള്ളച്ചാട്ടം ദൂരെനിന്ന് വീക്ഷിക്കാനുള്ള സംവിധാനങ്ങള്‍ എന്നിവയെല്ലാം ഒരുക്കിയിട്ടുണ്ട്. അരുവിയിലേക്ക് വളഞ്ഞ് വാഹനം ഇറങ്ങുന്ന റോഡിലെ കൊടും വളവും കുത്തിറക്കവും വീതികൂട്ടി സൗകര്യപ്രദമാക്കിയിട്ടുണ്ട്. അമിനിറ്റി സെന്‍ററും ഭക്ഷണശാലയും താമസിക്കാനുള്ള മുറികളും നിലവിലുണ്ട്. ടൂറിസം പദ്ധതിയുടെ സമഗ്ര വികസനമാണ് പുതുതായി ലക്ഷ്യമിടുന്നത്. വെള്ളച്ചാട്ടം തൊട്ടുമുകളില്‍ നിന്നു കാണത്തക്ക വിധമുള്ള കണ്ണാടി നടപ്പാലം, സുരക്ഷാ സംവിധാനങ്ങള്‍, പൂന്തോട്ടം, പ്രകൃതിയുടെയും നദിയുടെയും സൗന്ദര്യം ആസ്വദിച്ചുകൊണ്ട് നദീതീരത്തുകൂടിയുള്ള നടപ്പാത എന്നിവയെല്ലാം പദ്ധതിയില്‍ വിഭാവനം ചെയ്തിട്ടുണ്ട്. ഒരു വര്‍ഷം കൊണ്ട് നിര്‍മാണം പൂര്‍ത്തിയാക്കാനാണ് ഉദ്ദേശിക്കുന്നത്. ടൂറിസം വകുപ്പിനാണ് നിര്‍മാണച്ചുമതല. പഞ്ചായത്തും ഇറിഗേഷന്‍ വകുപ്പും സ്ഥലം ലഭ്യമാക്കുന്നതോടെ നിര്‍മാണം ആരംഭിക്കാനാകുമെന്ന് എംഎല്‍എ പറഞ്ഞു.

ലഹരിക്കെതിരേയുള്ള പോരാട്ടം ഉത്തരവാദിത്വമായി കാണണം: കാതോലിക്കാ ബാവ

പന്തളം: ലഹരിക്കെതിരേയുള്ള പോരാട്ടം ഓരോരുത്തരുടെയും ഉത്തരവാദിത്വമായി കണ്ട് ഇടവകാംഗങ്ങളും സന്നദ്ധ സംഘടനകളും മുന്നിട്ടിറങ്ങണമെന്ന് ബസേലിയോസ് മാര്‍ത്തോമ്മ മാത്യൂസ് തൃതീയന്‍ കാതോലിക്കാ ബാവ. ആറ്റുവ സെന്‍റ് ബര്‍സൗമ ഓര്‍ത്തഡോക്സ് പള്ളിയുടെ നവീകരിച്ച ദേവാലയത്തിന്‍റെ കൂദാശയോടനുബന്ധിച്ചു നടന്ന പൊതുസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഓരോ ദേവാലയങ്ങള്‍ കേന്ദ്രീകരിച്ചും സന്നദ്ധ സംഘങ്ങള്‍ രൂപീകരിക്കണം. ലഹരിക്കടിമപ്പെട്ടുപോയവരുടെ മാനസിക രൂപാന്തരത്തിനാണ് ശ്രമിക്കേണ്ടത്. പ്രയാസമനുഭവിക്കുന്നവര്‍ക്ക് സഹായഹസ്തം നീട്ടിക്കൊടുക്കാന്‍ നമുക്ക് കഴിയണമെന്നും കാതോലിക്കാ ബാവ പറഞ്ഞു. ഡോ. മാത്യൂസ് മാര്‍ തിമോത്തിയോസ് മെത്രാപ്പോലീത്ത അധ്യക്ഷത വഹിച്ചു. ഗീവര്‍ഗീസ് മാര്‍ പീലക്‌സിനോസ് മെത്രാപ്പോലീത്ത അനുഗ്രഹ പ്രഭാഷണം നടത്തി. കൊടിക്കുന്നില്‍ സുരേഷ് എംപി, എം.എസ്. അരുണ്‍ കുമാര്‍ എംഎല്‍എ, ഫാ. തോമസ് വര്‍ഗീസ് അമയില്‍, ഫാ. പി.കെ. കോശി, ഫാ. നൈനാന്‍ വി. ജോര്‍ജ്, ഇടവക വികാരി ഫാ. ജോണ്‍ പി. ഉമ്മന്‍, ട്രസ്റ്റി സൈമണ്‍ പി. ജോണ്‍, എ. കോശി ജോണ്‍, സി.കെ. റെജി എന്നിവര്‍ പ്രസംഗിച്ചു.

കെ.വി. തമ്പി പുരസ്‌കാരം കൃപ അമ്പാടിക്ക്

പത്തനംതിട്ട: കവിയും വിവര്‍ത്തകനും അധ്യാപകനും പത്രപ്രവര്‍ത്തകനുമായിരുന്ന പ്രഫ. കെ.വി. തമ്പിയുടെ സ്മരണാര്‍ഥം ഏര്‍പ്പെടുത്തിയിട്ടുള്ള കെ.വി. തമ്പി പുരസ്‌കാരത്തിന് എഴുത്തുകാരി കൃപ അമ്പാടിയെ തെരഞ്ഞെടുത്തു. റവ. ഡോ. മാത്യു ദാനിയല്‍, മധു ഇറവങ്കര, ബാബു ജോണ്‍, ജോര്‍ജ് ജേക്കബ് എന്നിവരടങ്ങിയ സമിതിയാണ് പുരസ്‌കാര ജേതാവിനെ തെരഞ്ഞെടുത്തത്. കവി, കഥാകൃത്ത്, ബാലസാഹിത്യകാരി എന്നീ നിലകളില്‍ ശ്രദ്ധേയയാണ്. എട്ടിന് ഉച്ചകഴിഞ്ഞ് മൂന്നിന് പത്തനംതിട്ട പ്രസ് ക്ലബില്‍ ചേരുന്ന യോഗത്തില്‍ ശാന്ത കടമ്മനിട്ട പുരസ്‌കാരം സമ്മാനിക്കും.

നാട്ടുമരങ്ങള്‍ക്കൊരിടമൊരുക്കി പരിസ്ഥിതി ദിനാചരണം

കല്ലൂപ്പാറ: കല്ലൂപ്പാറ അഗ്രികള്‍ച്ചര്‍ പ്രൊഡ്യൂസേഴ്‌സ് ആന്‍ഡ് പ്രമോട്ടേഴ്‌സ് അസോസിയേഷനും (കപ്പ) കല്ലൂപ്പാറ എന്‍ജിനിയറിംഗ് കോളജ് ഭൂമിത്രസേനയും ചേര്‍ന്ന് അഞ്ചിന് ലോക പരിസ്ഥിതിദിനം ആചരിക്കും. എന്‍ജിനിയറിംഗ് കോളജ് അങ്കണത്തില്‍ നാടന്‍മരങ്ങളുടെ തൈകള്‍ നട്ടാകും ദിനാചരണം. നാട്ടുമരങ്ങള്‍ക്കൊരിടം എന്ന പേര് നല്‍കിയിരിക്കുന്ന പരിപാടിയില്‍ നാട്ടിന്‍പുറങ്ങളില്‍ വിവിധ പേരുകളില്‍ അറിയപ്പെട്ടിരുന്ന നാടന്‍ പ്ലാവുകളുടെയും മാവുകളുടെയും തൈകളാണ് പ്രധാനമായും നടുക. ഇവയ്‌ക്കൊപ്പം മറ്റു നാട്ടുമരങ്ങളുടെ തൈകളും ഉണ്ടാകും. രാവിലെ 10.30ന് കോളജ് പ്രിന്‍സിപ്പല്‍ ഡോ. ദീപ ജയന്‍ പരിപാടി ഉദ്ഘാടനം ചെയ്യും. "കപ്പ' പ്രസിഡന്‍റ് സി.കെ. മത്തായി നേതൃത്വം നല്‍കും. പെട്ടെന്ന് കായ്ഫലം നല്‍കുന്ന ഒട്ടുമാവുകളുടെയും വിദേശയിനം പ്ലാവുകളുടെയും വരവോടെ വംശനാശ ഭീഷണി നേരിട്ടുകൊണ്ടിരിക്കുന്ന പ്ലാവിനങ്ങളും മാവിനങ്ങളും സംരക്ഷിക്കുകയാണ് പരിപാടിയിലൂടെ ലക്ഷ്യമിടുന്നതെന്ന് ജനറല്‍ സെക്രട്ടറി ലെജു ഏബ്രഹാവും ഭൂമിത്ര സേന കോ-ഓർ‌ഡിനേറ്റര്‍ വി.എസ്. ദീപുവും അറിയിച്ചു. കാലാവസ്ഥാ വ്യതിയാനത്തെ അതിജീവിക്കാന്‍ പുതിയ ഇനങ്ങളുടെ ശേഷിയില്‍ ആശങ്ക ഉയരുമ്പോള്‍ നാടന്‍ ഇനങ്ങളുടെ സംരക്ഷണം ഉറപ്പാക്കുകയാണു ലക്ഷ്യം. വാകത്താനം വരിക്ക, തെള്ളിയൂര്‍ വരിക്ക, ചെമ്പരത്തി വരിക്ക, തേന്‍ വരിക്ക, ഇരുവള്ളിപ്ര വരിക്ക, ഉണ്ട ചക്ക, താമര ചക്ക തുടങ്ങിയ പ്ലാവിനങ്ങള്‍, മൂവാണ്ടന്‍, കിളിച്ചുണ്ടന്‍, കപ്പമാവ്, വിവിധ ഇനം നാട്ടുമാവുകള്‍ എന്നിവയുടെ തൈകളും വിത്തുകളുമാണ് പ്രധാനമായും നടുക. ഇതിനൊപ്പം അപൂര്‍വ നാട്ടുമരങ്ങളുടെ തൈകളും നടും. സംസ്ഥാനത്തിന്‍റെ വിവിധ ഭാഗങ്ങളില്‍ ഇത്തരം മരങ്ങള്‍ സംരക്ഷിക്കുന്നവരില്‍നിന്നാണ് വിത്തുകളും തൈകളും ശേഖരിച്ചത്. അവശേഷിക്കുന്ന തൈകള്‍ പൊതുസ്ഥലങ്ങളില്‍ നടും.

ഡോക്ടര്‍മാരുടെ എതിര്‍പ്പ് തുടരുന്നു; നിലപാടില്‍ മാറ്റമില്ലാതെ ആരോഗ്യവകുപ്പ്

ജനറൽ ആശുപത്രിയിലെ ശസ്ത്രക്രിയ വിഭാഗങ്ങള്‍ മെഡിക്കല്‍ കോളജിലേക്ക് പത്തനംതിട്ട: ജനറല്‍ ആശുപത്രിയിലെ ശസ്ത്രക്രിയ വിഭാഗങ്ങള്‍ കോന്നി മെഡിക്കല്‍ കോളജിലേക്ക് മാറ്റാനുള്ള തീരുമാനത്തിലുറച്ച് ആരോഗ്യവകുപ്പ്. ഇതുമായി ബന്ധപ്പെട്ട് ജനറല്‍ ആശുപത്രിയിലും കോന്നി മെഡിക്കല്‍ കോളജിലും സന്ദര്‍ശനം നടത്തിയ ആരോഗ്യവകുപ്പ് ഡയറക്ടറും സെക്രട്ടറിയും അടക്കമുള്ള ഉദ്യോഗസ്ഥര്‍ രണ്ടിടങ്ങളിലെയും ഡോക്ടര്‍മാരുമായി ചര്‍ച്ച നടത്തിയെങ്കിലും നിര്‍ദേശങ്ങള്‍ അംഗീകരിച്ചില്ല. ജനറല്‍ ആശുപത്രിയിലെ ശസ്ത്രക്രിയ വിഭാഗങ്ങള്‍ മെഡിക്കല്‍ കോളജിലേക്ക് കൊണ്ടുവരുന്നതില്‍ അവിടെയുള്ള ഡോക്ടര്‍മാരും പ്രതിഷേധത്തിലാണ്. മെഡിക്കല്‍ വിദ്യാഭ്യാസവകുപ്പിനു കീഴിലുള്ള മെഡിക്കല്‍ കോളജിലേക്ക് ആരോഗ്യവകുപ്പിന്‍റെ നിയന്ത്രണത്തിലുള്ള ജനറല്‍ ആശുപത്രിയിലെ ചികിത്സാ സംവിധാനങ്ങള്‍ കൊണ്ടുവരുന്നതിലെ സാങ്കേതിക പ്രശ്‌നങ്ങളാണ് ഡോക്ടര്‍മാര്‍ ഉന്നയിക്കുന്ന പ്രധാന തടസവാദം. മെഡിക്കല്‍ വിദ്യാഭ്യാസവകുപ്പും ആരോഗ്യവകുപ്പും തമ്മില്‍ നിലവിലുള്ള തൊഴില്‍-സേവന വ്യവസ്ഥകളടക്കം പരിഗണിച്ചു മാത്രമേ തീരുമാനമെടുക്കാനാകൂവെന്ന് ഡോക്ടര്‍മാര്‍ പറയുന്നു. എന്നാല്‍, സര്‍ക്കാര്‍ പ്രത്യേക ഉത്തരവിലൂടെ തീരുമാനം നടപ്പാക്കാനാണ് ഉദ്ദേശിക്കുന്നത്. ജനറല്‍ ആശുപത്രിയുടെ ബി ആന്‍ഡ് സി ബ്ലോക്ക് പുനരുദ്ധാരണ പ്രവര്‍ത്തനങ്ങളുടെ ഭാഗമായി പ്രധാന ശസ്ത്രക്രിയ വിഭാഗങ്ങളായ ഒബ്സ്റ്റട്രിക്‌സ് ആന്‍ഡ് ഗൈനക്കോളജി, അസ്ഥിരോഗവിഭാഗം, ജനറല്‍ സര്‍ജറി, ഇഎന്‍ടി എന്നീ ഏറ്റവും പ്രധാനപ്പെട്ട വകുപ്പുകളെയാണ് കോന്നി മെഡിക്കല്‍ കോളജിലേക്കു മാറ്റുന്നത്. മെഡിക്കല്‍ കോളജിന്‍റെ അംഗീകാരത്തിന് ആശുപത്രി വേണം നാലാം വര്‍ഷത്തിലേക്കു പ്രവേശിക്കുന്ന കോന്നി മെഡിക്കല്‍ കോളജിന് ഇതേവരെ സ്വന്തമായി 300 കിടക്കളെങ്കിലുമുള്ള ആശുപത്രി സജ്ജീകരിക്കാനാകാത്ത സാഹചര്യത്തില്‍ പത്തനംതിട്ട ജനറല്‍ ആശുപത്രി നിലനിര്‍ത്തേണ്ടത് അനിവാര്യമാണ്. ആശുപത്രി ബില്‍ഡിംഗ് അറ്റകുറ്റപ്പണിയുടെ പേരില്‍ അടച്ചിടുമ്പോള്‍ അവിടെയുള്ള സംവിധാനങ്ങള്‍ പുനഃക്രമീകരിച്ച് രോഗികളെ നിലനിര്‍ത്തേണ്ടത് മെഡിക്കല്‍ കോളജിന്‍റെ അംഗീകാരം തുടരാന്‍ ആവശ്യമാണ്. കിടത്തിചികിത്സയും രോഗികളുടെ തിരക്കും മെഡിക്കല്‍ കമ്മീഷന്‍ പരിശോധനയില്‍ കാട്ടേണ്ടതുണ്ട്. താലൂക്ക് ആശുപത്രികളിലേക്ക് ശസ്ത്രക്രിയ വിഭാഗങ്ങള്‍ പുനഃക്രമീകരിച്ചാല്‍ രോഗകളെ കേന്ദ്രീകൃതമായി നിലനിര്‍ത്താനാകില്ല. പത്തനംതിട്ട നഗരത്തില്‍ തന്നെ അടഞ്ഞുകിടക്കുന്ന സ്വകാര്യ ആശുപത്രി വാടകയ്‌ക്കെടുത്ത് ജനറല്‍ ആശുപത്രി സംവിധാനങ്ങള്‍ മാറ്റുന്ന ആലോചന പരിഗണനയില്‍ വന്നുവെങ്കിലും ഇതിനോടും യോജിപ്പുണ്ടായില്ല.

പ്രളയക്കെടുതിയില്‍ അപ്പര്‍ കുട്ടനാട്

തിരുവല്ല: പത്തനംതിട്ട ജില്ലയുടെ പടിഞ്ഞാറന്‍ മേഖലയില്‍ പ്രളയക്കെടുതികള്‍ ഒഴിയുന്നില്ല. ഇന്നലെ മഴയ്ക്കു നേരിയ ശമനമുണ്ടായെങ്കിലും പടിഞ്ഞാറന്‍ മേഖലയിലെ വെള്ളക്കെട്ടുകള്‍ തുടരുകയാണ്. ഇതോടെ ദുരിതാശ്വാസ ക്യാമ്പുകളുടെ എണ്ണവും കൂടി. അപ്പര്‍ കുട്ടനാട്ടിലെ കൂടുതല്‍ പ്രദേശങ്ങളില്‍ വെള്ളംകയറിയതിനാല്‍ ദുരിതാശ്വാസ ക്യാമ്പുകളുടെ എണ്ണം 43ആയി. 412 കുടുംബങ്ങളിലായി 539 പുരുഷന്മാരും 565 സ്ത്രീകളും 275 കുട്ടിയും ഉള്‍പ്പെടെ 1379 പേരാണ് നിലവില്‍ ക്യാമ്പിലുള്ളത്. ജില്ലയില്‍ തിരുവല്ല താലൂക്കിലാണ് ഏറ്റവുമധികം ക്യാമ്പുകള്‍ പ്രവര്‍ത്തിക്കുന്നത്. 34 ക്യാമ്പുകളിലായി 501 പുരുഷന്മാരും 522 സ്ത്രീകളും 251 കുട്ടികളുമായി 377 കുടുംബങ്ങള്‍ ഇവിടെ കഴിയുന്നു. തിരുവല്ല താലൂക്കില്‍ തോട്ടപ്പുഴശേരി എംടിഎല്‍പി സ്‌കൂള്‍, തിരുമൂലപുരം സെന്‍റ് തോമസ് സ്‌കൂള്‍, കുറ്റൂര്‍ സര്‍ക്കാര്‍ ഹൈസ്‌കൂള്‍, നിരണം സെന്‍റ് ജോര്‍ജ് യുപിഎസ്, കുമ്പനാട് ഗേള്‍സ് സ്‌കൂള്‍, ഇരവിപേരൂര്‍ നന്നൂര്‍ കമ്യൂണിറ്റി ഹാള്‍, തോട്ടപ്പുഴശേരി ചെറുപുഷ്പം എല്‍പി സ്‌കൂള്‍, കാവുംഭാഗം വേങ്ങല്‍ ദേവമാതാ ഓഡിറ്റോറിയം, നിരണം മുകളടി സര്‍ക്കാര്‍ യുപിഎസ്, കാവുംഭാഗം ഇടിഞ്ഞില്ലം എല്‍പിഎസ്, കവിയൂര്‍ പടിഞ്ഞാറ്റുംശേരി സര്‍ക്കാര്‍ എല്‍പിഎസ്, ഇരവിപേരൂര്‍ വാടിക്കുളം എന്‍എസ്എസ് സ്‌കൂള്‍, കടപ്ര സെന്‍റ് ഫ്രാന്‍സിസ് സ്‌കൂള്‍, കടപ്ര സര്‍ക്കാര്‍ യുപി സ്‌കൂള്‍, കവിയൂര്‍ തോട്ടഭാഗം സര്‍ക്കാര്‍ എല്‍പി സ്‌കൂള്‍, തിരുവല്ല സിഎംഎസ് എച്ച്എസ്എസ്, കാവുംഭാഗം ഡിബിഎച്ച്എസ്, തിരുവല്ല ഡയറ്റ്, കുറ്റപ്പുഴ തിരുമൂലവിലാസം യുപി സ്‌കൂള്‍, ഇരവിപേരൂര്‍ മുരിങ്ങശേരി എല്‍പിഎസ്, മുത്തൂര്‍ സര്‍ക്കാര്‍ എല്‍പിഎസ്, തോട്ടപ്പുഴശേരി എഎംഎംടിടിഐ, ഇരവിപേരൂര്‍ ദേവിവിലാസം എന്‍എസ്എസ് സ്‌കൂള്‍, കാവുംഭാഗം ആലംതുരുത്തി സര്‍ക്കാര്‍ എല്‍പി എസ്, മുത്തൂര്‍ എസ്എന്‍ഡിപി ഓഡിറ്റോറിയം, കുറ്റൂര്‍ ബാലികമഠം, പെരിങ്ങര പിഎംവി എല്‍പിഎസ്, നിരണം സെന്‍റ് മേരീസ് എച്ച്എസ്, കടപ്ര സര്‍ക്കാര്‍ യുപി സ്‌കൂള്‍, കൊമ്പങ്കേരി എംടിഎല്‍പിഎസ്, പെരിങ്ങര സര്‍ക്കാര്‍ എല്‍പിഎസ്, വേങ്ങല്‍ എംടിഎല്‍പിഎസ്, കണ്ണശ സ്മാരകം എല്‍പിഎസ്, നുകത്തല സാംസ്‌കാരിക നിലയം എന്നിവിടങ്ങളിലാണ് ക്യാമ്പ് പ്രവര്‍ത്തിക്കുന്നത്. കോഴഞ്ചേരി താലൂക്കില്‍ ആറും മല്ലപ്പള്ളി, കോന്നി, അടൂര്‍ താലൂക്കുകളില്‍ ഓരോ ക്യാമ്പുമാണുള്ളത്. കോഴഞ്ചേരി താലൂക്കില്‍ ആറന്മുള കോഴിപ്പാലം എന്‍എംയുപി സ‌കൂള്‍, ആറാട്ടുപുഴ സര്‍ക്കാര്‍ യുപിഎസ്, നാല്‍കാലിക്കല്‍ എംടിഎല്‍പിഎസ്, വല്ലന എസ്എന്‍ഡിപി യുപിഎസ്, മല്ലപ്പുഴശേരി കുറുന്തര്‍ സാംസ്‌കാരിക നിലയം, ഓന്തേക്കാട് എംടിഎല്‍പിഎസ് ക്യാമ്പുകളിലായി 32 കുടുംബങ്ങളിലെ 95 പേരാണുള്ളത്. മല്ലപ്പള്ളി താലൂക്കില്‍ ആനിക്കാട് പിആര്‍ഡിഎസ് സ്‌കൂളില്‍ ഒരു കുടുംബങ്ങളിലെ നാലു പേരും കോന്നി താലൂക്കില്‍ തണ്ണിത്തോട് പകല്‍വീട് ഒരു കുടുംബത്തിലെ നാലു പേരും അടൂര്‍ താലൂക്കില്‍ പന്തളം മുടിയൂര്‍ക്കോണം എംടിഎല്‍പി സ്‌കൂളില്‍ ഒരു കുടുംബത്തിലെ രണ്ടു പേരുമാണുള്ളത്.

