ലഹരിക്കെതിരെ പ്രതിജ്ഞയെടുത്തു

കൊല്ലം : രാസ ലഹരിക്കെതിരെ ഉള്ള പ്രചരണവുമായി മഹിളാ കോൺഗ്രസ് സംസ്ഥാന പ്രസിഡന്‍റ് ജെബി മേത്തർ എംപി നയിക്കുന്ന മഹിള സാഹസ് കേരളയാത്രയ്ക്ക് കൊല്ലത്ത് ഗംഭീര വരവേൽപ്പ് നൽകി.

കൊല്ലം സൗത്ത് മണ്ഡലത്തിന്‍റെ സ്വീകരണം തങ്കശേരിയിൽ എം .വിൻസന്‍റ് എംഎൽഎയും കടപ്പാക്കട - ആശ്രാമം മണ്ഡലങ്ങളുടെ സ്വീകരണം കടപ്പാക്കട ജംഗ്ഷനിൽ ഡിസിസി പ്രസിഡന്‍റ് പി .രാജേന്ദ്രപ്രസാദും കൊല്ലം സെൻട്രൽ - വെസ്റ്റ് മണ്ഡലങ്ങളുടെ സ്വീകരണം ചിന്നക്കടയിൽ കെപിസിസി രാഷ്ട്രീയകാര്യ സമിതി അംഗം അഡ്വ.ബിന്ദു കൃഷ്ണയും ഉദ്ഘാടനം ചെയ്തു. സ്വീകരണയോഗത്തിൽ പ്രതിജ്ഞ എടുത്തു.

നേതാക്കളായ എ.കെ .ഹഫീസ്, സൂരജ് രവി, ഡി .ഗീതാകൃഷ്ണൻ, സന്തോഷ്‌ തുപ്പശേരിൽ, ആദിക്കാട് മധു, പ്രാക്കുളം സുരേഷ്, മഹിളാ കോൺഗ്രസ് നേതാക്കളായ ഫേബ സുദർശൻ, യു. വഹീദാ, എൽ. അനിത, ജയലക്ഷ്മി ദത്തൻ, മാരിയത്ത് ബീവി, സുനിത സലീംകുമാർ, ഡോ .ഉദയ കരുമാലിൽ തുടങ്ങിയവർ നേതൃത്വം നൽകി.

ADVERTISEMENT

വിത്തുത്പാദന കേന്ദ്രത്തിന്‍റെ പ്രവർത്തനം നിലച്ചു

കൊട്ടാരക്കര : കാൽ നൂറ്റാണ്ട് മുൻപ് നെടുവത്തൂർ പഞ്ചായത്തിലെ പുല്ലാമലയിൽ തുടക്കം കുറിച്ച വിത്തുത്പാദന കേന്ദ്രത്തിന്‍റെ പ്രവർത്തനം നിലച്ചു. 25വർഷം മുൻപ് സംസ്ഥാനകൃഷി വകുപ്പിന്‍റെ മേൽ നോട്ടത്തിൽ നെടുവത്തൂർ കൃഷി ഭവനും പഞ്ചായത്തും മുൻകൈ എടുത്താണ് വിത്തുത്പാദനത്തിനും തൈകൾ വിപണനം ചെയ്യുന്നതിനുമായി പുല്ലാമലയിൽ കെട്ടിടം നിർമിച്ചത്. ഉത്പാദന കേന്ദ്രം വരുന്നതോട് കൂടി പ്രദേശവാസികൾക്ക് ദിവസവേതന അടിസ്ഥാനത്തിൽ തൊഴിൽ ലഭിക്കുമെന്നുള്ള പ്രതീക്ഷയും ഉണ്ടായിരുന്നു. സർക്കാരിൽ നിന്നും പച്ചക്കറി വിത്തുകളും തൈകളും യഥേഷ്ടം വിപണിയിൽ എത്തുന്നതിനാൽ പുല്ലാമലയിൽ തുടക്കം കുറിച്ച വിത്തുൽപ്പാദന കേന്ദ്രത്തെ അവഗണിച്ചു. കോവിഡ് കാലയളവിൽ ഈ കെട്ടിടം രോഗികൾക്കായി തുറന്നു കൊടുത്തിരുന്നു. എന്നാൽ പഞ്ചായത്തിൽ തന്നെ നിരവധി സർക്കാർ സ്ഥാപനങ്ങൾ വാടകകെട്ടിടത്തിൽ ഇപ്പോഴും പ്രവർത്തിക്കുകയാണ്.

കൊട്ടാരക്കര ഇന്‍റഗ്രേറ്റഡ് ആയുഷ് ആശുപത്രി നിർമാണ അവലോകനം നടത്തി എംപി

കൊട്ടാരക്കര : ഗവ. ആയുർവേദ ആശുപത്രി സമുച്ചയത്തിൽ 30 ബെഡുകൾ ഉൾപ്പെടുത്തി നിർമിക്കുന്ന ഇന്‍റഗ്രേറ്റഡ് ആയുഷ് ആശുപത്രിയുടെ നിർമാണ പുരോഗതി അവലോകനം നടത്തി കൊടിക്കുന്നിൽ സുരേഷ് എംപി. ദേശീയ ആയുഷ് മിഷൻ പദ്ധതിയുടെ ഭാഗമായി 10.50 കോടി രൂപ ചെലവിൽ നിർമിക്കുന്ന ആശുപത്രി 60 ശതമാനം കേന്ദ്രവിഹിതമായും 40 ശതമാനം സംസ്ഥാന വിഹിതമായും ആണ് നടപ്പിലാക്കുന്നത്. ഇതിൽ 6.25 കോടി രൂപ കേന്ദ്ര ആയുഷ് മന്ത്രാലയവും 4.25 കോടി രൂപ സംസ്ഥാന സർക്കാരിന്‍റെയും വിഹിതമാണ്. അവലോകന യോഗത്തിൽ ദേശീയ ആയുഷ് മിഷൻ ജില്ലാ പ്രോഗ്രാം മാനേജർ, നിർമാണ പ്രവർത്തനങ്ങളുടെ കൺസൾട്ടൻസി പ്രതിനിധികൾ, കോൺട്രാക്ടർ, ബന്ധപ്പെട്ട വകുപ്പ് ഉദ്യോഗസ്ഥർ, ജനപ്രതിനിധികൾ എന്നിവർ പങ്കെടുത്തു. ആരോഗ്യ പരിപാലനത്തിന്‍റെ പുതിയ സാധ്യതകൾ തുറക്കുന്ന തരത്തിലാണ് കൊട്ടാരക്കരക്ക് ലഭിക്കുന്ന ഈ പദ്ധതി. ആയുഷ് ചികിത്സാവ്യവസ്ഥയെ ശാസ്ത്രീയമായി വികസിപ്പിക്കുകയും ജനങ്ങൾക്ക് ഗുണമേന്മയുള്ള സേവനം ഉറപ്പാക്കുകയും ചെയ്യുന്നതിൽ ഇതിന് വലിയ പങ്കുണ്ടാകും. കൊട്ടാരക്കരയും സമീപ പ്രദേശങ്ങളും ഉൾപ്പെടുന്ന ജനങ്ങൾക്ക് ആശുപത്രി വലിയ ആശ്വാസമായിരിക്കുമെന്ന് കൊടിക്കുന്നിൽ സുരേഷ് എംപി പറഞ്ഞു.

വസ്ത്രശാല ജീവനക്കാർക്ക് കളഞ്ഞുകിട്ടിയ സ്വർണമാലയും താലിയും ഉടമയ്ക്ക് തിരികെ നൽകി

കുണ്ടറ: ഉത്രാടദിനത്തിൽ വസ്ത്രശാല ജീവനക്കാർക്ക് കളഞ്ഞുകിട്ടിയ ഏഴരഗ്രാം സ്വർണമാലയും താലിയും ഉടമയ്ക്ക് തിരികെ നൽകി. പുത്തൂർ തെക്കുംചേരി തെങ്ങുവിള വീട്ടിൽ കിഷോറിന്‍റെ ഭാര്യ റോഷ്‌നിയുടെ നഷ്ടപെട്ട മാലയും താലിയുമാണ് തിരികെ കിട്ടിയത്. നാലിന് റോഷ്നി വസ്ത്രം വാങ്ങാൻ പുത്തൂരിലെ ഒരു തുണിക്കടയിലെത്തിയപ്പോഴാണ് മാല നഷ്ടപെട്ടത്. അതിനു ശേഷം അവർ പുത്തൂരിലും കൊട്ടാരക്കരയിലുമായി വിവിധ കടകളിൽ പോയി. അന്ന് രാത്രിയോടെയാണ് മാല നഷ്ടപ്പെട്ട വിവരം റോഷ്‌നി അറിയുന്നത്. പലയിടത്തും അന്വേഷിച്ചെങ്കിലും ഒരു ഫലവുമുണ്ടായില്ല. ടെക്സ്റ്റൈൽസിന്‍റെ ലാൻഡ് ഫോണിൽ വിളിച്ചെങ്കിലും ഫോൺ തകരാറായതിനാൽ കോൾ കണക്ടായില്ല. ഇതിനിടെയാണ്, തുണിക്കടയുടെ രണ്ടാംനില വൃത്തിയാക്കിയ ജീവനക്കാരായ മൈലംകുളം സ്വദേശി മിഥുനേഷ്, ചെറുമങ്ങാട് സ്വദേശി മനോജ് എന്നിവർക്ക് മാല കിട്ടുന്നത്. ഇവർ ഉടൻ കടയുടമയ്ക്ക് മാല കൈമാറി. മാല തിരക്കി ആളെത്തുമെന്ന പ്രതീക്ഷയിൽ കടയുടമ കടയിൽതന്നെ താലി ഉൾപ്പെടെയുള്ള മാല സൂക്ഷിക്കുകയായിരുന്നു. എന്നാൽ ദിവസങ്ങൾ കഴിഞ്ഞിട്ടും ആളെത്താത്തതിനാൽ മാല പുത്തൂർ പോലീസിന് കൈമാറി. ബുധനാഴ്ച വിവരമറിഞ്ഞ റോഷ്‌നി സ്റ്റേഷനിലെത്തി മാല തന്‍റേതാണെന്ന്‌ അറിയിച്ചു. പുത്തൂർ എസ്ഐ ടി.ജെ. ജയേഷിന്‍റെ സാന്നിധ്യത്തിൽ ടെക്സ്‌റ്റൈൽസ് ജീവനക്കാർ മാല റോഷ്‌നിക്ക് കൈമാറി. ഖത്തറിൽ കുടുംബസമേതം താമസിക്കുന്ന റോഷ്‌നി ഓണാവധിക്ക് നാട്ടിലെത്തുമ്പോഴായിരുന്നു സംഭവം.

അന്പതേക്കർ പാലം നിര്‍മാണത്തിലെ അപാകത : പ്രതിഷേധവുമായി നാട്ടുകാർ

കുളത്തൂപ്പുഴ: വില്ലുമല ആദിവാസി സെറ്റിൽമെന്‍റ് ഉന്നതി യിലേക്ക് അടക്കം ജനവാസ മേഖലയിലേക്കുള്ള വനപാതയിലെ പാലം നിര്‍മാണത്തില്‍ അപാകത ആരോപിച്ച് പ്രതിഷേധവുമായി നാട്ടുകാര്‍. കുളത്തൂപ്പുഴ പഞ്ചായത്തിലെ വില്ലുമല അമ്പതേക്കര്‍ പാതയിലുള്ള കുഞ്ഞുമാന്‍ തോടിന് കുറുകെയുള്ള പാലം നിര്‍മാണത്തിനെതിരെയാണ് പ്രദേശവാസികള്‍ പ്രതിഷേധമുയര്‍ത്തുന്നത്. വർഷങ്ങൾക്ക് മുമ്പ് നിര്‍മിച്ച പാലം കാലവര്‍ഷത്തില്‍ ജലനിരപ്പുയര്‍ന്ന് നിരന്തരം വെള്ളത്തിനടിയിലാവുകയും പ്രദേശം ഒറ്റപ്പെടുന്ന അവസ്ഥയുണ്ടാവുന്ന സാഹചര്യത്തിലാണ് പുതിയ പാലത്തിനായുള്ള നടപടികൾ ആരംഭിക്കുന്നത്. എംഎല്‍എയുടെ ആസ്ഥി വികസന ഫണ്ടില്‍ നിന്നും 95 ലക്ഷം രൂപ മുടക്കി നിര്‍മിക്കുന്ന പുതിയ പാലത്തിന്‍റെ വശങ്ങളുടെ നിര്‍മാണം പുരോഗമിക്കവേയാണ് പണിയിലെ അപകാത ചൂണ്ടിക്കാട്ടി നാട്ടുകാര്‍ രംഗത്ത് വന്നിട്ടുള്ളത്. പാലത്തിന്‍റെ ഇരുകരകളിലും അപ്രോച്ച് റോഡ് കടന്നെത്തുന്നതിനായി നിര്‍മിക്കുന്ന കോണ്‍ക്രീറ്റ് ബീമിന്‍റെ ഒരു വശത്തു മാത്രമായാണ് കമ്പികള്‍ ഇതുവരെ പാകിയിട്ടുള്ളത്. മൂന്നടിയോളം കനത്തില്‍ നിര്‍മിക്കുന്ന കോണ്‍ക്രീറ്റ് ഭിത്തിയുടെ ഒരു വശത്തു മാത്രം കമ്പികള്‍ പാകുന്നത് ഭാവിയില്‍ ഭിത്തിക്ക് വിള്ളലുണ്ടാവുന്നതിനും പൊട്ടിതകരുന്നതിനും കാരണമാകാമെന്ന ഭീതിയാണ് നാട്ടുകാര്‍. പാലത്തിന്‍റെ പണിനടത്തുന്ന കരാറുകാരോട് നാട്ടുകാരില്‍ ചിലര്‍ ഇത് സംബന്ധിച്ച് പരാതി പങ്കുവെച്ചെങ്കിലും കരാര്‍ പ്രകാരമുള്ള ജോലികളാണ് ചെയ്യുന്നതെന്ന വിശദീകരണമാണ് നൽകിയത്. ഇതോടെ ബന്ധപ്പെട്ട ഉദ്യോഗസ്ഥരെത്തിയ ശേഷം നിര്‍മാണ ജോലികള്‍ തുടര്‍ന്നാല്‍ മതിയെന്ന് നാട്ടുകാര്‍ ആവശ്യപ്പെടുകയായിരുന്നു. യാതൊരു വിധ ബലക്ഷയവുമുണ്ടാകാന്‍ സാധ്യതയില്ലെന്നുള്ള ഉറപ്പ് പൊതുമരാമത്ത് എൻജിനയര്‍ നല്‍കിയതോടെയാണ് നാട്ടുകാര്‍ പ്രതിഷേധം അവസാനിപ്പിച്ചത്. പ്രദേശവാസികളായ ഷാംജീര്‍, നസീര്‍, സജിന്‍ നാസര്‍, അജിമോന്‍ തുടങ്ങിയവര്‍ ചര്‍ച്ചകള്‍ക്ക് നേതൃത്വം നൽകി.

ബന്തിപ്പൂവ് കൃഷിയിൽ വിജയഗാഥയുമായി മലർവാടി ഗ്രൂപ്പ്

അനിൽ പന്തപ്ലാവ് പുനലൂർ: പൂക്കളുടെ വസന്തകാലമൊരുക്കി കരവാളൂരിലെ മലർവാടി ഗ്രൂപ്പ് അംഗങ്ങൾ. പൂക്കൾക്കായി അന്യസംസ്ഥാനങ്ങളെ ആശ്രയിക്കുമ്പോൾ മലയാളികൾക്കിടയിൽ വ്യത്യസ്തമായി മാറുകയാണ് മാത്രയിലുള്ള മലർവാടി ഗ്രൂപ്പ്. പാട്ടത്തിനെടുത്ത അര ഏക്കർ ഭൂമിയിൽ കഴിഞ്ഞ വർഷം ബന്തിപ്പൂവ് കൃഷിയിറക്കി വിജയം വരിച്ച ചരിത്രമാണ് ഇവർക്കുള്ളത്. അഞ്ചൽ ബ്ലോക്ക് ഓഫീസിൽ നിന്നും ലഭിച്ച മൂവായിര ത്തോളം വരുന്ന ബന്തിച്ചെടികളാണ് ഇപ്പോൾ പൂവിട്ട് വില്പനയ്ക്ക് തയാറായി നിൽക്കുന്നത്. മഞ്ഞയും ഓറഞ്ചും നിറങ്ങളിൽ വലിപ്പമേറിയ പൂവാണ് ഈ കൃഷിയിടത്തിൽ നിന്ന് ലഭിക്കുന്നത് .പുഷ്പ വ്യാപാരശാലകളിലെ ഓരോ ദിവസത്തേയും പൂവിന്‍റെ വിലയ്ക്ക് തന്നെ ഇവിടെ നിന്നും പൂക്കൾ വാങ്ങാം. പൂക്കടകളിൽ നിന്ന് മാത്രമല്ല സമീപ ക്ഷേത്രങ്ങളിൽ നിന്നും സ്കൂൾ, വ്യാപാര സ്ഥാപനങ്ങളിൽ നിന്നും പൂക്കൾ വാങ്ങുവാൻ ഇവിടെ എത്തുന്നുണ്ട്. മലർവാടി ഗ്രൂപ്പിനെ വസുദേവി, രാജി, ചിത്രലേഖ, ശോഭ, അനില തുടങ്ങിയ അഞ്ചംഗ സംഘമാണ് നയിക്കുന്നത്. കഴിഞ്ഞ വർഷം പൂവിനൊപ്പം മരച്ചീനിയും ഇവർ കൃഷി ചെയ്തിരുന്നു. നല്ല വിളവെടുപ്പ് ലഭിച്ചിരുന്നു. ഇതിന്‍റെ ആത്മവിശ്വാസത്തിലാണ് ഇക്കുറിയും കളത്തിലിറങ്ങിയിട്ടുള്ളത്. ബ്ലോക്ക് - പഞ്ചായത്ത് - കൃഷി ഭവൻ എന്നിവയുടെ നിർദ്ദേശാനുസരണമാണ് കൃഷിയെങ്കിലും സബ്സിഡിയോ മറ്റോ ലഭ്യമായാൽ കൂടുതൽ കൃഷി വ്യാപിപ്പിക്കാൻ സാധിക്കുമെന്നും ഇവർ പറയുന്നു. തീർത്തും ജൈവ കൃഷിയാണ് ഇവർ നടത്തിവരുന്നത്. നിലമൊരുക്കി ചാണകപ്പൊടി വിതറി ബന്ദിനടുന്നു. മൂന്നാം മാസം മുതൽ വിളവെടുക്കാം. മഴയും പുഴുശല്യവും പ്രതികൂലമായി വരാതെ ഇരുന്നാൽ സിസംബർ പകുതി വരെ വില്പന നടത്താൻ കഴിയുമെന്നും ഇവർ പറയുന്നു.ഇത്തരത്തിൽ പൂക്കളിലൂടെ സ്വയംപര്യാപ്തത കൈവരിക്കാൻ ഒരുങ്ങുകയാണ് മാത്ര ഗ്രാമം.

അദാലത്ത് സംഘടിപ്പിച്ചു

കുണ്ടറ : പി.സി. വിഷ്ണുനാഥ് എംഎൽഎയുടെ നേതൃത്വത്തിൽ മണ്ഡലത്തിലെ ജനങ്ങളുടെ പരാതികൾ കേൾക്കുന്നതിനും പരിഹാരം കാണുന്നതിനുമായി അദാലത്ത് സംഘടിപ്പിച്ചു. തീർപ്പാക്കാൻ കഴിയാവുന്ന പരാതികൾ തൽസമയം തീർപ്പ് കൽപ്പിക്കുകയും സർക്കാരിലേക്ക് സമർപ്പിക്കേണ്ട പരാതികൾ അതാത് വകുപ്പുകൾ വഴി സർക്കാരിലേക്ക് സമർപ്പിക്കുകയും ചെയ്തു. നിയമപരമായ പരിഹാരം ആവശ്യമായ വിഷയങ്ങൾ നിയമസഭയിൽ ഉന്നയിക്കുമെന്നും പി.സി .വിഷ്ണുനാഥ് എംഎൽഎ പറഞ്ഞു.

അനന്തപുരി എക്സ്പ്രസ് താംബരം വരെ മാത്രം

കൊല്ലം: ചെന്നൈ എഗ്‌മോർ - കൊല്ലം അനന്തപുരി സൂപ്പർ ഫാസ്റ്റ് എക്സ്പ്രസ് (20635/20636) താത്ക്കാലികമായി താംബരത്ത് സർവീസ് അവസാനിപ്പിക്കും. ഈ മാസം 17 മുതൽ നവംബർ 10 വരെയാണ് നിയന്ത്രണം ഏർപ്പെടുത്തിയിട്ടുള്ളത്. ചെന്നൈ എഗ്‌മോർ സ്റ്റേഷനിൽ നവീകരണ ഭാഗമായി വികസന പ്രവർത്തനങ്ങൾ നടക്കുന്ന സാഹചര്യത്തിലാണ് ഈ മാറ്റം.ഇക്കാലയളവിൽ ഈ വണ്ടി താംബരത്ത് നിന്ന് രാത്രി 8.20ന് കൊല്ലത്തിന് പുറപ്പെടും. തിരികെ കൊല്ലത്ത് നിന്ന് ഉച്ചകഴിഞ്ഞ് 2.50ന് പുറപ്പെടുന്ന ട്രെയിൻ അടുത്ത ദിവസം രാവിലെ 5.20ന് താംബരത്ത് എത്തുമെന്നും തിരുവനന്തപുരം ഡിവിഷൻ ഓപ്പറേറ്റിംഗ് ബ്രാഞ്ച് അധികൃതർ അറിയിച്ചു. സ്റ്റോപ്പുകളിലും സമയക്രമത്തിലും മറ്റ് മാറ്റങ്ങൾ ഒന്നുമില്ല.

കൊട്ടാരക്കരയിൽ കേന്ദ്രീയ വിദ്യാലയം യാഥാർഥ്യമാകുന്നു: കൊടിക്കുന്നിൽ സുരേഷ് എംപി

കൊട്ടാരക്കര : കേന്ദ്രീയ വിദ്യാലയം അടുത്ത അധ്യയന വർഷം പ്രവർത്തനമാരംഭിക്കുമെന്നു കൊടിക്കുന്നിൽ സുരേഷ് എംപി. കേന്ദ്രീയ വിദ്യാലയം താത്കാലികമായി ആരംഭിക്കുന്നതിനായി കൊട്ടാരക്കരയിൽ കണ്ടെത്തിയ ഓർത്തഡോക്സ് സഭയുടെ ഉടമസ്ഥതയിലുള്ള മാർ ബസേലിയസ് സ്കൂൾ കെട്ടിടം ഉദ്യോഗസ്ഥരോടൊപ്പം സന്ദർശിച്ച ശേഷം പ്രതികരിക്കുകയായിരുന്നു എംപി. കേന്ദ്രീയ വിദ്യാലയം താൽക്കാലികമായി സ്ഥാപിക്കുന്നതിനായി കണ്ടെത്തിയ കെട്ടിടത്തിന്‍റെ ഫിറ്റ്നസ് പരിശോധിക്കുന്നതിനായി കേന്ദ്രീയ വിദ്യാലയം സംഘംചുമതലപ്പെടുത്തിയതനുസരിച്ച് കൊല്ലം കേന്ദ്രീയ വിദ്യാലയം പ്രിൻസിപ്പൽ, പുനലൂർ ആർഡിഒ, പിഡബ്ല്യുഡി എൻജിനീയർ, ആർക്കിടെക്റ്റ് അടക്കമുള്ള ഉദ്യോഗസ്ഥരുടെ സംഘമാണ് എംപിയുടെ ആവശ്യപ്രകാരം കൊട്ടാരക്കരയിൽ എത്തിയത്. എംപി കേന്ദ്ര-സംസ്ഥാന വകുപ്പുകളിലെ ഉദ്യോഗസ്ഥരോടൊപ്പം നടത്തിയ സന്ദർശനത്തിൽ കൊട്ടാരക്കര മുൻസിപ്പൽ ചെയർമാൻ ഉണ്ണികൃഷ്ണമേനോൻ, വൈസ് ചെയർമാൻ ബിജി ഷാജി, ഡിസിസി ജനറൽ സെക്രട്ടറി പി .ഹരികുമാർ, കോൺഗ്രസ് ബ്ലോക്ക് പ്രസിഡന്‍റ് കെ.ജി .അലക്സ്, സിപിഎം ഏരിയ കമ്മറ്റി സെക്രട്ടറി ജോൺസൺ, നഗരസഭ കൗൺസിലർമാർ തുടങ്ങിയവർ പങ്കെടുത്തു.

