സ്വ​ന്തം കാ​ർ​ഷി​ക ഉ​ത്്പ​ന്ന​ങ്ങ​ളു​മാ​യി ഓ​ണ​വി​പ​ണിക്കായി ജി​ല്ലാ കൃ​ഷി​ത്തോ​ട്ടം
Monday, September 2, 2024 11:58 PM IST
നൗ​ഷാ​ദ് മാ​ങ്കാം​കു​ഴി

മാ​ങ്കാം​കു​ഴി: ത​ഴ​ക്ക​ര പ​ഞ്ചാ​യ​ത്തി​ലെ മാ​ങ്കാം​കു​ഴി കോ​ട്ട​മു​ക്കി​ലു​ള്ള നൂ​റേ​ക്ക​ർ ജി​ല്ലാ കൃ​ഷി​ത്തോ​ട്ട​ത്തി​ൽ സ്വ​ന്തം കാ​ർ​ഷി​ക ഉ​ത്പ​ന്ന​ങ്ങ​ളു​മാ​യി ഓ​ണ​വി​പ​ണി ഒ​രു​ങ്ങു​ന്നു. ഇ​തി​നാ​യി പ​ച്ച​ക്ക​റി​യു​ടെ വി​ള​വെ​ടു​പ്പ് ആ​രം​ഭി​ച്ചു. 11 മു​ത​ൽ ഉ​ത്രാ​ടം വ​രെ​യാ​ണ് ഇ​വി​ടെ ഓ​ണ​വി​പ​ണി ഒ​രു​ക്കു​ന്ന​ത്. മ​റ്റ് എ​ല്ലാ ദി​വ​സ​ങ്ങ​ളി​ലും രാ​വി​ലെ ​പ​ത്ത് മു​ത​ൽ വൈ​കു​ന്നേ​രം അ​ഞ്ചു​വ​രെ സാ​ധാ​ര​ണ പ​ച്ച​ക്ക​റി വി​പ​ണി​ സ്റ്റാ​ളും പ്ര​വ​ർ​ത്തി​ക്കു​ന്നു​ണ്ട്.

ഫാ​മി​നോ​ട് ചേ​ർ​ന്നാ​ണ് വി​പ​ണി​ക്കാ​യി പ്ര​ത്യ​ക വി​ൽ​പ്പ​ന സ്റ്റാ​ൾ പ്ര​വ​ർ​ത്തി​ക്കു​ന്ന​ത്. പ​ച്ച​ക്ക​റി​ക്കൊ​പ്പം കൃ​ഷി​ക്കു വേ​ണ്ട തൈ​ക​ളും വി​ത്തു​ക​ളും ല​ഭി​ക്കു​ന്നു​ണ്ട് എ​ന്ന​താ​ണ് ജി​ല്ലാ​ കൃ​ഷി​ത്തോ​ട്ട​ത്തി​ലെ ​പ്ര​ത്യേ​ക​ത. അ​തി​നാ​ൽ നാ​ട​ൻ പ​ച്ച​ക്ക​റി​ക​ളും തൈ​ക​ളും വി​ത്തു​ക​ളും വാ​ങ്ങാ​ൻ നി​ര​വ​ധി​പ്പേ​ർ ഇ​വി​ടെ എ​ത്തു​ന്നു​ണ്ട്. പ​ട​വ​ലം, പാ​വ​ൽ, വെ​ള്ള​രി, ഏ​ത്ത​ക്കു​ല, വെ​ണ്ട​യ്ക്ക, വ​ഴു​ത​ന​ങ്ങ, മ​ത്ത​ങ്ങ, പ​യ​ർ, കു​മ്പ​ള​ങ്ങ, ചു​ര​ക്ക, പ​ച്ച​മു​ള​ക് തു​ട​ങ്ങി​യ​വ​യു​ടെ വി​ള​വെ​ടു​പ്പാ​ണ് ഇ​പ്പോ​ൾ ന​ട​ക്കു​ന്ന​ത്.


വി​ള​വെ​ടു​ക്കു​ന്ന കാ​ർ​ഷി​ക ഉ​ത്പ​ന്ന​ങ്ങ​ൾ നേ​രി​ട്ട് സ്റ്റാ​ൾ വ​ഴി ആ​വ​ശ്യ​ക്കാ​ർ​ക്ക് വി​ല​കു​റ​ച്ച് വി​ൽ​പ്പ​ന ന​ട​ത്തു​ക​യാ​ണ്.​ ഓ​ണ വി​പ​ണി​യി​ലേ​ക്ക് അ​ടു​ക്കു​മ്പോ​ൾ ചേ​മ്പ്, ചേ​ന, ഇ​ഞ്ചി, കാ​ച്ചി​ൽ, ക​പ്പ എ​ന്നി​വ കൂ​ടു​ത​ലാ​യി വി​ള​വെ​ടു​ക്കും.​ ഓ​ണ​വി​പ​ണി ല​ക്ഷ്യ​മി​ട്ടും അ​ല്ലാ​ത​യും ജി​ല്ലാ കൃ​ഷി​ത്തോ​ട്ട​ത്തി​ലെ ജീ​വ​ന​ക്കാ​രു​ടെ​യും തൊ​ഴി​ലാ​ളി​ക​ളു​ടെ​യും അ​ധ്വാ​ന​ത്തി​ന്‍റെ ഫ​ല​മാ​യാ​ണ് പ​ച്ച​ക്ക​റി കൃ​ഷി​യി​ൽ വ​ലി​യ നേ​ട്ടം കൈ​വ​രി​ക്കു​ന്ന​ത്.​

വി​വി​ധയിനം വി​ത്തു​ക​ളും ഇ​വി​ടെ ഉ​ത്പാ​ദി​പ്പി​ക്കു​ന്നു​ണ്ട്. കൂ​ടാ​തെ വി​വി​ധയിനം ചെ​ടി​ക​ളു​ടെ തൈ​ക​ളും ഫ​ല വൃ​ക്ഷ​ത്തൈ​ക​ളും ല​ഭ്യ​മാ​ണ്. ഫാം ​സൂ​പ്ര​ണ്ട് ബി. ​സു​നി​ൽ​കു​മാ​ർ, കൃ​ഷി ഓ​ഫീ​സ​ർ ഹൃ​ദ്യ ര​ജീ​ന്ദ്ര​ൻ,കൃ​ഷി അ​സി​സ്റ്റ​ന്‍റുമാ​രാ​യ ര​ഞ്ജി​ത്ത്, ശ്യാം​കു​മാ​ർ, ന​ദി​യ എ​ന്നി​വ​രു​ടെ മേ​ൽ​നോ​ട്ട​ത്തി​ലാ​ണ് പ​ച്ച​ക്ക​റിക്കൃ​ഷി ന​ട​ത്തു​ന്ന​ത്.