ദുരിതാശ്വാസ ക്യാമ്പുകളായ സ്‌കൂളുകള്‍ക്ക് അവധി : പടിഞ്ഞാറന്‍ മേഖലയിലെ സ്‌കൂളുകളും തുറക്കില്ല

പത്തനംതിട്ട: ജില്ലയില്‍ ദുരിതാശ്വാസ ക്യാമ്പുകളായി പ്രവര്‍ത്തിക്കുന്ന 31 സ്‌കൂളുകള്‍ക്ക് ജില്ലാ കളക്ടര്‍ ഇന്ന് അവധി പ്രഖ്യാപിച്ചു. മധ്യവേനല്‍ അവധിക്കുശേഷമുള്ള പ്രവേശനോത്സവം ഈ സ്കൂളുകളില്‍ ഇന്നുണ്ടാകില്ല. ദുരിതാശ്വാസ ക്യാമ്പുകള്‍ പ്രവര്‍ത്തിക്കുകയാണെങ്കിലും തിരുമൂലപുരം ബാലികാമഠം എച്ച്എസ്എസ്, സെന്‍റ് തോമസ് എച്ച്എസ് എസ്, കോയിപ്രം ഗവ. എച്ച്എസ്എസ് എന്നിവിടങ്ങളില്‍ പ്രവേശനോത്സവത്തിന് അനുമതി നൽകിയിട്ടുണ്ട്. സുരക്ഷയെ മുന്‍നിര്‍ത്തി തിരുവല്ല താലൂക്കിലെ 13 സ്‌കൂളുകള്‍ക്കും അവധിയാണ്. പ്രളയക്കെടുതി നേരിടുന്ന അപ്പര്‍ കുട്ടനാട് പ്രദേശങ്ങളിലെ സ്‌കൂളുകള്‍ക്കാണ് അവധി നല്‍കിയിരിക്കുന്നത്.

മഴ മാറി; സ്‌കൂള്‍ വിപണി ഉണര്‍ന്നു

അടൂര്‍: കഴിഞ്ഞ ദിവസങ്ങളില്‍ തുടര്‍ച്ചയായി പെയ്ത മഴയില്‍ ആലസ്യത്തിലായിരുന്ന സ്‌കൂള്‍ വിപണി ഇന്നലെ ഉണര്‍ന്നു. ഞായറാഴ്ചയായിരുന്നിട്ടും വിപണികള്‍ ഇന്നലെ സജീവമായിരുന്നു. സ്‌കൂള്‍ തുറക്കലിനോടനുബന്ധിച്ച് ബാഗുകള്‍, കുട, ചെരിപ്പ്, നോട്ട്ബുക്കുകള്‍, മഴക്കോട്ട് തുടങ്ങിയവ വാങ്ങാനുള്ള തിരക്ക് ഇന്നലെ എല്ലായിടത്തുമുണ്ടായി. സ്‌കൂള്‍ തുറക്കല്‍ മുന്നില്‍ക്കണ്ട് പ്രത്യേക വിപണികള്‍ ഒരുക്കിയിരുന്നവര്‍ക്കും ഇന്നലെയാണ് വില്പന ലഭിച്ചത്. പലരും ഡിസ്‌കൗണ്ട് നിരക്കിലാണ് സാധനങ്ങള്‍ വിറ്റഴിച്ചത്. വസ്ത്രശാലകളിലും തിരക്കുണ്ടായി. റെഡിമെയ്ഡ് യൂണിഫോമുകള്‍ വാങ്ങാനുള്ളവരുടെ തിരക്കും ഉണ്ടായി.

വര്‍ണചിത്രങ്ങളെഴുതി സ്‌കൂളുകള്‍; ന്യൂ ജെന്‍ കുറുക്കന് മുന്തിരി പുളിക്കില്ല

റാന്നി: പഴവങ്ങാടി ഗവ. യുപി സ്‌കൂളില്‍ ക്ലാസിക് ബാലകഥകളുടെ സര്‍ഗതുടര്‍ച്ച വിവരിക്കുന്ന ചുവര്‍ചിത്രങ്ങളാണ് പ്രധാന ആകര്‍ഷണം. തനിക്കു കിട്ടാത്ത മുന്തിരി പുളിക്കും എന്നു പറഞ്ഞ കുറുക്കന്‍ ന്യൂജെന്‍ കാലഘട്ടത്തില്‍ പഴങ്കഥയായി. കുറുക്കന്‍ കൂട്ടുകാരെ കൂട്ടിവന്ന് മുന്തിരി പറിക്കുന്ന ദൃശ്യമാണ് ഒന്നാം ക്ലാസിന്‍റെ പുറംഭിത്തിയില്‍ വരച്ചു ചേര്‍ത്തിരിക്കുന്നത്. മണ്ണാങ്കട്ട അലിഞ്ഞുപോയി കരിയില പറന്നുപോയി എന്ന ദുഃഖപര്യവസായിയായ കഥ പഠിച്ചവര്‍ തങ്ങളുടെ മക്കളെ പഴവങ്ങാടി സ്‌കൂളില്‍ ചേര്‍ക്കാന്‍ വരുമ്പോള്‍ അറിയുന്നത് സന്തോഷത്തോടെ കാശിയിലെത്തിയ മണ്ണാങ്കട്ടയുടെയും കരിയിലയുടെയും കഥയാണ്. ചുവരുകളില്‍ ഇത്തരം ചിത്രങ്ങള്‍ വരയ്ക്കണം എന്നത് റാന്നി ബിപിസി ഷാജി എ. സലാമിന്‍റെ നിര്‍ദേശമായിരുന്നു. പ്രഥമാധ്യാപകന്‍ ജോമോന്‍ പി. ജോണിന്‍റെ നേതൃത്വത്തിലാണ് മുന്നൊരുക്കങ്ങള്‍ നടന്നത്.

ഒന്നിച്ച്, ഒന്നായി, ഒന്നാവാം... കരുതലിന്‍റെ വര്‍ഷം

കോഴഞ്ചേരി: പുതിയ അധ്യയന വര്‍ഷാരംഭത്തില്‍ തന്നെ സ്‌കൂളുകള്‍ക്ക് പുത്തന്‍ വെല്ലുവിളികള്‍. ഹൈസ്‌കൂള്‍ ക്ലാസുകളില്‍ കുട്ടികളെ വരവേല്‍ക്കുന്ന ആദ്യദിനത്തില്‍ തന്നെ ലഹരിക്കെതിരേയുള്ള ബോധവത്കരണ പ്രവര്‍ത്തനങ്ങളും ഉണ്ടാകും. സര്‍ക്കാര്‍ നിര്‍ദേശപ്രകാരമുള്ള വിവിധങ്ങളായ പരിപാടികള്‍ ഇതോടൊപ്പം ഉണ്ടാകുമെന്ന് സ്‌കൂള്‍ അധികൃതര്‍ പറഞ്ഞു. വൈകുന്നേരം 4.30 വരെയാക്കി ഹൈസ്‌കൂള്‍ ക്ലാസുകളില്‍ പഠനം പുനഃക്രമീകരിക്കുകയും ചെയ്തിട്ടുണ്ട്. സ്റ്റുഡന്‍റ് പോലീസ് കേഡറ്റുകളുള്ള സ്‌കൂളുകളില്‍ ആദ്യ ദിവസം തന്നെ പോലീസുമായി ചേര്‍ന്ന് ലഹരിവിരുദ്ധ പ്രതിജ്ഞയും ബോധവത്കരണവും ക്രമീകരിച്ചിട്ടുണ്ട്. പുല്ലാട് ശ്രീവിവേകാനന്ദ ഹൈസ്‌കൂളില്‍ നര്‍ക്കോട്ടിക് സെല്‍ ഡിവൈഎസ്പിയുടെ നേതൃത്വത്തില്‍ ലഹരി വിരുദ്ധ ബോധവത്കരണ ക്ലാസ് ക്രമീകരിച്ചിട്ടുണ്ട്.

സ്‌കൂള്‍ തുറക്കലിന് ഒരുക്കങ്ങള്‍ നടത്തി പോലീസും

പത്തനംതിട്ട: പുതിയ അധ്യായനവര്‍ഷത്തോടനുബന്ധിച്ച് കുട്ടികളുടെ സുരക്ഷ ഉറപ്പാക്കുന്നതിന്‍റെ ഭാഗമായി വിവിധ വിഭാഗങ്ങളെ പങ്കെടുപ്പിച്ചുകൊണ്ട് ജില്ലയില്‍ പോലീസിന്‍റെ നേതൃത്വത്തില്‍ അവലോകനയോഗങ്ങള്‍ നടന്നു. സംസ്ഥാന പോലീസ് മേധാവിയുടെ നിര്‍ദേശപ്രകാരം ജില്ലാ പോലീസ് മേധാവിയുടെ നേതൃത്വത്തിലാണ് യോഗങ്ങള്‍ നടത്തിയത്. ജനമൈത്രി സുരക്ഷാപദ്ധതിയുടെ ഭാഗമായാണ് പരിപാടി സംഘടിപ്പിച്ചത്. സ്‌കൂള്‍ പ്രവേശനോത്സവവുമായി ബന്ധപ്പെട്ട് കുട്ടികളുടെ സുരക്ഷ മുന്‍നിര്‍ത്തി ജില്ലയിലെ അഞ്ച് പോലീസ് സബ് ഡിവിഷന്‍ തലങ്ങളില്‍ നടന്ന വിവിധ യോഗങ്ങളില്‍ സ്‌കൂള്‍ അധികൃതരെ കൂടാതെ വിവിധ വകുപ്പുകളുടെ പ്രതിനിധികളും പങ്കെടുത്തു. സ്‌കൂള്‍ ഹെഡ്മാസ്റ്റര്‍മാര്‍, പിടിഎ പ്രസിഡന്‍റുമാര്‍, പഞ്ചായത്ത് അംഗങ്ങള്‍, എക്‌സൈസ്-വാഹനഗതാഗത വകുപ്പുകളില്‍ നിന്നുള്ള ഉദ്യോഗസ്ഥര്‍, വിദ്യാഭ്യാസ വകുപ്പിലെ പ്രതിനിധികള്‍, രക്ഷാകര്‍ത്താക്കള്‍ കുടുംബശ്രീ, ആശാ വര്‍ക്കര്‍മാര്‍, റെസിഡന്‍റ്സ് അസോസിയേഷന്‍ ഭാരവാഹികള്‍, ജനമൈത്രി സിആര്‍ഒമാര്‍, ബീറ്റ് പോലീസ് ഓഫീസര്‍മാര്‍, സ്റ്റുഡന്‍റ് പോലീസ് കേഡറ്റ് (എസ്പിസി) സ്‌കൂള്‍ പ്രൊട്ടക്‌ഷന്‍ ഗ്രൂപ്പ് (എസ്പിജി) അംഗങ്ങള്‍ തുടങ്ങിയവര്‍ പങ്കെടുത്തു. ലഹരിക്കെതിരായ പോരാട്ടവുമായി ബന്ധപ്പെട്ടുള്ള യോദ്ധാവ്, കുട്ടികളുമായി ബന്ധപ്പെട്ട മറ്റു പദ്ധതികളായ ഹോപ്പ്, ചിരി, ചൈല്‍ഡ് ഹെല്‍പ്പ് ലൈന്‍ നമ്പര്‍, പോലീസ് ഹെല്‍പ്പ് ലൈന്‍ നമ്പര്‍ തുടങ്ങിയ പൊതുവായ കാര്യങ്ങള്‍ അവലോകന യോഗങ്ങളില്‍ അതതു ഡിവൈഎസ്പി മാര്‍ വിശദീകരിച്ചു. പോക്‌സോ നിയമം ഉള്‍പ്പെടെയുള്ള കുട്ടികളുമായി ബന്ധപ്പെട്ട നിയമങ്ങളെക്കുറിച്ച് കുട്ടികള്‍ക്കും രക്ഷാകര്‍ത്താക്കള്‍ക്കും അധ്യാപകര്‍ക്കും സ്‌കൂള്‍ ജീവനക്കാര്‍ക്കും ബോധവത്കരണം നല്‍കുന്നതിന്‍റെ ആവശ്യകതയെക്കുറിച്ചും കുട്ടികള്‍ക്ക് കൗണ്‍സലിംഗ് നല്‍കുന്നതിനെ സംബന്ധിച്ചും യോഗങ്ങളില്‍ ഡിവൈഎസ്പിമാര്‍ വിശദീകരിച്ചു. അടൂരില്‍ ഡിവൈഎസ്പി ജി. സന്തോഷ് കുമാര്‍, റാന്നിയില്‍ ഡിവൈഎസ്പി ആര്‍. ജയരാജ്, തിരുവല്ലയില്‍ ഡിവൈഎസ്പി എസ്. നന്ദകുമാര്‍ എന്നിവര്‍ ക്ലാസുകള്‍ നയിച്ചു. പത്തനംതിട്ടയില്‍ നടന്ന ബോധവത്കരണ പരിപാടി ഡിവൈഎസ്പി എസ്. അഷാദ് ഉദ്ഘാടനം ചെയ്തു.

മാറിയ പുസ്തകങ്ങള്‍ക്കും വരക്കൂട്ടുകള്‍ ഒരുക്കി ഷാജി മാത്യു

പത്തനംതിട്ട: പുതിയ പാഠപുസ്തകങ്ങളിലും കാര്‍ട്ടൂണിസ്റ്റ് ഷാജി മാത്യുവിന്‍റെ ചിത്രങ്ങള്‍. ഇക്കുറി മാറിയ രണ്ട്, നാല്, ആറ് ക്ലാസുകളിലെ ഇംഗ്ലീഷ്, മലയാളം, സംസ്‌കൃതം, ഹെല്‍ത്ത് പുസ്തകങ്ങളിലാണ് ഷാജി മാത്യുവിന്‍റെ ചിത്രങ്ങള്‍ ഉള്ളത്. കഴിഞ്ഞ വര്‍ഷം പരിഷ്‌കരിച്ച ഒന്ന്, മൂന്ന്, അഞ്ച്, ഏഴ് ക്ലാസുകളിലെ മലയാളം, ഇംഗ്ലീഷ്, സംസ്‌കൃതം, ഗണിതം, സയന്‍സ്, ഫിസിക്കല്‍ പുസ്തകങ്ങളിലും ചിത്രങ്ങള്‍ വരച്ചിട്ടുണ്ട്. മണ്ടൂസ്, ടിന്‍റുമോന്‍, പിണ്ടൂസ് തുടങ്ങിയ നിരവധി കാര്‍ട്ടൂണ്‍ കഥാപാത്രങ്ങളിലുടെ ജനശ്രദ്ധ നേടിയ ഷാജി മാത്യു നിരവധി ആനുകാലികങ്ങളിലും തന്‍റെ രചനകള്‍ നടത്തിയിട്ടുണ്ട്. പത്തനംതിട്ട മണ്ണാരക്കുളഞ്ഞി സ്വദേശിയായ അദ്ദേഹം നിമിഷ കാരിക്കേച്ചര്‍ രചനയിലും ശ്രദ്ധേയനാണ്.

നാടിന് അഭിമാനമായി... കുരുന്നെഴുത്തില്‍ ഇടംനേടി ലിയോ ലിജു

തെള്ളിയൂര്‍: ഒന്നാം ക്ലാസുകാരുടെ തെരഞ്ഞെടുത്ത ഡയറിക്കുറിപ്പുകള്‍ ഉൾ‌പ്പെടുത്തി വിദ്യാഭ്യാസ വകുപ്പ് പുറത്തിറക്കിയ കുരുന്നെഴുത്തില്‍ ഇടം നേടി ലിയോ ലിജു. വെണ്ണിക്കുളം ഉപജില്ലയിലെ തെള്ളിയൂര്‍ സെന്‍റ് ബഹനാന്‍സ് എല്‍പി സ്‌കൂള്‍ ഒന്നാം ക്ലാസ് വിദ്യാര്‍ഥിയാണ് ലിയോ ലിജു. ലിയോ തയാറാക്കിയ ഡയറിക്കുറിപ്പുകള്‍ കുരുന്നെഴുത്തില്‍ ഇടം കണ്ടെത്തുകയായിരുന്നു. മുഖ്യമന്ത്രി പിണറായി വിജയന്‍ കുരുന്നെഴുത്തു പ്രകാശനം നിര്‍വഹിച്ചു. വിദ്യാഭ്യാസമന്ത്രി വി. ശിവന്‍കുട്ടി എഡിറ്ററായ കുരുന്നെഴുത്തില്‍ തന്‍റെ ഡയറിയും അച്ചടിച്ചു വന്ന സന്തോഷത്തിലാണ് ലിയോ രണ്ടാം ക്ലാസിലേക്ക് എത്തിയിരിക്കുന്നത്. വിദ്യാകിരണം മിഷനാണ് പുസ്തകം പുറത്തിറക്കിയത്.