മോണ്ടിസോറി ഗ്ലോബൽ സ്കൂൾ ഉദ്ഘാടനം

കുണ്ടറ: കുണ്ടറ പെരുമ്പുഴയിൽ ഗ്രീൻ ട്രീസ് മോണ്ടിസോറി ഗ്ലോബൽ സ്കൂൾ ഉദ്ഘാടനം മന്ത്രി ജെ. ചിഞ്ചുറാണി നിർവഹിച്ചു. ഗ്രീൻ ട്രീസ് എഡ്യൂ പാർക്കിംഗ് മാനേജിംഗ് ഡയറക്ടർ ഐസക് ഈപ്പന്‍റെഅധ്യക്ഷതയിൽ ചേർന്ന യോഗത്തിൽ പി.സി. വിഷ്ണുനാഥ് എംഎൽഎ സ്കൂളിന്‍റെ അഫിലിയേഷൻ സർട്ടിഫിക്കറ്റ് വിതരണം ചെയ്തു. മുൻ മന്ത്രി ജെ. മേഴ്സിക്കുട്ടിയമ്മ മോണ്ടിസോറി ഗ്ലോബൽ സ്കൂളിന്‍റെ ലോഗോ പ്രകാശനം ചെയ്തു. ഇളമ്പള്ളൂർ പഞ്ചായത്ത് പ്രസിഡന്‍റ് എസ്.ഡി. അഭിലാഷ് മുഖ്യ പ്രഭാഷണം നടത്തി. നെടുമ്പന പഞ്ചായത്ത് വൈസ് പ്രസിഡന്‍റ് ജി. സുധാകരൻ നായർ,മുഖത്തല ബ്ലോക്ക് പഞ്ചായത്ത് മെമ്പർ അഡ്വ.ഫറോക്ക് നിസാർ, പെരുമ്പുഴ ഗോപാലകൃഷ്ണപിള്ള, കരിപ്ര പഞ്ചായത്ത് അംഗം സന്തോഷ് സാമുവൽ കൊട്ടാരക്കര, യുഐടി പ്രിൻസിപ്പൽ ഡോ. എൻ. ശശികുമാർ, ഗ്രീൻപീസ് എഡ്യൂ പാർക്ക് ജനറൽ മാനേജർ തോമസ് മാത്യു, എൻ .ജോയി തുടങ്ങിയവർ പ്രസംഗിച്ചു.

എയറോബിക് കമ്പോസ്റ്റ് യൂണിറ്റ് സ്ഥാപിക്കാനുള്ള നീക്കം പാതിവഴിയിൽ നിലച്ചു

കൊല്ലം: നഗരം ശുചിത്വമുള്ളതാക്കാൻ വിഭാവനം ചെയ്ത യന്ത്രവൽകൃത എയറോബിക് കമ്പോസ്റ്റ് യൂണിറ്റ് നഗരസഭയുടെ ഒരിക്കലും പൂർത്തിയാകാത്ത ആധുനിക അറവുശാല പോലെയായി. പോളയത്തോട് വിശ്രാന്തിക്ക് സമീപം കോർപറേഷന്‍റെ മെക്കനൈസ്ഡ് എയ്റോബിക് കംപോസ്റ്റ് യൂണിറ്റ് സ്ഥാപിക്കാനുള്ള പ്രവർത്തനങ്ങളും പാതിവഴിയിൽ നിലച്ചിരിക്കുകയാണ്. കരാർ എടുത്ത സ്വകാര്യ ഏജൻസിയുടെ അലംഭാവമാണ് പ്രൊജക്ട് പൂർത്തിയാക്കുന്നതിനു തടസമായിരിക്കുന്നത്. പോർട്ടബിൾ കണ്ടെയ്നറോടുകൂടിയ കംപോസ്റ്റിംഗ് യൂണിറ്റാണ് സ്ഥാപിക്കാൻ ലക്ഷ്യമിട്ടിരുന്നത്. ഇതിനായി റോഡ് സൈഡിൽ നിർമാണം ആരംഭിച്ച ഷീറ്റിട്ട യൂണിറ്റ് പോലും പൂർത്തിയാക്കിയിട്ടില്ല. മാസങ്ങൾക്ക് മുമ്പ് തുടങ്ങിയ നിർമാണം മഴയെ തുടർന്ന് നിറുത്തി വെക്കുകയായിരുന്നു എന്നാണ് കരാർ എടുത്ത ഏജൻസി അവകാശപ്പെടുന്നത്. പാതി എത്തിയ നിർമാണം ഇപ്പോൾ കാട് മൂടി കൊണ്ടിരിക്കുന്ന അവസ്ഥയിലാണ്. വീടുകൾ, ആശുപത്രികൾ, ഹോട്ടൽ എന്നിവിടങ്ങളിൽ നിന്നെല്ലാം ജൈവമാലിന്യങ്ങൾ ശേഖരിച്ച് വേർതിരിച്ചാണ് യൂണിറ്റിൽ ശേഖരിക്കാൻ ലക്ഷ്യമിട്ടിരുന്നത്. നേരിട്ട് എത്തിക്കാൻ കഴിഞ്ഞില്ലെങ്കിൽ വീടുകളിൽ ഉൾപ്പെടെ എത്തി മാലിന്യം ശേഖരിക്കാനും ലക്‌ഷ്യം വെച്ചിരുന്നു. പദ്ധതിയിലൂടെ ജൈവമാലിന്യ സംസ്കരണം കൂടുതൽ വേഗത്തിലും ശാസ്ത്രീയമായും നിർവഹിക്കാനാകും എന്നതാണ് പദ്ധതിയുടെ പ്രത്യേകത. മാലിന്യ സംസ്കരണത്തിനായി എട്ടര അടി നീളവും രണ്ടടി വീതിയും നാലടി ഉയരവും ഉള്ള യന്ത്രം, ചുറ്റും മറച്ച ശീതീകരിച്ച പോർട്ടബിൾ കണ്ടെയ്നർ കാബിനുകൾ, മാലിന്യ ശേഖരണത്തിന് രണ്ട് ഓട്ടോറിക്ഷകൾ, 24 മണിക്കൂർ പ്രവർത്തനം, ഷിഫ്റ്റ് അടിസ്ഥാനത്തിൽ ജീവനക്കാർ, സുരക്ഷ ക്യാമറ, അലാറം എന്നിവ പ്രോജക്ടിനായി സജമാക്കുമെന്നായിരുന്നു കോർപറേഷൻ പറഞ്ഞിരുന്നത്. എന്നാൽ ഇതെല്ലാം എങ്ങും എങ്ങും എത്താത്ത അവസ്ഥയിലാണിപ്പോൾ.

തമിഴ്നാട് വിദഗ്ധ സംഘം കൊട്ടാരക്കര നഗരസഭ സന്ദർശിച്ചു

കൊട്ടാരക്കര : തദ്ദേശസ്വയംഭരണ സ്ഥാപനങ്ങളുടെ പ്രവർത്തനം പഠിക്കുന്നതിനായി തമിഴ്നാട്ടിൽ നിന്നും 20 അംഗസംഘം കൊട്ടാരക്കര നഗരസഭ സന്ദർശിച്ചു. തമിഴ്നാട്ടിലെ തന്നാച്ചി എന്ന എൻജിഒ സംഘമാണ് എത്തിയത്. തമിഴ്നാട് സർക്കാരിനുവേണ്ടി തദ്ദേശസ്വയംഭരണ സ്ഥാപനങ്ങളുടെയും മറ്റ് അനുബന്ധ വകുപ്പുകളുടെയും പ്രവർത്തനം പഠിച്ച് റിപ്പോർട്ട് സമർപ്പിക്കുന്ന സംഘമാണ് ഇത് . കിലയുടെ മേൽനോട്ടത്തിലാണ് പഠനത്തിനായുള്ള എകോപനം നടത്തുന്നത്. ഇന്ത്യയിലെ പഞ്ചായത്ത് രാജ് സംവിധാനം ഫലപ്രദമായി നടപ്പിലാക്കുന്നത് കേരളമാണ്. അതിനാലാണ് കേരളത്തെ തെരഞ്ഞെടുത്തതെന്ന് പ്രതിനിധികൾ പറഞ്ഞു. കേരളത്തിലെ നഗരസഭകളുടെ പഠനത്തിനായി കൊട്ടാരക്കര നഗരസഭയാണ് ഇവർ തെരഞ്ഞെടുത്തത് . ശരവണനാണ് തന്നാച്ചിയുടെ കോ ഓർഡിനേറ്റർ. മൂന്ന് ദിവസത്തെ സന്ദർശന പഠനത്തിനാണ് അവർ കേരളത്തിൽ എത്തിയത്. പഞ്ചായത്ത് രാജ് അസിസ്റ്റന്‍റ്പ്രഫ.ഡോ. പീറ്റർ എം രാജ് ,കില സ്റ്റേറ്റ് ട്രെയിനിങ് കോഡിനേറ്റർ ദിലീപ് കുമാർ എന്നിവർക്കൊപ്പമാണ് തമിഴ്നാട് സംഘം പഠനത്തിനായി എത്തിയത് . നഗരസഭ ചെയർമാൻ അഡ്വ.കെ. ഉണ്ണികൃഷ്ണമേനോൻ , സ്റ്റാൻഡിംഗ് കമ്മിറ്റി ചെയർമാൻമാർ കൗൺസിലർമാർ , നഗരസഭ ഉന്നത ഉദ്യോഗസ്ഥർ എന്നിവർ പങ്കെടുത്തു.

ജില്ലാ റോളർ സ്‌കേറ്റിംഗ് ചാമ്പ്യൻഷിപ്പ് 27ന് തുടങ്ങും

കൊല്ലം: ജില്ലാ കേഡറ്റ്‌ സബ് ജൂണിയർ, ജൂണിയർ, സീനിയർ, മാസ്റ്റേഴ്സ് റോളർ സ്‌കേറ്റിംഗ് ചാമ്പ്യൻഷിപ്പ് 27,28 തീയതികളിൽ കൊല്ലത്ത് നടത്താൻ അസോസിയേഷൻ ജില്ലാ കമ്മിറ്റി തീരുമാനിച്ചു. ക്വാഡ്, ഇൻലൈൻ സ്പീഡ് സ്‌കേറ്റിംഗ് (റോഡ്, റിങ്ക്), റോളർ ഹോക്കി, ആർട്ടിസ്റ്റിക്, റോളർ സ്‌കൂട്ടർ, സ്‌കേറ്റ് ബോർഡിംഗ്, ഇൻലൈൻ ആൽപൈൻ, ഇൻലൈൻ ഡൗൺഹിൽ തുടങ്ങിയ മത്സരങ്ങളും നടത്തും. ചാമ്പ്യൻ ഷിപ്പിൽ പങ്കെടുക്കുന്നവർ ആധാർ കാർഡ് ഉപയോഗിച്ച് ഇന്ത്യസ്‌കേറ്റ്.കോമിൽ പേര് രജിസ്റ്റർ ചെയ്‌ത ഫോം, www. rollersportskerala.org-ൽ രജിസ്റ്റർ ചെയ്ത ഓൺലൈൻ എൻട്രി ഫോം, പഠിക്കുന്ന സ്ഥാപനത്തിൽനിന്നുള്ള ജനന തീയതി തെളിയിക്കുന്ന സർട്ടിഫിക്കറ്റ്, ആധാർ കാർഡ് കോപ്പി, എൻട്രി ഫീസ് എന്നിവ 21ന് വൈകുന്നേരം അഞ്ചിനു മുമ്പ് ഹാജരാക്കണം. രജിസ്‌ട്രേഷൻ അവസാന തീയതി 20. യോഗത്തിൽ ജില്ലാ റോളർ സ്‌കേറ്റിങ് അസോസിയേഷൻ പ്രസിഡന്‍റ് എൻ.ശങ്കരനാരായണ പിള്ള അധ്യക്ഷനായി. ജില്ലാ സെക്രട്ടറി പി.ആർ. ബാലഗോപാൽ, എസ്.ബിജു, പി.അശോകൻ, തുടങ്ങിയവർ പ്രസംഗിച്ചു. സംസ്ഥാന ചാമ്പ്യൻഷിപ്പിലേക്കുള്ള ജില്ലാ ടീമിനെ ഈ മത്സരത്തിൽനിന്നു തെരഞ്ഞെടുക്കും. വിശദവിവരങ്ങൾക്ക് ഫോൺ: 9447230830.

ജില്ലാ പഞ്ചായത്തിന്‍റെ പദ്ധതി ഇനി സംസ്ഥാനതലത്തിലേക്ക്: പി.കെ. ഗോപൻ

കൊല്ലം: ആതുരസേവനത്തിന് വരുമാനംകൂടി ഉറപ്പാക്കിയുള്ള പരിശീലനം നല്‍കുന്ന ജില്ലാ പഞ്ചായത്തിന്‍റെ പദ്ധതി ഇനി സംസ്ഥാനമൊട്ടാകെ നടപ്പിലാക്കുമെന്ന് ജില്ലാ പഞ്ചായത്ത് പ്രസിഡന്‍റ് ഡോ. പി.കെ. ഗോപന്‍. മാലാഖകൂട്ടം മാതൃകാപദ്ധതിയുടെ തുടര്‍ച്ച കേരളമാകെ വ്യാപിപ്പിക്കാനുള്ള നടപടികളിലേക്ക് കടക്കും. തദ്ദേശസ്വയംഭരണസ്ഥാപനങ്ങള്‍ക്കുള്ള പദ്ധതിനിര്‍വഹണം സംബന്ധിച്ച മാര്‍ഗരേഖയില്‍ ഇത് ഉൾപ്പെടുത്തിയതായും ജില്ലാ പഞ്ചായത്ത് പ്രസിഡന്‍റ് അറിയിച്ചു. ആതുരസേവനരംഗത്ത് മികച്ച പ്രഫഷണലുകളെ സൃഷ്ടിക്കാനും വിദേശത്തും സ്വദേശത്തും ലഭ്യമായ തൊഴില്‍സാധ്യതകള്‍ പ്രയോജനപ്പെടുത്താനുമാണ് പദ്ധതി നടപ്പിലാക്കിവരുന്നത്. പട്ടികജാതി, പൊതുവിഭാഗത്തില്‍പെട്ട നഴ്‌സിംഗ് ബിരുദധാരികള്‍ക്ക് സര്‍ക്കാര്‍ ആശുപത്രികളില്‍ സ്‌റ്റൈപന്‍റോടെ അപ്രന്‍റിഷിപ്പിന് സൗകര്യം ഒരുക്കുന്ന പദ്ധതിയാണിത്. പഞ്ചായത്ത് പരിധിയിലെ സ്ഥിരതാമസക്കാരായ ബി എസ് സി നഴ്‌സിംഗ്, ജനറല്‍നഴ്‌സിംഗ് യോഗ്യതയുള്ള കേരള നഴ്‌സിംഗ് കൗണ്‍സിലില്‍ രജിസ്റ്റര്‍ ചെയ്ത പട്ടികജാതി വിഭാഗത്തില്‍പ്പെട്ട വനിതകള്‍ക്കായാണ് ഇതിന്‍റെ തുടക്കം. ജനറല്‍ നഴ്‌സിംഗ് പാസായവര്‍ക്ക് പ്രതിമാസം 12,500 രൂപയും ബി എസ് സി നഴ്‌സിംഗ് പാസായവര്‍ക്ക് 15,000 രൂപയുമായിരുന്നു സ്‌റ്റൈപന്‍റ്. പാരിപ്പള്ളി മെഡിക്കല്‍ കോളജ്, ജില്ലാ ആശുപത്രി, താലൂക്ക് ആശുപത്രികള്‍, സാമൂഹികാരോഗ്യകേന്ദ്രങ്ങള്‍ തുടങ്ങിയ ആരോഗ്യസ്ഥാപനങ്ങളിലേക്ക് കൂടുതല്‍ നഴ്‌സുമാരുടെ സേവനം ഉറപ്പാക്കാനും ഇത് വഴി കഴിഞ്ഞു. പട്ടികജാതി വികസന വകുപ്പിന്‍റെ സഹകരണത്തോടെയാണ് പദ്ധതിനിര്‍വഹണം. 82 ലക്ഷം രൂപ വകയിരുത്തി പൊതുവിഭാഗത്തില്‍പ്പെട്ട 100 നഴ്‌സുമാര്‍ക്കും ജില്ലാ മെഡിക്കല്‍ ഓഫീസ് മുഖേന നിയമനം നല്‍കി.ഈ വര്‍ഷം 50 ലക്ഷം രൂപ പദ്ധതിക്കായി വകയിരുത്തിട്ടുണ്ട്. പുതിയ ബാച്ചിലേക്കുള്ള ഉദ്യോഗാര്‍ഥികളുടെ നിയമനം 15നകം പൂര്‍ത്തിയാകും. നടപ്പ് സാമ്പത്തിക വര്‍ഷവും പൊതുവിഭാഗത്തിനെ പദ്ധതിയില്‍ ഉള്‍പ്പെടുത്തിയിട്ടുണ്ട്.

അധിക ടിക്കറ്റ് കൗണ്ടറുകൾ തുറക്കാതെ മുഖംതിരിച്ച് റെയിൽവേ

കൊല്ലം: കൊല്ലം റെയിൽവേ സ്റ്റേഷനിൽ യാത്രക്കാരുടെ തിരക്ക് കണക്കിലെടുത്ത് അധിക ടിക്കറ്റ് കൗണ്ടറുകൾ തുറക്കണമെന്ന ആവശ്യത്തിന് മുന്നിൽ മുഖംതിരിച്ച് തിരുവനന്തപുരം ഡിവിഷൻ കൊമേഴ്സൽ വിഭാഗം. ജീവനക്കാർ ഉണ്ടായിട്ടും അധികം കൗണ്ടർ തുറക്കേണ്ടെന്ന നിലപാടിലാണ് റെയിൽവേ. ഓണക്കാലത്ത് കൂടുതൽ തിരക്കുണ്ടായിരുന്നപ്പോൾ പോലും രണ്ട് കൗണ്ടർ മാത്രമാണ് ഇവിടെ പ്രവർത്തിച്ച് വന്നിരുന്നത്. ഓണക്കാലത്തേക്ക് പ്രഖ്യാപിച്ച കൂടുതൽ ട്രെയിനുകൾ ഇപ്പോഴും സർവീസ് നടത്തി വരികയാണ്. ടിക്കറ്റ് കൗണ്ടറുകളിൽ എപ്പോൾ നോക്കിയാലും നീണ്ട ക്യൂ ആയിരിക്കും. ഇത് മൂലം നിരവധി യാത്രക്കാർക്ക് ടിക്കറ്റ്‌ ലഭിക്കാതെ യാത്ര മുടങ്ങിയെ അവസ്ഥ ഉണ്ടായിട്ടുണ്ട്. റെയിൽവേ സ്റ്റേഷനിലെ ടിക്കറ്റ്‌ കൗണ്ടറിലെ തിക്കുംതിരക്കും ഒഴിവാക്കാൻ അധിക കൗണ്ടറുകൾ തുറക്കേണ്ടെന്ന റെയിൽവേ ഡിവിഷൻ കൊമേഴ്സൽ വിഭാഗത്തിന്‍റെ തീരുമാനം ജനദ്രോഹ പരമെന്നാണ് ഇതോടെ ആക്ഷേപം ഉയർന്നിരിക്കുന്നത്. പാസഞ്ചേഴ്‌സ്‌ അസോസിയേഷനുകളും നിരവധി യാത്രക്കാരും ഇത് സംബന്ധിച്ച് പരാതി നൽകിയിട്ടും ഒരു നടപടിയും ഉണ്ടായില്ല. യാത്രക്കാർ മൊബൈല്‍ ആപ്പിലൂടെ ടിക്കറ്റ് എടുക്കട്ടെ എന്ന നിലപാടിലാണ് റെയിൽവേ. കൊല്ലം റെയിൽവേ സ്റ്റേഷനിലെ നിലവിലുള്ള ടിക്കറ്റ്‌ കൗണ്ടറുകൾ നവീകരണപേരിലാണ് പൊളിക്കുന്നത്. പകരം ഏർപ്പെടുത്തിയ താത്കാലിക കൗണ്ടറുകൾ യാത്രക്കാർക്ക്‌ ദുരിതമയമാണ്. ക്യൂവിനെ ചൊല്ലി യാത്രക്കാർ തമ്മിലും യാത്രക്കാരും ജീവനക്കാരും തമ്മിലും നിത്യവും തർക്കം നടക്കുന്നു. പലപ്പോഴും കൗണ്ടറുകൾ പ്രവർത്തിക്കുന്ന താത്കാലിക കെട്ടിട ഹാളിനു പുറത്തേക്കുവരെ ക്യൂ നീളുന്നു. ഉന്തും തള്ളും രണ്ടു കൗണ്ടറുകളുടെയും ക്യൂകളിൽ നിത്യ സംഭവം തന്നെയെങ്കിലും കൗണ്ടറുകളിൽ തിരക്ക് നിയന്ത്രിക്കാൻ പോലീസിന്‍റെയോ ആർപിഎഫ്‌ ഉദ്യാഗസ്ഥരുടെയോ ഒരു സഹായവും ഉണ്ടാവാറില്ല. ഓൺലൈൻ പേമെന്‍റ് ചെയ്യുന്നവർക്ക് ആവട്ടെ മൂന്നു മിനിറ്റ് വരെ വൈകിയാണ് ടിക്കറ്റ് കിട്ടുന്നതെന്ന് യാത്രക്കാര്‍ ആരോപിക്കുന്നു. ടിക്കറ്റ്‌ എടിവിഎമ്മിൽ നിന്ന് ജീവനക്കാരെ ഒഴിവാക്കാനാണ് യാത്രക്കാർ സ്വന്തമായി ഓട്ടോമാറ്റിക്‌ ടിക്കറ്റ്‌ വെൻഡിംഗ് മെഷീനിൽ നിന്നു ടിക്കറ്റ്‌ എടുക്കട്ടെ എന്ന നിലപാടിലേക്ക് റെയിൽവേ എത്തുന്നതെന്നും ആക്ഷേപം ഉണ്ട്. മിക്ക യാത്രക്കാർക്കും മെഷീനിൽ നിന്ന് നേരിട്ട് ടിക്കറ്റ് എടുക്കാൻ അറിയില്ല. എടിവിഎമ്മിൽനിന്നു ടിക്കറ്റ്‌ എടുക്കാൻ യാത്രക്കാരെ സഹായിക്കാനുള്ള ഫെസിലിറ്റേറ്റർമാർ രക്ഷപെടാൻ സന്ധ്യയാവാൻ കാത്തിരിക്കുകയാണ്. ഫെസിലിറ്റേറ്റർ മാരെ നേരത്തെ കമ്മിഷൻ വ്യവസ്ഥയിൽ നിയമിച്ചിരുന്നത്‌ റിട്ട. റെയിൽവേ ജീവനക്കാരെയും അവരുടെ കുടുംബാംഗങ്ങളെയും മാത്രമായിരുന്നു. അതേസമയം ഇപ്പോൾ സ്ഥിതി മാറി. 50,000രൂപ ഡിപ്പോസിറ്റ്‌ വാങ്ങി ആളെ നിയമിക്കുന്ന സ്ഥിതി വിശേഷമാണുള്ളത്.

മൂന്നു മെമു ട്രെയിനുകൾക്ക് ഇന്ന് 12 കോച്ചുകൾ മാത്രം

കൊല്ലം: സംസ്ഥാനത്ത് 16 കോച്ചുകളുമായി സർവീസ് നടത്തുന്ന മൂന്നു മെമു ട്രെയിനുകളിൽ ഇന്ന് 12 കോച്ചുകൾ മാത്രമേ ഉണ്ടായിരിക്കുകയുള്ളൂവെന്നു റെയിൽവേ അധികൃതർ അറിയിച്ചു. കൊല്ലം - ആലപ്പുഴ , ആലപ്പുഴ - എറണാകുളം ജംഗ്ഷൻ , എറണാകുളം ജംഗ്ഷൻ -ഷൊർണൂർ എന്നീ മെമു ട്രെയിനുകളിലാണ് കോച്ചുകളുടെ എണ്ണം ഒരു ദിവസത്തേയ്ക്കുമാത്രം കുറച്ചിട്ടുള്ളത്. അറ്റകുറ്റപ്പണികൾ നടക്കുന്നതിനാലാണ് 16 കോച്ച് മെമുവിന് പകരം താത്ക്കാലികമായി 12 കോച്ച് മെമു ക്രമീകരിച്ചതെന്നും അധികൃതർ വ്യക്തമാക്കി.

