ഇതൊരു കാക്കക്കൂട്ടിന്‍റെ കഥയാണ് : Deepika.com Nattu Visesham

KOTTAYAM

ഇതൊരു കാക്കക്കൂട്ടിന്‍റെ കഥയാണ്

Monday, May 6, 2024 11:45 PM IST

കടുത്തുരുത്തി: കഴിഞ്ഞ പുതുവത്സരദിനത്തിലാണ് ഷാജിക്ക് കുഞ്ഞന്‍ കാക്കയെ കിട്ടുന്നത്. കൂടെ കൂട്ടിയ കാക്കക്കുഞ്ഞിന് രാമനെന്ന് ഷാജി പേരിട്ടു. ഇപ്പോള്‍ ഷാജിയില്ലാതെ രാമനില്ലാത്ത അവസ്ഥയാണ്. ഷാജിയുടെ തോളിലിരുന്നും കൂടെ പറന്നും ഉറ്റവനായി സഹചാരിയായി മാറിയിരിക്കുകയാണ് രാമനെന്ന കുഞ്ഞന്‍ കാക്ക.

കല്ലറ - വെച്ചൂര്‍ റോഡില്‍ പെരുന്തുരുത്ത് കടവ് പാലത്തിന് സമീപം അമീഷ ഡക്ക് ഷോപ്പ് നടത്തുകയാണ് പെരുന്തുരുത്ത് വാക്കേപ്പറമ്പ് ഷാജി പൗലോസ്. പുതുവത്സരദിനത്തില്‍ താറാവിന് തീറ്റ കൊടുത്തിട്ട് തിരികെ വരുമ്പോളാണ് നിലത്ത് വീണുകിടക്കുന്ന കാക്കക്കുഞ്ഞിനെ ഷാജി കാണുന്നത്. കൈയിലെടുത്ത് കടയിലേക്ക് കൊണ്ടുവന്നു. ഒരാഴ്ചയോളം കടയില്‍ ഒരു പെട്ടിയിലിട്ടു സംരക്ഷിച്ചു.

ഇതിനിടെ രാമന്‍ എന്ന് പേരുമിട്ടു. പിന്നീട് കടയ്ക്കുള്ളില്‍ ഒരു കമ്പ് കെട്ടിവച്ച് അതില്‍ കയറ്റിയിരുത്തി. പറക്കാറായപ്പോള്‍ രാമന്‍ കടയിലും സമീപത്തെ മരത്തിലുമായി ഇരിപ്പുറപ്പിച്ചു. മീനും ചോറുമൊക്കെയാണ് ഇവന്‍റെ ഇഷ്ടഭക്ഷണം. കട രാവിലെ പത്തിന് തുറന്ന് വൈകുന്നേരം മൂന്നിന് അടയ്ക്കുന്നതാണ് ഷാജിയുടെ പതിവ്. ഈ സമയം രാമന്‍ ഷാജിക്കും ഭാര്യ മിനിക്കുമൊപ്പമുണ്ടാകും. ഷാജി പുറത്തേക്ക് പോകാനിറങ്ങിയാല്‍ ഉടന്‍തന്നെ രാമന്‍ തോളിലേക്കു പറന്നെത്തി കൂടെ പോകും.

തോളില്‍ കയറിയിരിക്കുന്ന രാമന് കൊക്ക് തടവിക്കൊടുക്കുന്നത് വളരെ ഇഷ്ടമാണെന്ന് ഷാജി പറയുന്നു. അത്രദൂരയല്ലാതെ പറന്നുപോയാല്‍ രാമാ എന്ന് വിളിച്ചാലുടന്‍ ഷാജിയുടെ അടുത്ത് ഇവന്‍ പറന്നെത്തും. ഇടയ്ക്ക് ഷാജിയുടെ പോക്കറ്റില്‍നിന്ന് നോട്ടുകള്‍ കൊത്തിയെടുത്ത് പറത്തിക്കളയുന്ന അത്ര നല്ലതല്ലാത്ത ഒരു ശീലവും രാമനുണ്ട്.