പ്രവേശനോത്സവ ഗാനം അടൂരിലെ കൊച്ചുമിടുക്കിയുടേത്

പത്തനംതിട്ട: ‘മഴമേഘങ്ങള്‍ പന്തലൊരുക്കിയ പുതുവര്‍ഷത്തിന്‍ പൂന്തോപ്പില്‍’ എന്ന ഗാനത്തിന്‍റെ അകമ്പടിയോടെ സ്‌കൂളുകളില്‍ ഇന്ന് പ്രവേശനോത്സവം നടക്കുമ്പോള്‍ ഗാനരചയിതാവ് സ്വന്തം ജില്ലക്കാരിയെന്നതില്‍ അഭിമാനിക്കാം. അടൂര്‍ സ്വദേശി ഭദ്ര ഹരിയുടെ ഗാനമാണ് ഇക്കുറി പ്രവേശനോത്സവത്തിനായി തെരഞ്ഞെടുത്തത്. ഇതാദ്യമായാണ് സ്‌കൂള്‍ പ്രവേശനോത്സവത്തിന് ഒരു വിദ്യാര്‍ഥിനി തന്നെ ഗാനം എഴുതി നല്‍കുന്നത്. കൊട്ടാരക്കര താമരക്കുടി എസ്‌വിവിഎച്ച്എസ്എസിലെ പത്താം ക്ലാസ് വിദ്യാര്‍ഥിനിയായ ഭദ്ര എല്ലാ വിഷയങ്ങള്‍ക്കും എ പ്ലസ് നേടി വിജയിച്ചിരുന്നു. പിന്നാലെയാണ് സ്‌കൂള്‍ പ്രവേശനോത്സവ ഗാനം തെരഞ്ഞെടുത്ത വിവരവും അറിഞ്ഞത്. ഇരട്ടിമധുരത്തിന്‍റെ ആവേശത്തിലാണ് കുടുംബം. താമരക്കുടി സ്‌കൂളിലെ അധ്യാപികയാണ് ഭദ്രയുടെ മാതാവ് സുമ. അച്ഛന്‍ ഹരീന്ദ്രനാഥ് അടൂര്‍ താലൂക്ക് ഓഫീസില്‍ ഡെപ്യൂട്ടി തഹസില്‍ദാരാണ്. കുടുംബം ഇപ്പോള്‍ കൊട്ടാരക്കയിലാണ് താമസം. ഏക സഹോദരി: ധ്വനി ഹരി. ചുരുങ്ങിയ ദിവസങ്ങള്‍ കൊണ്ടാണ് ഭദ്ര ഗാനം രചിച്ചത്. വിജ്ഞാപനം കണ്ടാണ് വരികള്‍ എഴുതി അയച്ചത്. കേരളത്തിന്‍റെ അഞ്ചുവര്‍ഷത്തെ വിദ്യാഭ്യാസചരിത്രം ഉള്‍ക്കൊള്ളിച്ച് എഴുതാനായിരുന്നു നിര്‍ദേശം. ഗാനത്തിന്‍റെ വീഡിയോയില്‍ കുറച്ചു രംഗം അഭിനയിക്കാനുള്ള ഭാഗ്യവും ഭദ്രയെ തേടി എത്തിയിരുന്നു. ഭദ്ര ഹരിയെ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ വീട്ടിലെത്തി അനുമോദിച്ചു. ഭദ്രയുടെ കവിതകളില്‍ പ്രകൃതിയുടെ മനോഹര ബിംബങ്ങള്‍ കൊണ്ടുവന്നിട്ടുണ്ട്. ഭദ്രയുടെ കവിതകള്‍ ആദ്യ വായനയില്‍ നമ്മെ ആകര്‍ഷിക്കുമെന്നും ചിറ്റയം ഗോപകുമാര്‍ പറഞ്ഞു. തന്‍റെ 15 കവിതകള്‍ ഉള്‍പ്പെടുത്തി മഴത്തുള്ളി പബ്ലിക്കേഷന്‍സ് പുറത്തിറക്കിയ ധനുമാസ പൗര്‍ണമി എന്ന കവിതാ സമാഹാരം ഡെപ്യൂട്ടി സ്പീക്കറിന് ഭദ്ര സമ്മാനിച്ചു. ഭദ്രയുടെ അച്ഛന്‍ ഹരീന്ദ്രനാഥ്, അമ്മ സുമ, എറത്ത് ഗ്രാമപഞ്ചായത്ത് പ്രസിഡന്‍റ് രാജേഷ് അമ്പാടി, അനില്‍ പൂതക്കുഴി, കെ. സുനില്‍ ബാബു എന്നിവരും സന്നിഹിതരായിരുന്നു.

അക്ഷരമധുരം മഴവില്ലഴകാകും... ഉത്സവമേളം വരവായി : പ്രവേശനോത്സവത്തിനൊരുങ്ങി വിദ്യാലയങ്ങള്‍

പത്തനംതിട്ട: പുത്തന്‍ പ്രതീക്ഷകളോടെ അക്ഷരമുറ്റത്തേക്ക് കാലുകുത്തുന്ന കുരുന്നുകളെ വരേവല്‍ക്കാന്‍ ഒരുക്കമായി. ഒന്നിച്ച് ഒന്നായ് ഒന്നാവാം എന്ന സന്ദേശം നല്‍കി പ്രവേശനോത്സവത്തോടെ പുതിയ അധ്യയന വര്‍ഷത്തിന് ഇന്നു തുടക്കം. ജില്ലയിലെ പൊതുവിദ്യാലയങ്ങള്‍ക്കൊപ്പം അണ്‍എയ്ഡഡ് സ്‌കൂളുകളും പ്രവേശനോത്സവത്തോടെയാണ് പുതിയ അധ്യയന വര്‍ഷത്തിനു തുടക്കം കുറിക്കുന്നത്. പ്രവേശനോത്സവത്തിനായി സ്‌കൂളുകള്‍ ഒരുങ്ങിക്കഴിഞ്ഞു. വ്യത്യസ്തങ്ങളായ പരിപാടികളോടെയാണ് കുട്ടികളെ വരവേല്‍ക്കുന്നത്. ഇതിനായി സ്‌കൂളും പരിസരങ്ങളും ഒരുങ്ങിക്കഴിഞ്ഞു. പഠനത്തെ ഉത്സാഹഭരിതമാക്കുകയെന്ന ലക്ഷ്യത്തോടെയാണ് ആഘോഷങ്ങള്‍. പ്രവേശനോത്സവ ഗാനത്തിന്‍റെ അകമ്പടിയോടെയാണ് പൊതുപരിപാടികള്‍ തുടങ്ങുന്നത്. വര്‍ണക്കടലാസുകളും ബലൂണുകളും ചാര്‍ത്തി സ്‌കൂള്‍ പരിസരങ്ങള്‍ അലങ്കരിച്ചിരിക്കുകയാണ്. സര്‍ക്കാര്‍ വിദ്യാലയങ്ങളിലും എയ്ഡഡ് വിദ്യാലയങ്ങളിലും വിദ്യാഭ്യാസവകുപ്പിന്‍റെ നിര്‍ദേശപ്രകാരമുള്ള പ്രവേശനോത്സവ പരിപാടികളാണ് ക്രമീകരിക്കുന്നത്. രക്ഷിതാക്കളെ കൂടി പങ്കാളികളാക്കിക്കൊണ്ടാണ് പരിപാടികള്‍. പുതുതായി എത്തുന്ന കുട്ടികളെ മധുരം നല്‍കി സ്വീകരിക്കും. കുട്ടികള്‍ക്ക് യൂണിഫോം, പാഠപുസ്തകം വിതരണം നേരത്തേതന്നെ പൂര്‍ത്തീകരിച്ചിട്ടുണ്ട്. നോട്ട്ബുക്കുകള്‍, ബാഗുകള്‍, കുട തുടങ്ങിയവ പ്രൈമറി ക്ലാസുകളില്‍ അധ്യാപകര്‍ തന്നെ ക്രമീകരിച്ചു നല്‍കുന്നുണ്ട്. ഉച്ചഭക്ഷണവും ഇന്നുമുതല്‍ ഉണ്ടാകും. ജില്ലാതല പ്രവേശനോത്സവം കാരംവേലിയില്‍ പത്തനംതിട്ട: ജില്ലാതല സ്‌കൂള്‍ പ്രവേശനോത്സവം ഇന്നു രാവിലെ 10ന് കോഴഞ്ചേരി കാരംവേലി സര്‍ക്കാര്‍ എല്‍പി സ്‌കൂളില്‍ മന്ത്രി വീണാ ജോര്‍ജ് ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അധ്യക്ഷത വഹിക്കും. ജില്ലാ കളക്ടര്‍ എസ്. പ്രേംകൃഷ്ണന്‍ മുഖ്യാതിഥിയാകും. ജില്ലാ പഞ്ചായത്ത് വൈസ് പ്രസിഡന്‍റ് ബീനാ പ്രഭ മുഖ്യപ്രഭാഷണം നടത്തും. ജനപ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുക്കും. ബ്ലോക്ക്, ഗ്രാമപഞ്ചായത്ത്, നഗരസഭാ തലങ്ങളിലും സ്‌കൂള്‍ പ്രവേശനോത്സവ ഉദ്ഘാടനങ്ങള്‍ ക്രമീകരിച്ചിട്ടുണ്ട്. എംഎല്‍എമാര്‍, ത്രിതല പഞ്ചായത്ത്, നഗരസഭാ ജനപ്രതിനിധികള്‍ മുഖ്യാതിഥികളാകും. റാന്നിയില്‍ റാന്നി: റാന്നി ബ്ലോക്ക്തല സ്‌കൂള്‍ പ്രവേശനോത്സവത്തിന് റാന്നി ഗവ. യുപി സ്‌കൂളില്‍ വേദിയൊരുക്കും. ഏറെ കൗതുകത്തോടെ വിദ്യാലയത്തിലെത്തുന്ന കുട്ടികളെ സ്വീകരിക്കാനും സന്തോഷിപ്പിക്കാനും കുട്ടികളുടെ വിദ്യാലയപ്രവേശം രക്ഷിതാക്കള്‍ക്ക് അവിസ്മരണീയമാക്കാനും വിവിധ പരിപാടികളാണ് സമഗ്ര ശിക്ഷ കേരള റാന്നി ബിആര്‍സിയുടെ നേതൃത്വത്തില്‍ ക്രമീകരിച്ചിരിക്കുന്നതെന്ന് ബിപിസി ഷാജി എ. സലാം പറഞ്ഞു. പ്രവേശനോത്സവം കളര്‍ഫുള്‍ ആക്കാനുള്ള ശ്രമത്തിലാണ് പ്രഥമാധ്യാപകന്‍ സി.പി. സുനിലും അധ്യാപകരും രക്ഷിതാക്കളും. പ്രവേശനോത്സവ ദിവസം വനിതകളുടെ ചെണ്ടമേളം, രക്ഷിതാക്കള്‍ക്ക് കുട്ടിയോടൊപ്പം ഫോട്ടോ എടുക്കാനുള്ള ഫാമിലി ഫോട്ടോ പോയിന്‍റ് തുടങ്ങിയവ പ്രധാന ആകര്‍ഷണങ്ങളാണ്. പ്രമോദ് നാരായണ്‍ എംഎല്‍എ ബ്ലോക്ക്തല പ്രവേശനോത്സവം ഉദ്ഘാടനം ചെയ്യും. ഗ്രാമപഞ്ചായത്ത് പ്രസിഡന്‍റ് കെ.ആര്‍. പ്രകാശ് അധ്യക്ഷത വഹിക്കും. ബ്ലോക്ക് പ്രസിഡന്‍റ് കെ.എസ്. ഗോപി വിശിഷ്ടാതിഥിയാകും. ഉപജില്ലാ വിദ്യാഭ്യാസ ഓഫീസര്‍ പ്രീതി ജോസഫ് മുഖ്യപ്രഭാഷണം നടത്തും. പഞ്ചായത്ത്തല പ്രവേശനോത്സവങ്ങൾ പുല്ലൂപ്ര ഗവ. എല്‍പി സ്‌കൂളില്‍ റാന്നി - അങ്ങാടി പഞ്ചായത്ത് പ്രസിഡന്‍റ് ബിന്ദു റെജിയും എംഡി എല്‍പി സ്‌കൂളില്‍ പഴവങ്ങാടി ഗ്രാമപഞ്ചായത്ത് പ്രസിഡന്‍റ് റൂബി കോശിയും ഇടമുറി ഗവ. എച്ച്എസിൽ ‍ നാറാണംമൂഴി ഗ്രാമപഞ്ചായത്ത് പ്രസിഡന്‍റ് സോണിയ മനോജും പെരുനാട് എച്ച്എസില്‍ ഗ്രാമപഞ്ചായത്ത് പ്രസിഡന്‍റ് പി.എസ്. മോഹനനും ഉദ്ഘാടനം ചെയ്യും. പ്രവേശനോത്സവത്തിന് ഹരിതച്ചട്ടം ബാധകം പത്തനംതിട്ട: സ്‌കൂള്‍, അങ്കണവാടി പ്രവേശനോത്സവങ്ങള്‍, പരിസ്ഥിതി ദിനാഘോഷം എന്നിവ ഹരിതചട്ടം പാലിച്ചു നടത്തണമെന്ന നിര്‍ദ്ദേശവുമായി പത്തനംതിട് ജില്ലാ ശുചിത്വ മിഷന്‍. ഇതു സംബന്ധിച്ച് പരിശോധനകള്‍ നടത്താനും നടപടികള്‍ സ്വീകരിക്കാനും ജില്ലയിലെ തദ്ദേശ സ്ഥാപനങ്ങള്‍ക്ക് പത്തനംതിട്ട ജില്ലാ ശുചിത്വ മിഷന്‍ നിര്‍ദേശം നല്‍കി. സ്‌കൂളില്‍ സ്ഥാപിച്ചിട്ടുള്ള ബിന്നുകളും മറ്റു മാലിന്യസംസ്‌കരണ സംവിധാനങ്ങളും പ്രവര്‍ത്തന സജ്ജമാണോയെന്ന് പരിശോധനകള്‍ നടന്നുവരികയാണ്. ജില്ലയിലെ എല്ലാ സ്‌കൂളുകളിലും കംമ്പോസ്റ്റിംഗ് പ്രോത്സാഹിപ്പിക്കുന്നതിന്‍റെ ഭാഗമായി സ്വന്തം പൂന്തോട്ടം സ്വന്തം കമ്പോസ്റ്റ് കാമ്പയിന്‍ പരിപാടി സംഘടിപ്പിക്കാനും ശുചിത്വ മിഷന്‍ നിര്‍ദേശിച്ചിട്ടുണ്ട്. ശുചിത്വം-മാലിന്യ നിര്‍മാര്‍ജനം തുടങ്ങിയ വിഷയങ്ങളുമായി ബന്ധപ്പെട്ട് തദ്ദേശ സ്ഥാപനങ്ങളുടെ നേതൃത്വത്തില്‍ അതതു മേഖലകളില്‍ ക്ലാസുകളും പരിശോധനകളും നടക്കും.

സേ നോ ടു ഡ്രഗ്സ്: കാഷ്മീർ യാത്ര

പത്തനംതിട്ട: മദ്യത്തിനും മയക്കുമരുന്നിനുമെതിരായി സേ നോ ടു ഡ്രഗ്‌സ് എന്ന സന്ദേശം പ്രചരിപ്പിക്കുന്നതിന് കോന്നി ബ്ലോക്ക് കോണ്‍ഗ്രസ് കമ്മിറ്റി ജനറല്‍ സെക്രട്ടറി പ്രകാശ് പേരങ്ങാട്ടിന്‍റെ നേതൃത്വത്തിലുള്ള നാലംഗ സംഘം പത്തനംതിട്ടയില്‍നിന്നും കാറില്‍ കാഷ്മീരിലേക്ക് ഭാരത് യാത്ര നടത്തുന്നു. യാത്രയുടെ ഫ്‌ളാഗ് ഓഫ് കര്‍മം പത്തനംതിട്ടയില്‍ ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പില്‍ നിര്‍വഹിച്ചു. ജനറല്‍ സെക്രട്ടറിമാരായ സാമുവല്‍ കിഴക്കുപുറം, സജി കൊട്ടയ്ക്കാട്, അനില്‍ കൊച്ചുമൂഴിക്കല്‍ എന്നിവര്‍ പ്രസംഗിച്ചു.

വിവാഹപരസ്യത്തിലൂടെ പണം തട്ടിയ യുവതിക്കും മാതാവിനുമെതിരേ കേസ്

പന്തളം: വിവാഹാലോചനയുമായെത്തിയ യുവാവിനെ കബളിപ്പിച്ച് പണം തട്ടിയതിന് ഭര്‍തൃമതിയും ഒരു കുട്ടിയുടെ മാതാവുമായ യുവതിക്കും മാതാവിനും എതിരേ കേസെടുത്ത് പന്തളം പോലീസ്. പന്തളം തോന്നല്ലൂര്‍ മൂര്‍ത്തിയത്ത് ദേവിക ആര്‍. നായര്‍ (26), മാതാവ് എം. എസ്. ശ്രീലേഖ (47) എന്നിവരെ പ്രതികളാക്കിയാണ് കേസെടുത്തത്. തിരുവനന്തപുരം സ്വദേശിനിയാണ് പരാതിക്കാരി. ഇവരുടെ സഹോദരിയുടെ മകന്‍ മാട്രിമോണിയല്‍ പരസ്യത്തിലൂടെ യുവതിയെ പരിചയപ്പെട്ടു. യുവതിയുടെ പ്രൊഫൈല്‍ ഇയാള്‍ കാണുകയും, വിവാഹാലോചന നടത്തുകയും ചെയ്തു. തുടര്‍ന്ന്, യുവതി അമ്മയുടെ ചികിത്സാ ആവശ്യത്തിനെന്നു പറഞ്ഞു 1,76,500 രൂപ ഇവരില്‍നിന്നും പലതവണയായി കൈപ്പറ്റി. പിന്നീട്, 57550 രൂപ ബാങ്ക് അക്കൗണ്ട് വഴി തിരികെ നല്‍കി. യുവാവിനെ ദേവിക കബളിപ്പിച്ചതാണെന്നും ഇവര്‍ വിവാഹിതയും ഒരു കുട്ടിയുടെ മാതാവുമാണെന്നും യുവാവിനും കുടുംബത്തിനും വ്യക്തമായത് പിന്നീടാണ്. തുടര്‍ന്ന് പരാതിയുമായി യുവാവിന്‍റെ കുടുംബം പോലീസിനെ സമീപിക്കുകയായിരുന്നു. പോലീസ് ഇന്‍സ്പെക്ടര്‍ ടി. ഡി. പ്രജീഷ്, എസ്ഐ അനീഷ് ഏബ്രഹാം എന്നിവരുടെ നേതൃത്വത്തിലായിരുന്നു അന്വേഷണം.

ക്ഷീരകര്‍ഷകരുടെ ഉന്നമനം സർക്കാർ ലക്ഷ്യം: മന്ത്രി ജെ. ചിഞ്ചുറാണി

മെഴുവേലി: ക്ഷീരകര്‍ഷകരുടെ പ്രശ്നങ്ങളോട് അനുഭാവപൂര്‍വമായ സമീപനം സർക്കാർ എക്കാലവും സ്വീകരിച്ചുവരുന്നതെന്ന് മന്ത്രി ജെ. ചിഞ്ചുറാണി. മെഴുവേലി ഗ്രാമപഞ്ചായത്തില്‍ നിര്‍മിച്ച മൃഗാശുപത്രി ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. ക്ഷീരമേഖലയില്‍ നിരവധി ക്ഷേമപദ്ധതി നടപ്പാക്കി. നിരവധി പ്രതിസന്ധി അതിജീവിച്ച് പാലുത്പാദനത്തില്‍ സ്വയംപര്യാപ്തതയില്‍ എത്താനുള്ള ശ്രമത്തിലാണ്. ക്ഷീരകര്‍ഷകര്‍ക്ക് പാലിന് ഏറ്റവും കൂടുതല്‍ വില നല്‍കുന്ന സംസ്ഥാനങ്ങളിലൊന്നാണ് കേരളം. രാജ്യത്ത് പാല്‍ ഉത്പാദനത്തില്‍ രണ്ടാം സ്ഥാനത്താണ്. വളര്‍ത്തുന്ന 95 ശതമാനം പശുക്കളും സങ്കര ഇനങ്ങളാണ്. ക്ഷീരക്ഷേമ നിധി ബോര്‍ഡിന്‍റെ പ്രവര്‍ത്തനം പ്രശംസനീയമാണെന്നും മന്ത്രി പറഞ്ഞു. ക്ഷീരകര്‍ഷകരുടെ കുട്ടികള്‍ക്ക് സ്‌കോളര്‍ഷിപ്പടക്കം നല്‍കുന്നു. ചികത്സച്ചെലവിന് രണ്ടു ലക്ഷം രൂപ വരെയുള്ള ഇന്‍ഷ്വറന്‍സ് പദ്ധതിയുണ്ട്. പഞ്ചായത്ത് കേന്ദ്രീകരിച്ച് ക്ഷീരഗ്രാമം പദ്ധതി നടപ്പാക്കി. വീട്ടുമുറ്റത്ത് സേവനം നല്‍കാന്‍ എല്ലാ ബ്ലോക്ക് പഞ്ചായത്തുകളിലും വെറ്ററിനറി ആംബുലന്‍സുകള്‍ ഉറപ്പാക്കുമെന്ന് മന്ത്രി പറഞ്ഞു. 1962 എന്ന ടോള്‍ ഫ്രീ നമ്പറില്‍ ബന്ധപ്പെട്ടാല്‍ ഡോക്ടര്‍ ഉള്‍പ്പെടെ ആംബുലന്‍സ് വീട്ടിലെത്തും. ഡ്രൈവര്‍ കം അറ്റന്‍ഡറും മരുന്നും മൊബൈല്‍ യൂണിറ്റിലുണ്ടാകും. കന്നുകാലികള്‍ക്കെല്ലാം സമഗ്ര ഇന്‍ഷുറന്‍സ് പദ്ധതി ഉറപ്പാക്കാനാണ് സര്‍ക്കാര്‍ ശ്രമമെന്നും ചിഞ്ചുറാണി അറിയിച്ചു. മന്ത്രി വീണാ ജോർജ് അധ്യക്ഷത വഹിച്ചു.