ഹരിതകർമ സേനയ്ക്ക് വാഹനം നൽകി കെഎംഎംഎല്‍

ചവറ : ഹരിത കര്‍മ സേന പ്രവര്‍ത്തനങ്ങളില്‍ ജില്ലയിലെ ഒന്നാം സ്ഥാനക്കാരും സംസ്ഥാന തലത്തിലെ ഒന്നാം സ്ഥാനക്കാരുമായ പന്മന പഞ്ചായത്തിലെ ഹരിത കര്‍മ സേനയ്ക്ക് കരുത്തേകാന്‍ കൈത്താങ്ങുമായി പൊതുമേഖലാ വ്യവസായ സ്ഥാപനമായ കെഎംഎംഎല്‍ പഞ്ചായത്ത് പരിധിയിലെ മെറ്റീരിയല്‍ കളക്ഷനായി 8.5 ലക്ഷം രൂപ ചെലവില്‍ പുതിയ വാഹനം വാങ്ങി നല്‍കി. വാഹനത്തിന്‍റെ ഫ്ലാഗ് ഓഫ് കര്‍മം സുജിത് വിജയന്‍പിള്ള എംഎൽഎ നിര്‍വഹിച്ചു. കെഎംഎംഎല്‍ മാനേജിംഗ് ഡയറക്ടര്‍ പി. പ്രദീപ്കുമാര്‍ വാഹനത്തിന്‍റെ താക്കോല്‍ പന്മന പഞ്ചായത്ത് പ്രസിഡന്‍റ് ശ്രീകലയ്ക്ക് കൈമാറി. പന്മന പഞ്ചായത്തിലെ മുഴുവന്‍ വാര്‍ഡുകളില്‍ നിന്നും അജൈവ മാലിന്യ - പാഴ് വസ്തു ശേഖരണത്തിന് ഇത് ഉപകരിക്കും. ഇത്രയും നാള്‍ വാഹനം വാടകക്കെടുത്താണ് ഹരിതകര്‍മ സേന പ്രവര്‍ത്തിച്ചത്. പുതിയ വാഹനം ലഭ്യമായതോടെ പ്രവര്‍ത്തനങ്ങള്‍ കൂടുതല്‍ കാര്യക്ഷമമാക്കാനുള്ള ശ്രമത്തിലാണ് പന്മന പഞ്ചായത്ത്. പഞ്ചായത്തിലെ ഹരിത കര്‍മസേനയുടെ പ്രവര്‍ത്തനങ്ങള്‍ ത്വരിതപ്പെടുത്തി സംസ്ഥാന സര്‍ക്കാര്‍ മുന്നോട്ടു വെക്കുന്ന മാലിന്യ മുക്ത നവകേരളം എന്ന ആശയത്തിന് ശക്തിപകരുന്നതാണ് കെഎംഎംഎല്‍ നടപടി. ജില്ലാ പഞ്ചായത്ത് അംഗങ്ങളായ സി.പി. സുധീഷ്‌കുമാര്‍, എസ്. സോമന്‍ , കെഎംഎംഎല്‍ എച്ച്ആര്‍ യൂണിറ്റ് ഹെഡും സിഎസ്ആര്‍ കമ്മിറ്റി കണ്‍വീനറുമായ എം.യു വിജയകുമാര്‍, പിആന്‍ഡ്എ ഡിപ്പാര്‍ട്ട്മെന്‍റ് ഹെഡ് എ.എം.സിയാദ്, പിആര്‍ഒ പി.കെ. ഷബീര്‍, പന്മന പഞ്ചായത്ത് സെക്രട്ടറി ചെറിയാന്‍ ഫിലിപ്, യൂണിയന്‍ നേതാക്കളായ വി.സി .രതീഷ്‌കുമാര്‍, ആര്‍ .ശ്രീജിത്, എസ്. സനല്‍, ജെ. മനോജ്‌മോന്‍, എഫ്. ജോയ്, മുന്‍ പഞ്ചായത്ത് പ്രപസിഡന്‍റ് ജയചിത്ര, വാര്‍ഡ് മെമ്പര്‍മാര്‍, ഉദ്യോഗസ്ഥര്‍, ജനപ്രതിനിധികള്‍, ഹരിതകര്‍മ്മസേന പ്രവര്‍ത്തകര്‍ തുടങ്ങിയവര്‍ പങ്കെടുത്തു.

ബസ് തലയിലൂടെ കയറി യാത്രക്കാരന്‍റെ മരണം: അന്വേഷണം ആവശ്യപ്പെട്ട് മക്കൾ

പത്തനാപുരം : കെഎസ്ആർ ടിസി ബസ് സ്റ്റാൻഡിൽ ബസ് തലയിലൂടെ കയറിയിറങ്ങി യാത്രക്കാരൻ മരിക്കാനിടയായ സംഭവത്തിൽ അന്വേഷണം ആവശ്യപ്പെട്ടു മക്കൾ. തിരുവനന്തപുരം പാലോട് തടത്തരികത്തു വീട്ടിൽ അശോക് കുമാർ (56) ആണ് പത്തനാപുരത്ത് ബസ് ഷണ്ടിങ്ങിനിടെ മരണപ്പെട്ടത്. സ്റ്റാൻഡിലെ കാത്തിരിപ്പ് കേന്ദ്രത്തിനു മുന്നിൽ നിർത്തിയിട്ടിരുന്ന ബസ് പരിശോധനക്കായി റോഡിലേക്ക് ഇട്ടു ഡ്രൈവർ തിരികെ സ്റ്റാൻഡിലെത്തിയപ്പോൾ തല ചതഞ്ഞരഞ്ഞ് അശോക് കുമാർ ബസ് സ്റ്റാൻഡിനുള്ളിൽ വെച്ച് മരണപ്പെട്ട നില യിലാണ് കാണുന്നത്. വർഷങ്ങളായി പത്തനാപുരത്ത് വീട് നിർമാണ പ്രവൃത്തി ചെയ്തുവരികയായിരുന്നു അശോക് കുമാർ. സംഭവത്തിൽ യാതൊരു നടപടികളും ഉണ്ടാകാഞ്ഞതിനെ തുടർന്ന് അശോക് കുമാറിന്‍റെ മക്കൾ പത്തനാപുരം പോലീസിൽ ഇന്നലെ അന്വേഷണം ആവശ്യപ്പെട്ടു പരാതി നൽകി. വിവരാവകാശ അപേക്ഷയും കെഎസ്ആർടിസിക്ക് നൽകി. സംഭവം നടന്ന ഭാഗത്തെ സിസി ടിവി പ്രവർത്തനരഹിതമാണെന്ന ഡിപ്പോ അധികൃതരുടെ വിശദീകരണമാണ് ദുരൂഹത ഉണ്ടാക്കിയിട്ടുള്ളത്. ബസ് ഓടിച്ച ഡ്രൈവറുടെ മൊഴി പോലീസ് രേഖപ്പെടുത്തിയിരുന്നു. പോലീസ് സി സി ടി വി ദൃശ്യവും പരിശോധിച്ചു. അതിൽ ബസിന് അടുത്തേക്ക് ഒരാൾ പോകുന്നത് കാണാമായിരുന്നു. അതേസമയം, എന്താണ് സംഭവിച്ചതെന്ന് ദൃശ്യങ്ങളിൽ വ്യക്തമല്ല. സംഭവം നടന്ന ഭാഗത്തെ സിസിടിവി ദൃശ്യം കെ എസ്ആർടിസി നൽകിയിട്ടില്ല. അച്ഛന്‍റെ മരണത്തിൽ സംശയം ഉണ്ടായതോടെയാണ് മക്കൾ വിവരാവകാശ അപേക്ഷ സമർപ്പിച്ചത്. സംഭവം നടന്ന് ഒരാഴ്ച പിന്നിട്ടെങ്കിലും അശോക് കുമാറിന്‍റെ മരണം എങ്ങനെ സംഭവിച്ചതെന്ന് പറയാൻ പോലീസിന് കഴിഞ്ഞിട്ടില്ല. അശോക് കുമാറിന്‍റെ മക്കൾ വിവരാവകാശ നിയമപ്രകാരം കെഎസ്ആർടിസി ഡിപ്പോയിൽ എടിഒക്ക് കഴിഞ്ഞ ദിവസമാണ് അപേക്ഷ നൽകിയത്. മക്കളായ ആതിര, അഞ്ജു, ആര്യ എന്നിവരാണ് പഞ്ചായത്ത്‌ അംഗങ്ങളായ എം. സാജുഖാൻ, ഫാറൂഖ് മുഹമ്മദ്‌ എന്നിവരുടെ നേതൃത്വത്തിൽ എടിഒക്ക് അപേക്ഷ നൽകിയത്. അതേസമയം, അശോക് കുമാറിന്‍റെ മരണം ആത്മഹത്യയാണെന്ന പോലീസിന്‍റെയും കെഎസ്ആർടിസിയുടെയും വാദം മക്കൾ തള്ളിയിട്ടുണ്ട്. അച്ഛന് ആത്മഹത്യ ചെയ്യാനായി ഒരു കാരണവുമില്ലെന്നാണ് മക്കൾ പറയുന്നത്.

പുനലൂർ വാർഡിന്‍റെ അതിർത്തി നിര്‍ണയിക്കുന്നതിൽ ഇടപെട്ടിട്ടില്ല: ചെയർപേഴ്സൺ പുഷ്പലത

പുനലൂർ : വാര്‍ഡിന്‍റെ അതിർത്തി നിര്‍ണയിക്കുന്നതിലോ മറ്റു കാര്യങ്ങളിലോ നഗരസഭ അധ്യക്ഷ എന്ന നിലയില്‍ ഞാനോ ഭരണസമിതിയിലെ മറ്റ് അംഗങ്ങളോ ഇടപെട്ടിട്ടില്ലെന്നു പുനലൂർ നഗരസഭാ ചെയർപേഴ്സൺ പുഷ്പലത അറിയിച്ചു. പുനലൂര്‍ നഗരസഭയില്‍ 35 വാര്‍ഡുകളായിരുന്നതു 36 വാര്‍ഡായി മാറി. തെരഞ്ഞെടുപ്പുമായി ബന്ധപ്പെട്ട പൂർണ ചുമതല ഇലക്ടറല്‍ രജിസ്‌ട്രേഷന്‍ ഓഫീസറായ മുനിസിപ്പല്‍ സെക്രട്ടറിക്കും ബന്ധപ്പെട്ട ഉദ്യോഗസ്ഥര്‍ക്കുമാണ്. അവരുടെ കൃത്യനിര്‍വഹണത്തില്‍ ഒരിക്കല്‍ പോലും തടസവാദങ്ങളുമായി ഞങ്ങള്‍ പോയിട്ടില്ല. കരട് വോട്ടര്‍ പട്ടിക പ്രസിദ്ധീകരിച്ച ശേഷം സര്‍വകക്ഷിയോഗം വിളിച്ചു ചേര്‍ത്തു. എല്ലാ രാഷ്ട്രീയ പാര്‍ട്ടി പ്രതിനിധികളുടെയും അഭിപ്രായങ്ങള്‍ കേട്ടു. ആക്ഷേപങ്ങള്‍ പരിശോധിച്ച് റിപ്പോര്‍ട്ട് ചെയ്യുന്നതിനായി ഉദ്യോഗസ്ഥരെ ചുമതലപ്പെടുത്തി. അപാകതകള്‍ പരിഹരിക്കാന്‍ ഉള്ള നടപടികള്‍ സ്വീകരിച്ചു. വോട്ട് ചേര്‍ക്കുന്നതും ഒഴിവാക്കുന്നതുമടക്കമുള്ള മുഴുവന്‍ പ്രവൃത്തികളും ഓണ്‍ലൈന്‍ മുഖേനയാണ്. അവസാന ദിവസങ്ങളിലെ സോഫ്റ്റ് വെയര്‍ തകരാര്‍ മൂലം ബള്‍ക് ട്രാന്‍സ്‌പൊസിഷന്‍ നടക്കാത്ത സ്ഥിതിയുണ്ടായിട്ടുണ്ട്. ഇതു തെരഞ്ഞെടുപ്പ് കമ്മീഷനെ രേഖാമൂലം അറിയിച്ചിട്ടുള്ളതുമാണ്. ഇത്തരത്തില്‍ ഉദ്യോഗസ്ഥ തലത്തില്‍ ചിട്ടയായതും കൃത്യവുമായ പ്രവര്‍ത്തനങ്ങളാണ് നടന്നുവരുന്നത് എന്നാണ് മനസിലാക്കുന്നത്. എന്നാല്‍ സെപ്റ്റംബര്‍ രണ്ടിന് അന്തിമ വോട്ടര്‍ പട്ടിക പ്രസിദ്ധീകരിച്ച ശേഷം ഓരോ തടസവാദങ്ങള്‍ ഉന്നയിച്ചു പരാജയഭീതി മറയ്ക്കാന്‍ ശ്രമിക്കുകയാണ് കോണ്‍ഗ്രസ്. വാസ്തവ വിരുദ്ധമായ കാര്യങ്ങളാണ് കോണ്‍ഗ്രസ് നേതാക്കള്‍ ഉന്നയിക്കുന്നത്. യാതൊരുവിധ പരാതിയും രേഖാമൂലം നല്‍കാതെ നഗരസഭാ സെക്രട്ടറിയെ ഉപരോധിച്ച് ജനങ്ങളുടെ കണ്ണില്‍ പൊടിയിടാനാണ് ഇവരുടെ ശ്രമം. പാര്‍ട്ടി ഓഫീസുകള്‍ കേന്ദ്രീകരിച്ച് വോട്ടുകള്‍ ചേര്‍ക്കുന്നുവെന്നു പരാതിപ്പെടുകയാണ് പ്രതിപക്ഷ നേതാവ്. അദ്ദേഹം വസ്തുത അറിയാതെയാണ് ഇക്കാര്യം പറയുന്നത് . അടിസ്ഥാനമില്ലാത്ത കാര്യങ്ങളില്‍ ആക്ഷേപം ഉന്നയിച്ചു ഭരണപക്ഷത്തെ താറടിച്ചു കാണിക്കുകയും അതേ സമയം വ്യാജരേഖകള്‍ ഉണ്ടാക്കി വോട്ട് ചേര്‍ക്കാന്‍ ശ്രമം നടത്തുകയും ചെയ്തവരുടെ ഇരട്ടത്താപ്പ് അനുവദിച്ചു കൊടുക്കില്ല. ശക്തമായ നിയമനടപടികളുമായി ഇടതുപക്ഷ ജനാധിപത്യ മുന്നണി മുന്നോട്ട് പോകുമെന്ന് ചെയർ പേഴ്സൺ പുഷ്പലത അറിയിച്ചു.

പുനലൂർ സെന്‍റ് മേരീസ് ബഥനി യുപി സ്കൂളിൽ ദീപിക നമ്മുടെഭാഷ പദ്ധതി

പുനലൂർ: പത്രവായനയിലൂടെ അറിവിന്‍റെ ലോകത്തേയ്ക്ക് കടക്കാൻ കഴിയുമെന്നും ദീപിക പത്രം ഒരുക്കുന്ന അവസരം കുട്ടികൾ പരമാവധി പ്രയോജനപ്പെടുത്തണമെന്നും പുനലൂർ സെന്‍റ് ജോസഫ് മലങ്കര കത്തോലിക്കാ പള്ളി വികാരി റവ.ഡോ. സി.സി. ജോൺ . പുനലൂർ സെന്‍റ് മേരീസ് ബഥനി യുപി സ്കൂളിൽ ദീപിക നമ്മുടെ ഭാഷ പദ്ധതിയുടെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു അദ്ദേഹം. അറിവിന്‍റെ വഴികളിലൂടെ കുട്ടികൾക്ക് വളരാൻ കഴിയണം. അതിന് പത്രവായനയും പുസ്തക വായനയും ശീലമാക്കിയെടുക്കണമെന്നും റവ. ഡോ. സി.സി. ജോൺ അഭിപ്രായപ്പെട്ടു. ചടങ്ങിൽ ദീപിക ലേഖകൻ അനിൽ പന്തപ്ലാവ്, ഏരിയാ മാനേജർ വർഗീസ് ജോസഫ്, സിസ്റ്റർ ലാളിത്യ എസ്ഐസി, യമുന ഗണേഷ് തുടങ്ങിയവർ പങ്കെടുത്തു.

ശ്രീരംഗം ജയകുമാറിന് അധ്യാപക പുരസ്കാരം

കൊല്ലം: ഡോ. രാമചന്ദ്രൻ മാരിടൈം ഫൗണ്ടേഷനും ചെന്നൈ അമെറ്റ് യൂണിവേഴ്സിറ്റിയും സംയുക്തമായി നൽകിവരുന്ന അധ്യാപക പുരസ്കാരം ഇക്കുറി ശ്രീരംഗം ജയകുമാറിന്. 14 ന് അമെറ്റ് യൂണിവേഴ്സിറ്റി ആസ്ഥാനത്ത് നടക്കുന്ന ചടങ്ങിൽ അവാർഡ് നൽകും. എംഎസ്എം എച്ച്എസ്എസിലെ ബോട്ടണി അധ്യാപകനാണ്. കഴിഞ്ഞ 27 വർഷമായി ഹയർ സെക്കണ്ടറി തല ബോട്ടണി അധ്യാപകനായി സേവനം അനുഷ്ടിച്ചു വരുന്നു.

മൺട്രോതുരുത്തിൽ റെയിൽ ലിങ്ക്ഡ് ടൂറിസം പദ്ധതി വരുന്നു

കൊല്ലം: ജില്ലയിലെ അതിവേഗം വളർന്നു വരുന്ന പ്രമുഖ വിനോദ സഞ്ചാര കേന്ദ്രമായ മൺട്രോതുരുത്തിൽ റെയിൽവേ ലിങ്ക്ഡ് ടൂറിസം പദ്ധതി വരുന്നു. ഇതു നടപ്പിലാക്കുന്നതിനുള്ള പ്രാഥമിക നടപടികൾ ഇന്ത്യൻ റെയിൽവേ കാറ്ററിംഗ് ആൻഡ് ടൂറിസം കോർപറേഷൻ ആരംഭിച്ചു കഴിഞ്ഞു. മൺട്രോതുരുത്തിലെ 12 ഏക്കറിലധികം വിസ്തൃതിയിലുള്ള റെയിൽവേ ഭൂമിയെ വിനോദ സഞ്ചാര വികസനത്തിനായി പ്രയോജനപ്പെടുത്തുക എന്നതാണ് പദ്ധതി വഴി ലക്ഷ്യമിടുന്നത്. റെയിൽവേയുടെ സ്വന്തം സ്ഥലത്ത് രാജ്യത്ത് ആദ്യമായി നടപ്പാക്കുന്ന പദ്ധതിയാണ് ഇതെന്ന സവിശേഷതയുമുണ്ട്. ഇതിന്‍റെ ഭാഗമായി കഴിഞ്ഞ ഓഗസ്റ്റ് 25ന് ഐആർസിടിസി നേതൃത്വത്തിൽ ദക്ഷിണ റെയിൽവേയുടെ തിരുവനന്തപുരം ഡിവിഷനെ ബന്ധപ്പെടുത്തി യോഗം ചേർന്നിരുന്നു. ഈ യോഗത്തിൽ മൺട്രോതുരുത്തിലെ ഭൂമി ടൂറിസം വികസനത്തിനു പ്രയോജനപ്പെടുത്താൻ ഓഫീസർ ലെവൽ കമ്മിറ്റിയെ രൂപീകരിച്ചു പ്രാഥമിക പഠനം നടത്താൻ തീരുമാനിക്കുകയുണ്ടായി. ഇക്കാര്യത്തിൽ ദക്ഷിണ റെയിൽവേയിലെ ഉന്നത ഉദ്യോഗസ്ഥർ തയാറാക്കുന്ന ഫീസിബിലിറ്റി റിപ്പോർട്ട് ലഭിച്ചതിനു ശേഷം ഐആർസിറ്റിസി സമഗ്രമായ പ്രോജക്ട് റിപ്പോർട്ട് തയാറാക്കുമെന്നും യോഗത്തിൽ അറിയിച്ചിട്ടുണ്ട്. മൺട്രോതുരുത്തിലെ ടൂറിസം സാധ്യതകൾ പ്രയോജനപ്പെടുത്തണമെന്ന് ആവശ്യപ്പെട്ട് ഐആർസിറ്റിസി ചെയർമാനും മാനേജിംഗ് ഡയറക്ടറുമായ സഞ്ജയ് കുമാർ ജയിനിനു കൊടിക്കുന്നിൽ സുരേഷ് എംപി കത്ത് അയച്ചിരുന്നു. പാർലമെന്‍റിന്‍റെ സ്റ്റാന്‍റിംഗ് കമ്മിറ്റി യോഗം കശ്മീരിൽ നടന്നപ്പോൾ ചെയർമാനെ നേരിൽ കണ്ടും എംപി ഈ ആവശ്യം ഉന്നയിക്കുകയുണ്ടായി. തുടർന്നാണ് ഐആർസിറ്റിസി ഈ പദ്ധതിയിൽ പ്രത്യേക താത്പര്യമെടുത്തു പ്രാഥമിക നടപടികളുമായി മുന്നോട്ട് പോകുന്നത്. ഇക്കോ ടൂറിസം റിസോർട്ട്, ഹെറിറ്റേജ് ഹോം സ്റ്റേകൾ, ഹെറിറ്റേജ് വില്ലേജ്, ആയുർവേദ വെൽനസ് സെന്‍റർ, കലാ സാംസ്കാരിക കേന്ദ്രങ്ങൾ. തുടങ്ങിയവ ഈ പദ്ധതിയിൽ ഉൾപ്പെടും. സ്വകാര്യ സ്ഥാപനങ്ങളുമായി ചേർന്ന് റെയിൽവേ ലിങ്ക്ഡ് പാക്കേജ് ടൂറിസവും പരിഗണനയിലാണ്.തിരുവനന്തപുരം, കൊച്ചുവേളി, കൊല്ലം തുടങ്ങിയ റൂട്ടുകളെ ഉൾപ്പെടുത്തി വിനോദ സഞ്ചാരികൾക്ക് പ്രത്യേക പാക്കേജ് ആണ് ഇതുവഴി ലക്ഷ്യമിടുന്നത്.മൺട്രോതുരുത്തിലെ റെയിൽവേ ഭൂമി വിനോദ സഞ്ചാര വികസനത്തിന് പ്രയോജനപ്പെടുത്തുന്ന പദ്ധതിയിലൂടെ പരിസ്ഥിതി സൗഹൃദവും ഹെറിറ്റേജ് അടിസ്ഥാനപ്പെടുത്തിയുമുള്ള ടൂറിസം കേന്ദ്രം രൂപപ്പെടുമെന്നാണ് കരുതുന്നത്. ഇതു സംസ്ഥാനത്തിന്‍റേതടക്കം ടൂറിസം മേഖലയിലെ വരുമാനം വർധിപ്പിക്കുന്നതിന് ഒപ്പം പ്രാദേശിക തൊഴിൽ അവസരങ്ങളും ജീവിതോപാധികളും ശക്തിപ്പെടുത്തുമെന്നാണ് വിലയിരുത്തൽ. മാത്രമല്ല കേരളത്തിന്‍റെ വിനോദ സഞ്ചാര ഭൂപടത്തിൽ മൺട്രോതുരുത്തിനു പുതിയ മുന്നേറ്റം നൽകാനും പദ്ധതി സഹായകരമാകും. അഷ്ടമുടിക്കായലും കല്ലടയാറും ചുറ്റി നിൽക്കുന്ന മനോഹരമായ ദ്വീപാണ് മൺട്രോതുരുത്ത്. പരമ്പരാഗത മത്സ്യബന്ധനവും കൃഷിയുമാണ് പ്രദേശവാസികളുടെ പ്രധാന ജീവിതോപാധികൾ. അതുകൊണ്ട് തന്നെ ഈ പ്രദേശം പരിസ്ഥിതി സൗഹൃദ വിനോദ സഞ്ചാരത്തിന് ഏറ്റവും അനുയോജ്യമാണ്. മൺട്രോതുരുത്ത് റെയിൽവേ സ്റ്റേഷനും ഇതിന് വളരെ അടുത്താണ് സ്ഥിതി ചെയ്യുന്നത്. അക്കാരണത്താൽ തന്നെ റെയിൽവേ അടിസ്ഥാനമാക്കിയുള്ള വിനോദ സഞ്ചാര വികസനത്തിന് വമ്പൻ സാധ്യതകളാണ് ഇവിടെയുള്ളത്.

പിണറായി വിജയൻ പോലീസ് സേനയെ ക്രിമിനൽവത്കരിച്ചു: എൻ. ജയചന്ദ്രൻ

ഓയൂർ : കേരളത്തിലെ പോലീസിനെ ആധുനികവത്കരിച്ചത് കെ.കരുണാകരനും, ഇ.കെ നയനാരുമായിരുന്നെങ്കിൽ സേനയെ ക്രിമിനൽവത്കരിച്ചത് പിണറായി വിജയനാണെന്ന് കെപിസിസി നിർവാഹക സമിതി മുൻ അംഗം എൻ. ജയചന്ദ്രൻ. യൂത്ത് കോൺഗ്രസ് നേതാവ് വി.എസ്. സുജിത്തിനെ മർദിച്ച പോലീസ് ഉദ്യോഗസ്ഥരെ സർവീസിൽ നിന്നും പിരിച്ചു വിടണമെന്നും പോലീസിലെ ക്രിമിനൽവൽക്കരണം അവസാനിപ്പിക്കണമെന്നും ആവശ്യപ്പെട്ട് പൂയപ്പള്ളി, ഓടനാവട്ടം,വെളിയം, വെളിനെല്ലൂർ മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ പൂയപ്പള്ളി പോലീസ് സ്റ്റേഷനിലേക്ക് നടത്തിയ പ്രതിഷേധ മാർച്ചും സംഗമവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ചാത്തന്നൂർ ബ്ലോക്ക് കോൺഗ്രസ്കമ്മിറ്റി പ്രസിഡന്‍റ് ബിജുവിശ്വരാജൻ അധ്യക്ഷത വഹിച്ചു. ഓടനാവട്ടം മണ്ഡലം പ്രസിഡന്‍റ് എം.എസ്. പീറ്റർ, വെളിയം മണ്ഡലം പ്രസിഡന്‍റ് പ്രസാദ് കായില, വെളിനല്ലൂർ മണ്ഡലം പ്രസിഡന്‍റ് പ്രകാശ് വി.നായർ, പൂയപ്പള്ളി മണ്ഡലം മുൻ പ്രസിഡന്‍റ് ചെങ്കുളം ബി.ബിനോയി, ചെങ്കുർ സുരേഷ്, സി.വൈ.റോയി, വിപിൻ റോയി, അനീഷ് വർഗീസ്, സിനു മരുതമൺ പള്ളി, ഗീതാ ജോർജ് , രാജുചാവടി, ഷീബ സന്തോഷ്, തുടങ്ങിയവർ പ്രസംഗിച്ചു.

