ഹേമ കമ്മിറ്റി റിപ്പോര്ട്ട് പുറത്തേക്ക്; ഉച്ചയ്ക്ക് രണ്ടരയ്ക്ക് പുറത്തുവിടും
Monday, August 19, 2024 1:13 PM IST
തിരുവനന്തപുരം: സിനിമാ മേഖലയിലെ സ്ത്രീകളുടെ പ്രശ്നങ്ങൾ പഠിക്കാൻ നിയോഗിച്ച ജസ്റ്റീസ് ഹേമ കമ്മിറ്റിയുടെ റിപ്പോർട്ട് ഇന്ന് പുറത്തുവിടാൻ തീരുമാനം. ഉച്ചയ്ക്ക് രണ്ടരയ്ക്കാണ് റിപ്പോർട്ട് പുറത്തുവിടുക. വിവരാവകാശ അപേക്ഷകരോട് ഹാജരാകാന് നിര്ദേശം നല്കിയിട്ടുണ്ട്.
മൊഴിനല്കിയവരുടെ സ്വകാര്യത ഹനിക്കപ്പെടുമെന്ന് കണ്ടെത്തിയ പേജുകള് ഒഴിവാക്കി 233 പേജുള്ള റിപ്പോര്ട്ടാണ് പുറത്തുവിടുന്നത്. റിപ്പോർട്ട് ശനിയാഴ്ച പുറത്തുവിടാനിരിക്കെ നടി രഞ്ജിനി ഹൈക്കോടതിയെ സമീപിക്കുകയായിരുന്നു.
വിവരാവകാശ നിയമപ്രകാരം റിപ്പോര്ട്ട് പുറത്തുവിടാമെന്ന സിംഗിള് ബെഞ്ച് ഉത്തരവ് ചോദ്യം ചെയ്തുകൊണ്ടായിരുന്നു ഹർജി. കമ്മിറ്റിക്ക് മുന്നില് താനും മൊഴി നല്കിയതാണെന്നും ഇക്കാര്യങ്ങളടക്കം പുറത്തുവന്നാലുളള പ്രത്യാഘാതങ്ങളില് ആശങ്കയുണ്ടെന്നും അതുകൊണ്ടുതന്നെ റിപ്പോര്ട്ട് പരിശോധിച്ചശേഷമേ പുറത്തുവിടാവൂ എന്നുമായിരുന്നു നടിയുടെ ആവശ്യം. എന്നാൽ രഞ്ജിനിയുടെ ഹർജി തള്ളിയ ഹൈക്കോടതി ഡിവിഷൻ ബെഞ്ച്, ആവശ്യമെങ്കിൽ സിംഗിൾ ബെഞ്ചിനെ സമീപിക്കാമെന്ന് നിർദേശം നൽകി.
സിനിമാ മേഖലയിലെ സ്ത്രീകൾ നേരിടുന്ന പ്രശ്നങ്ങളും നീതിനിഷേധങ്ങളും തൊഴിൽസാഹചര്യങ്ങളുമൊക്കെ പഠിക്കാൻ രാജ്യത്ത് ആദ്യമായി രൂപീകരിച്ച കമ്മീഷനാണ് ഹേമ കമ്മിറ്റി. സിനിമാരംഗത്തെ വനിതാ കൂട്ടായ്മയായ വിമൻ ഇൻ സിനിമ കളക്ടീവ് നൽകിയ നിവേദനത്തിന്റെ അടിസ്ഥാനത്തിലാണ് കമ്മിറ്റി രൂപീകരിച്ചത്.