യുവാവിനെതിരേ കാപ്പ നിയമം ചുമത്തി; യാത്രാവിവരങ്ങൾ പോലീസിനെ അറിയിക്കണം

പത്തനംതിട്ട: നിരവധി ക്രിമിനല്‍ കേസുകളില്‍ പ്രതി ചേർക്കപ്പെട്ട യുവാവിന് കാപ്പ നിയമപ്രകാരം പത്തനംതിട്ട ജില്ലയില്‍ സഞ്ചാരനിയന്ത്രണം ഏര്‍പ്പെടുത്തി ഡിഐജി എസ്. അജിത ബേഗത്തിന്‍റെ ഉത്തരവ്. മലയാലപ്പുഴ താഴം പത്തിശേരിയില്‍ കൃഷ്ണ നിവാസ് വീട്ടില്‍ അർജുൻദാസി(42) നാണ് നിയന്ത്രണം ഏര്‍പ്പെടുത്തിയത്. ആറുമാസത്തേക്ക് ഇയാള്‍ തന്‍റെ യാത്രാവിവരങ്ങള്‍ പത്തനംതിട്ട ഡിവൈഎസ്പിയെ അറിയിക്കണം. ഈ കാലയളവില്‍ ജീവനോപാധികള്‍ക്കോ അടിയന്തര ആശുപത്രി ആവശ്യങ്ങള്‍ക്കോ ഒഴികെയുള്ള ഓരോ ആഴ്ചയിലെയും സഞ്ചാരവിവരം എല്ലാ ശനിയാഴ്ചയും ഡിവൈഎസ്പിയെ അറിയിക്കണമെന്നാണ് ഉത്തരവ്. അർജുൻദാസിനെതിരേ പരിഗണിച്ച അഞ്ചു കേസുകളില്‍ മൂന്നും ദേഹോപദ്രവം ഏല്പിച്ചതിന് പത്തനംതിട്ട, അടൂര്‍ പോലീസ് സ്റ്റേഷനുകളില്‍ എടുത്ത കേസുകളാണ്. ഫോണിലൂടെ അസഭ്യം വിളിച്ചതിനും ഭീഷണിപ്പെടുത്തിയതിനും പന്തളം പോലീസ് രജിസ്റ്റര്‍ ചെയ്ത കേസും, വിശ്വാസവഞ്ചനയ്ക്ക് കോന്നി പോലീസ് രജിസ്റ്റര്‍ ചെയ്തതുമാണ് മറ്റ് രണ്ട് കേസുകള്‍. 2005 മുതല്‍ അടിക്കടി സമാധാന ലംഘനപരമായ കുറ്റകൃത്യങ്ങളില്‍ ഏര്‍പ്പെട്ടു പൊതുജനങ്ങളുടെ സമാധാന ജീവിതത്തിന് ഭീഷണി സൃഷ്ടിച്ചുവന്ന ഇയാൾക്കെതിരേ 107 സി ആര്‍ പി സി പ്രകാരം ഒരു വര്‍ഷത്തേക്ക് നല്ല നടപ്പ് ജാമ്യം വാങ്ങുന്നതിനായി മലയാലപ്പുഴ പോലീസ് കഴിഞ്ഞവര്‍ഷം അടൂര്‍ സബ് ഡിവിഷണല്‍ മജിസ്ട്രേറ്റ് കോടതിയില്‍ റിപ്പോര്‍ട്ട് സമര്‍പ്പിച്ചിരുന്നു. ഇത് കോടതിയുടെ പരിഗണനയിലാണ്.

അന്താരാഷ്‌ട്ര നഴ്സിംഗ് ശില്പശാല ബിലീവേഴ്സ് ആശുപത്രിയിൽ

തിരുവല്ല: ബിലീവേഴ്സ് ചർച്ച് മെഡിക്കൽ കോളജ് ആശുപത്രി നഴ്സിംഗ് വിഭാഗത്തിന്‍റെ ആഭിമുഖ്യത്തിൽ അന്താരാഷ്‌ട്ര നഴ്സിംഗ് ശില്പശാല ബിയാകോൺ 2025 നടന്നു. ഏകദിന ശില്പശാല ബിലീവേഴ്സ് ആശുപത്രി ഡയറക്ടറും സിഇഒ യുമായ ഡോ.ജോർജ് ചാണ്ടി മറ്റീത്ര ഉദ്ഘാടനം ചെയ്തു. കേരള ആരോഗ്യ സർവകലാശാല സെനറ്റ് അംഗവും ആശുപ്രതി മാനേജരുമായ ഫാ. സിജോ പന്തപ്പള്ളിൽ ഓൺലൈനായി മുഖ്യപ്രഭാഷണം നടത്തി. അസോസിയേറ്റ് ഡയറക്ടർ ഡോ.ജോൺ വല്യത്ത്, ബിലീവേഴ്സ് ചർച്ച് മെഡിക്കൽ കോളജ് വൈസ് പ്രിൻസിപ്പൽ ഡോ. ഏബൽ കെ.സാമുവൽ, ഫാ. തോമസ് വർഗീസ്, ചീഫ് നഴ്സിംഗ് ഓഫീസർ മിനി സാറാ തോമസ് എന്നിവർ പ്രസംഗിച്ചു. സാമൂഹിക - വിദ്യാഭ്യാസ പ്രവർത്തകൻ വർക്കി ജോർജ്, പ്രഫ. ബ്രയാൻ ഉനിസ, ഡോ. ഹെലൻ വി. വാഡൻസ്ജോ, ഡോ. റിജു മാത്യു, പ്രഫ. കയാസ ജുറൈസാറ്റർ, പ്രഫ. അന്നാ വിൽമാൻ, ഡോ. രേണു സൂസൻ തോമസ് എന്നിവർ വിവിധ സെക്‌ഷനുകൾ നയിച്ചു.കേരളത്തിലെ വിവിധ ആശുപത്രികളിൽ നിന്നുളള നഴ്സുമാരും നഴ്സിംഗ് വിദ്യാർഥികളുമടക്കം 400 ഓളം പേർ പങ്കെടുത്തു.

‘കളിക്കളം ആകട്ടെ ലഹരി ’ കായികമത്സരങ്ങൾ സമാപിച്ചു

തിരുവല്ല: ശരീരവും മനസും പ്രവർത്തനനിരതമായാൽ ജീവിതം നശിപ്പിക്കുന്ന ലഹരിയിൽ നിന്ന് മാറി നിൽക്കാൻ കഴിയുമെന്ന് പുഷ്പഗിരി മെഡിക്കൽ സൊസൈറ്റി സിഇഒ ഫാ. ഡോ. ബിജു വർഗീസ് പയ്യമ്പള്ളിൽ. കേരള കോൺഗ്രസ് - എം പത്തനംതിട്ട ജില്ല കമ്മിറ്റിയുടെ നേതൃത്വത്തിൽ ഒരു മാസമായി നടത്തിവന്ന ‘കളിക്കളം ആകട്ടെ ലഹരി’എന്ന പരിപാടിയുടെ സമാപനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലയിലെ അഞ്ച് നിയോജകമണ്ഡലങ്ങളിലായി വോളിബോൾ, ക്രിക്കറ്റ്, ചെസ്, ഷട്ടിൽ ബാഡ്മിന്‍റൺ, ഫുട്ബോൾ എന്നീ മത്സരങ്ങൾ നടന്നു. സമാപന പരിപാടിയിൽ എക്സൈസ് ടീമും കേരള കോൺഗ്രസ് -എം ജില്ലാ ടീമും തമ്മിൽ സൗഹൃദ ഫുട്ബോൾ മത്സരം തിരുവല്ല മാർത്തോമ്മ കോളജ് ഗ്രൗണ്ടിൽ നടത്തി. കേരള കോൺഗ്രസ് - എം ടീം വിജയികളായി. ഇതോടനുബന്ധിച്ചു നടന്ന യോഗത്തിൽ ജില്ലാ പ്രസിഡന്‍റ് സജി അലക്സ് അധ്യക്ഷത വഹിച്ചു. എക്സൈസ് ഇൻപെക്ടർ മിഥുൻ മോഹൻ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു.പാർട്ടി ഉന്നതാധികാര സമിതി അംഗം ടി.ഒ. ഏബ്രഹാം തോട്ടത്തിൽ, സംഘടനാ കാര്യ ജില്ലാ ജനറൽ സെക്രട്ടറി ബ്രഹാം വാഴയിൽ, ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, സാം കുളപ്പള്ളി,സോമൻ താമരച്ചാലിൽ, റിന്‍റോ തോപ്പിൽ, എം.സി. ജയകുമാർ, തോമസ് വർഗീസ്, ജോജി പി.തോമസ്, മാത്യു നൈനാൻ, തോമസ് ജോർജ് കുന്നത്ത്, റ്റിബു പുരക്കൽ, മനോജ് മടത്തുംമൂട്ടിൽ, രാജീസ് കൊട്ടാരം, ലിനു കുളങ്ങര, റജി നോൾഡ് വർഗീസ്, വിൽസൺ ഏബ്രഹാം എന്നിവർ പ്രസംഗിച്ചു.

പീഡനക്കേസില്‍ യുവാവ് അറസ്റ്റില്‍

പത്തനംതിട്ട: പതിനാലുകാരിയെ ബലാത്സംഗം ചെയ്ത യുവാവിനെ പെരുനാട് പോലീസ് അറസ്റ്റ് ചെയ്തു. പെരുനാട് മാടമണ്‍ മേലെകുറ്റി വീട്ടില്‍ ജോബി തോമസാണ് (25) പിടിയിലായത്. ഇയാളുടെ വീട്ടില്‍ വച്ച് 2025 ഏപ്രില്‍ ആറു മുതല്‍ 10 വരെയുള്ള ദിവസങ്ങളിലാണ് കുട്ടിയെ ലൈംഗിക പീഡനത്തിനിരയാക്കിയതെന്ന് പറയുന്നു. കോന്നി എന്‍ട്രി ഹോമില്‍ കഴിയുന്ന പെണ്‍കുട്ടി പോലീസിന് മൊഴിനല്‍കി. പത്തനംതിട്ട വനിതാ പോലീസ് സ്റ്റേഷന്‍ എസ്‌ഐ കെ.ആര്‍. ഷെമി മോളാണ് കുട്ടിയുടെ മൊഴി രേഖപ്പെടുത്തിയത്. പെരുനാട് പോലീസ് മേല്‍ നടപടികള്‍ സ്വീകരിച്ചു. പോലീസ് ഇന്‍സ്‌പെക്ടര്‍ ജി. വിഷ്ണുവാണ് കേസ് അന്വേഷിക്കുന്നത്. കൗണ്‍സിലറോട് കുട്ടി വിവരങ്ങള്‍ വെളിപ്പെടുത്തുകയായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

കുന്നന്താനം ഗവൺമെന്‍റ് ആയുർവേദ ഡിസ്പെൻസറിക്ക് ദേശീയ അംഗീകാരം

മല്ലപ്പള്ളി:കേരളത്തിലെ ആയുഷ് ആരോഗ്യ സ്ഥാപനങ്ങളുടെ ക്വാളിറ്റി അക്രഡിറ്റേഷന്‌ പ്രവർത്തനങ്ങളുടെ ഭാഗമായി കുന്നന്താനം ഗവൺമെന്‍റ് ആയുർവേദ ഡിസ്പെൻസെറിക്ക് ദേശീയ അംഗീകാരം ലഭിച്ചു. തിരുവനന്തപുരം ടാഗോർ തിയേറ്ററിൽ നടന്ന ചടങ്ങിൽ ആരോഗ്യമന്ത്രി വീണാ ജോർജിൽനിന്നും ഗ്രാമപഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ മിനി ജനാർദനൻ, മെഡിക്കൽ ഓഫീസർ ഡോ.എൻ. അഞ്ജന, വികസന സ്റ്റാൻഡിംഗ് കമ്മിറ്റി ചെയർപേഴ്സൺ വി.എസ്. ഈശ്വരി എന്നിവർ ചേർന്ന് സർട്ടിഫിക്കറ്റ് ഏറ്റുവാങ്ങി. ആയുഷ് ആരോഗ്യ സ്ഥാപനത്തിലെ ഗുണനിലവാരം ഉറപ്പുവരുത്തുക ലക്ഷ്യമിട്ട് ആരംഭിച്ച എൻഎബിഎച്ച് നടപ്പിലാക്കൽ പദ്ധതി സമയബന്ധിതമായി പൂർത്തീകരിച്ച് കുന്നന്താനം ഗവൺമെന്‍റ് ആയുർവേദ ഡിസ്പെൻസറി ദേശീയ അംഗീകാരം നേടാനായത് കുന്നന്താനം ഗ്രാമപഞ്ചായത്തിലെ ആരോഗ്യ മേഖലയിലെ മികച്ച പ്രവർത്തനങ്ങൾക്കുള്ള അംഗീകാരമാണ്. അടിസ്ഥാനസൗകര്യം, രോഗീ സൗഹൃദം, രോഗീ സുരക്ഷ, ഔഷധ ഗുണമേന്മ, അണുബാധ നിയന്ത്രണം എന്നിവ ഉൾപ്പെടെയുള്ള സേവനങ്ങളുടെ വിലയിരുത്തലുകളെ തുടർന്നാണ് എൻഎബിഎച്ച് അംഗീകാരം ലഭ്യമാകുന്നത്.

പ്രകൃതിയോടു ചേർന്നുള്ള വിദ്യാഭ്യാസം അനിവാര്യം: രാജു നാരായണ സ്വാമി

പുത്തൻപീടിക: കുട്ടികളുടെ വ്യക്തിത്വ വികസനത്തിന് പ്രകൃതിയോടു ചേർന്നുള്ള വിദ്യാഭ്യാസം അനിവാര്യമാണെന്ന് അഡീഷണൽ ചീഫ് സെക്രട്ടറി രാജു നാരായണ സ്വാമി. ഓമല്ലൂർ പഞ്ചായത്തിൽ ബിരുദ തലത്തിൽ മികച്ച നേട്ടം കൈവരിച്ച മൂന്നു വിദ്യാർഥികൾക്ക് ടോംസ് ജോൺ കുഴിനാപ്പുറത്ത് ഷഷ്‌ടിപൂർത്തി എൻഡോവ്മെന്‍റ് അവാർഡുകൾ വിതരണം ചെയ്തു പ്രസംഗിക്കുകയായിരുന്നു അദ്ദേഹം. ഓമല്ലൂർ ഗ്രാമപഞ്ചായത്ത് പ്രസിഡന്‍റ് ജോൺസൺ വിളവിനാൽ യോഗം ഉദ്ഘാടനം ചെയ്തു. മണ്ണാർമല വാർഡ് മെംബർ ഉഷാ റോയി അധ്യക്ഷത വഹിച്ച സമ്മേളനത്തിൽ റവ. ഡോ. തോമസ് കുഴിനാപ്പുറത്ത്, ഫാ. ലോറൻസ് തയ്യിൽ, ടി.എസ്. അജിത, പി.എസ്. മണിയമ്മ തുടങ്ങിയവർ പ്രസംഗിച്ചു. അക്സൺ മാത്യു സാമുവേൽ, ശ്രദ്ധാ മറിയം ഷിജു, ജ്യുവെൽ അന്ന ജോൺ എന്നീ വിദ്യാർഥികൾക്കാണ് വിദ്യാഭ്യാസ അവാർഡുകൾ സമ്മാനിച്ചത്.

അങ്കണവാടി പോഷകാഹാര വിതരണം മുടങ്ങി; ഗ്രാമപഞ്ചായത്ത് സെക്രട്ടറിയെ ഉപരോധിച്ചു

അടൂർ: ഏഴംകുളം ഗ്രാമപഞ്ചായത്തിലെ വിവിധ അങ്കണവാടികളില്‍ പോഷകാഹാര വിതരണം മുടങ്ങിയതില്‍ പ്രതിഷേധിച്ച് ഗ്രാമപഞ്ചായത്ത് സെക്രട്ടറിയെ കോണ്‍ഗ്രസ് ജനപ്രതിനിധികളുടെ നേതൃത്വത്തില്‍ ഉപരോധിച്ചു. അങ്കണവാടി കുട്ടികള്‍ക്കുള്ള പോഷകാഹാരങ്ങള്‍ സപ്ലൈകോയില്‍ ആഴ്ചകള്‍ക്ക് മുൻപേ എത്തിയിട്ടും അവ അങ്കണവാടികളിലേക്ക് വിതരണം ചെയ്യുന്നതിനായുള്ള വാഹനത്തിന്‍റെ ടെന്‍ഡര്‍ നടപടികള്‍ സമയബന്ധിതമായി പൂര്‍ത്തീകരിക്കാത്തതാണ് വിതരണത്തിനു തടസമായത്. കുറഞ്ഞ നിരക്കില്‍ മാനദണ്ഡ പ്രകാരമുള്ള ടെന്‍ഡര്‍ ക്വട്ടേഷന്‍ വന്നിട്ടും അതു ചില വ്യക്തിതാത്പര്യങ്ങളുടെ അടിസ്ഥാനത്തില്‍ അട്ടിമറിക്കാന്‍ ശ്രമിച്ചതാണ് ഈ ദുരവസ്ഥയ്ക്ക് കാരണമായതെന്ന് കോണ്‍ഗ്രസ് പാര്‍ലമെന്‍ററി പാര്‍ട്ടി ലീഡര്‍ ഇ.എ ലത്തീഫ് ആരോപിച്ചു. ഗ്രാമപഞ്ചായത്ത് സെക്രട്ടറി പറക്കോട് ബ്ലോക്ക് ഐസിഡിഎസ് ഓഫീസറുമായി നടത്തിയ ചര്‍ച്ചയില്‍ പോഷകാഹാര ക്ഷാമം അടിയന്തരമായി പരിഹരിക്കുന്നതിന് ബദല്‍ വിതരണ സംവിധാനം ഒരുക്കാമെന്ന് ഉറപ്പു ലഭിച്ചതോടെയാണ് ഉപരോധം പിന്‍വലിച്ചത്. വിഷയത്തില്‍ താത്കാലികമായി പരിഹാരം ഉണ്ടായെങ്കിലും ടെന്‍ഡര്‍ നടപടികള്‍ അട്ടിമറിച്ചതില്‍ ഉള്‍പ്പെടെ പരാതി നല്‍കി തുടര്‍ നിയമനടപടികള്‍ സ്വീകരിക്കുമെന്ന് ഡിസിസി ജനറല്‍ സെക്രട്ടറി ബിനു എസ്.ചക്കാലയില്‍ അറിയിച്ചു. യുഡിഎഫ് ഗ്രാമപഞ്ചായത്ത് അംഗങ്ങളായ ശ്രീദേവി ബാലകൃഷ്ണൻ, സുരേഷ് ബാബു, ഷീബാ അനി, സദാനന്ദന്‍ സി, കെ. വി. രാജൻ, ബിനില്‍ ബിനു, ചാര്‍ളി ഡാനിയൽ, മാത്യു ഐസക് ചക്കാലയിൽ, നുബിന്‍ ബിനു എന്നിവര്‍ പ്രസംഗിച്ചു.

വിദ്യാമൃതം പദ്ധതിയുമായി സ്നേഹത്തണൽ

അടൂർ: സിഎംഐ വൈദികരുടെ നേതൃത്വത്തില്‍ നടത്തുന്ന സ്‌നേഹത്തണല്‍ സീനിയര്‍ ഡേ കെയര്‍ആന്‍ഡ് കൗണ്‍സിലിംഗ് സെന്‍ററില്‍ പഠനോപകരണങ്ങള്‍ വിതരണം ചെയ്തു. അടൂര്‍ നഗരസഭയിലെ 28 വാര്‍ഡുകളില്‍നിന്നും തെരഞ്ഞെടുക്കപ്പെട്ട 500 കുട്ടികള്‍ക്ക് വിദ്യാമൃതം എന്ന നാമകരണം ചെയ്ത സൗജന്യ പഠനോപകരണങ്ങളാണ് വിതരണം ചെയ്തത്. അടൂര്‍ സ്നേഹത്തണല്‍ കാമ്പസില്‍ നഗരസഭ ചെയര്‍പേഴ്‌സണ്‍ ദിവ്യ റെജി മുഹമ്മദ് വിതരണോദ്ഘാടനം നിര്‍വഹിച്ചു. സ്ഥിരം സമിതി അധ്യക്ഷരായ ബീന ബാബു, എം. അലാവുദ്ദീൻ, അജി പാണ്ടിക്കുടിയില്‍, വൈസ് ചെയര്‍പേഴ്‌സണ്‍ രാജി ചെറിയാൻ, സ്‌നേഹത്തണല്‍ ഡയറക്ടര്‍ ഫാ. ജയിംസ് മടത്തില്‍ചിറ, മാര്‍ സ്ലീവാ പള്ളി വികാരി ഫാ. ലൂക്കാ വെട്ടുവേലിക്കളം, ഫാ. ബൈജു,പകല്‍വീട്, സിഡിഎസ് ചെയര്‍പേഴ്‌സണ്‍ വത്സല പ്രസന്നൻ എന്നിവര്‍ പ്രസംഗിച്ചു.