കോവിഡിന് ശേഷം കൊല്ലം സിറ്റിയിൽ 2404 പേർ ആത്മഹത്യ ചെയ്തു: കിരൺ നാരായണൻ

കൊല്ലം: കോവിഡിന് ശേഷം കൊല്ലം സിറ്റിയിൽ 2404 പേർ ആത്മഹത്യ ചെയ്‌തെന്ന് ജില്ലാ പോലീസ് മേധാവി കിരൺ നാരായണൻ. ആത്മഹത്യ ചെയ്തവരിൽ 35 പേർ ആൺകുട്ടികളും 41 പേർ പെൺകുട്ടികളുമാണ്. വർധിച്ച് വരുന്ന കുട്ടികളുടെ ആത്മഹത്യ പ്രവണതയെ പ്രതിരോധിക്കുകയെന്ന ലക്ഷ്യത്തോടെ സിറ്റി പോലീസ് വിദ്യാർഥികൾക്കും രക്ഷകർത്താക്കൾക്കുമായി നടത്തിയ ബോധവൽക്കരണ സെമിനാർ ഉദ്ഘാടനം ചെയ്തു പ്രസംഗിക്കുകയായിരുന്നു കിരൺ നാരായണൻ. നിരന്തരമായ ടെലിവിഷൻ, മൊബൈൽ ഫോൺ, കംപ്യൂട്ടർ എന്നിവയുടെ അമിത ഉപയോഗവും, കർട്ടൂൺ പരിപാടികളും കുട്ടികളിൽ അഡിക്ഷൻ ഉണ്ടാക്കുന്നുവെന്നും പക്ഷികൾ പോലും നിരന്തരം ഇത്തരം പരിപാടികൾ കണ്ടാൽ അവരും ഇതിന് അടിമകളാകുന്നുവെന്നും പഠനങ്ങൾ തെളിയിക്കുന്നതായി ജില്ലാ പോലീസ് മേധാവി പറഞ്ഞു. ഒരു നിമിഷത്തെ ദൗർബല്യമാണ് ഒരു ജീവനെടുക്കുന്നത്. ആത്മഹത്യയെ ഒരു വ്യക്തിയുടെ മാത്രം പ്രശ്നമായി കാണരുത്. അതിനെ തടയാൻ സമൂഹത്തിന് ഒന്നടങ്കം ഉത്തരവാദിത്തമുണ്ട്. ആത്മഹത്യ പ്രതിരോധ പ്രവർത്തനങ്ങൾ ശക്തിപ്പെടുത്തുകയും ഇക്കാര്യത്തിൽ കുട്ടികളിൽ മാനസികാരോഗ്യം വളർത്തിയെടുക്കാൻ ശ്രമിക്കുകയുമാണ് വേണ്ടതെന്നും ജില്ലാ പോലീസ് മേധാവി പറഞ്ഞു. ലോക ആത്മഹത്യ പ്രതിരോധ ദിനത്തിൽ ബോധവത്കരണത്തിന്‍റെ ഭാഗമായി കൊല്ലം സിറ്റി പോലീസാണ് സെമിനാർ സംഘടിപ്പിച്ചത്. കൊല്ലം പോലീസ് ക്ലബിൽ നടന്ന സെമിനാറിൽ കൊല്ലം സിറ്റി പോലീസ് പരിധിയിലെ സ്കൂളുകളിലെ അധ്യാപക - രക്ഷകർതൃ - ഭാരവാഹികൾ, വിദ്യാർഥികൾ തുടങ്ങിയവർ പങ്കെടുത്തു. സ്പെഷൽ ബ്രാഞ്ച് എസിപി എ.പ്രദീപ്കുമാർ അധ്യക്ഷത വഹിച്ച ചടങ്ങിൽ എ എസ് പി അഞ്ജലി ഭാവന, എ സിപിമാരായ എ.നസീർ, അലക്സാണ്ടർ തങ്കച്ചൻ, മെറിൻ സോളമൻ എന്നിവർ പ്രസംഗിച്ചു. മെറിൻ സോളമൻ വിദ്യാർഥികളിൽ വർധിച്ചുവരുന്ന ആത്മഹത്യ പ്രവണതയ്ക്കുള്ള കാരണങ്ങളും അതിനുള്ള പ്രതിവിധികളും എന്ന് വിഷയത്തിൽ ക്ലാസ് നയിച്ചു.

തില്ലേരി സെന്‍റ് ആന്‍റണീസ് ആശ്രമത്തിൽ ഒരു ഏദൻതോട്ടം

ജോൺസൺ വേങ്ങത്തടം കൊല്ലം: വൈദികവൃത്തിയുടെ വിശുദ്ധിക്കൊപ്പം ശുദ്ധമായ കൃഷിയുടെ സന്ദേശവും ജനങ്ങളിലേക്ക് വീശുകയാണ് ഫ്രാൻസീസ്കൻ കപ്പൂച്ചിൻ സഭയുടെ തില്ലേരി സെന്‍റ് ആന്‍റണീസ് ആശ്രമത്തിലൂടെ. വിശുദ്ധ ഫ്രാൻസിസിനെ പോലെ ലാളിത്യവും സാഹോദര്യവും പ്രാർഥനയും പ്രകൃതിയോടു ചേർന്നുള്ള ജീവിതവുമാണ് ആശ്രമത്തിൽനിന്നും ഒഴുകുന്നത്. പച്ചപ്പ് നിറഞ്ഞ പ്രകൃതിയും ചെടികളും മൃഗങ്ങളും പക്ഷികളും ആശ്രമത്തിനൊരു ചൈതന്യമാണ് പകരുന്നത്. ആറ് ഏക്കർ വരുന്ന കൃഷിയിടത്തിൽ നിറഞ്ഞുനിൽക്കുന്ന പച്ചപ്പ് കണ്ണിനുകുളിരു പകരുന്നു. കൃഷിത്തോട്ടത്തൊടൊപ്പം പശുഫാമും മീൻവളർത്തലും ആടുഫാമും മുയലും കോഴിയും താറാവും വാത്തയും ഈ കൃഷിയിടത്തിലുണ്ട്. ആശ്രമ റെക്ടർ റവ.ഡോ. സെബാസ്റ്റ്യൻ തോബിയാസ് ഒഎഫ് എം സിഎപിയുടെ മേൽനോട്ടത്തിലാണ് ഇവിടുത്തെ ഓരോ പ്രവർത്തനവും മുന്നോട്ടു പോകുന്നത്. ഫാമുകളുടെ ചാർജ് ഫാ. അൽഫോൻസ് ലൂഷ്യസ് ഒഎഫ്എം സിഎ പി, കൃഷിയിടങ്ങളുടെ മേൽനോട്ടം ഫാ. ക്ലീറ്റസ് ആന്‍റണി ഒഎഫ്എം സിഎപി എന്നിവർക്കാണ്. എന്നാൽ ഇവരോടൊപ്പം ഈ ആശ്രമത്തിലെ വൈദികരും വൈദികവിദ്യാർഥികളും ഇവയെ സ്നേഹിച്ചുകൂടെയുണ്ട്. ശുദ്ധമായ പാലും മരുന്നടിക്കാത്ത പച്ചക്കറിയും ഉപയോഗിക്കണമെന്നാഗ്രഹത്തോടെയാണ് ഈ ഭൂമിയെ ഉപയോഗപ്പെടുത്തുന്നത്. തെങ്ങ്, വാഴ എന്നിവ കൂടാതെ സർവ പച്ചക്കറികളും ഈ ഭൂമിയിൽ നട്ടുവളർത്തുന്നുണ്ട്. വെണ്ട, വഴുതനങ്ങ, പടവലം, വെള്ളരി, മത്തൻ, മരച്ചീനി, മുളക്, മഞ്ഞൾ, ഇഞ്ചി, തക്കാളി, ബീൻസ്, പയർ, ചീര തുടങ്ങിയവയെല്ലാം തലയുയർത്തിയാണ് നില്‌ക്കുന്നത്. 500 വാഴകളും അര ഏക്കറിൽ കപ്പയും വളർത്തുന്നുണ്ട്. ഈ കൃഷിയിടത്തിൽ വളരുന്നതെല്ലാം അടുക്കളയിലേക്കുമാത്രമല്ല, ഇല്ലാത്ത പാവപ്പെട്ട നാട്ടുകാർക്കും നല്കുന്നു. 21അടി ഉയരത്തിലും 60 അടിനീളത്തിലും 45 അടി വീതിയിലുമുള്ള മനോഹരമായ പശുഫാമാണ് ഈ തോട്ടത്തിലെ മറ്റൊരു ആകർഷണം. കാറ്റും വെളിച്ചവും കയറുന്ന ഫാം. പശുക്കൾക്കായി ഫാനും ഒരുക്കിയിട്ടുണ്ട്. കോൺക്രീറ്റ് തറകളും കന്നുകാലികളുടെ കാലിനുപ്രശ്നം ഉണ്ടാകാതിരിക്കാൻ റബർമാറ്റും കുടിക്കാൻ വെള്ളവും ഒരുക്കിയിട്ടുണ്ട്. കുളിപ്പിക്കാൻ ഇഷ്ടംപോലെ വെളളം. വൃത്തിയും വെടിപ്പുമാണ് ഫാമിന്‍റെ പ്രത്യേകത. ജേഴ്സിയും എച്ച്എഫുമാണ് ഫാമിലുള്ളത്. 25 എണ്ണത്തിൽ 16 ഓളം പശുക്കൾക്കുകറവയുണ്ട്. മൂന്നു എരുമകളുമുണ്ട്. ആറോളം കുഞ്ഞുങ്ങളുമുണ്ട്. പുലർച്ചെ അഞ്ചിനും ഉച്ചക്ക് രണ്ടിനുമാണ് യന്ത്രമുപയോഗിച്ചുകറക്കുന്നത്. ഇവയുടെ പരിപാലനത്തിനായി തൊഴിലാളികളുണ്ട്. ആവശ്യത്തിനു എടുത്തശേഷം കവറിലാക്കി പുറത്തു നാട്ടുകാർക്കു കൊടുക്കുന്നുണ്ട്. മിൽമയ്ക്കും ബേക്കറികൾക്കും കൂടാതെ പാലെടുത്ത് ഉപജീവനം നയിക്കുന്ന ഒരാൾക്കും പാൽ നൽകുന്നുണ്ട്. ഇവയുടെ തീറ്റക്കായി ഒരുഏക്കർ സ്ഥലത്ത് തീറ്റപ്പുൽകൃഷി ചെയ്യുന്നുണ്ട്. ലാർജ് വൈറ്റ് യോർക്ക്ഷെയർ,ലാൻഡ്രേസ് ,ഡ്യൂറോക്ക് തുടങ്ങിയ ഇനത്തിൽപ്പെട്ട 20ഓളം പന്നികളാണ് ഫാമിലുള്ളത്. ഇടത്തരവും കുഞ്ഞുങ്ങളും ഇവയ്ക്കൊപ്പമുണ്ട്. ക്രിസ്മസിനും ഈസ്റ്ററിനുമാണ് ഇവയുടെ മാംസം വിൽക്കുന്നത്. ആടുകളിൽ ജമുനാപാരി, മലബാറി, ബീറ്റൽ, ഹൈദ്രാബാദി ഇനങ്ങളിൽപ്പെട്ട ആടുകളാണുള്ളത്. ഇതിന്‍റെ പാൽ പൂർണമായും കുഞ്ഞുങ്ങൾക്കു കുടിക്കാൻ കൊടുക്കുകയാണ്. ഇതിനോടൊപ്പം ഔഷധഗുണമുള്ള പാൽ നല്കുന്ന നാടൻ പശുക്കളായ വെച്ചൂരും കാസർകോഡ് കുള്ളനും ഇവിടെയുണ്ട്. താറാവും കോഴിയും ചൈനീസ് വാർത്തകളും കൂടെ മണിതാറാവുകളും നിറഞ്ഞുനിൽക്കുന്നു. ഇവയ്ക്കെല്ലാം നീന്തികളിക്കാൻ കുളവും ഈ കുളത്തിൽ മീൻ വളർത്തലുമുണ്ട്. ഇതൊന്നും പണം ഉണ്ടാക്കാനോ, ലാഭം കൊയ്യാനൊഅല്ല പ്രകൃതിയോടു ചേർന്നു ജീവിക്കുക. ശുദ്ധവായു ശ്വസിച്ചു ഈ പറന്പിലൂടെ നടക്കുക. ഓരോ ചെടിയുടെയും വളർത്തുമൃഗങ്ങളുടെയും അടുത്ത് അല്പനേരം പങ്കിടുന്പോൾ ലഭിക്കുന്ന അനുഭവം വലുതാണ്. വിശുദ്ധ ഫ്രാൻസിസിനെ പോലെ പ്രാർഥന ജീവിതത്തൊടൊപ്പം പ്രകൃതിയോടും ചേർന്നുനിൽക്കാനാണ് ആഗ്രഹിക്കുന്നതെന്ന് ഫാ. ക്ലീറ്റസ് ആന്‍റണിയും ഫാ. അൽഫോൻസ് ലൂഷ്യസും പറയുന്നു.

കൊല്ലത്ത് എയർ കോൺകോഴ്സ് നിർമാണം ഉടൻ : ട്രെയിൻ ഗതാഗതം തടസപ്പെടുമെന്ന് റെയിൽവേ

കൊല്ലം : കൊല്ലം റെയില്‍വേ സ്റ്റേഷൻ നവീകരണ ഭാഗമായി എയര്‍ കോണ്‍കോഴ്‌സിന്‍റെ നിര്‍മാണ പ്രവര്‍ത്തനങ്ങള്‍ ഉടന്‍ ആരംഭിക്കും. ഇതിന്‍റെ ഭാഗമായി നിലവിലുള്ള സൗത്ത് ടെര്‍മിനല്‍ കെട്ടിടം പൊളിച്ചുനീക്കും. ദക്ഷിണ റെയില്‍വേയുടെ തിരുവനന്തപുരം ഡിവിഷണല്‍ ഓഫീസ് പുറത്തിറക്കിയ അറിയിപ്പ് പ്രകാരം ഈ പ്രവര്‍ത്തനങ്ങള്‍ കാരണം തീവണ്ടി ഗതാഗതത്തിനു മാറ്റങ്ങളും കാലതാമസങ്ങളും ഉണ്ടാകും. എയര്‍ കോണ്‍കോഴ്‌സിനായുള്ള തൂണുകള്‍, കോര്‍ബെല്‍, ട്രെസ്റ്റില്‍ ബീമുകള്‍ എന്നിവ ഒന്നാം നമ്പർ പ്ലാറ്റ്ഫോമിലാണ് സ്ഥാപിക്കുക. നിലവിലെ സൗത്ത് ടെര്‍മിനല്‍ കെട്ടിടം പൊളിച്ചുനീക്കുന്ന ജോലികളും ഇതിനോടൊപ്പം നടക്കും. ഇന്നു മുതല്‍ നവംബര്‍ 14 വരെയാണ് ഈ ജോലികള്‍ നടക്കുക. നിര്‍മാണ പ്രവര്‍ത്തനങ്ങള്‍ക്കായി ദിവസവും ഒരു മണിക്കൂര്‍ 30 മിനിറ്റും (രാവിലെ 10.45 മുതല്‍ 12.15 വരെ) പിന്നീട് അഞ്ച് മണിക്കൂറും (രാത്രി 10.30 മുതല്‍ പുലര്‍ച്ചെ 3.30 വരെ) പവര്‍ ബ്ലോക്ക് അനുവദിച്ചിട്ടുണ്ട്. പവര്‍ ബ്ലോക്ക് സമയത്ത് എല്ലാ ഡൗണ്‍ ട്രെയിനുകളും ( തിരുവനന്തപുരം ഭാഗത്തേയ്ക്ക്) മൂന്നാം നമ്പർ പ്ലാറ്റ്ഫോം വഴിയായിരിക്കും കടന്നുപോവുക. ഇത് ട്രെയിനുകളുടെ യാത്രയില്‍ 20 മിനിറ്റ് അധിക കാലതാമസം ഉണ്ടാക്കാന്‍ സാധ്യതയുണ്ട്. ഡൗണ്‍ ട്രെയിനുകള്‍ അപ് ലൈനിലൂടെ കടന്നുപോകുന്നത് കാരണം അപ് ട്രെയിനുകള്‍ക്കും (എറണാകുളം ഭാഗത്തേയ്ക്ക്) 20 മിനിറ്റ് വരെ കാലതാമസം നേരിടാം. ഈ നിര്‍മാണ പ്രവര്‍ത്തനങ്ങള്‍ സുരക്ഷിതമായി പൂര്‍ത്തിയാക്കുന്നതിന് ആവശ്യമായ എല്ലാ മുന്‍കരുതലുകളും ഉറപ്പാക്കുമെന്നും യാത്രക്കാരുടെ സുരക്ഷയ്ക്ക് മുന്‍ഗണന നല്‍കുമെന്നും തിരുവനന്തപുരം റെയില്‍വേ ഡിവിഷൻ അധികൃതർ അറിയിച്ചു.

ഏറ്റവും വലിയ അപ്രത്യക്ഷമാകുന്ന വെള്ളച്ചാട്ടം; വണ്ടർ ഫാൾസിന് ലോക റിക്കാർഡ്

കൊല്ലം : ലോകത്തിലെ ഏറ്റവും വലിയ അപ്രത്യക്ഷമാകുന്ന വെള്ളച്ചാട്ടം സൃഷ്ടിച്ചതിനുള്ള ലോക റിക്കാർഡ് വണ്ടർഫാൾസിന്. കൊല്ലം ആശ്രാമം മൈതാനത്ത് 60 അടി ഉയരവും 164 അടി വീതിയുമുള്ള അപ്രത്യക്ഷമാകുന്ന വെള്ളച്ചാട്ടം സൃഷ്ടിച്ചതിനാണ് യുആർഎഫ് (യൂണിവേഴ്സൽ റിക്കാർഡ് ഫോറം) 2025 ലോക റിക്കാർഡിനു വണ്ടർഫാൾസ് അർഹമായിരിക്കുന്നത്. അപ്രത്യക്ഷമാകുന്ന ഈ വെള്ളച്ചാട്ടത്തിന് 1.5 ലക്ഷം ലിറ്റർ ജലസംഭരണ ശേഷിയും 300 ടൺ മൊത്തത്തിലുള്ള ഘടനാപരമായ ഭാരവുമുണ്ട്. ഈ അതിശയകരമായ നിർമ്മിതി ഒരേസമയം സർഗാത്മകതയുടെയും എൻജിനീയറിംഗിന്‍റെയും മികവ് സംഗമിക്കുന്ന അദ്ഭുതമാണ്. ആർ. ശ്യാംകുമാറും മറ്റു സാങ്കേതിക വിദഗ്ദ്ധരും ചേർന്നു സൃഷ്ടിച്ച ഈ പദ്ധതി, 630 ൽ അധികം മണിക്കൂറുകൾ കൊണ്ട് 100 തൊഴിലാളികളുടെ സമർപ്പിത പരിശ്രമത്തിലൂടെയാണ് പൂർത്തീകരിച്ചത്. ലോക റിക്കാർഡിന് ഇക്കാര്യങ്ങളാണ് പരിഗണിച്ചതെന്ന് യു ആർ എഫ് അധികൃതർ അറിയിച്ചു. ഇന്നേവരെ കൊല്ലം കണ്ടിട്ടില്ലാത്തത്ര ജനസാഗരം സൃഷ്ടിച്ചുകൊണ്ടാണ് അപ്രത്യക്ഷമാകുന്ന വെള്ളച്ചാട്ടം മുന്നേറുന്നത്. 30 വരെ പ്രദർശനം ഉണ്ടായിരിക്കും.

തീരദേശത്തിന്‍റെ മകനു രാഷ്ട്രപതിയുടെ വിശിഷ്ട സേവാ പുരസ്‌കാരം

കൊല്ലം: സെന്‍റര്‍ റിസര്‍വ്‌ പോലീസ്‌ ഫോഴ്‌സിലെ കൊല്ലം സ്വദേശി കമാന്‍ഡന്‍റ് എറിക്‌ ഗില്‍ബര്‍ട്ട്‌ ജോസ്‌ രാഷ്ര്ടപതിയുടെ വിശിഷ്ട സേവാപുരസ്കാരത്തിനു തെരഞ്ഞെടുക്കപ്പെട്ടു. രാജ്യത്തിന്‍റെ വിവിധ ഭാഗങ്ങളില്‍ സായുധ കലാപകാരികളെ അമര്‍ച്ച ചെയ്യുന്നതിനു നടത്തിയ ധീരമായ ഇടപെടലു കള്‍ക്കാണ്‌ കമാന്‍ഡന്‍റ് എറിക്‌ ഗില്‍ബര്‍ട്ട്‌ ജോസിന്‍റെ സേവനം അംഗീകരിക്കപ്പെട്ടത്‌. അദ്ദേഹം ഇപ്പോള്‍ ഒഡീസയിലെ മാവോയിസ്റ്റ്‌ സാധ്യതയുള്ള പ്രദേശങ്ങളിൽ തീവ്രവാദികളെ അമര്‍ച്ച ചെയ്യുന്നതിനുള്ള ഓപ്പറേഷനുകളില്‍ വ്യാപൃതനാണ്. ധീരതയ്ക്കും വിജയകരമായ സൈനിക നീക്കങ്ങള്‍ക്കും പല അംഗീകാരങ്ങളും ഇന്ത്യയുടെ സൈനാ ധിപനില്‍ നിന്നും കമാന്‍ഡന്‍ എറിക്‌ ഏറ്റു വാങ്ങിയിട്ടുണ്ട്‌. ജമ്മു കാശ്മീരിലെ ഇടപെടലുകള്‍ക്ക്‌ ദേശീയ സുരക്ഷ അഡ്വവൈസര്‍ അജിത്‌ ഡോവലിന്‍റെ പ്രശംസയ്ക്കും നേടിയിട്ടുണ്ട്. ജമ്മു കാശ്മീര്‍, മിസോറാം, ത്രിപുര, ഛത്തീസ്ഖണ്ഡ്‌, നാഗാലാന്‍റ് , തമിഴ്നാട് എന്നീ സംസ്ഥാനങ്ങളില്‍ വളരെ അപകടകരമായ പല ദൗത്യങ്ങള്‍ക്കും എറിക്‌ നേതൃത്വം നല്‍കി. ഭീകര പ്രവര്‍ത്തകരെ നിര്‍വീര്യരാക്കുന്നതിനും ബന്ധിക്കുന്നതിനും ഇദ്ദേഹത്തിനു സാധിച്ചു. സൈനികരുടെ അടിസ്ഥാന സൗകര്യങ്ങളും കാര്യക്ഷമതയും മെച്ചപ്പെടുത്തുന്നതിനായി നിരവധി കണ്ടുപിടുത്തങ്ങള്‍ക്കു എറിക്‌ നേതൃത്വം നല്‍കി. 5109 മോര്‍ട്ടാര്‍, രണ്ട് മോര്‍ട്ടാര്‍ എന്നീ ഉയര്‍ന്ന ആയുധങ്ങള്‍ ഉപയോഗിച്ച്‌ കൃത്യമായി വെടിവയ്ക്കുന്നതിനുള്ള ഒരു ലക്ഷ്യ ഉപകരണം ഇദ്ദേഹം കണ്ടുപിടിച്ചു. കാശ്മീരിലെ മഞ്ഞുമൂടിയ പ്രദേശങ്ങളില്‍ വിന്യസിച്ചിരിക്കുന്ന സൈനികര്‍ക്ക്‌ അലക്കിയ വസ്ര്തങ്ങൾ മൈനസ്‌ താപനിലയില്‍ വേഗത്തില്‍ ഉണക്കുന്നതിനുള്ള ഒരു ഉപകരണവും ഇദ്ദേഹം കണ്ടുപിടിച്ചു. 2017-ല്‍, ജമ്മുവിനും ശ്രീനഗറിനും ഇടയില്‍ സുരക്ഷാ സേനയുടെ വാഹനവ്യുഹത്തെ തീവ്രവാദികള്‍ ലക്ഷ്യം വയ്ക്കാന്‍ തുടങ്ങിയപ്പോള്‍, ഫോഴ്‌സ്‌ വാഹനത്തെ ബുള്ളറ്റ്‌ പ്രൂഫ്‌ വാഹനമാക്കി മാറ്റേണ്ടതിന്‍റെ ആവശ്യകത അദ്ദേഹത്തിന്അറിയാമായിരുന്നു. ഇന്ത്യന്‍ ആര്‍മി യുടെ ബറ്റാലിയനുകളുമായി അദ്ദേഹം ഈ സാങ്കേതികവിദ്യ പങ്കിട്ടു. കോവിഡ്‌ പാൻഡെമിക്‌ സമയത്ത്‌ ഡോക്ടര്‍മാര്‍ക്കും മറ്റു മെഡിക്കല്‍ ഉദ്യോഗസള്‍ക്കും പൂര്‍ണ സംരക്ഷണം നല്‍കുന്നതിനായി അദ്ദേഹം എയര്‍ ടൈറ്റ്‌ തുണി ഉപയോഗിച്ച്‌ മൈക്രോബയല്‍ പ്രിവന്‍റീവ്‌ സ്യൂട്ട് വികസിപ്പിച്ചെടുത്തു.

