ആവേശത്തിരയായി ഡിസിഎൽ സംസ്ഥാന ടാലന്‍റ് ഫെസ്റ്റ് : Deepika.com Kerala News |

Click here for detailed news of all items

ആവേശത്തിരയായി ഡിസിഎൽ സംസ്ഥാന ടാലന്‍റ് ഫെസ്റ്റ്

Sunday, February 19, 2017 1:56 PM IST

തൃശൂർ: ദീപിക ബാലസഖ്യം(ഡിസിഎൽ) സംസ്ഥാന ടാലന്‍റ് ഫെസ്റ്റും ഐക്യു സ്കോളർഷിപ്പ് അവാർഡ് സമർപ്പണവും വർണാഭമായ ചടങ്ങിൽ തൃശൂരിൽ നടന്നു. ഡിസിഎൽ ഷോർട്ട് ഫിലിം അവാർഡും ചടങ്ങിൽ പ്രഖ്യാപിച്ചു.

തൃശൂർ ദേവമാത സിഎംഐ പബ്ലിക് സ്കൂളിൽ സംഘടിപ്പിച്ച അവാർഡ്ദാന സമ്മേളനോദ്ഘാടനവും അവാർഡ് സമർപ്പണവും കാർഷിക സർവകലാശാല വൈസ് ചാൻസലർ ഡോ.പി. രാജേന്ദ്രൻ നിർവഹിച്ചു. അവാർഡും അഭിനന്ദനങ്ങളും അംഗീകാരങ്ങളും നമ്മളിൽനിന്നു കൂടുതൽ ഉത്തരവാദിത്വം ആവശ്യപ്പെടുന്നുണ്ടെന്നും അതു തുടരാനും നിലനിർത്താനും കഴിയണമെന്നും അദ്ദേഹം ഓർമിപ്പിച്ചു. അംഗീകാരങ്ങൾ വലിയ ഉയരങ്ങളിലേക്കുള്ള ചവിട്ടുപടിയായി കാണണം. വിനയത്താൽ എത്രയും ചെറുതാകുന്നോ, അത്രയും വലുതാകുന്നുണ്ടെന്നും ഓർക്കണം. പൊതുപ്രവർത്തനങ്ങളിൽ ഏർപ്പെട്ടും ചുറ്റുമുള്ള കാര്യങ്ങളെ അറിഞ്ഞും സ്വയംവളർച്ചയെ പരിപോഷിപ്പിക്കണം. ജീവിതത്തിന്‍റെ എല്ലാ അവസ്ഥകളിലും ഒരുപാട് കടമകൾ സമൂഹത്തിനായി നമുക്ക് നിർവഹിക്കാനുണ്ടെന്ന് ഓർമിക്കണമെന്നും ഡോ.പി. രാജേന്ദ്രൻ ചൂണ്ടിക്കാട്ടി.

ഡിസിഎൽ പ്രവർത്തനത്തിൽ 50 വർഷം പൂർത്തീകരിച്ച കോട്ടയം പ്രവിശ്യ കോ-ഓർഡിനേറ്റർ പി.ടി. തോമസിനെ ചടങ്ങിൽ ആദരിച്ചു. ഡിസിഎൽ നാഷണൽ കോ-ഓർഡിനേറ്റർ വർഗീസ് കൊച്ചുകുന്നേൽ, പി.ടി. തോമസിനെ പരിചയപ്പെടുത്തി. ഡിസിഎൽ സംസ്ഥാന ജനറൽ ലീഡർ ജിയ മരിയ ഫിലിപ്പ് അധ്യക്ഷയായി.

ഡിസിഎൽ ഷോർട്ട്ഫിലിം പ്രഖ്യാപനം തൃശൂർ ദൂരദർശൻ കേന്ദ്രം മുൻ ഡയറക്‌ടർ ഡോ.സി.കെ. തോമസ് നിർവഹിച്ചു. സംഗീതനാടക അക്കാദമി മുൻ വൈസ് ചെയർമാൻ ഡോ.ടി.എം. ഏബ്രഹാം മുഖ്യപ്രഭാഷണം നടത്തി.

സിഎംഐ ദേവമാത പ്രൊവിൻഷ്യൽ റവ.ഡോ. വാൾട്ടർ തേലപ്പിള്ളി, പാലക്കാട് രൂപത വികാരി ജനറാൾ മോണ്‍. ജോസഫ് ചിറ്റിലപ്പിള്ളി, ഡിസിഎൽ ട്രസ്റ്റ് ഡയറക്‌ടർമാരായ ഫാ. പോൾ മണവാളൻ, സി.പി. പോൾ ചുങ്കത്ത്, ദീപിക തൃശൂർ റസിഡന്‍റ് മാനേജർ റവ.ഡോ. ആന്‍റോ ചുങ്കത്ത് എന്നിവർ ആശംസകൾ നേർന്നു. ഡിസിഎൽ കൊച്ചേട്ടൻ ഫാ. റോയി കണ്ണൻചിറ സ്വാഗതവും തൃശൂർ പ്രവിശ്യ കോ-ഓർഡിനേറ്റർ ജെയിംസ് പടമാടൻ നന്ദിയും പറഞ്ഞു.
രാവിലെ സംസ്ഥാന ടാലന്‍റ് ഫെസ്റ്റിന്‍റെ ഉദ്ഘാടനം രാഷ്‌ട്രദീപിക ഡയറക്ടർ റവ.ഡോ.ജെയിംസ് ഏർത്തയിൽ നിർവഹിച്ചു. ഡിസിഎൽ സംസ്ഥാന െഡപ്യൂട്ടി ലീഡർ ഷിന്‍റോ ഷിബു അധ്യക്ഷനായി.

സംസ്ഥാന ജനറൽ സെക്രട്ടറി ദേവതീർഥ മുരളി, തൃശൂർ മേഖല ഓർഗനൈസർ സിസ്റ്റർ സൗമ്യ എഫ്സിസി എന്നിവർ ആശംസകൾ നേർന്നു. രാവിലെ നടന്ന സംസ്ഥാന ടാലന്‍റ് ഫെസ്റ്റിൽ സംഗീതം, പ്രസംഗം, രചന മത്സരങ്ങളിലായി 14 ജില്ലകളിൽനിന്നു സമ്മാനാർഹരായ 1500 ലേറെ പ്രതിഭകൾ പങ്കെടുത്തു. ഇതിനോടൊപ്പം മുൻ ഡിസിഎൽ ജനറൽ ലീഡർ ഡിന്‍റോ ഡേവിസിന്‍റെ നേതൃത്വത്തിൽ നടത്തിയ ചോക്ലേറ്റ് മെഗാ ക്വിസിൽ 100-ഓളം ടീമുകൾ പങ്കെടുത്തു. ടാലന്‍റ് ഫെസ്റ്റിൽ കണ്ണൂർ പ്രവിശ്യ ഓവറോൾ ചാന്പ്യന്മാരായി.
ഉച്ചകഴിഞ്ഞ് നടത്തിയ ഡിസിഎൽ ഐക്യു സ്കോളർഷിപ്പ് അവാർഡ് വിതരണത്തിൽ 500 ലേറെ പ്രഥമാധ്യാപകരും റാങ്കു ജേതാക്കളും മാതാപിതാക്കളുമുൾപ്പെടെ 1500 ലേറെ പേർ പങ്കെടുത്തു.
പ്രവിശ്യാ കോ-ഓർഡിനേറ്റർ മാരും കേന്ദ്ര സമിതിയംഗങ്ങളും സംസ്ഥാന നേതാക്കളും നേതൃത്വം നൽകി.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.