ലോക പുകയിലവിരുദ്ധ ദിനാചരണം

കോന്നി:സീനിയർ ചേംബർ കോന്നിയുടെ ആഭിമുഖ്യത്തിൽ ലോകപുകയില വിരുദ്ധ ദിനം ആചരിച്ചു.സീനിയർ ചേംബർ പ്രസിഡന്‍റ് ജയിംസ് വർഗീസിൽ നിന്നും പുകയിലവിരുദ്ധ പോസ്റ്ററുകൾ സ്വീകരിച്ച് വ്യാപാര വ്യവസായി ഏകോപനസമിതി കോന്നി യൂണിറ്റ് പ്രസിഡന്‍റ് ഡി. അനിൽകുമാർ ചടങ്ങ് ഉദ്ഘാടനം ചെയ്തു. പുകയിലവിരുദ്ധ പോസ്റ്ററുകൾ വിവിധ വ്യാപാര സ്ഥാപനങ്ങൾ, ഓട്ടോറിഷാ തൊഴിലാളികൾ തുടങ്ങിയ വിവിധ മേഖലകളിൽ വിതരണവും ബോധവൽക്കരണവും നടത്തി. സെക്രട്ടറി രാജീസ് കൊട്ടാരം, ട്രഷറർ മനോഹരൻ ഡി, മുൻ പ്രസിഡന്‍റ് ജേക്കബ് തോമസ്, വേണു ജി,ജോസഫ് തോമസ്, തോമസുകുട്ടി ഇലഞ്ഞിക്കൽ, വ്യാപാരി വ്യവസായി ഏകോപനസമിതി സെക്രട്ടറി സന്തോഷ് മാത്യു തുടങ്ങിയവർ പ്രസംഗിച്ചു.

പോക്‌സോ കേസ് പ്രതിക്ക് 105 വര്‍ഷം കഠിനതടവും 2,85,000 രൂപ പിഴയും

പത്തനംതിട്ട: എട്ടുവയസുകാരിയെ ബലാല്‍സംഗം ചെയ്ത കേസില്‍ പ്രതിക്ക് 105 വര്‍ഷം കഠിന തടവും 2,85,000 രൂപ പിഴയും ശിക്ഷ. കണ്ണൂര്‍ ഇരിവേശി കുനിയന്‍ പുഴ അരിക്കമല ചേക്കോട്ടു വീട്ടില്‍ ഹിതേഷ് മാത്യുവിനെയാണ് (കുട്ടായി, 30) അഡീഷണല്‍ ഡിസ്ട്രിക്ട് ആന്‍ഡ് സെഷന്‍സ് ജഡ്ജി ജി.പി. ജയകൃഷ്ണന്‍ ശിക്ഷിച്ചത്. വെച്ചൂച്ചിറ പോലീസ് 2020 മേയ് 17ന് രജിസ്റ്റര്‍ ചെയ്ത കേസിലാണ് ശിക്ഷ. ശിക്ഷ ഒരുമിച്ച് 20 വര്‍ഷം അനുഭവിച്ചാല്‍ മതിയാകും. പിഴത്തുക കുട്ടിക്ക് നല്‍കണം. വെച്ചൂച്ചിറ പോലീസ് ഇന്‍സ്‌പെക്ടറായിരുന്ന ആര്‍ സുരേഷാണ് എഫ്‌ഐആര്‍ രജിസ്റ്റര്‍ ചെയ്ത് അന്വേഷണം നടത്തി പ്രതിയെ അറസ്റ്റ് ചെയ്ത് കോടതിയില്‍ കുറ്റപത്രം സമര്‍പ്പിച്ചത്. അന്ന് വനിതാ പോലീസ് സ്റ്റേഷന്‍ എസ്‌ഐ ആയിരുന്ന സാലി ജോണ്‍ കുട്ടിയുടെ മൊഴി രേഖപ്പെടുത്തുകയും ചെയ്തു. ബലാല്‍സംഗത്തിനും പോക്സോ നിയമത്തിലെ വിവിധ വകുപ്പുകള്‍ പ്രകാരവും കുറ്റക്കാരനെന്ന് കണ്ടെത്തി കോടതി പ്രത്യേകം പ്രത്യേകം കാലയളവ് ശിക്ഷ വിധിക്കുകയായിരുന്നു. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടര്‍മാരായ ജെയ്സണ്‍ മാത്യൂസ്, സ്മിത പി. ജോണ്‍ കോടതിയില്‍ ഹാജരായി.

കാടിറങ്ങിയ ആനകൾ തിരികെ പോകുന്നില്ല; കല്ലേലിയിൽ ജനം ഭീതിയിൽ

കോന്നി: നടവത്തുംമൂഴി വനമേഖലയിൽ നിന്നും തീറ്റ തേടി കാടിറങ്ങിയ വന്യമൃഗങ്ങൾ ജനവാസ മേഖലകളോട് ചേർന്ന് നിലയുറപ്പിച്ചതോടെ കല്ലേലി, അരുവാപ്പുലം മേഖലകളിലെ ജനങ്ങൾ ഭീതിയിലായി. കൊക്കാത്തോട്ടിൽ നിന്നും കോന്നിക്കുള്ള യാത്രയിലാണ് വന്യമൃഗഭീഷണി ഏറെയും നേരിടേണ്ടി വരുന്നത്. മഴ ശക്തമാകുന്നതിനു മുന്നേ കാടിറങ്ങിയ കാട്ടാനകൾ സമീപത്തേ റബർ എസ്റ്റേറ്റുകളിലും സ്വകാര്യ വ്യക്തികളുടെ സ്ഥലങ്ങളിലുടെയുമാണ് സഞ്ചരിക്കുന്നത്. തേക്കു കുപ്പുകളും ഇവരുടെ വാസകേന്ദ്രങ്ങളാണ്. മഴ കനത്തതോടെ അച്ചൻകോവിലാറ്റിൽ ജലനിരപ്പ് ഉയരുകയും തോടുകൾ നിറഞ്ഞ് ഒഴുകുകയും ചെയ്തതോടെയാണ് കാടിറങ്ങിയ മൃഗങ്ങളിൽ പലതും കാടിനു പുറത്തായത്. വീടുകൾക്കും കൃഷിയിടങ്ങൾക്കും നാശം വരുത്തുന്ന വന്യമൃഗങ്ങൾ പ്രധാന പാത കൈയടക്കി ഇതുവഴിയുള്ള യാത്രക്കാരെ ആക്രമിക്കാനെത്തുന്നതും സർവ സാധാരണമായിട്ടുണ്ട്. ഏതാനും ദിവസങ്ങൾക്ക് മുമ്പ് ഇതുവഴി കോന്നിക്ക് ഇരുചക്ര വാഹനത്തിൽ എത്തിയ അമ്മയും മകളും രക്ഷപ്പെട്ടത് അദ്ഭുതകരമായാണ്. ഇതിനും ഏതാനം ദിവസങ്ങൾക്ക് മുമ്പ് കല്ലേലി കാവിലേക്ക് പൂക്കളുമായി എത്തിയ യുവാവിന്‍റെ ബൈക്കിൽ പന്നി വന്നിടിച്ച് ഇദ്ദേഹത്തിന് ഗുരുതരമായ പരിക്കേറ്റിരുന്നു. പലവിധ ശസ്ത്രക്രിയകൾ നടത്തിയ ഈ വ്യാപാരിയുടെ ആരോഗ്യം ഇതുവരെ സാധാരണ നിലയിൽ എത്തിയിട്ടില്ല. ഇതേ ഭാഗത്ത് കഴിഞ്ഞ മൂന്നു ആഴ്ചകൾ മുമ്പ് ആനക്കൂട്ടങ്ങൾ റോഡ് കൈയടക്കി നിന്നതും യാത്രയെ തടസപ്പെടുത്തിയ സംഭവമായിരുന്നു. വന്യമൃഗങ്ങൾ കാടിറങ്ങുന്നത് തടയാൻ വനം വകുപ്പ് യാതൊരു പരിഹാര മാർഗങ്ങളും സ്വീകരിച്ചിട്ടില്ല. ഇരുപതിലധികം പേർക്ക് ഈ പാതയിൽ പല ഘട്ടങ്ങളിലായി വന്യമൃഗ ആക്രമണം നേരിടേണ്ടി വന്നിട്ടുണ്ട്. പന്നി ശല്യത്താൽ അരുവാപ്പുലം ഗ്രാമം നിരന്തരം ഭീഷണി നേരിടുകയാണ്. വീട്ടുമുറ്റത്ത് കിടന്ന പന്നി ഓടി അടുത്തതിനെത്തുടർന്ന് വീണ് ഏഴുപത്തിയഞ്ചുകാരിക്ക് പരിക്കേറ്റിരുന്നു.

പെരുന്തേനരുവി ടൂറിസം; ഏഴുകോടി രൂപ അനുവദിച്ചതായി എംഎൽഎ

റാന്നി:പെരുന്തേനരുവി ടൂറിസം പദ്ധതിയുടെ വികസനത്തിനായി ഏഴു കോടി രൂപ അനുവദിച്ചതായി അഡ്വ പ്രമോദ് നാരായൺ എംഎൽഎ അറിയിച്ചു. കഴിഞ്ഞ നവ കേരള സദസിന് എംഎൽഎ മുഖ്യമന്ത്രിക്ക് സമർപ്പിച്ച വികസന പദ്ധതികളുടെ പട്ടികയിൽ നിന്നാണ് പെരുന്തേനരുവി ടൂറിസം പദ്ധതി തെരഞ്ഞെടുത്തത്. പെരുന്തേനരുവി ടൂറിസം പദ്ധതിക്ക് തുക അനുവദിച്ചതോടെ റാന്നി നിയോജക മണ്ഡലത്തിന്‍റെ ടൂറിസം സ്വപ്നങ്ങൾക്കാണ് ചിറകേറിയിരിക്കുന്നത്. പമ്പാനദിയിലെ പെരുന്തേനരുവി വെള്ളച്ചാട്ടം കേന്ദ്രീകരിച്ചുള്ള ബൃഹത്തായ ടൂറിസം പദ്ധതിയാണ് ആസൂത്രണം ചെയ്തിരിക്കുന്നത്. വെച്ചൂച്ചിറ, നാറാണംമൂഴി പഞ്ചായത്തുകൾ അതിർത്തി പങ്കിടുന്ന പമ്പാനദിയിലെ പെരുന്തേനരുവി വെള്ളച്ചാട്ടം കേന്ദ്രീകരിച്ചുള്ള പെരുന്തേനരുവി ടൂറിസം പദ്ധതിയുടെ വികസനം ഇരു പഞ്ചായത്തുകളുടെയും സമഗ്ര വികസനത്തിന് വഴി തെളിക്കും. ഇപ്പോൾ തന്നെ ദിവസേന നൂറുകണക്കിന് സഞ്ചാരികളാണ് ഇവിടെയെത്തി പ്രകൃതിയുടെ വന്യ സൗന്ദര്യം ആസ്വദിച്ചു പോകുന്നത്. മുൻ സർക്കാരുകളുടെ കാലത്ത് ഇവിടെ വാഹനങ്ങൾക്കുള്ള പാർക്കിംഗ് ഗ്രൗണ്ട് , കുട്ടികളുടെ കളി സ്ഥലം, അരുവിലേക്ക് ഇറങ്ങാനുള്ള പടിക്കെട്ടുകൾ, കൈവരികൾ, രണ്ട് കെട്ടിടങ്ങൾ, വെള്ളച്ചാട്ടം ദൂരെ നിന്ന് വീക്ഷിക്കാനുള്ള സംവിധാനങ്ങൾ എന്നിവയെല്ലാം ഒരുക്കിയിട്ടുണ്ട്. അരുവിയിലേക്ക് വളഞ്ഞ് വാഹനം ഇറങ്ങുന്ന റോഡിലെ കൊടും വളവും കുത്തിറക്കവും വീതി കൂട്ടി സൗകര്യപ്രദമാക്കിയിട്ടുണ്ട്. അമിനിറ്റി സെന്‍ററും ഭക്ഷണശാലയും താമസിക്കാനുള്ള മുറികളും ഇപ്പോൾ ഇവിടെ നിലവിലുണ്ട്. ടൂറിസം പദ്ധതിയുടെ സമഗ്ര വികസനമാണ് പുതുതായി ലക്ഷ്യമിടുന്നത്. വെള്ളച്ചാട്ടം തൊട്ടുമുകളിൽ നിന്നും കാണത്തക്ക വിധമുള്ള കണ്ണാടി നടപ്പാലം, സുരക്ഷാ സംവിധാനങ്ങൾ, പൂന്തോട്ടം, പ്രകൃതിയുടെയും നദിയുടെയും സൗന്ദര്യം ആസ്വദിച്ചുകൊണ്ട് നദീതീരത്തുകൂടിയുള്ള നടപ്പാത എന്നിവയെല്ലാം പദ്ധതിയിൽ വിഭാവനം ചെയ്യുന്നുണ്ട്. ഒരു വർഷം കൊണ്ട് നിർമ്മാണം പൂർത്തിയാക്കാനാണ് ഉദ്ദേശിക്കുന്നത്. ടൂറിസം വകുപ്പിന് ആണ് നിർമ്മാണ ചുമതല. പഞ്ചായത്തും ഇറിഗേഷൻ വകുപ്പും സ്ഥലം ലഭ്യമാക്കുന്നതോടെ നിർമ്മാണം ആരംഭിക്കാനാകും.

റിപ്പബ്ലിക്കൻ ഹയർ സെക്കൻഡറി സ്കൂളിന് ഇത് അഭിമാന നിമിഷം

കോന്നി: റിപ്പബ്ലിക്കൻ ഹയർ സെക്കൻഡറി സ്കൂളിന് ഇത് അഭിമാന നിമിഷം. ഹെഡ്മാസ്റ്റർ പദവിയിൽ നിന്ന് ഇന്നലെ വിരമിച്ച പ്രധാന അധ്യാപകൻ ശ്രീകുമാർ സർ അതേ പദവി പ്രിയ സഹോദരന് കൈമാറിയാണ് പടിയിറങ്ങിയത്. അറിവിന്‍റെ ദീപം കൊളുത്തി അനേകം കുട്ടികളുടെയും അധ്യാപകരുടെയും മനസിൽ വെളിച്ചമായി, കാലങ്ങളായി നിലകൊണ്ട അധ്യാപകനാണ് ഇദ്ദേഹം. ഒപ്പം ജോലി ചെയ്യാനും തുടർന്ന് അതേ പദവി സഹോദരന് കൈ മാറാനും ലഭിച്ച ഭാഗ്യനിമിഷങ്ങളുടെ ആഹ്ലാദത്തിലുമാണ് ശ്രീകുമാർ സ്കൂൾ പടവുകൾ ഇറങ്ങിയത്. ജ്യേഷ്ഠനിൽ നിന്നും അധികാരം ഏറ്റെടുക്കുന്ന നിമിഷങ്ങൾ സഹോദരൻ സുരേഷിനും ധന്യ നിമിഷങ്ങളായി. കഴിഞ്ഞ ഏറെ വർഷങ്ങളായി ഒന്നിച്ച് ഒരേ വിദ്യാലത്തിന്‍റെ ഉയർച്ചയ്ക്കായി ഒപ്പം നിന്നവരിൽ ഒരാൾ ഒദ്യോഗിക പദവി വിട്ടൊഴിഞ്ഞെങ്കിലും ഇനിയുള്ള ദിനങ്ങളിലും വിദ്യാലയത്തിന്‍റെ നല്ല ഭാവിക്കായി ഒപ്പം ഉണ്ടാകുമെന്ന് ഉറപ്പും നൽകിയാണ് ഓദ്യോഗിക പദവികൾ വിട്ടൊഴിഞ്ഞത്. നല്ലൊരു ദിനത്തിലെ അവസാന പാഠം കുറിച്ചുകൊണ്ട്, അതേ സ്ഥാനത്തേക്ക് ആത്മസ്നേഹത്തോടെ കൈപിടിച്ചു കയറ്റുന്നത് പ്രീയപ്പെട്ട അനുജന് തന്നേക്കാൾ മികവോടെ വിദ്യാലയം മുന്നോട്ട് കൊണ്ടുപോകാനകട്ടേയെന്നും ശ്രീകുമാർ ആശംസിച്ചു.സ്‌കൂളിന്‍റെ ഉജ്ജ്വലതക്കും പെരുമയ്ക്കും ഈ സഹോദരങ്ങളുടെ സംഭാവന വിസ്മരിക്കാനാകാത്തതാണെന്ന് മാനേജ്മെന്‍റ് പ്രതിനിധികൾ പറഞ്ഞു.

വെള്ളംകയറി ഒറ്റപ്പെട്ടുപോയ കുടുംബത്തെ ഫയര്‍ഫോഴ്‌സ് രക്ഷിച്ചു

തിരുവല്ല: തിരുവല്ലയിലെ പെരിങ്ങരയില്‍ വെള്ളപ്പൊക്കത്തില്‍ ഒറ്റപ്പെട്ടുപോയ വീട്ടില്‍ നിന്നും വയോധിക അടക്കമുള്ള ആറംഗ കുടുംബത്തെ അഗ്‌നി രക്ഷാസേനയെത്തി രക്ഷപ്പെടുത്തി. പെരിങ്ങര പഞ്ചായത്ത് പതിനാലാം വാര്‍ഡില്‍ ചാത്തങ്കരി വൈഎംസിഎയ്ക്കു സമീപം പുതുപ്പറമ്പില്‍ വീട്ടില്‍ റോസമ്മ ആന്‍ഡ്രൂസ് (86 ), മക്കളായ ആലീസ് രാജു (53), ജോയ് മോന്‍ (46), ജോയിയുടെ ഭാര്യ ജോളി ജോയ്, ജോയ് മോന്‍റെ മക്കളായ ജോയല്‍ ജോയ് (14), റീമ ജോയ് (15) എന്നിവരെയാണ് ഇന്നലെ ഉച്ചയ്ക്ക് 12 ഓടെ തിരുവല്ലയില്‍ നിന്നും എത്തിയ അഗ്‌നിരക്ഷാസേന ഉദ്യോഗസ്ഥര്‍ ചേര്‍ന്ന് രക്ഷപ്പെടുത്തിയത്. പ്രധാന റോഡില്‍ നിന്നും ഒരു കിലോമീറ്ററോളം അകലെയുള്ള വീട്ടില്‍ നിന്നും ഡിങ്കി ബോട്ട് ഉപയോഗിച്ചാണ് രക്ഷാപ്രവര്‍ത്തനം നടത്തിയത്. അഗ്‌നി രക്ഷാ സേന ഉദ്യോഗസ്ഥര്‍ സുരക്ഷിതരായി പൊടിയാടിയില്‍ എത്തിച്ച കുടുംബം ബന്ധുവീട്ടിലേക്ക് പോയി.