കോണ്‍ഗ്രസ് ജനകീയ പ്രതിഷേധ സദസ് നടത്തി

കൊല്ലം: ചൊവ്വല്ലൂര്‍ മണ്ഡലം യൂത്ത് കോണ്‍ഗ്രസ് കമ്മിറ്റി പ്രസിഡന്റ് വി. എസ്. സുജിത്തിനെ അകാരണമായി തല്ലിചതച്ച പോലീസ് ഉദ്യോഗസ്ഥരെ പിരിച്ച് വിടണമെന്ന് ആവശ്യപ്പെട്ട് ജില്ലയിലെ പോലീസ് സ്റ്റേഷനുകള്‍ക്ക് മുന്നില്‍ മണ്ഡലം കോണ്‍ഗ്രസ് കമ്മിറ്റികളുടെ നേതൃത്വത്തില്‍ ജനകീയ പ്രതിഷേധ സദസ് സംഘടിപ്പിച്ചു. ജില്ലാതല ഉദ്ഘാടനം കൊട്ടാരക്കര പോലീസ് സ്‌റ്റേഷന് മുന്നില്‍ കോണ്‍ഗ്രസ് വര്‍ക്കിംഗ് കമ്മിറ്റി അംഗം കൊടിക്കുന്നില്‍ സുരേഷ് എം പി നിര്‍വഹിച്ചു. കുണ്ടറ - കണ്ണനല്ലൂര്‍ കെ പി സി സി വര്‍ക്കിംങ് പ്രസിഡന്‍റ് പി സി . വിഷ്ണുനാഥ് എം എല്‍ എ, കൊല്ലം ഈസ്റ്റ്, അഞ്ചാലുംമൂട് - ബിന്ദുകൃഷ്ണ, അഞ്ചല്‍ - എം എം നസീര്‍, ശൂരനാട് - കെ. സി. രാജന്‍, ഇരവിപുരം - എ. ഷാനവാസ്ഖാന്‍, പുനലൂര്‍ - ചാമക്കാല ജ്യോതികുമാര്‍, കൊട്ടിയം - കെ. ബേബിസണ്‍, ചാത്തന്നൂര്‍ - തൊടിയൂര്‍ രാമചന്ദ്രന്‍, ശാസ്താംകോട്ട - പി. ജര്‍മ്മിയാസ്, കിഴക്കേ കല്ലട - എം. വി. ശശികുമാരന്‍ നായര്‍, പത്തനാപുരം - സി. ആര്‍. നജീബ്, തെന്മല - കെ. ശശിധരന്‍, എഴുകോണ്‍ - സവിന്‍ സത്യന്‍ - കൊല്ലം വെസ്റ്റ് - സൈമണ്‍ അലക്‌സ്, പള്ളിത്തോട്ടം - എ. കെ. ഹഫീസ്, കിളികൊല്ലൂര്‍ - സൂരജ് രവി, പുത്തൂര്‍ - ബിന്ദുജയന്‍, പാരിപ്പള്ളി - പി. പ്രതീഷ്‌കുമാര്‍, പൂയപ്പള്ളി - ജയചന്ദ്രന്‍, ചവറ - ആര്‍. അരുണ്‍രാജ്, ശക്തികുളങ്ങര - സേതുനാഥപിള്ള, പരവൂര്‍ - നെടുങ്ങോലംരഘു എന്നിവര്‍ ജനകീയ പ്രതിഷേധ സദസുകള്‍ ഉദ്ഘാടനം ചെയ്തു. ചവറയിൽ ചവറ : കുന്നംകുളത്ത് യൂത്ത് കോണ്‍ഗ്രസ് മണ്ഡലം പ്രസിഡന്‍റ്സുജിത്തിനെ മര്‍ദിച്ച സംഭവത്തിലുള്‍പ്പെട്ട പോലീസുകാരെ ജോലിയില്‍ നിന്നും പിരിച്ചു വിടണമെന്നാവശ്യപ്പെട്ട് മണ്ഡലം കോണ്‍ഗ്രസ് കമ്മിറ്റി യുടെ ആഭിമുഖ്യത്തിൽ കോണ്‍ഗ്രസ് പ്രവര്‍ത്തകര്‍ ചവറ പോലീസ് സ്റ്റേഷനിലേക്ക് പ്രതിഷേധ മാര്‍ച്ച് നടത്തി. കരുനാഗപ്പള്ളി, ചവറ, തെക്കുംഭാഗം പോലീസ് സ്റ്റേഷനുകളില്‍ നിന്നും കൂടുതല്‍ പോലീസുകാരെയും വിന്യസിച്ചിരുന്നു. തട്ടാശ്ശേരിയിൽ നിന്നും പ്രകടനമായെത്തിയ പ്രതിഷേധം സ്റ്റേഷന് മുന്നിലെത്തി. തുടര്‍ന്ന് പ്രവര്‍ത്തകര്‍ ബാരിക്കേഡ് മറികടക്കാന്‍ ശ്രമിച്ചു. ഇതിനിടയില്‍ ബാരിക്കേഡിൽ തട്ടി യൂത്ത് കോണ്‍ഗ്രസ് പ്രവര്‍ത്തകന്‍ അനിലിന്‍റെ നെറ്റി പൊട്ടി. പോലീസും പ്രതിഷേധക്കാരും തമ്മിൽ ഇതോടെ ഉന്തും തള്ളും ഉണ്ടായി. പ്രതിഷേധ സമരം ഡിസിസി വൈസ് പ്രസിഡന്‍റ് ആര്‍.അരുണ്‍ രാജ് ഉദ്ഘാടനം ചെയ്തു. നേതാക്കളായ ആര്‍. ജയകുമാര്‍, ചവറ ഹരീഷ് കുമാര്‍,പി.ആര്‍ ജയപ്രകാശ്, കിഷോര്‍ അമ്പിലാക്കര, മേച്ചേഴ്ത്ത് ഗിരീഷ്, സന്തോഷ് തുപ്പാശേരി,പന്മന ജി. വേലായുധന്‍ കുട്ടി,വി. മനോഹരന്‍ തുടങ്ങിയവര്‍ നേതൃത്വം നല്‍കി. കുളത്തൂപ്പുഴയിൽ കുളത്തൂപ്പുഴ. കുന്നംകുളത്ത് പോലീസ് കസ്റ്റഡി മർദ്ദനത്തിനെതിരെ കുളത്തൂപ്പുഴയിൽ ഈസ്റ്റ് ,വെസ്റ്റ് കോൺഗ്രസ് മണ്ഡലം കമ്മിറ്റിയുടെ ആഭിമുഖ്യത്തിൽ ധർണ നടന്നു. കുളത്തുപ്പുഴ കോൺഗ്രസ് കമ്മിറ്റി ഓഫീസിൽ നിന്നും ആരംഭിച്ച മാർച്ച് ടൗൺ ചുറ്റി പോലീസ് സ്റ്റേഷൻ റോഡിൽ എത്തിയപ്പോൾ പോലീസ് ബാരിക്കേഡ് വെച്ച് തടഞ്ഞു. ഐഎൻടിയുസി പുനലൂർ മണ്ഡലം പ്രസിഡൻറ് സാബു എബ്രഹാം ധർണ ഉദ്ഘാടനം ചെയ്തു. കോൺഗ്രസ് കുളത്തൂപ്പുഴ ഈസ്റ്റ് വെസ്റ്റ് മണ്ഡലം പ്രസിഡന്റുമാരായ സൈനബ ബീവി, കെ .കെ. കുര്യൻ, ഗ്രാമപഞ്ചായത്ത് അംഗങ്ങളായ സുഭിലാഷ് കുമാർ, സന്തോഷ് കുമാർ, ഷീല സത്യൻ, കോൺഗ്രസ് നേതാക്കളായ പ്ലാവിള ശരീഫ്, എ. എസ്. നിസാം തുടങ്ങിയവർ പ്രസംഗിച്ചു. അഞ്ചലിൽ അഞ്ചല്‍ : യൂത്ത് കോൺഗ്രസ്‌ ചൊവ്വന്നൂർ മണ്ഡലം പ്രസിഡന്‍റ് സുജിത്തിനെ കുന്നംകുളം പോലീസ് സ്റ്റേഷനിൽ ഭീകരമായി മർദിച്ച പോലീസ് ഉദ്യോഗസ്ഥരെ സർവീസിൽ നിന്നു പിരിച്ചു വിടണമെന്ന് ആവശ്യപ്പെട്ടു കോൺഗ്രസ്‌ ഏരൂർ ആയിരനല്ലൂർ അലയമൺ മണ്ഡലം കമ്മിറ്റികളുടെ നേതൃത്വത്തിൽ ഏരൂർ പോലീസ് സ്റ്റേഷനു മുന്നില്‍ ജനകീയ പ്രതിഷേധ സദസ് സംഘടിപ്പിച്ചു. കെ പി സി സി സെക്രട്ടറി അഡ്വ. സൈമൺ അലക്സ്‌ പ്രതിഷേധം ഉദ്ഘാടനം ചെയ്തു. ഏരൂർ മണ്ഡലം പ്രസിഡന്‍റ് ഗീവർഗീസ് അധ്യക്ഷത വഹിച്ചു. ഡിസി സി ജനറൽ സെക്രട്ടറി അഡ്വ. എസ്.ഇ. സഞ്ചയ്ഖാൻ, പി.ബി.വേണുഗോപാൽ, തോയിത്തല മോഹനൻ, എം.എം. സാദിഖ്, ഡെനിമോൻ, നെട്ടയം സുജി, സി. ജെ. ഷോം, പി.റ്റി.കൊച്ചുമ്മച്ചൻ, പത്തടി സുലൈമാൻ, ബിജു അയിലറ, ശശിധരൻ പിള്ള, മൻസൂർ, അരവിന്ദ്, അനുരാജ്, ഷാജി, ലതാ സുനിൽ, സജീന ഷിബു, സജി ഇല്ലിക്കൽ, എന്നിവർ പ്രസംഗിച്ചു. കുണ്ടറയിൽ കുണ്ടറ : പോലീസ് മർദനമേൽക്കുന്ന നിരപരാധികളെ പാർട്ടി നോക്കാതെ കോൺഗ്രസ് സംരക്ഷിക്കുമെന്ന് കെപിസിസി വർക്കിംഗ് പ്രസിഡന്‍റ് പി .സി .വിഷ്ണുനാഥ് എം എൽ എ. കുണ്ടറയിൽ കോൺഗ്രസിന്‍റെ ജനകീയ പ്രതിഷേധ സദസ് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കുണ്ടറ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ നടന്ന പ്രതിഷേധ പരിപാടിയിൽ ബ്ലോക്ക് കോൺഗ്രസ് കമ്മിറ്റി പ്രസിഡന്‍റ്് രാജു .ഡി. പണിക്കർ അധ്യക്ഷനായി. ഡിസിസി ജനറൽ സെക്രട്ടറി ആന്‍റണി ജോസ്, യുഡിഎഫ് ചെയർമാൻ കുരീപ്പള്ളി സലീം, കെ. ബാബുരാജൻ, നീരൊഴുക്കിൽ സാബു, അനീഷ് പടപ്പക്കര, പെരുനാട് മുരളി, വിളവീട്ടിൽ മുരളി, കുണ്ടറ സുബ്രഹ്മണ്യം, സിന്ധു ഗോപൻ, തുടങ്ങിയവർ പ്രസംഗിച്ചു.

ഇടമുളക്കല്‍ സര്‍ക്കാര്‍ ജവഹര്‍ സ്കൂളിൽ കുട്ടികൾക്ക് മഞ്ഞപ്പിത്തം; സ്കൂള്‍ താത്ക്കാലികമായി അടച്ചു

അഞ്ചല്‍ : ഇടമുളക്കല്‍ സര്‍ക്കാര്‍ ജവഹര്‍ ഹൈസ്കൂളിലെ പതിനേഴോളം കുട്ടികള്‍ക്ക് മഞ്ഞപ്പിത്തം സ്ഥിരീകരിച്ചു. ഇതില്‍ രണ്ടു കുട്ടികളെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ചിലര്‍ പുനലൂര്‍ താലൂക്ക് ആശുപത്രിയിലും ചിലര്‍ അഞ്ചലിലെ സ്വകാര്യാശുപത്രിയിലും ചികില്‍സ തേടി. ഈമാസം ഒന്നാം തീയതി ഒരു കുട്ടിക്ക് മഞ്ഞപ്പിത്തം റിപ്പോര്ട്ട് ചെയ്തിരുന്നു. നാലാം തീയതോയോടെ മറ്റ് നാലുകൂട്ടികള്‍ക്ക് കൂടി രോഗം സ്ഥിരീകരിച്ചു. ഇതോടെയാണ് കൂടുതല്‍ കുട്ടികളെ പരിശോധന നടത്താന്‍ തീരുമാനിച്ചത്. അതേസമയം ഇത്രയധികം കുട്ടികളില്‍ മഞ്ഞപ്പിത്തം സ്ഥിരീകരിച്ചതോടെ ആരോഗ്യവകുപ്പിന്‍റെ നിര്‍ദേശത്തെ തുടര്‍ന്നു സ്കൂള്‍ താത്ക്കാലികമായി അടച്ചു. പ്രതിരോധ നടപടികള്‍ പൂര്‍ത്തിയാക്കി തിങ്കളാഴ്ചയോടെ സ്കൂള്‍ തുറക്കാനാണ് അധികൃതരുടെ നീക്കം. പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കിയതായി ആരോഗ്യവകുപ്പ് അധികൃതര്‍ അറിയിച്ചു. സ്കൂളിലെ വെള്ളം ശേഖരിച്ച് പരിശോധനക്കായി അയച്ചിരുന്നു. വെള്ളത്തില്‍ രോഗം പടരുവിധം യാതൊന്നും കണ്ടെത്തിയിട്ടില്ലന്നു സ്കൂള്‍ അധികൃതര്‍ വ്യക്തമാക്കി. ഇതോടെ പുറത്തുനിന്നുമാകാം അസുഖം പിടിപെട്ടതെന്ന നിഗമനത്തിലാണ് അധികൃതര്‍. കുട്ടികളുടെ വിവരങ്ങള്‍ ശേഖരിച്ചുകൊണ്ടു അതാത് പ്രദേശങ്ങളിലെ കുടിവെള്ളം ഉള്‍പ്പടെ പരിശോധിച്ചു പ്രതിരോധ പ്രവര്‍ത്തനങ്ങള്‍ വേഗത്തിലാക്കുമെന്ന് ആരോഗ്യവകുപ്പ് അധികൃതര്‍ പറഞ്ഞു. മുതിര്‍ന്നവരിലും മഞ്ഞപ്പിത്തം കണ്ടെത്തിയിട്ടുണ്ട്. ആശങ്കപ്പെടേണ്ട സാഹചര്യമില്ലന്നും ആരുടേയും നില ഗുരുതരമല്ലന്നും അധികൃതര്‍ പറയുന്നു. സ്കൂളിലെ കിണറും പരിസരവും വൃത്തിയാക്കിയിട്ടുണ്ട്. ആവശ്യമായ മുന്‍കരുതലുകള്‍ എല്ലാം സ്വീകരിച്ച ശേഷമേ സ്കൂള്‍ തുറക്കുവെന്ന് ഹെഡ്മാസ്റ്റർ ബിനു രാജ് അറിയിച്ചു.

ചാരായവും വാഷും പിടികൂടി: രണ്ടു പേർ അറസ്റ്റിൽ

ശാസ്താംകോട്ട: കടപുഴ ഭാഗത്ത് നടത്തിയ വാഹന പരിശോധനയിൽ ബൈക്കിൽ കടത്തിയ രണ്ട് ലിറ്റർ ചാരായം എക്സൈസ് സംഘം പിടികൂടി. കിഴക്കേ കല്ലട താഴത്ത് ചെറുകാളി വീട്ടിൽ ഗോപാലകൃഷ്ണനെ (52 )അറസ്റ്റ് ചെയ്തു. ഇയാളിൽ നിന്നും ലഭിച്ച വിവരത്തിന്‍റെ അടിസ്ഥാനത്തിൽ വീട്ടിൽ നടത്തിയ പരിശോധനയിൽ 20 ലിറ്റർ ചാരായവും 25 ലിറ്റർ സ്പെൻഡ് വാഷും വാറ്റുപകരണങ്ങളും കണ്ടെടുത്തു. സഹായിയായി പ്രവർത്തിച്ച കിഴക്കേ കല്ലട താഴത്ത് സരിത ഭവനത്തിൽ ഗിരിഷിനെയും അറസ്റ്റ് ചെയ്തു. ഓണം സ്പെഷൽ ഡ്രൈവിനോട് അനുബന്ധിച്ച് റേഞ്ച് ഇൻസ്പെക്ടർ എൻ. അബ്ദുൾ വഹാബും സംഘവും കടപുഴ ഭാഗത്ത് നടത്തിയ പരിശോധനയിലാണ് ചാരായവും വാഷും പിടിച്ചെടുത്തത്. പ്രതികളെ റിമാന്‍റ് ചെയ്തു .

അധ്യാപകനും വിദ്യാർഥിയും സ്കൂളിൽ ഏറ്റുമുട്ടി; അധ്യാപകനു സസ്പെൻഷൻ

കൊല്ലം: കായികാധ്യാപകനും ഹയർസെക്കൻഡറി വിദ്യാർഥിയും സ്കൂളിൽ ഏറ്റുമുട്ടി. കഴിഞ്ഞ ദിവസം ഉച്ചകഴിഞ് 3.30 ഓടെ അഞ്ചാലുംമൂട് സർക്കാർ ഹയർസെക്കൻഡറി സ്കൂളിലാണ് സംഭവം. സ്കൂൾ കോമ്പൗണ്ടിൽ സഹപാഠികൾക്ക് ഒപ്പം നിൽക്കുമ്പോൾ അധ്യാപകൻ എത്തി ക്ലാസിൽ പോകാൻ ആവശ്യപ്പെട്ടതുമായി ബന്ധപ്പെട്ട തർക്കമാണ് സംഘർഷത്തിൽ കലാശിച്ചതെന്നാണ് വിദ്യാർഥി പറയുന്നത്. താൻ പതുക്കെ നടന്നു പോകുന്നതിനിടെ അധ്യാപകൻ പിന്നിലെത്തി തള്ളിയെന്നും വിദ്യാർഥികളുടെയും മറ്റ് അധ്യാപകരുടെ മുന്നിലിട്ടു താക്കോൽ ഉപയോഗിച്ച് തല്ലിയെന്നുമാണ് വിദ്യാർഥിയുടെ പരാതി. എന്നാൽ ഒരു വിദ്യാർഥിനിയെ മോശം വാക്കുകൾ ഉപയോഗിച്ച് അധിക്ഷേപിക്കപ്പെട്ടതുമായി ബന്ധപ്പെട്ട തർക്കമാണ് സംഘർഷത്തിലേക്ക് നയിച്ചതെന്നാണ് സ്കൂൾ അധികൃതർ വ്യക്തമാക്കുന്നത്. വിദ്യാർഥിനിയോട് മോശമായി സംസാരിച്ചതു ശ്രദ്ധയിൽപ്പെട്ട അധ്യാപകൻ ഇക്കാര്യം ചോദ്യം ചെയ്തു. തുടർന്നു പ്രിൻസിപ്പലിനോട് പരാതി പറയാനായി പോയി. പ്രിൻസിപ്പലിനെ കാണാത്തതിനെ തുടർന്ന് സ്ഥലത്തുണ്ടായിരുന്ന മറ്റ് അധ്യാപകരോട് കാര്യം പറയുന്നതിനിടെ വിദ്യാർഥി എത്തി അധ്യാപകനോട് കൈ ചൂണ്ടി കയർത്തു സംസാരിച്ചു. അധ്യാപകൻ കൈതട്ടി മാറ്റിയതോടെ അധ്യാപകനും വിദ്യാർഥിയുമായി കൈയേറ്റം ഉണ്ടായി എന്നാണ് സ്കൂൾ അധികൃതർ പറയുന്നത്. ഏറ്റുമുട്ടലിൽ വിദ്യാർഥിയുടെ മൂക്കിന് പരിക്കേറ്റു. അധ്യാപകനും പരിക്കേറ്റിട്ടുണ്ട്.തുടർന്ന് ഇരുവരെയും കൊല്ലത്തെ സ്വകാര്യ ആശുപത്രിയിൽ പ്രവേശിപ്പിച്ചു. വിദ്യാർഥി പിന്നീട് ജില്ലാശുപത്രിയിൽ ചികിത്സതേടി. അധ്യാപകനും വിദ്യാർഥിയും അഞ്ചാലുംമൂട് പോലീസ് സ്റ്റേഷനിൽ പരാതി നൽകി. വിദ്യാർഥി ബാലാവകാശ കമ്മീഷനിലും പരാതി നൽകിയിട്ടുണ്ട്. സംഭവത്തിൽ അധ്യാപകനെ അന്വേഷണവിധേയമായി സസ്പെൻഡ് ചെയ്തു. വിദ്യാർഥിയെയും അന്വേഷണ വിധേയമായി രണ്ടാഴ്ചത്തേക്ക് മാറ്റി നിറുത്തിയിട്ടുണ്ട്.

തടഞ്ഞുനിർത്തി ഭീഷണിപ്പെടുത്തിയതായി സിറ്റി പോലീസ് കമ്മീഷണർക്കു പരാതി

കൊല്ലം: രണ്ടു പേർ തടഞ്ഞുനിർത്തി ഭീഷണിപ്പെടുത്തിയതായി തിരുവനന്തപുരം സിറ്റി പോലീസ് കമ്മീഷണർക്കു പരാതി. പരാതിയുടെ അടിസ്ഥാനത്തിൽ തിരുവനന്തപുരം മ്യൂസിയം പോലീസ് രണ്ടുപേർക്കെതിരേ എഫ്ഐആർ രജിസ്റ്റർ ചെയ്തു കേസെടുത്തു. കൊല്ലം ചിന്നക്കടആശ്രാമം റോഡിൽ ശാന്തിനഗറിൽ എച്ച്. സെയ്ഫുദ്ദീന്‍റെ പരാതിയിലാണ് അബ്ദുൾകലാം, ഷാജഹാൻ എന്നിവർക്കെതിരേ കേസെടുത്തിരിക്കുന്നത്. തിരുവനന്തപുരം ഭാഗ്യമാല ഓഡിറ്റോറിയത്തിൽ നടന്ന കേരള സ്റ്റേറ്റ് വഖഫ് ബോർഡിന്‍റെ ജൂഡീഷ്യൽ ക്യാന്പ് സിറ്റിംഗിൽ പങ്കെടുത്തശേഷം പുറത്തേക്കുവരുന്പോഴാണ് ഭീഷണിയുണ്ടായത്. കൂടെയുണ്ടായിരുന്ന ചിന്നക്കട മുസ്ലീം ജമാ അത്ത് പ്രസിഡന്‍റ്, സെക്രട്ടറി, എക്സിക്യൂട്ടീവ് അംഗം എന്നിവരുടെ ഇടപെടൽമൂലമാണ് അപകടം സംഭവിക്കാതിരുന്നതെന്നും പരാതിയിൽ ബോധിപ്പിച്ചിരുന്നു.

