ഷെയർ ചെയ്തവരും വായിച്ചവരും കുടുങ്ങുമെന്ന വിശേഷണം ചാർത്തിക്കിട്ടിയ ഒട്ടേറെ വാട്ട്സ്ആപ്പ് മെസേജുകളുണ്ട്. ആ ഗണത്തിൽപ്പെട്ടവ ഇനിയും വരാം. അപ്പോൾ ഉപയോക്താക്കൾ എന്തുചെയ്യണം? ആപ്പ് ഉപയോഗിക്കുന്പോൾ സൂക്ഷിക്കണം.
ഫേസ്ബുക്കിന്റെ ഉടമസ്ഥതയിലുള്ള വാട്ട്സ്ആപ്പ് ദിനേനയെന്നോണം പുത്തൻ ഫീച്ചറുകൾ അവതരിപ്പിച്ചുകൊണ്ടിരിക്കുകയാണ്. ഏറ്റവും പുതിയതായി സ്റ്റിക്കറുകൾ അയയ്ക്കാവുന്ന സൗകര്യം എത്തി. ടെക്സ്റ്റ്, ഫോട്ടോ, വീഡിയോ, ഓഡിയോ എന്നിങ്ങനെ എന്തും ഗ്രൂപ്പായോ ഒറ്റയ്ക്കോ അയയ്ക്കാവുന്ന ആപ്പ് ശ്രദ്ധയോടെ കൈകാര്യം ചെയ്തില്ലെങ്കിൽ കെണിയാകും. സ്വകാര്യതയുടെ കാര്യത്തിൽ വാട്ട്സ്ആപ്പ് അത്രയ്ക്കു നിർബന്ധമുള്ളവരാണ്. നിബന്ധനകൾക്കു നിരക്കാത്തതെന്ന് അവർ കരുതുന്ന ഫയലുകൾ ഷെയർ ചെയ്താൽ കർശന നടപടി ഉറപ്പാണ്. അക്കൗണ്ട് പൂട്ടിക്കെട്ടൽ പോലും പ്രതീക്ഷിക്കണം. താഴെപ്പറയുന്ന കാര്യങ്ങൾ ശ്രദ്ധിക്കാം.
പലപ്പോഴും നിങ്ങൾക്ക് അറിയാത്ത കോണ്ടാക്ടിൽനിന്ന് അനാവശ്യ മെസേജുകൾ, ഇമേജുകൾ തുടങ്ങിയവ വാട്ട്സ്ആപ്പ് വഴി വരാറുണ്ടാകും. ഇത് ഒഴിവാക്കാനാവാത്ത ശല്യമായി മാറുന്പോൾ ആ നന്പർ ബ്ലോക്ക് ചെയ്യുകയോ റിപ്പോർട്ട് ചെയ്യുകയോ മാത്രമാണ് പോംവഴി. ഇങ്ങനെ ഒട്ടേറെ ഉപയോക്താക്കൾ ഒരു നന്പർ ബ്ലോക്ക് ചെയ്യുകയാണെങ്കിൽ ആപ്പ് ആ അക്കൗണ്ട് ഡീആക്ടിവേറ്റ് ചെയ്യും. അതുകൊണ്ടുതന്നെ ഒട്ടേറെ പേർ നിങ്ങളെ ബ്ലോക്ക് ചെയ്യുന്നതായി വാട്ട്സ്ആപ്പ് കണ്ടെത്തിയാൽ നിങ്ങളുടെ അക്കൗണ്ടിനും താഴു വീഴും.
വൈറസുകൾ, മാൽവെയറുകൾ എന്നിവ വാട്ട്സ്ആപ്പ് വഴി അയയ്ക്കുന്നതും അക്കൗണ്ടിനു ഭീഷണിയാണ്. ഏതെങ്കിലും ഉപയോക്താവിന്റെ വിവരങ്ങൾ ചോർത്താനോ മറ്റു ചാരപ്പണികൾക്കോ വാട്ട്സ്ആപ്പ് സെർവറുകളിൽ നുഴഞ്ഞുകയറാൻ ശ്രമിച്ചാൽ നിങ്ങളുടെ അക്കൗണ്ട് പൂട്ടിക്കെട്ടുമെന്നുറപ്പ്.