പമ്പാതീരത്ത് വെള്ളപ്പൊക്കം തുടരുന്നു, വ്യാപക കൃഷിനാശം

കോഴഞ്ചേരി: തോരാമഴയില്‍ ജലനിരപ്പ് ഉയര്‍ന്ന് പമ്പാ തീരം മുങ്ങിയതോടെ വ്യാപക കൃഷിനാശവും. നദീതീരത്തെയും സമീപ സ്ഥലങ്ങളിലെയും കൃഷിയിടങ്ങള്‍ മുഴുവന്‍ വെള്ളത്തിനടിയിലായി. നാമമാത്ര, ചെറുകിട കര്‍ഷകരുടെ ജീവിതമാണ് ഏറെ ദുരിതത്തിലാക്കിയിരിക്കുന്നത്. ഗ്രാമപ്രദേശങ്ങളില്‍ പാട്ടത്തിനും മറ്റും സ്ഥലമെടുത്ത കൃഷി ചെയ്യുന്നവര്‍ക്കാണ് ഏറെ നഷ്ടമുണ്ടായിരിക്കുന്നത്. ഇന്‍ഷ്വറന്‍സ് പരിരക്ഷകളൊന്നും ഇല്ലാതെയാണ് പലരും കൃഷി നടത്തുന്നത്. സ്വന്തനിലയില്‍ മരച്ചീനിയും വാഴയും മറ്റ് ഇടവിള കൃഷികളും ചെയ്തിരുന്ന കര്‍ഷകരാകെ നഷ്ടത്തിലായി. കോയിപ്രം പഞ്ചായത്തിലെ പുല്ലാട് , പൂവത്തൂർ, കോയിപ്രം പ്രദേശങ്ങളിലെ കര്‍ഷക്കാര്‍ക്കാണ് ഏറെ നഷ്ടം ഉണ്ടായിരിക്കുന്നത്. പന്നികളുടെയും മറ്റും ശല്യങ്ങളുണ്ടാകാതിരിക്കാന്‍ വേലികളും മറ്റും നിര്‍മിച്ചാണ് കൃഷികള്‍ നടത്തിയിരുന്നത്. രാസവളം ഉപയോഗിക്കാതെ പരമ്പരാഗത രീതിയില്‍ നടന്നുവന്ന പച്ചക്കറി കൃഷിയും വെള്ളത്തിലായി. മൂന്നു ദിവസത്തോളം കൃഷിയിടങ്ങളില്‍ വെള്ളം കെട്ടി നില്‍ക്കുന്നതിനാല്‍ വാഴയും കപ്പയും ചേമ്പും ചേനയും പച്ചക്കറികളും നശിച്ചു പോകും. മഴ വെള്ളിയാഴ്ച രാത്രിയും ഇന്നലെ രാവിലെയും ശക്തമായി തുടര്‍ന്നതോടെ പമ്പയില്‍ ജലനിരപ്പില്‍ കാര്യമായ വ്യതിയാനം ഉണ്ടായിട്ടില്ല. എഴിക്കാട് കോളനിയിലെ വീടുകളില്‍ നിന്നു വെള്ളം ഇറങ്ങിയിട്ടില്ല. ആറന്മുള പഞ്ചായത്തിലെ താഴ്ന്ന പ്രദേശങ്ങളിലും ഇന്നലെ വെള്ളം കയറി. ആറന്മുള എന്‍ജിനിയറിംഗ് കോളജ് പരിസരത്തും റോഡിലും കച്ചേരിപ്പടി ജംഗ്ഷനു സമീപമുള്ള പ്രദേശങ്ങളിലുമാണ് വെള്ളം കയറിയത്.

മഴയ്ക്കു നേരിയ ശമനം; കെടുതികള്‍ പടിഞ്ഞാറന്‍ മേഖലയിലേക്ക്

250 വീടുകള്‍ ഭാഗികമായി തകര്‍ന്നു, 3.27 കോടിയുടെ കൃഷിനാശം പത്തനംതിട്ട: തുടര്‍ച്ചയായ മഴയ്ക്കു നേരിയ ശമനമെങ്കിലും കെടുതികള്‍ക്ക് അറുതിയില്ല. കിഴക്കന്‍ മേഖലയിലെ വെള്ളം പടിഞ്ഞാറേക്ക് ഒഴുകിയെത്തിയതോടെ കോഴഞ്ചേരി, തിരുവല്ല താലൂക്കുകളിലെ കെടുതികള്‍ക്ക് അറുതിയില്ല. അപ്പര്‍ കുട്ടനാട് മേഖല പൂര്‍ണമായി മുങ്ങി. തിരുവല്ല താലൂക്കിന്‍റെ പടിഞ്ഞാറന്‍ മേഖലയിലെ റോഡുകളിലടക്കം വെള്ളം കയറിയതോടെ യാത്ര പൂര്‍ണമായി തടസപ്പെട്ടു. വീടുകളില്‍ വെള്ളം കയറിയതോടെ ജനജീവിതം ദുസഹമായി. ജില്ലയിലെ ആറ് താലൂക്കുകളിലായി 250 വീടുകള്‍ ഭാഗികമായി തകര്‍ന്നു. അടൂര്‍ 72, തിരുവല്ല 56, റാന്നി 38, കോഴഞ്ചേരി 37, കോന്നി 25, മല്ലപ്പള്ളി 22 എന്നിങ്ങനെയാണ് കണക്ക്. കോഴഞ്ചേരി, അടൂര്‍ താലൂക്കുകളില്‍ രണ്ടു വീതം വീടുകള്‍ പൂര്‍ണമായി തകര്‍ന്നു. തിരുവല്ല താലൂക്കില്‍ 12, കോഴഞ്ചേരി, കോന്നി, അടൂര്‍ താലൂക്കുകളില്‍ 10, റാന്നി താലൂക്കില്‍ ഒമ്പത്, മല്ലപ്പള്ളി താലൂക്കില്‍ ഏഴ് എന്നിങ്ങനെയാണ് മഴക്കെടുതി ബാധിച്ച വില്ലേജുകൾ. ശക്തമായ കാറ്റിലും മഴയിലും ജില്ലയിലെ മൂന്ന് സെക്‌ഷനുകളിലായി കെഎസ്ഇബിയ്ക്ക് 80.89 ലക്ഷം രൂപയുടെ നഷ്ടം. 149 ഹൈടെന്‍ഷന്‍ പോസ്റ്റും 816 ലോടെന്‍ഷന്‍ പോസ്റ്റും തകര്‍ന്നു. 1069 ട്രാന്‍സ്‌ഫോര്‍മറുകളും തകരാറിലായി. കനത്ത മഴയിലും കാറ്റിലും ജില്ലയില്‍ ഇതുവരെ 3.27 കോടി രൂപയുടെ കൃഷി നാശം ഉണ്ടായി. 90.75 ഹെക്ടര്‍ സ്ഥലത്ത് വിവിധ കാര്‍ഷിക വിളകള്‍ നശിച്ചു. 2018 കര്‍ഷകര്‍ക്കാണ് നാശനഷ്ടമുണ്ടായത്. നെല്ല്, വാഴ, റബര്‍ എന്നിവയെയാണ് കൂടുതല്‍ ബാധിച്ചത്. ഇതില്‍ തന്നെ ഏത്തവാഴകൃഷിക്കു വ്യാപക നഷ്ടമുണ്ടായി. വെള്ളം കയറിയ പ്രദേശങ്ങളില്‍ വാഴ, മരച്ചീനി, പച്ചക്കറി കൃഷികള്‍ നഷ്ടപ്പെട്ടു. ഇവയുടെ കണക്കെടുപ്പ് പൂര്‍ണമായിട്ടില്ല. 38 ദുരിതാശ്വാസ ക്യാമ്പുകൾ‌, ക്യാമ്പുകളില്‍ 893 പേര്‍ പത്തനംതിട്ട: മഴ തുടരുന്ന സാഹചര്യത്തില്‍ പത്തനംതിട്ട ജില്ലയില്‍ 38 ദുരിതാശ്വാസ ക്യാമ്പുകള്‍ തുറന്നു. തിരുവല്ല താലൂക്കില്‍ 27, കോഴഞ്ചേരി താലൂക്കില്‍ ആറ്, മല്ലപ്പള്ളി താലൂക്കില്‍ മൂന്ന്, കോന്നി, അടൂര്‍ താലൂക്കുകളില്‍ ഓരോ ക്യാമ്പുമാണുള്ളത്. 257 കുടുംബങ്ങളിലായി 377 പുരുഷന്മാരും 387 സ്ത്രീകളും 129 കുട്ടികളുമുള്‍പ്പെടെ 893 പേരാണ് ക്യാമ്പിലുള്ളത്. കോഴഞ്ചേരി താലൂക്കില്‍ ആറന്മുള എന്‍എംയുപി സ്‌കൂള്‍, ആറാട്ടുപുഴ സര്‍ക്കാര്‍ യുപിഎസ്, നാല്‍ാലിക്കല്‍ എംടിഎല്‍പിഎസ്, വല്ലന എസ്എന്‍ഡിപി യുപിഎസ്, മല്ലപ്പുഴശേരി കുറുന്താര്‍ സാംസ്‌കാരിക നിലയം, ഓന്തേക്കാട് എംടിഎല്‍പിഎസ് ക്യാമ്പുകളിലായി 19 കുടുംബങ്ങളിലെ 55 പേരാണുള്ളത്. മല്ലപ്പള്ളി താലൂക്കില്‍ വെണ്ണിക്കുളം സെന്റ് ബഹനാന്‍സ് യുപിഎസ്, ആനിക്കാട് പിആര്‍ഡിഎസ് സ്‌കൂൾ, കീഴ്വായ്പൂര്‍ സര്‍ക്കാര്‍ വിഎച്ച്എച്ച്എസ് എന്നിവിടങ്ങളിലായി അഞ്ച് കുടുംബങ്ങളിലെ 22 പേര്‍ ക്യാമ്പിലുണ്ട്. കോന്നി താലൂക്കില്‍ തണ്ണിത്തോട് പകല്‍വീട് ഒരു കുടുംബത്തിലെ നാല് പേരും അടൂര്‍ താലൂക്കില്‍ പന്തളം മുടിയൂര്‍ക്കോണം എംടിഎല്‍പി സ്‌കൂളില്‍ ഒരു കുടുംബത്തിലെ രണ്ടു പേരുമാണുള്ളത്. 231 കുടുംബത്തിലെ 810 പേരാണ് തിരുവല്ല താലൂക്കിലെ ക്യാമ്പുകളിലുള്ളത്. മല്ലപ്പള്ളി സിഎംഎസ് എച്ച്എസ്എസ് സ്‌കൂളിലെ ക്യാമ്പ് താത്കാലികമായി അടച്ചു. കുരുമ്പന്‍മൂഴിയിലെ അഞ്ച് കുടുംബങ്ങളെ മാറ്റിപ്പാര്‍പ്പിക്കാന്‍ തുക അനുവദിച്ചു റാന്നി: കുരുമ്പന്‍മൂഴിയിലെ താമസക്കാരായിരുന്ന അഞ്ച് പട്ടികവര്‍ഗ കുടുംബങ്ങളെ മാറ്റിപാര്‍പ്പിക്കുന്നതിന് മുഖ്യമന്ത്രിയുടെ ദുരിതാശ്വാസനിധിയില്‍ നിന്നും ഫണ്ട് അനുവദിച്ചതായി പ്രമോദ് നാരായണ്‍ എംഎല്‍എ അറിയിച്ചു. 2021ഒക്ടോബറില്‍ പെയ്ത കനത്ത മഴയേ തുടര്‍ന്ന് ഉരുള്‍പ്പൊട്ടല്‍ ഉണ്ടായി വീടും വസ്തുവും നഷ്ടപ്പെട്ട അഞ്ചു കുടുംബങ്ങള്‍ക്കാണ് ഫണ്ട് അനുവദിച്ചിരിക്കുന്നത്. ഓരോ കുടുംബത്തിനും 10 ലക്ഷം രൂപ വീതം 50 ലക്ഷം രൂപയാണ് അനുവദിച്ചിരിക്കുന്നത്. കുരുമ്പന്‍മൂഴി സ്വദേശികളായ പൂവത്തുംമൂട്ടില്‍ സത്യൻ. കറുത്തേടത്ത് വീട്ടില്‍ ഷൈനി, പൂവത്തുംമൂട്ടില്‍ രാഘവൻ, പൂവത്തുമൂട്ടില്‍ സരിത, ആഞ്ഞിലിമൂട്ടില്‍ സാവിത്രി എന്നിവര്‍ക്കാണ് തുക അനുവദിച്ചത്. ഇവര്‍ നേരത്തെ താമസിച്ചിരുന്ന കുരുമ്പന്‍മൂഴിയില്‍ വീണ്ടും ഉരുള്‍പൊട്ടലിനും മണ്ണിടിച്ചിലും സാധ്യത ഉള്ളതിനാലും മഴയത്ത് അവരുടെ വീടിന് സമീപത്തു കൂടിയുള്ള തോട് കരകവിഞ്ഞും ഗതിമാറിയും ഒഴുകിയും പാറക്കല്ലുകള്‍ ഉള്‍പ്പെടെ പതിച്ചും അപകടം ഉണ്ടാകാന്‍ സാധ്യത ഉള്ളതിനാലും ഇവരെ മാറ്റിപ്പാര്‍പ്പിക്കേണ്ടതാണെന്ന് മൈനിംഗ് ആന്‍ഡ് ജിയോളജി വകുപ്പില്‍ നിന്നും അറിയിപ്പ് ലഭിച്ചിരുന്നു. ഇതിന്റെ അടിസ്ഥാനത്തില്‍ 2021 മുതല്‍ വീട് വാടകയ്ക്ക് എടുത്ത് സര്‍ക്കാര്‍ തന്നെ ഇവരെ താത്കാലികമായി മാറ്റി താമസിപ്പിച്ചിരിക്കുകയായിരുന്നു. ജില്ലാ വികസന സമിതിയുടെ അനുമതിയോടെ കോര്‍പ്പസില്‍ ഫണ്ടില്‍ നിന്നുമാണ് ഇവര്‍ക്ക് വാടക നല്‍കി വന്നത്. തുടര്‍ന്നാണ് ഇപ്പോള്‍ കുടുംബങ്ങളെ സ്ഥിരമായി മാറ്റിപ്പാര്‍പ്പിക്കുന്നത്. അപ്പര്‍കുട്ടനാട് ഒറ്റപ്പെട്ടു; ഏറെപ്പേരും ക്യാമ്പുകളില്‍ തിരുവല്ല: താലൂക്കിലെ പടിഞ്ഞാറന്‍ മേഖലയില്‍ വെള്ളം കയറിയതോടെ ഏറെപ്പേരും ദുരിതാശ്വാസ ക്യാമ്പുകളിലായി. തിരുവല്ല താലൂക്കില്‍ 27 ക്യാമ്പുകളിലായി 231 കുടുംബത്തിലെ 810 പേരാണ് ദുരിതാശ്വാസ ക്യാമ്പുകളിലുള്ളത്. പത്തനംതിട്ട ജില്ലയില്‍ ഏറ്റവുമധികം ദുരിതാശ്വാസ ക്യാമ്പുകളുള്ളതും തിരുവല്ലയിലാണ്. തിരുവല്ല നഗരസഭ, കുറ്റൂർ, പെരിങ്ങര, നെടുമ്പ്രം, നിരണം, കടപ്ര ഗ്രാമപഞ്ചായത്തുകള്‍ പ്രളയക്കെടുതിയിലാണ്. പെരിങ്ങര, നെടുമ്പ്രം, നിരണം പഞ്ചായത്തുകളിലെ ഏറെക്കുറെ എല്ലാ പ്രദേശങ്ങളും ഒറ്റപ്പെട്ട നിലയിലാണ്. അമ്പലപ്പുഴ - തിരുവല്ല പാതയില്‍ വെള്ളം കയറി ഗതാഗതം തടസപ്പെട്ടിരിക്കുകയാണ്. ഗ്രാമീണ റോഡുകളിലെല്ലാം വെള്ളം കയറി. പടിഞ്ഞാറന്‍ മേഖലയിലേക്കുള്ള പൊതുഗതാഗത സംവിധാനങ്ങള്‍ നിലച്ചു. തിരുവല്ല - കായംകുളം പാതയിലും പലയിടത്തും വെള്ളക്കെട്ടുണ്ട്. കിഴക്കന്‍ വെള്ളത്തിന്‍റെ വരവ് കുറഞ്ഞിട്ടില്ലെന്നതിനാല്‍ വരുംദിവസങ്ങളിലും അപ്പര്‍കുട്ടനാട്ടില്‍ ദുരിതങ്ങള്‍ ഏറും.

മഴക്കെടുതി പ്രദേശങ്ങൾ ഡെപ്യൂട്ടി സ്പീക്കര്‍ സന്ദര്‍ശിച്ചു

പന്തളം: മഴക്കെടുതിയില്‍ അടിയന്തരസഹായം നല്‍കാന്‍ നടപടി സ്വീകരിക്കുമെന്ന് നിയമസഭാ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ പറഞ്ഞു. അടൂര്‍ മണ്ഡലത്തില്‍ 62 വീടുകള്‍ക്ക് നാശനഷ്ടം സംഭവിച്ചു. രണ്ടു വീട് പൂര്‍ണമായി തകര്‍ന്നു. വെള്ളം കയറിയ വീടുകളിലെ കുടുംബങ്ങളെ മാറ്റിപ്പാര്‍പ്പിക്കാന്‍ ദുരിതാശ്വാസ ക്യാമ്പ് ആരംഭിക്കാന്‍ നിര്‍ദേശം നല്‍കി. പന്തളത്ത് വെള്ളം കയറിയ നാതനടി, പുതുമന ഭാഗങ്ങള്‍ ഡെപ്യൂട്ടി സ്പീക്കര്‍ സന്ദര്‍ശിച്ചു. കൗണ്‍സിലര്‍മാരായ സുശീല സന്തോഷ്, അരുണ്‍ കുമാര്‍, ഉദ്യോഗസ്ഥര്‍ തുടങ്ങിയവര്‍ ഒപ്പമുണ്ടായിരുന്നു.

വാഴമുട്ടത്ത് കുരിശടിയുടെ ഗ്ലാസ് തകർത്തു

വാഴമുട്ടം: മാർ ബഹനാൻ ഓർത്തഡോക്സ് ദേവാലയത്തിന്‍റെ വാഴമുട്ടം സ്കൂൾ ജംഗ്ഷനിലുള്ള സെന്‍റ് മേരീസ് കുരിശടിയുടെ ഗ്ലാസ് ചില്ലുകൾ തകർത്ത നിലയിൽ. ഇന്നലെ പുലർച്ചെ 3.50നോടനുബന്ധിച്ചാണ് ഗ്ലാസുകൾ തകർത്തതെന്ന് സമീപവാസികൾ പറഞ്ഞു. ഓട്ടോറിക്ഷയിൽ എത്തിയവരാണ് ഗ്ലാസ്‌ ആക്രമണം നടത്തിയത്. സിസിടിവിയിൽ ഓട്ടോറിക്ഷയുടെ ചിത്രം വ്യക്തമായി പതിഞ്ഞിട്ടുണ്ട്. പ്രദേശത്തെ സമാധാനാന്തരീക്ഷവും മതസൗഹാർദവും തകർക്കാനുള്ള ഗൂഢലക്ഷ്യമാണ് സംഭവത്തിനു പിന്നിലെന്ന് പറയുന്നു. ഇടവകയുടെ പരാതിയിൽ പത്തനംതിട്ട പോലീസ് കേസെടുത്ത് അന്വേഷണം ആരംഭിച്ചു. കഴിഞ്ഞദിവസം വാര്യാപുരം ഓർത്തഡോക്സ് ദേവാലയത്തിനു നേരെയും ഇത്തരത്തിൽ ആക്രമണം നടന്നിരുന്നു. പോലീസിന്‍റെ പെട്രോളിംഗ് ശക്തമാക്കണമെന്നാണ് നാട്ടുകാരുടെ ആവശ്യം. സംഭവത്തിൽ ഇടവക മാനേജിംഗ് കമ്മിറ്റി പ്രതിഷേധിച്ചു. വികാരി. ഫാ. ജോബിൻ പി. സജി, ട്രസ്റ്റി രാജ് ജോർജ്, സെക്രട്ടറി ഷാജി ജോർജ്, എന്നിവർ പ്രസംഗിച്ചു. ഭദ്രാസനാധിപൻ ഡോ. ഏബ്രഹാം മാർ സെറാഫിം, ഭദ്രാസന സെക്രട്ടറി ജോൺസൺ കല്ലിട്ടതിൽ കോർ എപ്പിസ്കോപ്പ, ഫാ. എബി ടി. സാമുവേൽ, ഭദ്രാസന കൗൺസിൽ അംഗങ്ങളായ ഫാ. ബിജു തോമസ്, ഐവാൻ വകയാർ തുടങ്ങിയവർ സ്ഥലം സന്ദർശിച്ചു.