പ്രേംനസീർ സുഹൃത് സമിതി ഓണനിലാവ് 13 ന്

കൊല്ലം: പ്രേംനസീർ സുഹൃത് സമിതി കൊല്ലം ചാപ്റ്ററിന്‍റെ ഓണനിലാവ് 13നു കൊല്ലം ശങ്കർ നഗർ വെസ്റ്റിലെ ശങ്കർ നഗർ ലൈബ്രറി ഹാളിൽ സംഘടിപ്പിക്കും. രാവിലെ 10 ന് കാളിദാസ കലാകേന്ദ്രം ഡയറക്ടർ സന്ധ്യാ രാജേന്ദ്രൻ അത്തപ്പൂക്കളം തിരിനാളം തെളിയിച്ച് ഉദ്ഘാടനം ചെയ്യും.വൈകുന്നേരം നാലിനു മേയർ ഹണി ബെഞ്ചമിന്‍റെ അധ്യക്ഷതയിൽ നടക്കുന്ന സാംസ്കാരിക സമ്മേളനം നൗഷാദ് എംഎൽഎ ഉദ്ഘാടനം ചെയ്യും. സിറ്റി പോലീസ് കമ്മീഷണർ കിരൺ നാരായണൻ മുഖ്യാതിഥിയായി പങ്കെടുക്കും. രണ്ട് ദിവസങ്ങളിലായി നടന്ന കരോക്ക ഗാനാലാപന മൽസരവിജയികൾക്കുള്ള കാഷ് അവാർഡുകൾ മുൻമന്ത്രി ഷിബു ബേബിജോണും ഫലകം ക്രൈംബ്രാഞ്ച് തിരുവനന്തപുരം ഡിവിഷൻ എസ്പി അബ്ദുൾ റഷിയും സർട്ടിഫിക്കറ്റുകൾ സമിതി കൊല്ലം ചാപ്റ്റർ ചെയർമാൻ അഡ്വ. അബ്ദുൾ ബാരിയും സമർപ്പിക്കും. വിരുന്നുകാർക്ക് വീടൊരുക്കുന്ന ജെവിഎ ഹോം സ്‌റ്റേ സാരഥി വിജി ജോസഫിനെ കൊല്ലം സിറ്റി സ്പെഷൽ ബ്രാഞ്ച് എസ്പി. പ്രദീപ് കുമാർ സ്നേഹാദരവ് നൽകി ആദരിക്കും. സുഹ്യത് സമിതി സംസ്ഥാന ജനറൽ സെക്രട്ടറി തെക്കൻസ്റ്റാർ ബാദുഷ ചടങ്ങിൽ മുഖ്യപ്രഭാഷണം നടത്തും. ചാപ്റ്റർ പ്രസിഡന്‍റ് സുൾഫിക്കർ, സെക്രട്ടറി ദിലീപ് റെയ്മ‌ണ്ട്, ഖജാൻജി സിന്ധ്യ, വൈസ് പ്രസിഡന്‍റ് ബൈജു മാധവ്, പ്രേംസിംഗേഴ്സ‌് കോ-ഓർഡിനേറ്റർ ബാബു ജോർജ്, ജോയിന്‍റ് സെക്രട്ടറി സുജാ മധു, കൺവീനർ ഷംഷാദ് എന്നിവർ ചടങ്ങിൽ സംബന്ധിക്കും. ഓണനിലാവിന്‍റെ ലോഗോ പ്രകാശനം എം.മുകേഷ് എംഎൽഎനിർവഹിച്ചിരുന്നു. പ്രേംനസീർ സുഹൃത് സമിതി കൊല്ലം ചാപ്റ്റർ ഗായക കൂട്ടായ്മ പ്രേംസിംഗേഴ്സ‌സ് എല്ലാ മാസവും പ്രതിമാസ ഗാനവിരുന്നും നടത്തിവരുന്നു. തുടർന്ന് ജില്ലയിലെ കലാ-സാംസ്കാരിക മേഖലകളിൽ വിവിധ ചടങ്ങുകൾ സംഘടിപ്പിക്കുവാനും കൊല്ലം ചാപ്റ്റർ തീരുമാനിച്ചിട്ടുണ്ട്. പത്രസമ്മേളനത്തിൽ അഡ്വ.അബ്ദുൾ ബാരി ,സുൾഫിക്കർ, ദീലിപ് റെയ്ണ്ട്, ബൈജുമാധവ്, ബാബു ജോർജ് തുടങ്ങിയവർ പങ്കെടുത്തു.

കൊല്ലത്തെ മത്സ്യത്തൊഴിലാളികളെ വറുതിയിലാക്കാൻ ആസൂത്രിത നീക്കം

കൊല്ലം: ജില്ലയിലെ മത്സ്യബന്ധന മേഖലയിൽ പരമ്പരാഗത മത്സ്യത്തൊഴിലാളികളെ വറുതിയിലേക്കു തള്ളിയിടാൻ ആസൂത്രിത നീക്കം. തീരപ്രദേശങ്ങളിലെ തദ്ദേശ മത്സ്യത്തൊഴിലാളികളെ മാറ്റിനിർത്തി ഇതരസംസ്ഥാനതൊഴിലാളികളെ ഇറക്കുമതി ചെയ്തു തൊഴിൽനൽകുന്ന പ്രവണത വർധിച്ചിരിക്കുകയാണ്. ഇതോടെ മത്സ്യത്തൊഴിലാളികളുടെ തൊഴിൽ ലഭ്യത കുറഞ്ഞിരിക്കുകയാണ്. കുറഞ്ഞ കൂലിക്ക് ജോലി ചെയ്യാനെത്തുന്ന ഇതരസംസ്ഥാന തൊഴിലാളികൾക്കു മത്സ്യബന്ധന മേഖലയിൽ ഒരു കൂട്ടർ രാഷ്ട്രീയലാക്കോടെ കൂടുതൽ അവസരങ്ങൾ ഒരുക്കുമ്പോൾ തദ്ദേശീയ തൊഴിലാളികൾ പുറം തള്ളപ്പെടുകയുമാണ്. വാടി, ശക്തികുളങ്ങര, നീണ്ടകര, കരുനാഗപ്പള്ളി എന്നിവിടങ്ങളിൽനിന്നു കടലിൽ പോകുന്നവരിലും അനുബന്ധ തൊഴിലാളികളുടെ എണ്ണത്തിലും ഇതര സംസ്ഥാന തൊഴിലാളികളെ കുത്തി നിറക്കുകയാണ്. കുറഞ്ഞ കൂലിക്കു കടലിൽ പോകാൻ തയാറാവുന്ന ഇതരസംസ്ഥാനതൊഴിലാളികൾ കൊല്ലത്തെ മൽസ്യബന്ധന മേഖലയിൽ പിടി മുറുക്കുന്നത്തിനു പിന്നിൽ രാഷ്ട്രീയ ഇടപെടലുകളും ഉണ്ട്. പശ്ചിമ ബംഗാൾ, ഒഡീഷ സംസ്ഥാനങ്ങളിൽനിന്ന് തൊഴിലാളികളെ ഇറക്കുമതി ചെയ്തുവരുന്നവരാണ് കടലിന്‍റെ മക്കളുടെ കഞ്ഞിയിൽ മണ്ണ് വാരിയിടുന്നത്. കൊല്ലം പരപ്പിലെ മൽസ്യ സമ്പത്ത് ലക്‌ഷ്യം വച്ചെത്തുന്ന അയൽ സംസ്ഥാനത്ത് നിന്നുള്ള ബോട്ടുകളിലെല്ലാം ഇവരാണ് കൂടുതലുള്ളത്. കേന്ദ്ര സമുദ്രമത്സ്യ ഗവേഷണ സ്ഥാപനമായ സി എം എഫ് ആർ ഐ നടത്തി പുറത്തുവിട്ട പഠനവും കണ്ടെത്തലുകളും അടിസ്ഥാന രഹിതവും വസ്തുതകൾക്കു നിരക്കാത്തതുമാണെന്നാണ് മത്സ്യത്തൊഴിലാളികൾ അവകാശപ്പെടുന്നത്. മത്സ്യബന്ധന മേഖലയിലെ മൊത്തം തൊഴിലാളികളിൽ 58 ശതമാനമാണ് ഇതരസംസ്ഥാനതൊഴിലാളികളെന്നാണ് സി എം എഫ് ആർ ഐ പറയുന്നത്. യുവതലമുറ ഈ തൊഴിൽമേഖലയിലേക്ക് വരുന്നില്ലെന്നത് തെറ്റായ വാദമാണെന്നും മൽസ്യ തൊഴിലാളി സംഘനകൾ പറയുന്നു.സി എം എഫ് ആർ ഐ പഠന വിധേയമാക്കിയ എറണാകുളം ജില്ലയിലെ മുനമ്പത്തെ പോലെ തന്നെ കൊല്ലം ജില്ലയിലെ ശക്തികുളങ്ങര, നീണ്ടകര തുറമുഖങ്ങളിലും കുറഞ്ഞ കൂലി നൽകി ഇതരസംസ്ഥാന തൊഴിലാളികളെ ഇറക്കുന്നുണ്ട്. ഇവിടുത്തെ യന്ത്രവൽകൃത മത്സ്യബന്ധന മേഖലയിലെ തൊഴിലാളികളിൽ ഭൂരിപക്ഷവും തമിഴ്നാട്, പശ്ചിമ ബംഗാൾ, ഒഡീഷ എന്നിവിടങ്ങളിൽ നിന്നുള്ളവരാണ്. മത്സ്യ സംസ്‌കരണ യൂണിറ്റുകളിൽ ആവട്ടെ 65 ശതമാനവും വിപണന മേഖലയിൽ 40 ശതമാനവും തദ്ദേശീയ തൊഴിലാളികളെ വറുതിയിലാക്കും വിധം ഇതര സംസ്ഥാന തൊഴിലാളികൾ കൈയടക്കി. കുറഞ്ഞ കൂലിയുടെ പേരിൽ തദ്ദേശിയരായ കടലിന്‍റെ മക്കൾ ഒറ്റപ്പെടുകഎന്നതാണ് യാഥാർഥ്യം.മത്സ്യബന്ധന മേഖലയിൽ തദ്ദേശീയ തൊഴിലാളികൾ നിരവധി വെല്ലുവിളികൾ നേരിടുന്നതിനിടെയാണ് സ്വന്തം തൊഴിൽ രംഗത്ത് അവർ പുറം തള്ളപ്പെടുന്നത്. കുറഞ്ഞ വരുമാനം, കടബാധ്യത, തൊഴിലില്ലായ്മ, ഉയർന്ന പലിശ നിരക്കുകൾ എന്നിവ ഇവരിൽ പലരുടെയും ജീവിതം ദുർഘടാവസ്ഥയിലാക്കിയിരിക്കെയാണ് ഇതരസംസ്ഥാന തൊഴിലാളികളുടെ കടന്നുകയറ്റം എന്നതാണ് ശ്രദ്ധേയം. നിലവിലുള്ള പ്രശ്നങ്ങൾ പരിഹരിക്കാൻ മിനിമം വേതന ഘടന പരിഷ്കരിക്കുക, തൊഴിലാളികൾക്ക് ആവശ്യമായ സുരക്ഷാ ഉപകരണങ്ങൾ ലഭ്യമാക്കുക, സാമൂഹിക സുരക്ഷാ പദ്ധതികൾ വിപുലീകരിക്കുക, തൊഴിലാളി സംഘടനകളെ ശക്തിപ്പെടുത്തുക തുടങ്ങിയ നടപടികൾ ആണ് ഇതിനു പരിഹാരമായി ആവശ്യം. മത്സ്യതൊഴിലാളികൾ പ്രധാനമായും നേരിടുന്ന പ്രശ്നങ്ങളിൽ ഉയർന്നുവരുന്നത് സാമൂഹിക സുരക്ഷാ സംവിധാനങ്ങളുടെ അഭാവം തന്നെയാണ്. നിലവിലെ സാമൂഹിക സുരക്ഷാ നിയമങ്ങൾ പലപ്പോഴും അസംഘടിത മേഖലയിലെ തൊഴിലാളികൾക്ക് ബാധകമാകാറില്ല. ഇത് രോഗം, വൈകല്യം, വാർധക്യം, തൊഴിലില്ലായ്മ എന്നിവ പോലുള്ള പ്രശ്നങ്ങളിൽ അവർക്ക് പരിരക്ഷ നൽകുന്നില്ല . കടബാധ്യതയും ഉയർന്ന പലിശനിരക്കും മത്സ്യത്തൊഴിലാളികളുടെ ജീവിതം ദുരിത പൂർണമാക്കി അവരെ കടക്കെണികളിലേക്ക് എത്തിച്ചിരിക്കുന്നു. അജി വള്ളിക്കീഴ്

പകൽവീട് കൂട്ടായ്മ ശ്രദ്ധേയമായി

കൊട്ടാരക്കര : മാർത്തോമാ ജൂബിലി മന്ദിരം പകൽവീട് കൂട്ടായ്മ യുഎസ്എ ഹാർവാർഡ് സ്കൂൾ ഓഫ് പബ്ലിക് ഹെൽത്ത് വിസിറ്റിംഗ് സയന്‍റിസ്റ്റ് ഡോ.പി.എസ് രാകേഷ് ഉദ്ഘാടനം ചെയ്തു. ആരോഗ്യകരമായ ജീവിതശൈലിയിലൂടെയുംകുടുംബാംഗങ്ങളുടെ മാനസിക പിന്തുണയിലൂടെയും വാർധക്യം ആനന്ദകരമാക്കാമെന്ന് അദ്ദേഹം പറഞ്ഞു. റവ. ബിനു സി. ശാമുവൽ അധ്യക്ഷത വഹിച്ചു. റവ.എം. ജെ. ചെറിയാൻ, റവ.ജോജി കെ. മാത്യു, പ്രഫ.ടി ജി. രാജൻ, പ്രഫ.ജേക്കബ് തോമസ്, ജോർജ് പണിക്കർ, ജോർജ് തോമസ്, എന്നിവർ പ്രസംഗിച്ചു

കോടതി വെറുതെ വിട്ടയാളെ അതേ കേസിൽ അറസ്റ്റ് ചെയ്തത് വീഴ്ച ഉണ്ടായി: മനുഷ്യാവകാശ കമ്മീഷൻ

കൊല്ലം : കോടതി വെറുതെ വിട്ടയാളെ ചാത്തന്നൂർ എസ് എച്ച് ഒ അതേ കേസിൽ അറസ്റ്റ് ചെയ്തെന്ന പരാതിയിൽ എസ് എച്ച് ഒയുടെ ഭാഗത്ത് വീഴ്ച സംഭവിച്ചതായി മനുഷ്യാവകാശ കമ്മീഷൻ. കമ്മീഷൻ അംഗം വി. ഗീതയാണ് നിലപാട് അറിയിച്ചിട്ടുള്ളത്.ഇക്കാര്യത്തിൽ ചാത്തന്നൂർ എസ് എച്ച് ഒ അനൂപിന്‍റെ ഭാഗം കേൾക്കാനും കമ്മീഷൻ തീരുമാനിച്ചു. കൊല്ലത്ത് നടക്കുന്ന സിറ്റിംഗിൽ കേസ് തുടർന്നും പരിഗണിക്കും. ജനുവരി 29 നാണ് പരാതിക്കാരനെ പറവൂർ കോടതി പൂർണമായും കുറ്റവിമുക്തനാക്കിയത്. പരാതിക്കാരനെ അറസ്റ്റ് ചെയ്യുന്നത് 2025 ഫെബ്രുവരി 12 നാണ്. കോടതി കുറ്റവിമുക്തനാക്കിയ കാര്യം പരിശോധിക്കാതെയാണ് അർധരാത്രി പരാതിക്കാരനെ പോലീസ് കസ്റ്റഡിയിലെടുത്തത്. വീടിന്‍റെ മതിൽ ചാടി കടന്ന് ഭാര്യയുടെയും മക്കളുടെയും സാന്നിധ്യത്തിലാണ് തന്നെ അറസ്റ്റ് ചെയ്തതെന്ന് പരാതിക്കാരൻ കമ്മീഷനെ അറിയിച്ചു. പോലീസ് ജീപ്പിൽ ഇരുന്ന് പോലീസ് ഇ കോർട്ട് സംവിധാനം പരിശോധിച്ചപ്പോഴാണ് വെറുതെവിട്ട വിവരം മനസിലാക്കിയതെന്നായിരുന്നു പോലീസ് നിലപാട്. പോലീസ് സ്റ്റേഷനിൽ വച്ച് ഇ-കോർട്ട് സംവിധാനം മനസിലാക്കി വേണമായിരുന്നു നടപടിയെടുക്കേണ്ടിയിരുന്നതെന്ന് കമ്മീഷൻ ഉത്തരവിൽ പറഞ്ഞു. കോടതിയിൽ നിന്നും അറസ്റ്റ് മെമ്മോ തിരികെ വിളിക്കുന്നതിലുണ്ടായ വീഴ്ച കാരണമാണ് പരാതിക്കാരനെ അറസ്റ്റ് ചെയ്തതെന്ന് കൊല്ലം ജില്ലാ പോലീസ് മേധാവി കമ്മീഷനെ അറിയിച്ചു. പോലീസിന്‍റെ ഭാഗത്ത് വീഴ്ച സംഭവിച്ചിട്ടില്ലെന്നും പോലീസ് മേധാവിയുടെ റിപ്പോർട്ടിൽ പറയുന്നു. അറസ്റ്റിന്‍റെ കാരണം കുടുംബാംഗങ്ങളോട് പോലീസ് പറഞ്ഞില്ലെന്ന് പരാതിക്കാരനായ പള്ളിമൺ സ്വദേശി വി. ആർ. അജി പറഞ്ഞു. അറസ്റ്റ് ചെയ്യപ്പെട്ട കേസ് തീർന്നതാണെന്ന് പറഞ്ഞിട്ടും പോലീസ് ചെവിക്കൊണ്ടില്ല. വസ്ത്രം ധരിക്കാൻ അനുവദിച്ചില്ലെന്നും പരാതിക്കാരൻ അറിയിച്ചതോടെ,ഇക്കാര്യങ്ങളൊന്നും പോലീസ് റിപ്പോർട്ടിലില്ലെന്നായിരുന്നു കമ്മീഷൻ പറഞ്ഞത്.

മികച്ച വിദ്യാർഥി കർഷക അഖില ഷാജിക്ക് ആദരവ്

കൊട്ടാരക്കര : മികച്ച വിദ്യാർഥി കർഷക പുരസ്കാരം നേടിയ കൊട്ടാരക്കര ഗവ. വെക്കേഷണൽ ഹയർ സെക്കൻഡറി സ്കൂൾ വിദ്യാർഥിനി അഖില ഷാജിക്ക് നാഷണൽ സർവീസ് സ്കീമിൻ്റെ ആദരവ്. എസ്എംസി അംഗം പി. കെ. വിജയകുമാർ ഉദ്ഘാടനം ചെയ്തു.പ്രിൻസിപ്പൽ ബി.ടി.ഷൈജിത് അധ്യക്ഷത വഹിച്ചു. അധ്യാപകരായ കെ.പി.മഞ്ജുഷ, ബിനിമോൾ, ബി. അശോകൻ, സി. രാജീവ്‌ ബോസ്, പ്രോഗ്രാം ഓഫീസർ കെ. എസ്.പ്രദീപ്, വോളണ്ടിയർ ലീഡർ ദേവി.എസ്. നായർ എന്നിവർ പ്രസംഗിച്ചു.

സർക്കാർ ശബരിമലഅയ്യപ്പനെ വിൽപനയ്ക്കുവച്ചു : ശബരിമല അയ്യപ്പ ധർമപരിഷത്ത്

കൊല്ലം:പരമ്പരാഗതമായി ശബരിമലയിൽ സന്നദ്ധ പ്രവർത്തനം നടത്തുന്ന സംഘടനകളെയും ഹിന്ദു സംഘടനകളെയും ഒഴിവാക്കി ശബരിമലയിൽ ആഗോള അയ്യപ്പ സംഗമം നടത്താനുള്ള ദേവസ്വംബോർഡിന്‍റെയും സർക്കാരിന്‍റെയും നടപടി തിരുത്തേണ്ടതാണെന്നു ശബരിമല അയ്യപ്പ ധർമ പരിഷത്ത് ദേശീയ ജനറൽ സെക്രട്ടറി അയർക്കുന്നം രാമൻ നായർ, കോഓർഡിനേറ്റർ ചവറ സുരേന്ദ്രൻ പിള്ള എന്നിവർ പത്രസമ്മേളനത്തിൽ കുറ്റപ്പെടുത്തി. ശബരിമലയിൽ ദീർഘകാല പ്രവർത്തനം നടത്തി പാരമ്പര്യമുള്ള സന്നദ്ധ സംഘടനകളുടെ പ്രവർത്തനഫലമായിട്ടാണ് ശബരിമലയിലേയ്ക്ക് ഭക്തജനങ്ങളെ എത്തിക്കാൻ സഹായിച്ചിട്ടുള്ളത്. ഈവസ്തുത മറച്ചുവെച്ച് ദേവസ്വം മന്ത്രി നടത്തുന്ന പ്രസ്‌താവനകൾ പ്രതിഷേധാർഹമാണ്. ശബരിമലയിലെ വരുമാനം വിവിധ എജൻസികൾ മുഖേനവഴി തിരിച്ചു വിടാനുള്ള സർക്കാരിന്‍റെയും ദേവസ്വം മന്ത്രിയുടെയും നടപടി ശബരിമലയെ രക്ഷിക്കാനുള്ള നടപടിയായി കാണാൻ കഴിയില്ലെന്നും ഇവർ ആരോപിച്ചു. ആഗോള സംഗമം നടത്തുന്നതിന്‍റെ ഉദ്ദേശ്യം എന്താണെന്നു സംഘാടകർ നാളിതുവരെ വ്യക്തമാക്കിയിട്ടില്ല. ശബരിമല സന്ദേശം കേരളത്തിന് അകത്തും പുറത്തും പ്രചരിപ്പിക്കുവാനും ഭക്തന്മാർക്ക് വേണ്ട സൗകര്യങ്ങൾ ചെയ്‌തുകൊടുത്തുകൊണ്ടിരുന്ന സേവനങ്ങളെ ഒഴിവാക്കി നടത്തുന്ന ദേവസ്വം ബോർഡിന്‍റെയും സർക്കാരിന്‍റെയും നടപടിയെ കോടതി വഴി ചോദ്യം ചെയ്യാൻ ധർമ്മപരിഷത്ത് തയാറെടുക്കുകയാണ്. ആഗോള അയ്യപ്പ സംഗമത്തിന് ഗൂഢ ലക്ഷ്യമാണെന്നും ശബരിമല അയ്യപ്പനെവിൽപനയ്ക്കു വയ്ക്കുകയാണ് തിരുവിതാംകൂർ ദേവസ്വം ബോർഡും പിണറായി സർക്കാരുമെന്ന് ശബരിമല ശ്രീ അയ്യപ്പ ധർമ പരിഷത്ത് ദേശീയ ജനറൽ സെക്രട്ടറി അയർക്കുന്നം രാമൻ നായരും ചീഫ് കോർഡിനേറ്റർ ചവറ സുരേന്ദ്രൻ പിള്ളയും ആരോപിച്ചു. 22 ന് പന്തളത്ത് കർമസമിതിയുടെ നേതൃത്വത്തിൽ നടക്കുന്ന ശബരിമല അയ്യപ്പ സംരക്ഷണ സംഗമത്തിൽ ധർമ പരിഷത്ത് പ്രവർത്തകർ പങ്കെടുക്കുമെന്നും അവർ പറഞ്ഞു.

സ്ത്രീകളെ ശല്യപ്പെടുത്തിയ യുവാവിനെ അറസ്റ്റ് ചെയ്തു

കുണ്ടറ:സ്ത്രീകളെ ശല്യപ്പെടുത്തിയ യുവാവിനെ കൊട്ടിയം പോലീസ് അറസ്റ്റ് ചെയ്തു.ഉമയനല്ലൂർ, പട്ടരുമുക്ക് ആദിൽ മൻസിലിൽ,അൻവർഷാ (22) ആണ് അറസ്റ്റിലായത്. കഴിഞ്ഞദിവസം രാത്രി 7.45 ന് ഉമയനല്ലൂർ കല്ലുകുഴിയിൽ വച്ച് സ്കൂട്ടറിൽ വരികയായിരുന്ന മൈലാപ്പൂർസ്വദേശിനിയെ ബൈക്കിൽ വന്ന പ്രതി ശല്യപ്പെടുത്തിയതായാണ് കേസ്. കണ്ടുനിന്നവർ പിൻന്തുടർന്നെങ്കിലും പിടിക്കാനായില്ല. നാട്ടുകാർ പോലീസിൽ വിവരമറിയിച്ചതിനെ തുടർന്ന് ഇരുചക്ര വാഹനത്തിന്‍റെ നമ്പർ പരിശോധിച്ച പോലീസ് അൻവർഷായെ വീട്ടിൽ നിന്നും അറസ്റ്റ് ചെയ്യുകയായിരുന്നു. കൊട്ടിയം, ഇരവിപുരം സ്റ്റേഷനുകളിൽസമാനമായ കേസിൽ ഇയാൾ ജയിൽ ശിക്ഷ അനുഭവിച്ചിട്ടുണ്ട്‌. എസ് ഐ നിതിൻ നളന്‍റെ നേതൃത്വത്തിലുളള പോലീസ് സംഘമാണ് പ്രതിയെ അറസ്റ്റ് ചെയ്തത്. മെഡിക്കൽ പരിശോധനയ്ക്ക് ശേഷം കോടതിയിൽ ഹാജരാക്കി.

