ഹേമ കമ്മിറ്റി: റിപ്പോര്ട്ടില് ഞെട്ടിക്കുന്ന മൊഴികളും പരാമര്ശങ്ങളും
Monday, August 19, 2024 4:52 PM IST
തിരുവനന്തപുരം: ഹേമ കമ്മിറ്റി റിപ്പോർട്ടിൽ ഞെട്ടിക്കുന്ന മൊഴികളും പരാമര്ശങ്ങളും. റിപ്പോര്ട്ടിലെ 55, 56 പേജുകളില് മലയാള സിനിമയില് നടക്കുന്ന ഗുരുതര ലൈംഗിക കുറ്റകൃത്യങ്ങളാണ് രേഖപ്പെടുത്തിയിരിക്കുന്നത്. മലയാള സിനിമാ മേഖലയില് അടിമുടി സ്ത്രീവിരുദ്ധത നിലനില്ക്കുന്നതായി റിപ്പോര്ട്ടില് വിശദീകരിക്കുന്നു.
ലൈംഗികമായ വിട്ടുവീഴ്ചകള്ക്ക് തയാറാകണമെന്ന് പ്രമുഖര് ഉള്പ്പടെ ആവശ്യപ്പെട്ടതായി കമ്മിറ്റിക്ക് മുന്നില് നിരവധി വനിതകള് മൊഴി നല്കിയിട്ടുണ്ട്. സിനിമയില് അവസരം ലഭിക്കണമെങ്കില് വഴങ്ങിക്കൊടുക്കേണ്ട സാഹചര്യമുണ്ട്. അതിജീവതകള് പോലീസിനെ സമീപിക്കാതിരിക്കുന്നത് ജീവഭയം കാരണമാണ്.
പരാതിപ്പെട്ടാല് കുടുംബാഗങ്ങള്ക്കെതിരെയും ഭീഷണിയുയരുമെന്നും റിപ്പോർട്ടിൽ പറയുന്നു. പരാതിപ്പെടുന്നവര് സിനിമയില് നിന്ന് തുടച്ചുനീക്കപ്പെടുകയാണ്. നടി ആക്രമിക്കപ്പെട്ടത് ഒറ്റപ്പെട്ട സംഭവമല്ല. സിനിമയില് കാസ്റ്റ് ചെയ്തിട്ടും വഴങ്ങിയില്ലെങ്കില് റിപ്പീറ്റ് ഷോട്ടുകള് എടുപ്പിച്ച് ബുദ്ധിമുട്ടിപ്പിക്കും. ഇത്തരത്തില് 17 ഷോട്ടുകള് വരെ എടുത്ത് ബുദ്ധിമുട്ടിച്ചു.
പ്രൊഡക്ഷൻ യൂണിറ്റിൽ ഉള്ളവർ ശുചിമുറി ഉപയോഗിക്കാൻ പോലും സ്ത്രീകളെ അനുവദിക്കാറില്ല. വഴിവിട്ട കാര്യങ്ങള്ക്ക് സംവിധായകരും നിര്മാതാക്കളും നിര്ബന്ധിക്കുന്നു. അതിക്രമം കാട്ടിയവരില് ഉന്നതരുണ്ട്. എന്നിങ്ങനെയുള്ള വെളിപ്പെടുത്തലുകള് ഹേമ കമ്മിറ്റി റിപ്പോര്ട്ടിലുണ്ട്.
ആകെ 233 പേജുകളുള്ള റിപ്പോർട്ടാണ് പുറത്തുവന്നത്. സ്വകാര്യതയെ ലംഘിക്കുന്ന വിവരങ്ങൾ കൈമാറില്ലെന്ന് നേരത്തെ വ്യക്തമാക്കിയതിനാൽ ആളുകളെ തിരിച്ചറിയുന്ന വിവരങ്ങൾ ഒഴിവാക്കിയിട്ടുണ്ട്. 49മത്തെ പേജിലെ 96മത്തെ പാരഗ്രാഫ് പ്രസിദ്ധീകരിച്ചില്ല.
81 മുതൽ 100 വരെയുള്ള പേജുകളിലെ ചില ഭാഗങ്ങൾ ഒഴിവാക്കിയിട്ടുണ്ട്. 165 മുതൽ 196 വരെയുള്ള പാരഗ്രാഫുകളും അനുബന്ധവും ഒഴിവാക്കിയിട്ടുണ്ട്.