ലോക്‌സഭയില്‍ ആവശ്യങ്ങള്‍ ഉന്നയിച്ച് കേരളത്തില്‍നിന്നുള്ള എംപിമാര്‍
Wednesday, August 7, 2024 2:52 AM IST
ന്യൂഡല്‍ഹി: സ്വകാര്യ ആശുപത്രികളിലെ നഴ്സുമാർക്ക് സർക്കാർ ആശുപത്രികളിൽ ലഭിക്കുന്ന അതേ ബഹുമാനവും അംഗീകാരവും ഉറപ്പാക്കണം. കേന്ദ്ര സർക്കാരിനോട് ഇക്കാര്യത്തിൽ ആവശ്യമായ നടപടികൾ സ്വീകരിക്കണമെന്ന് ആന്‍റോ ആന്‍റണി എംപി ലോക്സഭയിൽ ആവശ്യപ്പെട്ടു.
ഭരണഘടന അനുശാസിക്കുന്ന തുല്യനീതിയുടെ തത്വങ്ങൾ ഉയർത്തിപ്പിടിക്കുകയും നഴ്സുമാർക്ക് അർഹമായ അന്തസും അംഗീകാരവും നൽകുകയും ചെയ്യേണ്ടത് അത്യന്താപേക്ഷിതമാണ്.
ഇന്ത്യൻ പ്രഫഷണൽ നഴ്സസ് അസോസിയേഷന്റെ (ഐപിഎൻഎ) ആവശ്യപ്രകാരം കേന്ദ്ര സർക്കാരിൽ ജോലി ചെയ്യുന്ന നഴ്സുമാർ അറിയപ്പെടുന്നത് നഴ്സിംഗ് ഓഫീസർ എന്ന പേരിലാണ്. സർക്കാർ മേഖലയിൽ ഈ ഉത്തരവ് നടപ്പാക്കിയിട്ടുണ്ട്. സ്വകാര്യ മേഖലയിലും ഇത് നടപ്പാക്കണമെന്ന് ആന്‍റോ ആന്‍റണി ആവശ്യപ്പെട്ടു.
അങ്കമാലി- എരുമേലി റെയിൽവേ നിർമാണം പുനരാരംഭിക്കണം
അങ്കമാലി- എരുമേലി റെയിൽവേയുടെ പുതുക്കിയ എസ്റ്റിമേറ്റിന് അനുമതി നൽകണമെന്നും പദ്ധതി നിർമാണം പുനരാരംഭിക്കണമെന്നും ആവശ്യപ്പെട്ട് കേന്ദ്ര റെയിൽവേ മന്ത്രി ആശ്വിനി വൈഷ്ണവിന് എംപിമാർ നിവേദനം നൽകി. എംപി മാരായ ബെന്നി ബെഹനാൻ, ഡീൻ കുര്യാക്കോസ്, ഫ്രാൻസിസ് ജോർജ്, ആന്‍റോ ആന്‍റണി എന്നിവരാണ് കേന്ദ്രമന്ത്രിയുമായി കൂടിക്കാഴ്ച നടത്തിയത്. പദ്ധതിയുടെ പകുതി ചെലവ് സംസ്ഥാനം വഹിക്കാമെന്ന് സർക്കാർ ഉത്തരവിലൂടെയും കത്തിലൂടെയും മൂന്ന് തവണ കേന്ദ്ര റെയിൽവേ മന്ത്രിയെ അറിയിച്ചിട്ടും അനിശ്ചിതത്വം തുടരുകയാണ്.
വിഷയം ചർച്ച ചെയ്യാൻ സംസ്ഥാന സർക്കാരിന്‍റെ പ്രതിനിധികളെയും എംപിമാരെയും പങ്കെടുപ്പിച്ചു യോഗം വിളിച്ചു ചേർക്കാമെന്നും റെയിൽവേ മന്ത്രി ഉറപ്പ് നൽകി.
ജനങ്ങളുടെ മാനസിക ആരോഗ്യത്തെ കേന്ദ്ര സർക്കാർ അവഗണിക്കുന്നു: അഡ്വ. പി. സന്തോഷ് കുമാർ
ജനങ്ങളുടെ മാനസിക ആരോഗ്യത്തെയും മാനസിക ആരോഗ്യ ചികിത്സാ കേന്ദ്രങ്ങളെയും കേന്ദ്രസർക്കാർ അവഗണിക്കുന്നുവെന്ന് അഡ്വ. പി. സന്തോഷ് കുമാർ. ഇക്കാലത്ത് ആരോഗ്യ കേന്ദ്രങ്ങൾ വഹിക്കുന്ന അവിഭാജ്യ പങ്ക് മനസിലാക്കി അവയുടെ വികസനത്തിനും ജനങ്ങളുടെ മാനസികാരോഗ്യം വർധിപ്പിക്കുന്നതിനുമുള്ള പരിപാടികൾ കേന്ദ്ര സർക്കാർ ഗൗരവത്തോടെ കാണണമെന്നും അദ്ദേഹം രാജ്യസഭയിൽ ആവശ്യപ്പെട്ടു.