അടൂരിൽ മരം വീണ് വീടുകൾ തകർന്നു

അടൂർ: വ്യാഴാഴ്ച രാത്രിയുണ്ടായ ശക്തമായ കാറ്റിൽ അടൂർ, ഏനാത്ത് ഭാഗങ്ങളിൽ മരങ്ങൾ കടപുഴകി വീണു നിരവധി വീടുകൾക്ക് കേടുപാടുകൾ സംഭവിച്ചു. വീടുകളിൽ ആളുകൾ ഉണ്ടായിരുന്നെങ്കിലും പരിക്കുകളില്ല. ഏഴംകുളം കൈതപ്പറമ്പിൽ കെജി ബംഗ്ലാവിൽ കെ.ജി. ജോർജിന്‍റെ വീടിന്‍റെ മുകളിലേക്ക് സമീപത്തു നിന്ന അഞ്ച് മരങ്ങൾ ഒന്നിച്ച് കടപുഴകി. വ്യാഴാഴ്ച രാത്രി ഒന്പതോടെയാണ് സംഭവം. വീട്ടുകാർ ഉള്ളിലുണ്ടായിരുന്നെങ്കിലും പരിക്കേൽക്കാതെ രക്ഷപ്പെട്ടു. അടൂരിൽനിന്നും ഫയർഫോഴ്സ് എത്തിയാണ് മരങ്ങൾ മുറിച്ചു മാറ്റിയത് . ഏനാത്ത് തെങ്ങുംവിളയിൽ സന്തോഷിന്‍റെ വീടിനു മുകളിലേക്കു മരം വീണ് മേൽക്കൂര പൂർണമായി തകർന്നു. കിഴക്കുപുറം സ്കൂളിന് സമീപം കാഞ്ഞിരവിള കിഴക്കേതിൽ കെ.ഒ. പാപ്പച്ചന്‍റെ വീടിനു മുകളിലേക്ക് സമീപപുരയിടത്തിൽ നിന്നും മരം ഒടിഞ്ഞു വീണു. വീടിന്‍റെ മേൽക്കൂരയിലും വശങ്ങളിലും നാശനഷ്ടമുണ്ടായി. ഒരാഴ്ച മുൻപ് നവീകരണം പൂർത്തിയായ വീടിനാണ് നാശനഷ്ടമുണ്ടായത്. ശക്തമായ കാറ്റിൽ മരം വീണ് വീടിന് നാശനഷ്ടം. കൈതപ്പറമ്പിൽ വേങ്ങവിളയിൽ സുധീഷിന്‍റെ വീടിനാണ് വൻ നാശനഷ്ടം ഉണ്ടായിരിക്കുന്നത്. തട്ട മങ്കുഴിയിൽ വീടിനു മുകളിലേക്ക് മൂന്ന് വൻ മരങ്ങൾ വീണു വീട്ടുകാർ അദ്ഭുതകരമായി രക്ഷപ്പെട്ടു. തട്ട മല്ലികയിൽ പ്രീതാ ഭവനത്തിൽ ശശികുമാറിന്‍റെ വീടിനു മുകളിലേക്കാണ് രണ്ട് ആഞ്ഞിലിമരങ്ങൾ, ഒരു പ്ലാവ് എന്നിവ കടപുഴകി വീണത്. സംഭവം സമയത്ത് വീട്ടുകാർ വീട്ടിനുള്ളിലുണ്ടായിരുന്നുവെങ്കിലും അദ്ഭുതകരമായി രക്ഷപ്പെട്ടു. വീടിനു തകരാറുകളുണ്ടായി. അടൂരിൽ നിന്നും ഫയർഫോഴ്സ് എത്തി മരം മുറിച്ചുമാറ്റി. വ്യാഴാഴ്ച രാത്രിയുണ്ടായ ശക്തമായ കാറ്റിലാണ് മരങ്ങൾ വീണത്. അടൂർ ഫയർ സ്റ്റേഷനിൽ നിന്നും സ്റ്റേഷൻ ഓഫീസർ വിനോദ് കുമാർ, സീനിയർ റെസ്ക്യൂ ഓഫീസർ അജിഖാൻ, യൂസഫ് എന്നിവരുടെ നേതൃത്വത്തിലായിരുന്നു രക്ഷാപ്രവർത്തനം.

2.52 കോടിയുടെ കൃഷിനാശം

ജില്ലയില്‍ ഇതേവരെ 2.52 കോടി രൂപയുടെ കൃഷി നാശമുണ്ടായി. 90.75 ഹെക്ടര്‍ സ്ഥലത്ത് വിവിധ കാര്‍ഷിക വിളകള്‍ നശിച്ചു. 1676 കര്‍ഷകര്‍ക്കാണ് നാശനഷ്ടമുണ്ടായത്. അടൂര്‍ ബ്ലോക്കിലാണ് കൂടുതല്‍ നാശം. 242 കര്‍ഷകര്‍ക്കായി 42.25 ലക്ഷം രൂപയുടെ നഷ്ടമുണ്ടായി. നെല്ല്, വാഴ, റബര്‍ എന്നിവയാണ് കൂടുതല്‍ നശിച്ചത്. ഇതിൽ തന്നെ കുലച്ചതും കുലയ്ക്കാത്തതുമായ ഏത്തവാഴകൾക്കാണ് നഷ്ടം ഏറെയും. ഏത്തവാഴകൾ നിലംപൊത്തിയതോടെ ഓണവിപണി അടക്കം ലക്ഷ്യമിട്ട് കൃഷി നടത്തിയവരാണ് പ്രതിസന്ധിയിലായത്. വെറ്റില, മരച്ചീനി, പച്ചക്കറികൾ എന്നിവയ്ക്കും വ്യാപകമായ നഷ്ടമുണ്ടായിട്ടുണ്ട്. വെള്ളപ്പൊക്ക കെടുതികൾ രൂക്ഷമായതോടെ കാർഷിക നഷ്ടവും കൂടും. വെള്ളം കയറിയ പ്രദേശങ്ങളിലെ വാഴ, മരച്ചീനി, പച്ചക്കറി കൃഷികളുടെ നാശനഷ്ടത്തോത് ഏറിയേക്കും. കാറ്റു മൂലമാണ് കഴിഞ്ഞദിവസങ്ങളിൽ ഏറെയും നഷ്ടങ്ങളുണ്ടായത്.

ജില്ലയില്‍ 18 ദുരിതാശ്വാസ ക്യാമ്പുകള്‍

പത്തനംതിട്ട: ശക്തമായ മഴ തുടരുന്ന സാഹചര്യത്തില്‍ പത്തനംതിട്ട ജില്ലയില്‍ 18 ദുരിതാശ്വാസ ക്യാമ്പുകള്‍ തുറന്നു. തിരുവല്ല താലൂക്കില്‍ 13ഉം കോഴഞ്ചേരി താലൂക്കില്‍ നാലും കോന്നി താലൂക്കില്‍ ഒരു ക്യാമ്പുമാണുള്ളത്. തിരുവല്ല താലൂക്കില്‍ തോട്ടപ്പുഴശേരി എംടിഎല്‍പി സ്‌കൂൾ, തോട്ടപ്പുഴശേരി ചെറുപുഷ്പം എല്‍ പി സ്‌കൂൾ, കുറ്റപ്പുഴ സെന്‍റ് തോമസ് സ്‌കൂള്‍, കുറ്റൂര്‍ സര്‍ക്കാര്‍ ഹൈസ്‌കൂൾ, നിരണം സെന്‍റ് ജോര്‍ജ് യുപിഎസ്, നിരണം സര്‍ക്കാര്‍ യുപിഎസ്, കോയിപ്രം കുമ്പനാട് ഗേള്‍സ് സ്‌കൂൾ, ഇരവിപേരൂര്‍ പഞ്ചായത്ത് കമ്യൂണിറ്റി ഹാൾ, ഇരവിപേരൂര്‍ എന്‍എസ്എസ് സ്‌കൂൾ, കാവുംഭാഗം വേങ്ങല്‍ ദേവമാതാ ഓഡിറ്റോറിയം, കാവുംഭാഗം ഇടിഞ്ഞില്ലം എല്‍പിഎസ്, കവിയൂര്‍ പടിഞ്ഞാറ്റുംശേരി സര്‍ക്കാര്‍ എല്‍പിഎസ്, കടപ്ര സെന്‍റ് ഫ്രാന്‍സിസ് സ്‌കൂള്‍, കോഴഞ്ചേരി താലൂക്കില്‍ ആറന്മുള എന്‍എംയുപി സ്‌കൂൾ, ആറാട്ടുപുഴ സര്‍ക്കാര്‍ യുപിഎസ്, കിടങ്ങന്നൂര്‍ വല്ലന എസ്എന്‍ഡിപി യുപിഎസ്, മല്ലപ്പുഴശേരി കുറുന്ത സാംസ്‌കാരിക നിലയം, കോന്നി താലൂക്കില്‍ തണ്ണിത്തോട് പകല്‍വീട് എന്നിവിടങ്ങളിലാണ് ക്യാമ്പ് പ്രവര്‍ത്തിക്കുന്നത്. 96 കുടുംബങ്ങളിലായി 138 പുരുഷന്മാരും 142 സ്ത്രീകളും 48 കുട്ടികളുമുള്‍പ്പെടെ 321 പേരാണ് ക്യാമ്പിലുള്ളത്. റോഡുകളിൽ വെള്ളം കയറി; റാന്നിയിലും വെള്ളപ്പൊക്കം റാന്നി: അതിശക്തമായ മഴയിൽ പന്പാനദി കരകവിഞ്ഞതിനു പിന്നാലെ റാന്നിയിൽ പലയിടത്തും വെള്ളം കയറി. നദിയിലേക്കുള്ള തോടുകളാണ് ആദ്യം കരകവിഞ്ഞത്. റാന്നി പുള്ളോലി ഭാഗത്ത് തോട് കരകവിഞ്ഞതോടെ വലിയകാവ് റോഡ് വെള്ളത്തിലായി. പുള്ളോലി, ചെട്ടിമുക്ക് ഭാഗങ്ങളിൽ വെള്ളം കയറി. സെന്‍റ് മേരീസ് സ്കൂൾ മുറ്റത്തും വെള്ളം നിറഞ്ഞു. റാന്നി മാമുക്കിലും പുളിമുക്കിലും വലിയതോട് കരകവിഞ്ഞു. കിഴക്കൻ വെള്ളത്തിന്‍റെ വരവു കൂടിയതുമൂലം കോസ്‌വേകൾ പൂർണമായി മുങ്ങിയിരിക്കുകയാണ്. പെരുനാടിന് സമീപം പമ്പയാറ്റിലെ മുക്കം കോസ് വേയിൽ വെള്ളം കയറി ഒഴുകുന്നതിനാൽ ഇന്നലെ ഇതുവഴിയുള്ള യാത്ര തടസപ്പെട്ടു. ബസുകൾ പൊയ്ക്കൊണ്ടിരുന്ന കോസ്‌വേ നാറാണംമൂഴി പഞ്ചായത്തിന്‍റെ തെക്കൻ പ്രദേശങ്ങളെ പെരുനാടുമായി ബന്ധിപ്പിക്കുന്ന പ്രധാന മാർഗമായിരുന്നു. പെരുന്തേനരുവി ജലാശയത്തിൽനിന്നും വെള്ളം കയറിക്കിടക്കുന്ന കുരുമ്പൻ മൂഴി കോസ് വേയിൽ ജലനിരപ്പ് വീണ്ടും ഉയർന്നു. പെരുന്തേനരുവി ഡാമിൽനിന്നുള്ള വെള്ളമൊഴുക്കും ശക്തിപ്പെട്ടു. 199 വീടുകൾക്ക് നാശനഷ്ടം കഴിഞ്ഞ ഒരാഴ്ചയ്ക്കിടെ മഴക്കെടുതിയിൽ ജില്ലയിൽ 199 വീടുകൾക്കു നാശനഷ്ടം. കോഴഞ്ചേരി, അടൂര്‍ താലൂക്കുകളില്‍ രണ്ടു വീതം വീടുകള്‍ പൂര്‍ണമായി തകര്‍ന്നു. ആറ് താലൂക്കുകളിലായി 197 വീടുകള്‍ ഭാഗികമായും തകര്‍ന്നു. തിരുവല്ല 53, റാന്നി 37, അടൂര്‍ 32, കോഴഞ്ചേരി 31, കോന്നി 22, മല്ലപ്പള്ളി 22 എന്നിങ്ങനെയാണ് കണക്ക്. കെഎസ്ഇബിക്കു നഷ്ടം കൂടുന്നു ശക്തമായ കാറ്റിലും മഴയിലും കെഎസ്ഇബിക്കും കനത്ത നഷ്ടം. ജില്ലയിലെ മൂന്ന് സെക്ഷനുകളിലായി 68.2 ലക്ഷം രൂപയുടെ നഷ്ടമുണ്ടായി. മരങ്ങള്‍ വീണ് 124 ഹൈടെന്‍ഷന്‍ പോസ്റ്റും 677 ലോടെന്‍ഷന്‍ പോസ്റ്റും തകര്‍ന്നു. 992 ട്രാന്‍സ്ഫോര്‍മറുകളും തകരാറിലായി. കഴിഞ്ഞ ഞായറാഴ്ച മുതൽ കെഎസ്ഇബി സെക്‌ഷനുകളിൽ ജീവനക്കാർക്ക് വിശ്രമമില്ലാത്ത ജോലിയാണ്. തുടർച്ചയായ കാറ്റാണ് നാശം ഏറെയും വിതച്ചത്. വൈദ്യുതി തകരാറുകൾ സമയബന്ധിതമായി പരിഹരിച്ചുവരികയാണെന്ന് അധികൃതർ പറഞ്ഞു. വൈദ്യുതി അപകടങ്ങളോ അപകടസാധ്യതകളോ ശ്രദ്ധയില്‍പ്പെട്ടാല്‍ ഉടന്‍ തന്നെ അതത് കെഎസ്ഇബി സെക്‌ഷന്‍ ഓഫീസിലോ, കണ്‍ട്രോള്‍ റൂം നമ്പറായ 9446009451 ലോ അറിയിക്കണം.

പടിഞ്ഞാറൻ മേഖലയിലും വെള്ളപ്പൊക്കം; തിരുവല്ലയിൽ 13 ദുരിതാശ്വാസ ക്യാമ്പുകൾ

തിരുവല്ല: കാലവർഷം ശക്തി പ്രാപിച്ചതോടെ താലൂക്കിലെ വിവിധ പ്രദേശങ്ങൾ വെള്ളപ്പൊക്ക ഭീഷണിയായി. കഴിഞ്ഞ നാലുദിവസമായി തുടരുന്ന കനത്ത കാറ്റിലും മഴയിലും ഉണ്ടായ കിഴക്കൻ വെള്ളപ്പാച്ചിൽ കൂടിയായതോടെ പടിഞ്ഞാറൻ മേഖല വെള്ളത്തിനടിയിലായി. പമ്പ, മണിമല ആറുകൾ കരകവിഞ്ഞതോടെ താലൂക്കിലെ താഴ്ന്ന പ്രദേശങ്ങൾ വെള്ളപ്പൊക്ക ഭീഷണിയിലാണ്. തിരുവല്ല താലൂക്കിൽ13 ദുരിതാശ്വാസ ക്യാമ്പുകൾ ഇന്നലെ തുറന്നു. 80 കുടുംബങ്ങളിലെ 208 അംഗങ്ങളാണ് ക്യാന്പുകളിലുള്ളത്. കാലവർഷ പെയ്ത്ത് അതിരൂക്ഷമായതോടെ താഴ്ന്ന പ്രദേശങ്ങളിലെ കാർഷിക വിളകളായ കപ്പ, ചേന, ചേമ്പ്, ഏത്തവാഴ തുടങ്ങിയവയ്ക്കു നാശം സംഭവിച്ചിട്ടുണ്ട്. ഓണവില്പന പ്രതീക്ഷിച്ച് വിളവിറക്കിയ പച്ചക്കറികളും കാർഷിക വിളകളുമാണ് വെള്ളപ്പൊക്ക കെടുതിയിൽ മുങ്ങി നശിച്ചത്. വേനൽമഴ ശക്തമായിരുന്നതും കാലവർഷം പതിവിലും നേരത്തേ എത്തിയതിനാൽ നാശനഷ്ടങ്ങളുടെ തോത് വർധിക്കും. ഇത് നാടൻ ഭക്ഷ്യ ഇനങ്ങളുടെ ക്ഷാമത്തിന് ഇടയാവും കിഴക്കൻ പ്രദേശങ്ങളിൽ നിന്നും മലവെള്ളപ്പാച്ചിൽ രൂക്ഷമായതിനാൽ കൂടുതൽ ക്യാമ്പുകൾ തുറക്കേണ്ടിവരുമെന്നാണ് ചൂണ്ടിക്കാട്ടുന്നത്. താഴ്ന്ന ഭാഗങ്ങളിൽ വെള്ളം കയറിത്തുടങ്ങിയതോടെ വീടുകളിലെ വാഹനങ്ങൾ കുറ്റൂർതോണ്ടറ പഴയ പാലത്തിലും തിരുമൂലപുരം മുതൽ മഴുവങ്ങാട് വരെയുള്ള എംസി റോഡിന്‍റെ ഇരുവശങ്ങളിലുമായി പാർക്ക് ചെയ്തു തുടങ്ങി. പ്രളയസമാന കാഴ്ചയാണ് എംസി റോഡിൽ കണ്ടുവരുന്നത്. തിരുവല്ല മുനിസിപ്പാലിറ്റിയിലെ തിരുമൂലപുരം ആറ്റുമാലി ഭാഗത്തെ വീടുകളിൽ വെള്ളം കയറി. അപ്പർകുട്ടനാട് മേഖലയിലും പ്രളയക്കെടുതികൾ തുടങ്ങി. റോഡുകളിൽ വെള്ളം കയറിത്തുടങ്ങിയതോടെ പലയിടങ്ങളിലും പുറത്തേക്ക് ഇറങ്ങാനാകാത്ത സ്ഥിതിയാണ്. നെടുന്പ്രം, കടപ്ര, നിരണം മേഖലകളിൽ വെള്ളം കയറി തുടങ്ങി. സൈക്കിൾമുക്ക് - തേവേരി റോഡിൽ വെള്ളം കയറിയതോടെ നിരണം ഭാഗത്തേക്കുള്ള പ്രധാന പാതയിൽ യാത്രതടസമായി. ശക്തമായ കാറ്റിലും മഴയിലും ഇലക്‌ട്രിക് പോസ്റ്റുകൾ തകർന്നും മരങ്ങൾ കടപുഴകിയും നിലച്ച വൈദ്യുതിബന്ധം പുനഃസ്ഥാപിക്കാനാകാത്തതും ദുരിതം വർധിപ്പിച്ചിട്ടുണ്ട്.

മണിമലയാർ കരകവിഞ്ഞു; മല്ലപ്പള്ളിയിൽ വ്യാപക കൃഷിനാശം

മല്ലപ്പള്ളി: മണിമലയാർ കരകവിഞ്ഞു തുടങ്ങിയതോടെ മല്ലപ്പള്ളി മേഖലയിൽ വ്യാപക നാശം. കോട്ടാങ്ങൽ, ആനിക്കാട്, മല്ലപ്പള്ളി, കല്ലൂപ്പാറ, പുറമറ്റം, ഇരവിപേരൂർ, കവിയൂർ പഞ്ചായത്തുകളിൽ ആറിനോടു ചേർന്ന താഴ്ന്ന പ്രദേശങ്ങളിൽ വെള്ളം കയറി. തീരങ്ങളിൽ വ്യാപക കൃഷിനാശവുമുണ്ടായി. കഴിഞ്ഞ ദിവസങ്ങളിൽ മഴയ്ക്കൊപ്പം വീശിയടിച്ച കാറ്റിൽ ഉണ്ടായ നഷ്ടത്തിനു പുറമേയാണിത്. മരച്ചീനി, ഏത്തവാഴ എന്നിവയ്ക്കാണ് കൂടുതൽ നാശം സംഭവിച്ചത്. മല്ലപ്പള്ളി താലൂക്കിൽ നാല് ദുരിതാശ്വാസ ക്യാമ്പുകൾ പ്രവർത്തനം ആരംഭിച്ചു. ആനിക്കാട് വെങ്ങളത്തുകുന്ന്, വെണ്ണിക്കുളം സെന്റ് ബഹനാൻസ്, കീഴ്‌വായ്പൂര് വൊക്കേഷണൽ ഹയർ സെക്കൻഡറി, മല്ലപ്പള്ളി സിഎംഎസ് എന്നിവിടങ്ങളിലാണ് ക്യാമ്പുകൾ ആരംഭിച്ചത്. പുറമറ്റം, കല്ലുപ്പാറ, കുന്നന്താനം, മല്ലപ്പള്ളി പഞ്ചായത്ത് പ്രദേശങ്ങളിലാണ് കൃഷിനാശം ഏറെയുള്ളത്. തേക്ക്,ആഞ്ഞിലി, റബർ തുടങ്ങിയ മരങ്ങൾ വ്യാപകമായി കടപുഴകി. തകരാറിലായ വൈദ്യുതി ബന്ധം പലയിടങ്ങളിലും പുനഃസ്ഥാപിച്ചിട്ടില്ല.