ക്രിമിനലുകളെ സംരക്ഷിക്കുന്നത് പിണറായി : കെ. ബേബിസൺ

കൊല്ലം :ക്രിമിനലുകളായ പോലീസുകാരെസംരക്ഷിക്കുന്ന ആഭ്യന്തര വകുപ്പ് മന്ത്രി കൂടിയായ മുഖ്യമന്ത്രിയുടെ നടപടി സത്യപ്രതിജ്ഞാ ലംഘനമാണെന്ന് കെ പി സി സി സെക്രട്ടറി കെ. ബേബിസൺ.സിപിഎമ്മിലെ ക്രിമിനലുകളെ സംരക്ഷിക്കുന്ന ലാഘവത്തോടെ പോലീസിലെ സി പി എമ്മുകാരായ ക്രിമിനലുകളെയും രക്ഷിക്കാമെന്ന പിണറായി വിജയന്‍റെ മോഹം കേരളത്തിൽ നടക്കില്ലെന്നും അദ്ദേഹം പറഞ്ഞു. ചൊവ്വല്ലൂർ യൂത്ത് കോൺഗ്രസ് മണ്ഡലം പ്രസിഡന്‍റ് വി. എസ്.സുജിത്തിനെ മൃഗീയമായി തല്ലി ചതച്ച പോലീസുകാരെ സർവീസിൽ നിന്ന് പുറത്താക്കണമെന്ന് ആവശ്യപ്പെട്ട് കൊട്ടിയം പോലീസ് സ്റ്റേഷന് മുന്നിൽ കോൺഗ്രസ് മണ്ഡലം കമ്മിറ്റികൾ നടത്തിയ ജനകീയ പ്രതിഷേധ സദസ് ഉദ്ഘാടനം ചെയ്യുകയായിരുന്നു അദ്ദേഹം. മണ്ഡലം പ്രസിഡന്‍റ് എ.സജീബ്ഖാൻ അധ്യക്ഷത വഹിച്ചു. ഡി സിസി ഭാരവാഹികളായ എസ്. വിപിനചന്ദ്രൻ, എൻ. ഉണ്ണികൃഷ്ണൻ, നേതാക്കളായകെ.ഷെരീഫ്, കെ. ബി. ഷഹാൽ,ആർ.സാജൻ, ഷീലബിനു, പദ്മജ സുരേഷ്, അനസ്,മേടയിൽ മജീദ്, ആർ. എസ്.കണ്ണൻ, ജസ്റ്റസ്, നാസർ കുരുവേലിൽ, സലാം വരകുളം, സജീവ് തുടങ്ങിയവർ പ്രസംഗിച്ചു.

നാടകരാവ് 2025 ക്ലാപ്പനയിൽ ഉദ്ഘാടനം ഇന്ന്

കരുനാഗപ്പള്ളി: ക്ലാപ്പന പ്രിയദര്‍ശിനി കലാസാംസ്‌കാരിക വേദിയുടേയും ഗ്രന്ഥശാലയുടേയും സംയുക്ത ആഭിമുഖ്യത്തില്‍ പതിനഞ്ചാമത് പ്രഫഷണല്‍ നാടകോത്സവമായ നാടക രാവ് 2025 സംഘടിപ്പിക്കുന്നു. നാടക രാവിന്‍റെ ഉദ്ഘാടനം ഇന്ന് വൈകുന്നേരം അഞ്ചിന് സി. ആര്‍.മഹേഷ് എംഎല്‍എ ഉദ്ഘാടനം ചെയ്യും. പ്രസിഡന്‍റ് എസ്എം ഇക്ബാല്‍ അധ്യക്ഷത വഹിക്കും. ഫ്‌ളവേഴ്‌സ് ടി.വി കോമഡിഷോ താരങ്ങളായ രാജേഷ് കൊട്ടാരത്തില്‍, സുജിത്ത് കോന്നി, ഹരി റാന്നി എന്നിവരെ ചടങ്ങിൽ ആദരിക്കും. ഒരു ഏകപാത്ര നാടകം ഉള്‍പ്പെടെ അഞ്ച് പ്രഫഷണല്‍ നാടകങ്ങളാണ് നാടകോത്സവത്തില്‍ ഉണ്ടാവുക. നാടകരാവിന്റെ ഭാഗമായി വരവിള എ. വി. മനയ്ക്കല്‍ വിജയമ്മ സ്മാരക എവര്‍റോളിംഗ് ട്രോഫിയ്ക്കും ക്യാഷ് അവാര്‍ഡിന് വേണ്ടിയുളള തിരുവാതിര മത്സരം, സിനിമാറ്റിക് ഡാന്‍സ് മത്സരം, കാവ്യസന്ധ്യ എന്നീ പരിപാടികളും ഒരുക്കിയിട്ടുണ്ട്. പ്രസിഡന്റ് എസ്. എം. ഇക്ബാല്‍, കെ.ആര്‍.വത്സന്‍, ബി. ശ്രീകുമാര്‍, വരവിള ഹുസൈന്‍ എന്നിവർ അറിയിച്ചു.

കൊല്ലം – ഈറോഡ് എക്സ്പ്രസ് താമസിയാതെ യാഥാർഥ്യമാകും :കൊടിക്കുന്നിൽ സുരേഷ് എംപി

കൊല്ലം: കേരളത്തിലെ തെക്കൻ മേഖലയിൽ നിന്നുള്ള ദീർഘദൂര യാത്രക്കാരുടെ ചിരകാലാവശ്യമായ കൊല്ലം – ഈറോഡ് എക്സ്പ്രസ് താമസിയാതെ സർവീസ് ആരംഭിക്കുമെന്ന് കൊടിക്കുന്നിൽ സുരേഷ് എംപി. ആവശ്യം നിറവേറ്റുന്നതിൽ തന്‍റെ നിരന്തര ഇടപെടലുകളും പരിശ്രമങ്ങളും മൂലം ദക്ഷിണ റെയിൽവേ ഇതിനായി അനുകൂലമായ തീരുമാനം എടുത്തതായി എം പി അറിയിച്ചു. പുതിയ ട്രെയിൻ കൊല്ലം, കൊട്ടാരക്കര, ആവണീശ്വരം, പുനലൂർ, തെങ്കാശി, വിരുദുനഗർ, മധുരൈ, ഡിണ്ടിക്കൽ, പളനി, പൊള്ളാച്ചി, കോയമ്പത്തൂർ വഴി ഈറോഡിൽ സർവീസ് അവസാനിപ്പിക്കും. ട്രെയിൻ കോയമ്പത്തൂരിൽ അവസാനിപ്പിക്കണമെന്ന പൊതുവായ ആവശ്യത്തിനും ചരിത്രപരമായ ബന്ധത്തിനും വഴിമുടക്കിയത് നിലവിലുള്ള പ്ലാറ്റ്ഫോം സൗകര്യങ്ങളാണ്. ആവശ്യമായ സൗകര്യങ്ങൾ ഇല്ലാത്തതിനാൽ സർവീസ് ഇപ്പോൾ ഈറോഡിൽ അവസാനിപ്പിക്കാനാണ് തീരുമാനിച്ചിരിക്കുന്നത്. കൊല്ലം, കൊട്ടാരക്കര, ആവണീശ്വരം, പുനലൂർ മേഖലകളിൽ നിന്നുള്ള യാത്രക്കാർക്ക് തൊഴിൽ, വിദ്യാഭ്യാസം, ആരോഗ്യപരിരക്ഷ, തീർഥാടനം, വ്യാപാരം തുടങ്ങിയ ആവശ്യങ്ങൾക്കായി ദിവസേന തമിഴ്‌നാട്ടിലേക്ക് യാത്ര ചെയ്യേണ്ടിവരുന്നുണ്ട്. മധുരൈ, പളനി, കോയമ്പത്തൂർ തുടങ്ങിയ കേന്ദ്രങ്ങളിലേക്ക് എത്തിപ്പെടാൻ വലിയ ബുദ്ധിമുട്ടുകൾ നേരിടുന്ന ഈ യാത്രക്കാരുടെ ദീർഘകാല പ്രതിസന്ധിക്ക് പരിഹാരമായാണ് പുതിയ സർവീസ് .കേരളത്തിൽ നിന്ന് തമിഴ്‌നാട്ടിലേക്കുള്ള തൊഴിലധിഷ്ഠിത, വിദ്യാഭ്യാസ, ആരോഗ്യ, തീർഥാടന, നിറവേറ്റുന്നതിന് കൊല്ലം – ഈറോഡ് എക്സ്പ്രസ് വലിയ ഗുണം ചെയ്യുമെന്നും എംപി പറഞ്ഞു.

സൗജന്യ മെഡിക്കൽ ക്യാന്പ് 14ന്

പുനലൂർ :ചെമ്മന്തൂർ സെന്‍റ് ജോൺസ് ഓർത്തഡോക്സ്‌ പള്ളിയുടെ ശതോത്തര രജത ജൂബിലിയുടെ ഭാഗമായി പുനലൂർ ഗവ .താലൂക്ക് ഹോമിയോ ആശുപത്രിയുടെ ആഭിമുഖ്യത്തിൽ14ന് രാവിലെ 9.30 മുതൽ 12.30 വരെ ചെമ്മന്തൂർ സെന്‍റ് ജോൺസ് ഓർത്തഡോക്സ്‌ പള്ളിയിൽ സൗജന്യ മെഡിക്കൽ ക്യാമ്പ്‌ നടത്തും. ക്യാമ്പിൽഅലർജി, തൈറോയ്ഡ്, അസ്ഥി സംബന്ധമായ രോഗങ്ങൾ, ഡയബറ്റിസ്, ബ്ലഡ്‌ പ്രഷർ, മറ്റു ജീവിത ശൈലീ രോഗങ്ങൾ, ത്വക് രോഗങ്ങൾ തുടങ്ങി എല്ലാ രോഗങ്ങൾക്കുമുള്ള ചികിത്സ ലഭ്യമാണ്. ചികിത്സയ്ക്ക് എത്തുന്ന രോഗികൾക്ക് ആവശ്യമായ മരുന്നുകൾ സൗജന്യമായി ലഭിക്കുന്നതാണ്.ആദ്യം രജിസ്റ്റർ ചെയ്യുന്ന 150 പേർക്ക് സൗജന്യ രക്ത പരിശോധനയും (മെഡിസോൺ ലാബ് )ലഭ്യമാണെന്ന് ആശുപത്രി സൂപ്രണ്ട് ഡോ. ബിജി ഡാനിയേൽ, ഇടവക വികാരി ഫാ.സാജൻ തോമസ്,ട്രസ്റ്റി ജി.കുഞ്ഞപ്പൻ, സെക്രട്ടറി ജേക്കബ് ജോർജ്എന്നിവർ അറിയിച്ചു .9745340500,9447801450

കൊല്ലം - തിരുവനന്തപുരം റൂട്ടിൽ പാസഞ്ചർ ട്രെയിനുകളുടെ സമയക്രമം അശാസ്ത്രീയം

കൊല്ലം: കൊല്ലത്തിനും തിരുവനന്തപുരത്തിനും മധ്യേ സർവീസ് നടത്തുന്ന മിക്ക പാസഞ്ചർ ട്രെയിനുകളുടെയും സമയക്രമം അശാസ്ത്രീയം. സ്ഥിരം യാത്രികർ അടക്കമുള്ളവർക്ക് ഒട്ടും പ്രയോജനപ്പെടാത്ത വിധമാണ് ഈ ട്രെയിനുകളുടെ സമയം നിശ്ചയിച്ചിട്ടുള്ളത്. മെമു ട്രെയിൻ അടക്കം ഇത്തരത്തിൽ ആർക്കും ഗുണകരമാകാത്ത രീതിയിലാണ് സർവീസ് നടത്തുന്നത്. ഇതിന് പരിഹാരം കാണണമെന്ന് ആവശ്യപ്പെട്ട് യാത്രക്കാരും ഫ്രണ്ട്സ് ഓൺ റെയിൽസ് അടക്കമുള്ള സംഘടനകളും നിരവധി നിവേദനങ്ങൾ അധികൃതർക്ക് നൽകിയെങ്കിലും നാളിതുവരെയും ഒരു അനുകൂല നടപടിയും ഉണ്ടായിട്ടില്ല.രാവിലെ 6.55 ന് കൊല്ലത്ത് നിന്ന് പുറപ്പെടുന്ന തിരുവനന്തപുരം പാസഞ്ചർ മുതൽ രാത്രി 9.20 ന് കൊല്ലത്ത് യാത്ര അവസാനിപ്പിക്കുന്ന കന്യാകുമാരി - കൊല്ലം മെമു വരെ സമയമാറ്റം അനിവാര്യമായ ട്രെയിനുകളുടെ പട്ടികയിൽ ഉൾപ്പെടും. കൊല്ലം - തിരുവനന്തപുരം പാസഞ്ചർ പുറപ്പെടുന്നത് നിലവിലെ സമയത്തിൽ നിന്ന് 15 മിനിറ്റ് നേരത്തേ ആക്കിയാൽ പിന്നിൽ ഈ റൂട്ടിൽ വരുന്ന ആറ് ട്രെയിനുകളുടെ സമയക്ലിപ്തത ഉറപ്പുവരുത്താൻ കഴിയുമെന്ന് യാത്രക്കാർ ചൂണ്ടിക്കാട്ടുന്നു. പാസഞ്ചർ വൈകി പുറപ്പെടുന്നത് കാരണം പുറകിൽ വരുന്ന എക്സ്പ്രസ് ട്രെയിനുകൾ എല്ലാംവൈകിയാണ് തിരുവനന്തപുരത്ത് എത്തുന്നത്. ഇത്യകാരണം ഉദ്യോഗാർഥികളും വിദ്യാർഥികളും അടക്കമുള്ള പതിവ് യാത്രികർക്ക് കൃത്യ സമയത്ത് ലക്ഷ്യസ്ഥാനത്ത് എത്താൻ കഴിയാത്ത അവസ്ഥയുണ്ട്. തിരികെ നാഗർകോവിൽ നിന്ന് കൊല്ലം വഴി കോട്ടയത്തിന് പോകുന്ന ട്രെയിനും മെല്ലെപ്പോക്കിലാണ്. ഈ വണ്ടി മിക്കപ്പോഴും തിരുവനന്തപുരത്ത് നിന്ന് പുറപ്പെട്ടാൽ കൊല്ലത്ത് എത്താൻ രണ്ടേമുക്കാൽ മണിക്കൂറോളം എടുക്കുന്നു. നിലവിൽ ഈ ട്രെയിൻ നാഗർകോവിലിൽ നിന്ന് ഉച്ചയ്ക്ക് ഒന്നിനാണ് യാത്ര തിരിക്കുന്നത്. ഇത് ഉച്ചകഴിഞ്ഞ് രണ്ടിന് ആക്കിയാൽ 3.30 ന് തിരുവനന്തപുരത്ത് എത്തും.പിന്നീട് കൊച്ചുവേളിയിൽ നിന്നുള്ള പ്രതിവാര സ്പെഷൽ ട്രെയിനുകൾ എല്ലാം പോയശേഷം 3.45 ന് കൊല്ലത്തേയ്ക്ക് പുറപ്പെട്ടാൽ സർവീസ് നിരവധി പേർക്ക് ഗുണകരമാകും. മാത്രമല്ല വഴിയിൽ പല സ്റ്റേഷനുകളിൽ നിർത്തിയിട്ടുള്ള മെല്ലെപ്പോക്ക് ഒഴിവാക്കാനും സാധിക്കും. ഇത് കൂടാതെ കൊല്ലത്ത് നിന്ന് തിരുവനന്തപുരത്തേയ്ക്ക് ഉച്ചകഴിഞ്ഞു 3.30 ന് ശേഷം രണ്ട് പാസഞ്ചർ ട്രെയിനുകൾ അടുത്തടുത്ത് സർവീസ് നടത്തുണ്ട്. ഇതും തീർത്തും അശാസ്ത്രീയമാണെന്നാണ് യാത്രക്കാരുടെ പക്ഷം. ആദ്യ ട്രെയിൻ ഉച്ചകഴിഞ്ഞ് 3.35നുള്ള കൊല്ലം - നാഗർകോവിൽ പാസഞ്ചറാണ്. 0 മിനിറ്റ് കഴിയുമ്പോൾ 3.55 ന് കൊല്ലം - തിരുവനന്തപുരം പാസഞ്ചറും പുറപ്പെടും. ഇത് കാരണം രണ്ട് ട്രെയിനുകളിലും ആവശ്യത്തിന് യാത്രക്കാരും ഇല്ലാത്ത അവസ്ഥ. ഇവയിൽ ഏതെങ്കിലും ഒരു ട്രെയിൻ വൈകുന്നേരം അഞ്ചോടെ കൊല്ലത്ത് നിന്ന് പുറപ്പെട്ടാൽ വിവിധ സ്റ്റേഷനുകളിലെ ആയിരക്കണക്കിന് യാത്രക്കാർക്ക് പ്രയോജനപ്പെടും. കൊല്ലം -കന്യാകുമാരി മെമു ട്രെയിൻ രാവിലെ 11.35 നാണ് കൊല്ലത്ത് നിന്ന് പുറപ്പെടുന്നത്. ഇത് അര മണിക്കൂറെങ്കിലും നേരത്തേയാക്കണമെന്നാണ് യാത്രക്കാരുടെ മറ്റൊരു ആവശ്യം. തിരികെയുള്ള കന്യാകുമാരി - കൊല്ലം മെമു വൈകുന്നേരം നാലിനാണ് കന്യാകുമാരിയിൽ നിന്ന് പുറപ്പെടുന്നത്. ഇത് ഒരു മണിക്കൂർ കൂടി വൈകി അഞ്ചിന് പുറപ്പെട്ടാൽ പോലും തിരുവനന്തപുരത്തിനും കൊല്ലത്തിനും മധ്യേ കൂടുതൽ യാത്രക്കാർക്ക് പ്രയോജനപ്പെടും. ബഫർ ടൈം ഒഴിവാക്കിയാൽ ഇങ്ങനെ സർവീസ് നടത്തിയാൽ പോലും നിലവിലെ നിർദിഷ്ട സമയത്തിന് തന്നെ കൊല്ലത്ത് മെമുവിന് എത്തിച്ചേരാനും സാധിക്കും. മെമു ട്രെയിൻ വെള്ളിയാഴ്ചകളിൽ സർവീസ് നടത്താറുമില്ല. ഇത് വാരാന്ത്യങ്ങളിൽ വീട്ടിലെത്താനുള്ള ഉദ്യോഗസ്ഥരെയും വിദ്യാർഥികളെയും പ്രതികൂലമായി ബാധിക്കുന്നുണ്ട്. മെമു പ്രതിദിന സർവീസ് ആക്കണമെന്ന ആവശ്യവും അധികൃതർ അവഗണിച്ച മട്ടാണ്.വൈകുന്നേരം 6.25 ന് കൊല്ലത്ത് നിന്ന് പുറപ്പെടേണ്ട പുനലൂർ - മധുര പാസഞ്ചറിന്‍റെ അവസ്ഥയും പരിതാപകരമാണ്. പുനലൂരിൽ നിന്ന് കൃത്യസമയത്ത് കൊല്ലത്ത് എത്തുന്ന ഈ ട്രെയിൻ വൈകി ഓടുന്ന ദീർഘദൂര ട്രെയിനുകളെ കടത്തി വിടുന്നതിനായി മിക്കപ്പോഴും മുക്കാൽ മണികൂറിലധികം പിടിച്ചിടാറുണ്ട്. ഈ വണ്ടി കൊല്ലത്ത് വൈകുന്നേരം ആറിന് പുറപ്പെടുന്ന രീതിയിൽ സമയക്രമം മാറ്റണമെന്നാണ് യാത്രക്കാർ ആവശ്യപ്പെടുന്നത്. നേരത്തേ ഈ ട്രെയിൻ കൊല്ലത്ത് നിന്ന് വൈകുന്നേരം 5. 55 നാണ് തിരുവനന്തപുരം വഴി മധുരയ്ക്ക് പുറപ്പെട്ടിരുന്നത്.

അമ്മമാരുടെ വേറിട്ട ചിത്ര പ്രദർശനം കൊല്ലത്ത്

കൊല്ലം: നൂലും വരയും കൊണ്ട് രണ്ട് അമ്മമാർ കൊല്ലം നഗരത്തിൽ കലയുടെ ദൃശ്യവിരുന്നൊരുക്കുന്നു. ഒരാൾ വീട്ടമ്മയും മറ്റേയാൾ ടീച്ചറമ്മയും. കോളജ് റിട്ട പ്രഫ. ശാന്തകുമാരി ടീച്ചറും വീട്ടമ്മയായ ഉമാ റാണി ഷണ്മുഖവുമാണ് കലാകാരികൾ. കൊല്ലത്തെ കലാസ്വാദകർക്ക് അവർ വേറിട്ട ദൃശ്യ വിരുന്നൊരുക്കുകയാണ്. കൊല്ലം ടൗണിലെ ഷൺമുഖം സ്റ്റുഡിയോ ഉടമ പരേതനായ രവി സുന്ദറിന്‍റെ ഭാര്യയാണ് ഉമാറാണി. സ്കൂൾ പഠന കാലത്ത് പരിശീലിച്ച ചിത്ര തുന്നൽ അവർ ഒരിക്കലും ഉപേക്ഷിച്ചില്ല. ദീർഘനാളുകളുടെ സൂക്ഷ്മതയും ശ്രദ്ധയും കൊണ്ട് മാത്രം പൂർത്തിയാക്കാൻ കഴിയുന്ന ചിത്ര തുന്നൽ ക്രോസ് സ്റ്റിച്ച് സങ്കേതത്തിൽ 30-40 ഇഞ്ച് വലിപ്പത്തിൽ ഇംഗ്ലീഷ്, മലയാളം, ഹിന്ദി, തമിഴ് തുടങ്ങി പല ഭാഷകളിൽ തുന്നിയെടുത്ത ഇന്ത്യൻ ഭരണഘടനയുടെ ആമുഖവും ഇരുപതിലധികം പാറ്റേണുകളും ഡിസൈനുകളും പ്രദർശിപ്പിക്കുന്നു. കൊല്ലം ആശ്രാമം എട്ട് പോയിന്റ് ആർട്ട് കഫേയിൽ 13 നു രാവിലെ 11ന് ചലച്ചിത്ര സംവിധായകൻ അനിൽ മുഖത്തല, ശാന്തകുമാരി ടീച്ചർ വരച്ച തങ്ങൾ കുഞ്ഞ് മുസലിയാരുടെ പോർട്രെയിറ്റ് മുഖ്യാതിഥിയായ ടികെഎം. ട്രസ്റ്റ് ട്രഷറർ ജലാലുദീൻ മുസലിയാർക്ക് നൽകി പ്രദർശനം ഉദ്ഘാടനം ചെയ്യും. രണ്ടു ദിവസം നീണ്ടു നിൽക്കുന്ന പ്രദർശനം ഞായറാഴ്ച സമാപിക്കും. രാവിലെ 11 മുതൽ രാത്രി ഏഴുവരെയാണ് പ്രദർശനം.