കണ്ണൂർ വിമാനത്താവളത്തിന്‍റെ വളർച്ച തകർക്കുന്നു: കെ. സുധാകരൻ
കണ്ണൂർ വിമാനത്താവളത്തിന്‍റെ വളർച്ചാ സാധ്യതകൾ പ്രയോജനപ്പെടുത്തുന്നതിൽ കേന്ദ്രസർക്കാർ തുടരുന്ന അലംഭാവം ഉപേക്ഷിക്കണമെന്ന് കെ. സുധാകരൻ എംപി. മെട്രോ ഇതര വിമാനത്താവളങ്ങൾക്ക് സർക്കാർ ഒരു പോയിന്റ് കോൾ അനുവദിക്കില്ലെന്ന നിലപാടാണ് കേന്ദ്ര സർക്കാരിനുള്ളത്. ഇത് പുനഃപരിശോധിക്കാൻ കേന്ദ്ര സർക്കാർ തയാറാകണമെന്നും സുധാകരൻ ആവശ്യപ്പെട്ടു.
കണ്ണൂർ വിമാനത്താവളത്തിന് ‘പോയിന്റ് ഓഫ് കോൾ’ പദവി നൽകിയാൽ വിദേശ എയർലൈനുകൾക്ക് കണ്ണൂരിൽനിന്നു സർവീസ് നടത്താനാകുമെന്നും അദ്ദേഹം വ്യക്തമാക്കി.
കാർഷിക മേഖലയ്ക്ക് പ്രത്യേക പാക്കേജ് അനുവദിക്കണം: ജെബി മേത്തർ
കാലാവസ്ഥാ വ്യതിയാനം മൂലം വരൾച്ചയും പ്രകൃതി ദുരന്തങ്ങളും ആവർത്തിക്കപ്പെടുന്ന സാഹചര്യത്തിൽ തകർച്ചയിലായ കേരളത്തിന്‍റെ കാർഷികമേഖലയെ പുനരുജ്ജീവിപ്പിക്കുന്നതിന് പ്രത്യേക സാന്പത്തിക പാക്കേജ് അനുവദിക്കണമെന്ന് ജെബി മേത്തർ എംപി.
രാജ്യസഭയിൽ പ്രത്യേക പരമാർശത്തിലൂടെയാണ് എംപി ഇക്കാര്യം ആവശ്യപ്പെട്ടത്. 2024ലെ വരൾച്ച മൂലം 23,700 ഹെക്ടറിൽ കൃഷിനാശം സംഭവിക്കുകയും 260 കോടി രൂപയുടെ നഷ്ടം ഉണ്ടാവുകയും ചെയ്തു. കൃഷിനാശം സംഭവിച്ച കർഷകരുടെ കടം എഴുതിത്തള്ളുന്നതിന് ബാങ്കുകൾക്ക് നിർദേശം നൽകണമെന്നും വയനാട്ടിലെ ഉരുൾപൊട്ടൽ മൂലം ഉപജീവനമാർഗം നഷ്ടപ്പെട്ട കർഷകർക്ക് ആവശ്യമായ നഷ്ടപരിഹാരം നൽകണമെന്നും ജെബി മേത്തർ ആവശ്യപ്പെട്ടു.
കൂടുതൽ കൃഷി വിജ്ഞാന കേന്ദ്രങ്ങൾ അനുവദിക്കില്ലെന്ന് കേന്ദ്രമന്ത്രി
കേരളത്തിൽ കൂടുതൽ കൃഷി വിജ്ഞാന കേന്ദ്രങ്ങൾ അനുവദിക്കാൻ കഴിയില്ലെന്നു കേന്ദ്ര കൃഷിമന്ത്രി ഭഗീരഥ് ചൗധരി. എൻ.കെ. പ്രേമചന്ദ്രൻ എംപി സമർപ്പിച്ച ചോദ്യത്തിന് ലോക്സഭയിൽ മറുപടി നൽകുകയായിരുന്നു മന്ത്രി. കൃഷി വിജ്ഞാന കേന്ദ്രങ്ങളിലെ ജീവനക്കാർക്ക് പൊതു സർവീസ് ചട്ടവും സേവന വേതന വ്യവസ്ഥകളും നടപ്പാക്കുന്നത് പ്രായോഗികമല്ലെന്നും മന്ത്രി അറിയിച്ചു.
കോയന്പത്തൂർ- കൊച്ചി വ്യവസായ ഇടനാഴിക്ക് അന്തിമ അനുമതി നൽകണം: വി.കെ. ശ്രീകണ്ഠൻ
കോയന്പത്തൂർ- കൊച്ചി വ്യാവസായ ഇടനാഴിക്ക് അന്തിമ കേന്ദ്ര അനുമതി നൽകണമെന്ന് വി.കെ. ശ്രീകണ്ഠൻ എംപി പാർലമെന്‍റിൽ ആവശ്യപ്പെട്ടു. 2019ലെ ദേശീയ വ്യവസായിക ഇടനാഴി വികസനത്തിന്‍റെ ഭാഗമായി ചെന്നൈ ബാംഗ്ലൂർ വ്യവസായ ഇടനാഴി കോയന്പത്തൂർ വഴി കൊച്ചിയിലേക്ക് നീട്ടുന്നതിന് തീരുമാനിച്ചിരുന്നു. കേന്ദ്ര സർക്കാർ പദ്ധതിയുടെ കാര്യത്തിൽ ഉടൻ തീരുമാനമെടുക്കണമെന്ന് ശ്രീകണ്ഠൻ ആവശ്യപ്പെട്ടു.