വാട്ട്സ്ആപ്പ് പ്ലസ് എന്ന പേരിലുള്ള ആപ്പ് ഉപയോഗിക്കുന്നതും അക്കൗണ്ടിനു ഭീഷണിയാണ്. തങ്ങൾ പ്ലസ് എന്ന പേരിൽ ഒരു ആപ്പ് ഡെവലപ് ചെയ്തിട്ടില്ലെന്നും, അതുമായി തങ്ങൾക്ക് യാതൊരു ബന്ധവുമില്ലെന്നും വാട്ട്സ്ആപ്പ് വ്യക്തമാക്കിയിട്ടുണ്ട്.
ഏതെങ്കിലും കോണ്ടാക്ടിനോ ഗ്രൂപ്പിനോ എതിരേ പരാതി നൽകാനുള്ള സൗകര്യം വാട്ട്സ്ആപ്പ് നൽകുന്നുണ്ട്. നിയമവിരുദ്ധമായ എന്തെങ്കിലും കണ്ടന്റ് പ്രചരിപ്പിക്കുന്നതായി നിങ്ങളുടെ പേരിൽ പരാതി വാട്ട്സ്ആപ്പിനു ലഭിച്ചാൽ, അതിൽ സത്യമുണ്ടെങ്കിൽ അക്കൗണ്ട് ഡീആക്ടിവേറ്റ് ചെയ്യപ്പെടും.
വാട്ട്സ്ആപ്പിന്റെ ഒറിജിനൽ കോഡ് മോഡിഫൈ ചെയ്യാൻ എന്തെങ്കിലും വിധത്തിൽ ശ്രമിച്ചാൽ നിങ്ങൾക്ക് സ്വന്തം അക്കൗണ്ട് നഷ്ടമാകും.
ബൾക്ക് മെസേജിംഗ്, ഓട്ടോ-മെസേജിംഗ്, ഓട്ടോ-ഡയലിംഗ് എന്നിവയ്ക്കും വാട്ട്സ്ആപ്പിൽ നിരോധനമുണ്ട്. കോണ്ടാക്ട് ലിസ്റ്റിൽ ഇല്ലാത്തവർക്ക് ബൾക്ക് ആയി മെസേജുകൾ അയയ്ക്കാൻ ശ്രമിച്ചാൽ ഉറപ്പായും അക്കൗണ്ട് ഇല്ലാതാവാം.
വ്യാജ പ്രൊഫൈലുകൾ അതായത് മറ്റൊരാളുടെ പേരിൽ തുറക്കുന്ന പ്രൊഫൈലുകൾ റിപ്പോർട്ട് ചെയ്യപ്പെട്ടാൽ ഒട്ടും വൈകാതെ അതിനും താഴുവീഴും.
നുണകൾ, തെറ്റിദ്ധാരണാജനകമായ പ്രസ്താവനകൾ എന്നിവ കൈമാറ്റം ചെയ്താൽ അക്കൗണ്ട് ബാൻ ചെയ്യപ്പെടും. നിയമവിരുദ്ധമായ, അപകീർത്തികരമായ, ഭീഷണിപ്പെടുത്തുന്ന, വൈരാഗ്യം ജനിപ്പിക്കുന്ന, വർഗീയമായ സന്ദേശങ്ങൾ അയച്ചാലും ഇതുതന്നെയാണ് ഫലം.
അതുകൊണ്ടുതന്നെ ആപ്ലിക്കേഷൻ ശ്രദ്ധിച്ചുമാത്രം ഉപയോഗിക്കുക. ഒരിക്കൽ ഡീആക്ടിവേറ്റ് ചെയ്താൽ തിരിച്ചുകിട്ടുക അസാധ്യമാണ്. ബാൻ ചെയ്യപ്പെട്ട് 72 മണിക്കൂർ കഴിഞ്ഞാൽ നിങ്ങളുടെ സുഹൃത്തുക്കൾക്ക് നിങ്ങളെ കാണാനാവില്ല. ബാൻ ചെയ്യുന്നതിനു മുന്പ് വാട്ട്സ്ആപ്പ് അക്കാര്യത്തെക്കുറിച്ച് മുന്നറിയിപ്പു നൽകാറുമില്ല!