ജനറൽ ആശുപത്രി നവീകരണം : ശസ്ത്രക്രിയാ വിഭാഗങ്ങൾ മെഡിക്കൽ കോളജിലേക്ക്

പത്തനംതിട്ട: ജനറൽ ആശുപത്രിയുടെ ബി ആൻഡ് സി ബ്ലോക്ക് നവീകരിക്കുന്നതിന്‍റെ ഭാഗമായി നിലവിലെ സംവിധാനങ്ങൾ കോന്നി മെഡിക്കൽ കോളജിലേക്ക് മാറ്റും. ഇതു സംബന്ധമായ അന്തിമ തീരുമാനത്തിനായി ആരോഗ്യവകുപ്പ് ഉന്നതതല സംഘം ഇന്ന് ജനറൽ ആശുപത്രിയിലെത്തും. ശോച്യാവസ്ഥയിലായ ബി ആൻഡ് സി ബ്ലോക്കിന് അടിയന്തര അറ്റകുറ്റപ്പണി അനിവാര്യമായ സാഹചര്യത്തിൽ കെട്ടിടം അടച്ചിടേണ്ടിവരുമെന്നതിനാൽ ഇവിടെ പ്രവർത്തിച്ചിരുന്ന വിഭാഗങ്ങൾക്ക് മറ്റൊരിടം കണ്ടെത്താനാണ് ഇവ മെഡിക്കൽ കോളജിലേക്കു മാറ്റുന്നത്. പ്രധാന ശസ്ത്രക്രിയാ വിഭാഗങ്ങളായ ഒബ്സ്റ്റട്രിക്സ് ആൻഡ് ഗൈനക്കോളജി, അസ്ഥിരോഗവിഭാഗം, ജനറൽ സർജറി, ഇഎൻടി എന്നിവയാണ് മെഡിക്കൽ കോളജിലേക്ക് മാറ്റുന്നത്. ഇതു സംബന്ധമായി മന്ത്രിതലത്തിലുൾപ്പെടെ ചർച്ച നടത്തി തീരുമാനമെടുത്തിരുന്നു. എന്നാൽ ഡോക്ടർമാരുടെ ഭാഗത്തു നിന്ന് എതിർപ്പുണ്ടായതോടെ ഉത്തരവിറങ്ങാത്തതെന്ന് പറയുന്നു. ഡോക്ടർമാരുമായി ചർച്ച നടത്തി പ്രശ്ന പരിഹാരത്തിനായി ആരോഗ്യവകുപ്പ് ഡയറക്ടർ, സെക്രട്ടറി, എൻഎച്ച്എം ഡയറക്ടർ എന്നിവരുൾപ്പെട്ട ഉന്നതതല സംഘം ഇന്ന് പത്തനംതിട്ട ജനറൽ ആശുപത്രി സന്ദർശിക്കും. നാലുകോടി രൂപയുടെ അറ്റകുറ്റപ്പണി തകർച്ചയുടെ വക്കിലെത്തി നിൽക്കുന്ന ബി ആൻഡ് സി ബ്ലോക്കിന്‍റെ നവീകരണത്തിന് നാലു കോടി രൂപയുടെ പദ്ധതിയാണ് നടപ്പാക്കുന്നത്. സർക്കാർ ഏജൻസിയായ ഇൻകെലാണ് പണികൾ നടത്തുന്നത്. കെട്ടിടത്തിന്‍റെ ഒരു നില നവീകരിച്ച് നേത്രചികിത്സാ വിഭാഗം ക്രമീകരിക്കും. കണ്ണ് ഓപ്പറേഷൻ തിയേറ്ററും വാർഡും ഇതിൽ ക്രമീകരിക്കും. നിലവിൽ ആശുപത്രിയിൽ ഒപി ബ്ലോക്കിന്‍റെയും അത്യാഹിത വിഭാഗത്തിന്‍റെയും പണികൾ നടന്നുവരികയാണ്. ഇതുകാരണം സ്ഥലസൗകര്യം തീരെയില്ല. ഒപി പ്രവർത്തിക്കുന്ന കെട്ടിടത്തിലും അത്യാഹിത വിഭാഗത്തിലും ഏറെ പരിമിതികളുണ്ട്. ഇത്തരം ഒരു സാഹചര്യത്തിൽ ബി ആൻ സി ബ്ലോക്കിലെ സൗകര്യങ്ങൾ കൂടി ആശുപത്രി വളപ്പിൽ തന്നെ നിലനിർത്താനാകില്ലെന്ന് കഴിഞ്ഞ എച്ച്എംസി യോഗത്തിൽ മന്ത്രി വീണാ ജോർജ് തന്നെ വ്യക്തമാക്കിയിരുന്നു. ഇതര ആശുപത്രികളിലേക്ക് പുനഃക്രമീകരിക്കണം ഇടതടവില്ലാതെ സേവനങ്ങൾ നൽകി കൊണ്ടിരിക്കുന്ന പത്തനംതിട്ട ജനറൽ ആശുപത്രിയിലെ ശസ്ത്രക്രിയ വിഭാഗങ്ങളുടെ പ്രവർത്തനങ്ങൾ പൂർണമായി നിർത്തികൊണ്ട് ഒട്ടും പ്രവർത്തന സജ്ജമല്ലാത്തതും പരിമിതികളുള്ളതും പൊതു ഗതാഗത സൗകര്യങ്ങൾ കുറവുള്ളതുമായ കോന്നി മെഡിക്കൽ കോളജിലേക്ക് മാറ്റുന്നത് ആത്മഹത്യാപരവും ജനദ്രോഹുമാണെന്ന് കെജിഎംഒഎ കുറ്റപ്പെടുത്തി. പിയും ശസ്ത്രക്രിയാ സേവനങ്ങൾ ഉൾപ്പെടെയുള്ള പ്രവർത്തനങ്ങൾ ജനറൽ ആശുപത്രിയിൽ തന്നെ നിലനിർത്തണ‌മെന്നാണ് ഡോക്ടർമാരുടെ ആവശ്യം. അതിനു കഴിയുന്നില്ലെങ്കിൽ ആരോഗ്യ വകുപ്പിനു കീഴിലുള്ള കോഴഞ്ചേരി ജില്ലാ ആശുപത്രി, അടൂർ ജനറൽ ആശുപത്രി, റാന്നി, തിരുവല്ല താലൂക്ക് ആശുപത്രികൾ എന്നിവിടങ്ങളിലേക്ക് മാറ്റണമെന്ന് കെജിഎംഒഎ ജില്ലാ പ്രസിഡന്‍റ് ഡോ.ജ്യോതിന്ദ്രനും സെക്രട്ടറി ഡോ. നിഷാന സൈഫും അഭിപ്രായപ്പെട്ടു. ജില്ലാ ആശുപത്രിയിലും താലൂക്ക് ആശുപത്രികളിലും നിലവിൽ ഡോക്ടർമാർ ഉൾപ്പെടെയുള്ള ആരോഗ്യപ്രവർത്തകരുടെ രൂക്ഷമായ ക്ഷാമം നേരിടുകയാണ്. നിലവിൽ കുടുംബാരോഗ്യ കേന്ദ്രങ്ങളിൽ നിന്നുള്ള ഡോക്ടർമാരെ ഈ ആശുപത്രികളിൽ നിയമിച്ചാണ് സേവനങ്ങൾ നൽകിവരുന്നത്. ജനറൽ ആശുപത്രി മെഡിക്കൽ കോളജിന്‍റെ ഭാഗമാകും നിലവിലെ സംവിധാനങ്ങൾ കോന്നി മെഡിക്കൽ കോളജിലേക്കു മാറ്റുന്നതോടെ പത്തനംതിട്ട ജനറൽ ആശുപത്രി കോന്നി മെഡിക്കൽ കോളജിന്‍റെ ഭാഗമാകും. മെഡിക്കൽ വിദ്യാഭ്യാസ വകുപ്പിനു കീഴിലാണ് കോന്നി മെഡിക്കൽ കോളജിന്‍റെ പ്രവർത്തനം. ആരോഗ്യവകുപ്പിനു കീഴിലുള്ള ഡോക്ടർമാരെ മെഡിക്കൽ വിദ്യാഭ്യാസ വകുപ്പിനു കീഴിലേക്ക് മാറ്റേണ്ടിവരുമെന്ന സൂചയാണുള്ളത്. നേരത്തെ ജനറൽ ആശുപത്രിയെ മെഡിക്കൽ കോളജിന്‍റെ ഭാഗമാക്കി ഉത്തരവിറക്കിയിരുന്നു. കോന്നി സർക്കാർ മെഡിക്കൽ കോളജിന് ദേശീയ മെഡിക്കൽ കമ്മീഷന്‍റെ അംഗീകാരം വാങ്ങാൻ വേണ്ടിയാണ് ഇത്തരമൊരു ഉത്തരവിറക്കിയത്. ജനറൽ ആശുപത്രിയിലെ കിടക്കകളും രോഗികളും ചൂണ്ടിക്കാട്ടിയാണ് അംഗീകാരം വാങ്ങിയത്. മെഡിക്കൽ കോളജിൽ ഐപി വിഭാഗം ശക്തിപ്പെടാത്തതിനാൽ നിലവിലും ബേസ് ആശുപത്രിയായി പത്തനംതിട്ട ജനറൽ ആശുപത്രിയാണ് നിലനിൽക്കുന്നത്.

പന്പാതീരം കവിഞ്ഞൊഴുകുന്നു; എഴിക്കാട് കോളനി വെള്ളത്തിൽ

കോഴഞ്ചേരി: കനത്ത മഴയെത്തുടര്‍ന്ന് പന്പാനദി കരകവിഞ്ഞ് തീരങ്ങൾ വെള്ളത്തിലായി. തോട്ടപ്പുഴശേരി, കോയിപ്രം, ആറന്മുള പഞ്ചായത്തുകളിലെ വിവിധ സ്ഥലങ്ങളിൽ വെള്ളം കയറി. ആറന്മുള പഞ്ചായത്തിലെ എഴിക്കാട് നഗറിലെ പത്ത് വീടുകളില്‍ വെള്ളം കയറി. ബുധനാഴ്ചയും എഴിക്കാട് കോളനിയിലെ വീടുകളിൽ വെള്ളം കയറിത്തുടങ്ങിയിരുന്നു. പിന്നീടു മഴയ്ക്കു നേരിയ ശമനം ഉണ്ടായതോടെ കെടുതികൾ രൂക്ഷമായില്ല. എഴിക്കാട്ട് വെള്ളം കയറി വീടുകളിലുള്ളവരെ വല്ലന യുപിസ്‌കൂളിലെ ക്യാമ്പിലേക്ക് മാറ്റി. കുടുതല്‍ വീടുകളില്‍ വെളളം കയറാന്‍ സാധ്യത ഏറെയാണ്. മല്ലപ്പുഴശേരി പഞ്ചായത്തിലെ പന്ത്രണ്ടാം വാര്‍ഡിലെ ഏഴ് വീടുകളില്‍ വെളളം കയറി. ഇവരെ അടുത്തുള്ള ബന്ധുവീടുകളിലേക്ക് മാറ്റി. കോയിപ്രം പഞ്ചായത്തിലെ പുല്ലാട് - പൂവത്തൂര്‍ റോഡിലും, ഏഴാം വാര്‍ഡിലെ തെറ്റുപാറ പ്രദേശത്തെ കൃഷി ഇടങ്ങളിലും വെളളം കയറി. പല പ്രദേശത്തും മരങ്ങള്‍ ഒടിഞ്ഞുവീണു കിടക്കുകയാണ്. എംകെ റോഡിലെ ആറന്മുള സത്രം ജംഗ്ഷനില്‍ റോഡിലേക്ക് വെളളം കയറിത്തുടങ്ങി. ആറന്മുള - ചെങ്ങന്നൂർ റോഡിലും പന്തളം റോഡിലും പലയിടങ്ങളിലും വെള്ളക്കെട്ട് രൂക്ഷമാണ്. തോട്ടപ്പുഴശേരി ഗ്രാമപഞ്ചായത്ത് പ്രദേശങ്ങളില്‍ വെള്ളം കയറിയ വീടുകളുള്ള ഭാഗങ്ങളില്‍നിന്നും ആളുകളെ ഒഴിപ്പിച്ച് വിവിധ ക്യാമ്പുകളിലാക്കി. നെടുംപ്രയാര്‍ എംടി എല്‍പി എസ് സ്‌കൂള്‍, ചെട്ടിമുക്ക് ചെറുപുഷ്പം സ്‌കൂള്‍ എന്നിവിടങ്ങളിലായി 47 പേരെ ക്യാമ്പിനുള്ളില്‍ താമസിപ്പിച്ചു. രണ്ടു സ്‌കൂളുകളില്‍ കൂടി ക്യാമ്പുകള്‍ തയാറാക്കിയിട്ടുണ്ട്. മാരാമൺ ചെറുപുഷ്പം സ്കൂളിലെ ക്യാന്പിൽ 21 പേരാണുള്ളത്. ക്യാമ്പിലേക്ക് ആവശ്യമായ ഭക്ഷണവും മരുന്നുകളും മെഡിക്കല്‍ സഹായവും പാചകം ചെയ്യുന്നതിന് ആവശ്യമായ ഗ്യാസ് സൗകര്യവും കൃത്യമായി എത്തിച്ചുകൊടുത്തിട്ടുണ്ടെന്ന് തോട്ടപ്പുഴശേരി ഗ്രാമപഞ്ചായത്ത് പ്രസിഡന്‍റ് ആര്‍. കൃഷ്ണകുമാര്‍ അറിയിച്ചു.

പ്രളയക്കെടുതിയിൽ പത്തനംതിട്ട

പത്തനംതിട്ട: കാറ്റു മഴയും തുടരുന്പോൾ പത്തനംതിട്ടയിൽ കെടുതികൾ രൂക്ഷമായി. മഴയ്ക്കൊപ്പം വീശിയടിച്ച കാറ്റിൽ വ്യാഴാഴ്ച രാത്രിയും ഇന്നലെയും പല ഭാഗങ്ങളിലും നാശനഷ്ടങ്ങളുണ്ടായി. ഇതിനൊപ്പം മഴ ശക്തമായി തുടരുന്നതോടെ പ്രളയക്കെടുതിയുടെ രൂക്ഷതയും മലയോരത്തും പടിഞ്ഞാറൻ മേഖലയിലും ഒരേപോലെ അനുഭവപ്പെട്ടുതുടങ്ങി. ശക്തമായ മഴയ്ക്കിടെ പന്പ, മണിമല, അച്ചൻകോവിൽ നദികൾ പലയിടത്തും കരകവിഞ്ഞു. നദിക്കരകളിൽ പ്രളയ മുന്നറിയിപ്പ് നൽകിയിരിക്കുകയാണ്. നദികളും തോടുകളും കരകവിഞ്ഞു താഴ്ന്ന പ്രദേശങ്ങളിൽ വെള്ളം കയറിയിട്ടുണ്ട്. പ്രളയക്കെടുതികൾ വർധിച്ചതോടെ ദുരിതാശ്വാസ ക്യാന്പുകൾ തുറന്ന് ആളുകളെ മാറ്റിപ്പാർപ്പിച്ചു തുടങ്ങി. വെള്ളം കയറിയതിനു പിന്നാലെ റോഡുകളിലും ഗതാഗതം തടസപ്പെട്ടു. റാന്നി, ആറന്മുള, പുല്ലാട്, വെണ്ണിക്കുളം ഭാഗങ്ങളിലെ റോഡുകളിലാണ് വെള്ളം കയറിയത്. മരങ്ങൾ കടപുഴകിയുള്ള തടസങ്ങൾ ഇന്നലെയും തുടർന്നു. മഴയ്ക്കൊപ്പം കാറ്റ് ശക്തമായി വീശുന്നതു കാരണം മലയോര മേഖലയിൽ ആശങ്ക തുടരുകയാണ്. ജില്ലയിൽ ലഭിച്ചത് 101 മില്ലിമീറ്റർ മഴ ഇന്നലെ രാവിലെ വരെയുള്ള 24 മണിക്കൂറിൽ ജില്ലയിൽ ലഭിച്ച ശരാശരി മഴ 101.74 മില്ലിമീറ്റർ. കഴിഞ്ഞ ദിവസങ്ങളിൽ രേഖപ്പെടുത്തിയ മഴയേക്കാൾ കൂടുതലാണിത്. കിഴക്കൻ വനമേഖലയോടു ചേർന്ന പ്രദേശങ്ങളിലാണ് മഴ ശക്തമായിരുന്നത്. ഇന്നലെ ജില്ലയിൽ കാലാവസ്ഥ വകുപ്പ് റെഡ് അലർട്ട് നൽകിയിരുന്നു. ഇന്നു മുതൽ മഴ അല്പം ശമിച്ചേക്കാനാണ് സാധ്യത. ഇന്ന് മഞ്ഞ അലർട്ടാണ് നൽകിയിരിക്കുന്നത്. റാന്നിയിലെ ചെറുകുളഞ്ഞിയിലാണ് കൂടിയ മഴ ലഭിച്ചത്-198 മില്ലിമീറ്റർ. കക്കിയിൽ 175, പച്ചക്കാനം 148, കരിമാൻതോട് 141, വടശേരിക്കര 134, പന്പ 129, മൂഴിയാർ 126, ആങ്ങമൂഴി 117, കുന്നന്താനം 109.5, പാടം 109.41, മണ്ണീറ 107.05, അയിരൂർ 105, വെൺകുറിഞ്ഞി 102.5, റാന്നി ചേത്തയ്ക്കൽ 102, തവളപ്പാറ 100, തിരുവല്ല 67.4, കോന്നി എസ്റ്റേറ്റ് 64.6, പത്തനംതിട്ട 61 മില്ലിമീറ്റർ എന്നിങ്ങനെയാണ് മഴ ലഭ്യത. ജലനിരപ്പ് നിരീക്ഷിക്കും ജില്ലയിലെ നദികളിലെ ജലനിരപ്പ് കൃത്യമായി പരിശോധിച്ച് പ്രളയസാധ്യത വിലയിരുത്തും. ജില്ലാ ദുരന്തനിവാരണ അഥോറിറ്റിയാണ് ഇതിനുള്ള ക്രമീകരണം ചെയ്തിരിക്കുന്നത്. ഇന്നലെ ഉച്ചയ്ക്കുള്ള കണക്കിൽ അയിരൂരിൽ 8.82 , മാരാമണ്ണിൽ 7.84, ആറന്മുള ഏഴ് മീറ്റർ എന്നിങ്ങനെയാണ് പന്പയിലെ ജലനിരപ്പ്. അച്ചൻകോവിലാറ്റിൽ പന്തളത്ത് 9.3 മീറ്ററും മണിമലയാറിന്‍റെ വള്ളംകുളം ഭാഗത്ത 6.03 മീറ്ററും വെള്ളമുണ്ട്. ജലനിരപ്പിൽ കാര്യമായ വർധനയില്ലെന്നാണ് നിഗമനം. മൂഴിയാർ ഡാമിൽ റെഡ് അലർട്ട് തുടരുകയാണ്. ഷട്ടറുകൾ തുറന്ന് ജലനിരപ്പ് ഇടയ്ക്ക് ക്രമീകരിക്കുന്നുണ്ട്. ഇന്നലെ രണ്ടാം നന്പർ ഷട്ടറാണ് തുറന്നത്. പന്പയിലും കക്കിയിലും ജലനിരപ്പ് 45 ശതമാനത്തിനു താഴെയാണ്.

ലൈംഗികാതിക്രമക്കേസിൽ യുവാവ് പിടിയിൽ

തിരുവല്ല: ഇൻസ്റ്റഗ്രാമിലൂടെ ബന്ധം സ്ഥാപിച്ച് പരിചയത്തിലായ പ്രായപൂർത്തിയാകാത്ത പെൺകുട്ടിയെ സുഹൃത്തിന്‍റെ വീട്ടിലെത്തിച്ച് ലൈംഗിക അതിക്രമം കാട്ടിയ യുവാവിനെ തിരുവല്ല പോലീസ് അറസ്റ്റ് ചെയ്തു. മുത്തൂർ കാവുംഭാഗം പടിഞ്ഞാറ്റേതിൽ അർജുനാണ് (18) പിടിയിലായത്. ഇയാളുടെ സുഹൃത്തിന്‍റെ കറ്റോടുള്ള വീട്ടിലെത്തിച്ചാണ് അതിക്രമം കാട്ടിയത്. പീഡന ശ്രമമുണ്ടായതായും നഗ്നചിത്രങ്ങൾ അയച്ചു കൊടുക്കാൻ പ്രേരിപ്പിച്ചതായും മൊഴിയിൽ പറയുന്നു. തിരുവല്ല പോലീസ് ഇൻസ്പെക്ടറുടെ നിർദ്ദേശപ്രകാരം എസ്ഐ കെ.രവി ചന്ദ്രന്‍റെ നേതൃത്വത്തിലുള്ള പോലീസ് സംഘം അർജുന്‍റെ വീട്ടിലെത്തി ഇയാളെ സ്റ്റേഷനിലേക്ക് കൂട്ടിക്കൊണ്ടുവന്നു. പത്തനംതിട്ട ശിശുക്ഷേമ സമിതിയിൽ നിന്നും ലഭിച്ച വിവരമനുസരിച്ച്, പെൺകുട്ടിയെ താമസിപ്പിച്ച സഖി വൺ സ്റ്റോപ്പ് സെന്‍ററിൽ എത്തി പോലീസ് കുട്ടിയുടെ മൊഴി സെന്‍റർ അഡ്മിനിസ്ട്രേറ്ററുടെ സാന്നിധ്യത്തിൽ വിശദമായി രേഖപ്പെടുത്തി. മൊഴിയനുസരിച്ച് അർജുനെതിരേ പോക്സോ നിയമത്തിലെ വകുപ്പുകൾ ഉൾപ്പെടെ കേസ് രജിസ്റ്റർ ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]