സൈനികന്‍റെ മരണം: പോലീസ് സ്റ്റേഷനിലെ ദൃശ്യങ്ങൾ ആവശ്യപ്പെട്ട് മാതാവ്

കൊല്ലം: സൈനികന്‍റെ മരണം ലോക്കപ്പ് മര്‍ദനത്തെ തുടര്‍ന്നാണെന്ന പരാതിയിൽ പോലീസ് സ്റ്റേഷനിലെ ദൃശ്യങ്ങൾ ആവശ്യപ്പെട്ടു മാതാവ് വിവരാകാശ നിയമ പ്രകാരം അപേക്ഷ നൽകി. മുളവന സാജന്‍ കോട്ടേജില്‍ തോംസണ്‍ തങ്കച്ചന്‍റെ(32) മരണത്തിലാണ് സ്റ്റേഷനിലെ ദൃശ്യങ്ങൾ കാണണമെന്ന ആവശ്യവുമായി മാതാവ് ഡെയ്‌സി മോള്‍ അപേക്ഷയുമായി രംഗത്ത് എത്തിയത്. കഴിഞ്ഞ വര്‍ഷം ഡിസംബര്‍ 27നാണ് തോംസണ്‍ മരിച്ചത്. പാരിപ്പള്ളി മെഡിക്കല്‍ കോളജ് ആശുപത്രിയിൽ നടത്തിയ പോസ്റ്റ്മോര്‍ട്ടത്തിൽ തലയ്ക്ക് പുറകിലേറ്റ ക്ഷതവും ആന്തരികാവയവങ്ങളിലെ നീര്‍കെട്ടുമാണ് മരണകാരണമെന്ന് കണ്ടെത്തി.മുളവന ഫാന്‍സി ഹാളില്‍ വൈറ്റസിന്‍റെ മകള്‍ വിന്നിയെയാണ് തോംസണ്‍ വിവാഹം ചെയ്തത്. പ്രേമ വിവാഹമായിരുന്നു. 2024 ഓഗസ്റ്റില്‍ മകന്‍ ലീവിന് വന്നതുമുതൽ ഭാര്യ വീട്ടിലായിരുന്നു താമസം. ഈ സമയം ഭാര്യയുമായി വാക്കുതര്‍ക്കമുണ്ടായി. ‌ ഒക്‌ടോബര്‍ 11ന് രാത്രി 11ന് ഭാര്യ വീട്ടുകാര്‍ കൂട്ടായി മര്‍ദിച്ചു. അന്നേ ദിവസം രാത്രി 11.20ന് പേരയം പഞ്ചായത്ത് പ്രസിഡന്‍റിന്‍റെ സഹായത്തോടെ കുണ്ടറ പോലീസ് സ്റ്റേഷനില്‍ മകനെതിരേ സ്ത്രീധന പീഡനത്തിന് പരാതി കൊടുത്തു അറസ്റ്റ് ചെയ്യിക്കുകയായിരുന്നെന്ന് ഡെയ്സി പറഞ്ഞു. കസ്റ്റഡിയിൽ വച്ചു കൊടിയ ലോക്കപ്പ് മര്‍ദനത്തിന് വിധേയമാക്കുകയും ചെയ്തു. അടുത്ത ദിവസം പോലീസ് കോടതിയിൽ ഹാജരാക്കി. പോലീസിന്‍റെ വ്യാജ റിപ്പോര്‍ട്ടിന്‍റെ അടിസ്ഥാനത്തില്‍ റിമാൻഡ് ചെയ്ത് കൊല്ലം സബ് ജയിലിലാക്കി. ഒരു സൈനികനെ അറസ്റ്റ് ചെയ്യുമ്പോള്‍ പാലിക്കേണ്ട യാതൊരു നടപടിക്രമങ്ങളും സുപ്രീം കോടതിയുടെ നിര്‍ദേശങ്ങളും കുണ്ടറ പോലീസ് പാലിച്ചില്ലെന്നു മാതാവ് പറഞ്ഞു. പോലീസുകാര്‍ മര്‍ദിച്ച കാര്യത്തെപറ്റി കോടതിയില്‍ എന്തെങ്കിലും പറഞ്ഞാല്‍ ജോലി ഇല്ലാതാക്കുമെന്നും കള്ള കേസുകളില്‍ കുടുക്കുമെന്നും പറഞ്ഞു പോലിസുകാർ ഭീഷണിപ്പെടുത്തുകയും ചെയ്തു. തുടര്‍ന്നു ജാമ്യത്തിലിറങ്ങിയ ഇയാളെ പോലീസ് സഹായിയായ ഓട്ടോ ഡ്രൈവര്‍ വീട്ടില്‍ കൊണ്ടു വന്നു. ‌ അവശനിലയിലായിരുന്ന തോംസൺ തുടര്‍ന്നു കുണ്ടറ താലൂക്ക് ആശുപത്രിയില്‍ ചികിത്സ തേടി. പോലീസിന്‍റെ പീഡനത്തെ തുടര്‍ന്നു നട്ടെല്ലിന്‍റെ കീഴ്ഭാഗത്തുണ്ടായ മുഴ സര്‍ജറി ചെയ്യാനായി ഡിസംബര്‍ 13ന് കൊല്ലത്തെ സ്വകാര്യ മെഡിക്കല്‍ കോളജ് ആശുപത്രിയിൽ അഡ്മിറ്റ് ചെയ്തു. 20ന് ഡിസ്ചാര്‍ജായി വീട്ടിലെത്തി. 27ന് രാവിലെ കിടക്കയില്‍ മരിച്ച നിലയില്‍ കണ്ടെത്തുകയായിരുന്നു. പോലിസിന്‍റെ കൊടിയ മര്‍നമാണ് മകന്‍റെ മരണത്തിനു കാരണമായത്. മകന്‍റെ മരണത്തെക്കുറിച്ച് അന്വേഷിക്കണമെന്ന് ആവശ്യപ്പെട്ട് മുഖ്യമന്ത്രിക്കും ഉയര്‍ന്ന പോലീസ് മേധാവികള്‍ക്കും പരാതി നല്‍കിയെങ്കിലും കാര്യമായ തുടർ നടപടികൾ ഒന്നും ഉണ്ടായില്ലെന്ന് മാതാവ് പറഞ്ഞു.

പേരൂർക്കട മാല മോഷണക്കേസിൽ വഴിത്തിരിവ് : വീട്ടുജോലിക്കാരിയെ മോഷ്‌ടാവാക്കാൻ പോലീസ് കഥ മെനഞ്ഞെന്ന് അന്വേഷണ റിപ്പോർട്ട്

തിരുവനന്തപുരം: പേരൂർക്കട മാല മോഷണക്കേസിൽ വീട്ടുജോലിക്കാരിയായ ദളിത് യുവതി ബിന്ദുവിനെ മോഷ്ടാവാക്കാൻ പോലീസ് കഥ മെനഞ്ഞുവെന്ന് പുനരന്വേഷണം നടത്തിയ പത്തനംതിട്ട ക്രൈംബ്രാഞ്ച് ഡിവൈഎസ്പി വിദ്യാധരന്‍റെ കണ്ടെ ത്തൽ. പേരൂർക്കടയിലെ വീട്ടിൽ നിന്ന് മാല മോഷണം പോയിട്ടേ ഇല്ലെന്നും മറവി പ്രശ്നമുള്ള ഓമന ഡാനിയേൽ മാല സ്വന്തം വീട്ടിലെ സോഫയ്ക്കു താഴെവച്ചു മറക്കുകയായിരുന്നുവെന്ന് പ്രത്യേക അന്വേഷണ സംഘം കണ്ടെ ത്തി. മാല പിന്നീട് ഓമന തന്നെ കണ്ടെ ത്തിയെന്നും റിപ്പോർട്ടിൽ പറയുന്നു. കാണാതായ മാല വീടിനു പിന്നിലെ ചവറുകൂനയിൽ നിന്നും കണ്ടെ ത്തി എന്ന പേരൂർക്കട പോലീസിന്‍റെ കഥ നുണയാണ്. ബിന്ദുവിന്‍റെ അന്യായ കസ്റ്റഡിയെ ന്യായീകരിക്കാൻ പോലിസ് മെനഞ്ഞ കഥയാണ് ഇതെന്ന് റിപ്പോർട്ടിൽ ചൂണ്ട ിക്കാട്ടുന്നു. ബിന്ദുവിനെ അന്യായമായി സ്റ്റേഷനിൽ തടഞ്ഞു വച്ചത് സ്റ്റേഷൻ ഹൗസ് ഓഫീസർ ശിവകുമാർ അറിഞ്ഞിരുന്നു. രാത്രിയിൽ ശിവകുമാർ ബിന്ദുവിനെ ചോദ്യം ചെയ്തത് സിസിടിവി ദൃശ്യങ്ങളിൽ വ്യക്തമാണ്. വീട്ടുജോലിക്കാരിയെ മോഷണക്കേസിൽ കുടുക്കാൻ ശ്രമിച്ച പേരൂർക്കട എസ്എച്ച്ഒ ശിവകുമാർ, വീട്ടുടമ ഓമന ഡാനിയേൽ എന്നിവർക്കെതിരെ നടപടി വേണമെനും റിപ്പോർട്ടിൽ പറയുന്നു. സ്വർണാഭരണം കാണാനില്ലെന്ന വീട്ടുടമ ഓമനയുടെ പരാതിയിലാണു വീട്ടിൽ ജോലിക്കു നിന്നിരുന്ന ചുള്ളിമാനൂർ സ്വദേശി ബിന്ദുവിനെതിരെ പേരൂർക്കട പോലീസ് കേസെടുത്തത്. പരാതി നൽകിയതിനു നാലു ദിവസം മുന്പു മാത്രം വീട്ടുജോലിക്കെത്തിയ ബിന്ദുവിനെ പോലീസ് കസ്റ്റഡിലെടുത്ത് രാത്രിയിൽ സ്റ്റേഷനിലിരുത്തി മാനസികമായി പീഡിപ്പിക്കുകയായിരുന്നു. നഷ്ടപ്പെട്ടെന്നു പറഞ്ഞ സ്വർണം അടുത്ത ദിവസം പരാതിക്കാരിയുടെ വീടിനു പിന്നിലെ ചവറുകൂനയിൽ നിന്നും കിട്ടിയെന്ന് ഓമന ഡാനിയേൽ തന്നെ പൊലീസിനെ അറിയിച്ചു. പിന്നാലെ പൊലീസ് ബിന്ദുവിനെ വിട്ടയച്ചു. പോലീസിനു നാണക്കേടായ സംഭവത്തിൽ എസ്ഐയെയും എഎസ്ഐയും സസ്പെൻഡ് ചെയ്തിരുന്നു. സ്റ്റേഷൻ ഇൻസ്പെക്ടറെ കോഴിക്കോടിനു സ്ഥലം മാറ്റി. കാണാതായ സ്വർണം എങ്ങനെ ചവറുകൂനയിലെത്തിയെന്നു പോലും അന്വേഷിക്കാതെയാണ് കേസ് അവസാനിപ്പിച്ചത്. പോലീസ് പീഡനത്തിൽ ഉൾപ്പെടെ സമഗ്രമായ അന്വേഷണം ആവശ്യപ്പെട്ട ബിന്ദു നൽകിയ പരാതി ജില്ലയ്ക്കു പുറത്തുള്ള ഡിവൈഎസ്പി അന്വേഷിക്കാൻ മനുഷ്യാവകാശ കമ്മീഷൻ ഉത്തരവിട്ടിരുന്നു. അതിന്‍റെ അടിസ്ഥാനത്തിലാണ് പുനരന്വേഷണം നടത്തിയത്.

പുനലൂർ നഗരസഭ വോട്ടർപട്ടികയിൽ ക്രമക്കേട് : നിയമപോരാട്ടത്തിന് ഒരുങ്ങി കോൺഗ്രസ്

പുനലൂർ: തദ്ദേശസ്വയംഭരണ തെരഞ്ഞെടുപ്പിനോട് അനുബന്ധിച്ചു വോട്ടർ പട്ടികയിൽ ക്രമക്കേട് നടത്തിയ പുനലൂർ നഗരസഭ ഉദ്യോഗസ്ഥർക്കെതിരെ നിയമ പോരാട്ടത്തിന് ഒരുങ്ങി പുനലൂരിലെ കോൺഗ്രസ് നേതൃത്വം. നഗരസഭയിലെ തെരഞ്ഞെടുപ്പ് രജിസ്ട്രേഷൻ ഓഫീസർക്കും അസിസ്റ്റൻറ് രജിസ്ട്രേഷൻ ഓഫീസർമാർക്കും എതിരെ നിയമനടപടിക്ക് ഒരുങ്ങുന്നതായി കോൺഗ്രസ് നേതൃത്വം പത്രസമ്മേളനത്തിൽ അറിയിച്ചു. ഒരേ വോട്ടർമാർ തന്നെ ഒന്നിലധികം വാർഡുകളിൽ തങ്ങളുടെ വോട്ട് ചേർക്കുകയും കൃത്രിമ രേഖകളുടെ അടിസ്ഥാനത്തിൽ റെസിഡൻസ് സർട്ടിഫിക്കറ്റുകൾ സംഘടിപ്പിച്ച് വോട്ട് ചേർക്കുകയും പാർട്ടി ഓഫീസുകളുടെ പേരിലും മറ്റും വ്യാജ വോട്ടുകൾ കൂട്ടിച്ചേർക്കുകയും ചെയ്ത വോട്ടർമാർക്ക് എതിരെ കൂടി നിയമനടപടികൾ സ്വീകരിക്കുമെന്നും കോൺഗ്രസ് നേതൃത്വം അറിയിച്ചു. ഇരട്ട വോട്ടും വ്യാജ വോട്ടും ഉപയോഗിച്ച് ഇതര സംസ്ഥാനക്കാരുടെ വോട്ട് വ്യാപകമായി കൂട്ടിച്ചേർത്തുകൊണ്ടും തെരഞ്ഞെടുപ്പ് അട്ടിമറിക്കാനുള്ള ഇടതുപക്ഷത്തിന്‍റെ ശ്രമങ്ങൾക്കു പിന്തുണ നൽകുന്ന ഉദ്യോഗസ്ഥരുടെ നിലപാടുകളില്‍ ശക്തമായ പ്രതിഷേധം രേഖപ്പെടുത്തുന്നതായും അറിയിച്ചു. രാജ്യ സേവനത്തിന് അതിർത്തിയിൽ ജോലി ചെയ്യുന്ന സൈനികരുടെയും പഠനത്തിനും ജോലി ആവശ്യത്തിനും വിദേശങ്ങളിലും ഇതര സംസ്ഥാനങ്ങളിലും പോയിട്ടുള്ള ആളുകളുടെയും വോട്ട് അന്യായമായി നീക്കം ചെയ്യുന്നതിനും താമസമില്ലാത്ത ഒട്ടനവധി ആളുകളുടെ വോട്ട്, ആക്ഷേപം ലഭ്യമായ ശേഷവും നിലനിർത്തുകയും ചെയ്യുന്ന നിലപാടാണ് നഗരസഭയിൽ ചില ഉദ്യോഗസ്ഥർ സ്വീകരിച്ചതെന്നും ഇത് ആസൂത്രിതമായി ചെയ്ത ക്രമക്കേടാണെന്നും ഇതിനെതിരെയാണ് നിയമ പോരാട്ടം ആരംഭിക്കുന്നത്. പരാതി നല്‍കുന്നത്‌ കൂടാതെ നഗരസഭ ഓഫീസിനു മുന്നില്‍ പ്രതിഷേധ സംഗമം സംഘടിപ്പിക്കും. പത്രസമ്മേളനത്തിൽ യുഡിഎഫ് പാർലമെന്‍ററി പാർട്ടി ലീഡർ ജി. ജയപ്രകാശ്, ഡപ്യൂട്ടി ലീഡർ സാബു അലക്സ്, കോൺഗ്രസ് മണ്ഡലം പ്രസിഡന്‍റുമാരായ എസ്. നാസർ, കെ.എൻ. ബിപിൻ കുമാർ തുടങ്ങിയവർ പങ്കെടുത്തു.

പോലീസ് സ്റ്റേഷനിൽ കയറാൻ അനുമതി വാങ്ങണമെന്ന് : കണ്ണനല്ലൂർ പോലീസി െ ന്‍റ വിചിത്ര നോട്ടീസ് വിവാദത്തിൽ

ചാത്തന്നൂർ: പോലീസ് സ്റ്റേഷനുള്ളിൽ കയറണമെങ്കിൽ വാച്ച് ഡ്യൂട്ടിയിലുള്ള പോലീസ് ഉദ്യോഗസ്ഥനെ വിവരം ധരിപ്പിച്ച് അനുവാദം വാങ്ങിക്കണമെന്ന കണ്ണനല്ലൂർ പോലീസി െ ന്‍റ അറിയിപ്പ് വിവാദമായി. പോലീസ് സ്റ്റേഷനിൽ പതിച്ചിരുന്ന അറിയിപ്പ് പോസ്റ്റർ വിവാദമായതോടെ കീറി കളഞ്ഞ് പോലീസ് തലയൂരി. കൊല്ലം കണ്ണനല്ലൂർ പൊലീസ് സ്റ്റേഷനിലാണ് ഇത്തരമൊരു വിവാദ പോസ്റ്റർ ഒട്ടിച്ചിരുന്നത്. എസ്ഐയേയോ, എസ്എച്ച് ഒയേയോ കാണണമെങ്കിൽ എന്തിനാണ് വന്നതെന്ന വിവരം വാച്ച് ഡ്യൂട്ടിയിലുള്ള പൊലീസ് ഉദ്യോഗസ്ഥനോട് പറഞ്ഞ് സമ്മതം വാങ്ങണം എന്ന അറിയിപ്പ് പ്രതിഷേധത്തിന് ഇടയാക്കിയതോടെ പൊലീസ് തന്നെ അത് ഒഴിവാക്കുകയായിരുന്നു. മധ്യസ്ഥ ചർച്ചയ്ക്കായി പോലീസ് സ്റ്റേഷനിലെത്തിയ തന്നെ ഇൻസ്പക്ടർ മർദിച്ചുവെന്ന് സിപിഎം ലോക്കൽ സെക്രട്ടറി ഫേസ്ബുക്ക് പോസ്റ്റിലൂടെ വെളിപ്പെടുത്തിയിരിക്കെയാണ് കണ്ണനല്ലൂർ സ്റ്റേഷനിലെ ഈ സംഭവം. അഭ്യന്തര വകുപ്പോ ഉന്നത ഉദ്യോഗസ്ഥരോ അറിയാതെയാണ് ഇത്തരമൊരു പോസ്റ്റർ സ്റ്റേഷനിൽ പ്രദർശിപ്പിച്ചതെന്ന ആരോപണവും ഉയർന്നിട്ടുണ്ട്. സിപിഎം ലോക്കൽ സെക്രട്ടറി സമൂഹമാധ്യമങ്ങളിലൂടെ വെളിപ്പെടുത്തൽ നടത്തിയതിന് പിന്നാലെയാണ് നോട്ടീസ് സ്റ്റേഷനിൽ പതിച്ചത്. ഇൻസ്പക്ടർ മർദിച്ചുവെന്ന് ആരോപിച്ച സിപിഎം ലോക്കൽ സെക്രട്ടറി അന്ന് ഇൻസ്പെക്ടറുടെ മുറിയിൽ കുത്തിയിരിപ്പ് സത്യാഗ്രഹം നടത്തിയിരുന്നു. ഇതാകാം ഇത്തരത്തിലൊരു നോട്ടീസ് പതിക്കുവാൻ കാരണമാക്കിയതെന്നാണ് പറയപ്പെടുന്നത്.പൊതുപ്രവർത്തകർ ഉൾപ്പെടെയുള്ളവർ സ്റ്റേഷനിൽ വരുന്നതാണ് പ്രശ്നങ്ങൾക്ക് കാരണം എന്ന് പറഞ്ഞുകൊണ്ടാണ് പോലീസ് നോട്ടീസ് പതിച്ചത്. പെറ്റീഷ െ ന്‍റ കൂടെ വരുന്ന പൊതുപ്രവർത്തകരെ അകത്ത് പ്രവേശിപ്പിക്കാതെ വെളിയിൽ നിർത്തിയതിനെ തുടർന്നാണ് വിവാദം ഉണ്ടാവുന്നത്. ഇത് സംബന്ധിച്ച് പരാതി നൽകുവാൻ യുവജന സംഘടനകൾ തീരുമാനിച്ചിരുന്നു. ഇതോടെയാണ് പെട്ടെന്ന് തന്നെ സിഐയുടെ നിർദേശപ്രകാരം നോട്ടീസ് നീക്കം ചെയ്യുന്നത്. ഗുരുതര സ്വഭാവം ഉൾപ്പെടെയുള്ള, രഹസ്യ സ്വഭാവമുള്ള പരാതികൾ അടക്കം സ്റ്റേഷൻ ഡ്യൂട്ടിയിലുള്ള വാച്ച് ഓഫീസറുടെ ശ്രദ്ധയിൽപ്പെടുത്തിയ ശേഷം മാത്രം സ്റ്റേഷ െ ന്‍റ ചുമതലയിലുള്ള ഉദ്യോഗസ്ഥരെ കണ്ടാൽ മതി എന്ന് നോട്ടീസ് പതിച്ച സംഭവത്തിൽ ഉന്നത പോലീസ് ഉദ്യോഗസ്ഥർക്കും സ്റ്റേഷനിലുള്ള മറ്റ് പോലീസുകാർക്കും അതൃപ്തിയുണ്ട്. സംസ്ഥാനത്ത് ഒരു പൊലീസ് സ്റ്റേഷനിലും ഇത്തരത്തിലൊരു അറിയിപ്പ് ബോർഡ് സ്ഥാപിച്ചിട്ടില്ലെന്നും ഇൻസ്പെകടറോട് പറയേണ്ട കാര്യങ്ങൾ പാറാവുകാരനോട് പറയേണ്ട കാര്യമില്ലെന്നും ഡിസിസി ജനറൽ സെക്രട്ടറി ഫൈസൽ കുളപ്പാടം പ്രതികരിച്ചു. ഇതിനിടെ നിരന്തരം കണ്ണനല്ലൂർ പോലീസ് സ്റ്റേഷൻ വിവാദത്തിൽ പെടുന്നതിൽ ശക്തമായ നടപടിക്ക് സാധ്യത ഉണ്ടായിരിക്കുകയാണ്.

ഓണ വിപണിയിൽ താരമായി കുടുംബശ്രീ : കൊയ്തെടുത്തത് ലക്ഷങ്ങൾ

കൊല്ലം: ഓണവിപണിയിൽ കൊല്ലം ജില്ലയിലെ കുടുംബശ്രീക്കാർ താരമായി. ലക്ഷങ്ങളുടെ നേട്ടമാണ് കുടുംബശ്രീക്കാർ ഈ കൊല്ലം നേടിയത്. ഈ വർഷം 2.70 കോടിയാണ് നേടിയത്. ജില്ലയിൽ 145 കുടുംബശ്രീ ഓണം പ്രദർശന വിപണന മേളകളാണ് കുടുംബശ്രീ സംരംഭകർ നടത്തിയത്. 1.17 കോടിയാണ് ഓണം മേളകളിൽ നിന്ന് കഴിഞ്ഞ വർഷം കുടുംബശ്രീ നേടിയത്. കരുനാഗപ്പള്ളി, പെരിനാട്, ചാത്തന്നൂർ, കല്ലുവാതുക്കൽ, നിലമേൽ, ചിത്തറ, പവിത്രേശ്വരം, കൊറ്റങ്കര, മയ്യനാട് സിഡിഎസുകളിൽ രാത്രികാലത്തും ഓണം വിപണമേള സജീവമായി. പ്രാദേശിക മേളകളിൽ ജില്ലയിലെ 6151 സംരംഭകരുടെ പങ്കാളിത്തമുണ്ടായി. നെടുമൺകാവിൽ സംഘടിപ്പിച്ച ജില്ലാതല മേളയിൽ 30ൽ പരം കുടുംബശ്രീ സംരംഭകരാണ് പങ്കെടുത്തത്. ഇവിടെ 6.15 ലക്ഷം രൂപ നേടാനായി. ആശ്രാമം മൈതാനത്ത് നടന്ന ജില്ലാ പഞ്ചായത്തിന്‍റെ ഫാം ഫെസ്റ്റിലും നബാർഡിന്‍റെ സഹകരണത്തോടെ നടത്തിയ കുടുംബശ്രീ പ്രദർശന വിപണന മേളയിലുംനിന്ന് 8.6 ലക്ഷവും ജില്ലാ പഞ്ചായത്ത് ഫാംഫെസ്റ്റിനോട് ചേർന്നു നടത്തിയ ഭക്ഷ്യ മേളയിലെ ആറു കഫേ യൂണിറ്റുകൾ 2.54 ലക്ഷവും നേടി. ഓണസദ്യയിലും ഓണം ഗിഫ്റ്റ് ഹാമ്പറിലും ഇത്തവണ സംസ്ഥാനതലത്തിൽ ഒന്നാംസ്ഥാനം സ്വന്തമാക്കിയത് ജില്ല കുടുംബശ്രീ മിഷനാണ്. 1060ൽ അധികം ഗിഫ്റ്റ് ഓർ‌ഡറുകളാണ് ജില്ലയിൽ നിന്നുമാത്രം ലഭിച്ചത്. ഓണസദ്യ ഓർഡറുകൾ വഴി ജില്ലയിലെ തെരഞ്ഞെടുത്ത 65 കുടുംബശ്രീ കഫേ യൂണിറ്റുകൾ 44.50 ലക്ഷം നേടി. 27,278 ഓർഡറുകൾ ആണ് ആകെ ലഭിച്ചത്. 140, 170, 200 രൂപ നിരക്കിലാണ് ഓണസദ്യ ലഭ്യമാക്കിയത്. തിരുവോണം, അവിട്ടം, ചതയം ദിനങ്ങളിലെ ഓണം സദ്യ ഓർഡറുകൾക്ക് 50 രൂപ അധികം നിരക്ക് ഏർപ്പെടുത്തിയിരുന്നു. 10 ഓണസദ്യ ഓർഡറുകൾക്ക് താഴെ ബുക്കിംഗ് ലഭ്യമാക്കിയിരുന്നില്ല. എന്നാൽ ജില്ലയിലെ പല സ്ഥലങ്ങളിലും വൃദ്ധരായ മാതാപിതാക്കൾക്കും അവശത അനുഭവിക്കുന്നവർക്കും വേണ്ടി 10 ൽ താഴെയുള്ള ഓർഡർകളും ജില്ല കുടുംബശ്രീ മിഷന്‍റെ നേതൃത്വത്തിൽ ഏറ്റെടുത്തു. ജില്ലയിലെ 66 സിഡിഎസുകൾ വഴി 6,081 ഓണക്കിറ്റുകളാണ് തയാറാക്കിയത്. 38 ലക്ഷം രൂപയുടെ വിറ്റു വരവാണ് ഓണക്കിറ്റിലൂടെ സ്വന്തമാക്കിയത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]