അമ്പമ്പോ എന്തൊരു പോക്ക്! കത്തിക്കയറി സ്വർണം; ഒറ്റയടിക്ക് കൂടിയത് 2,160 രൂപ, വീണ്ടും 68,000 കടന്നു |

കൊച്ചി: വിവാഹമുൾപ്പെടെയുള്ള ആവശ്യങ്ങൾക്കായി സ്വർണം വാങ്ങാൻ ഇന്ന് ജ്വല്ലറികളിലേക്ക് പോകാൻ പദ്ധതിയിട്ടവരെ നിരാശയിലാഴ്ത്തി സ്വർണവില വൻ കുതിപ്പിൽ. പവന് ഒറ്റയടിക്ക് 2,160 രൂപയും ഗ്രാമിന് 270 രൂപയുമാണ് കൂടിയത്. ഇതോടെ, ഒരു പവൻ‌ സ്വർണത്തിന് 68,480 രൂപയിലും ഗ്രാമിന് 8,560 രൂപയിലുമാണ് വ്യാപാരം പുരോഗമിക്കുന്നത്. അതേസമയം, 18 കാരറ്റ് സ്വർണവില ഗ്രാമിന് 255 രൂപ ഉയർന്ന് 7,050 രൂപയിലെത്തി.

ചരിത്രത്തിലാദ്യമായി ഒറ്റദിവസത്തെ ഏറ്റവും വലിയ വർധനയാണ് സ്വർണവിലയിലുണ്ടായത്. പവന് 520 രൂപയാണ് ബുധനാഴ്ച വർധിച്ചത്. ഇതോടെ, രണ്ടുദിവസത്തിനിടെ മാത്രം പവന് 2,680 രൂപയുടെയും ഗ്രാമിന് 335 രൂപയുടെയും വർധനയാണുണ്ടായത്.

ഈ മാസം മൂന്നിന് രേഖപ്പെടുത്തിയ ഗ്രാമിന് 8,560 രൂപയും പവന് 68,480 രൂപയും എന്ന കേരളത്തിലെ എക്കാലത്തെയും റിക്കാർഡിനൊപ്പമാണ് ഒരാഴ്ച കൊണ്ട് സ്വർണവില എത്തിനില്ക്കുന്നത്. ഒരാഴ്ചയ്ക്കിടെ പവനു 2,680 രൂപയും ഗ്രാമിന് 335 രൂപയും കുറഞ്ഞശേഷം ബുധനാഴ്ച മുതലാണ് വില വീണ്ടും മുന്നേറിയത്.

ജനുവരി 22നാണ് പവന്‍ വില ആദ്യമായി 60,000 കടന്നത്. 31ന് പവന് ഒറ്റയടിക്ക് 960 രൂപ ഉയർന്ന് 61,000 രൂപയെന്ന പുതിയ ഉയരം താണ്ടി.

ഫെബ്രുവരി ഒന്നിന് ഒരു പവന്‍ സ്വര്‍ണത്തിന് 61,960 രൂപയായിരുന്നു വില. നാലിന് ഒറ്റയടിക്ക് 840 രൂപ ഉയർന്ന് 62,000 രൂപ പിന്നിട്ടു. തൊട്ടുപിന്നാലെ അഞ്ചിന് 760 രൂപ ഉയർന്ന് 63,000 രൂപയും കടന്നു. പിന്നീട് 11ന് 640 രൂപ ഉയർന്ന് 64,000 രൂപയെന്ന പുതിയ നാഴികക്കല്ലും പിന്നിട്ടു.

മാർച്ച് ഒന്നിന് പവന് 63,440 രൂപയിലാണ് വ്യാപാരം ആരംഭിച്ചത്. പിന്നീട് കയറ്റിറക്കങ്ങൾക്കൊടുവിൽ 14ന് 65,000 രൂപയും 18ന് 66,000 രൂപയും 31ന് 67,000 രൂപയും ഏപ്രിൽ ഒന്നിന് 68,000 പിന്നിടുകയായിരുന്നു.

ഓഹരി വിപണിയിലെ ചലനങ്ങളും രാജ്യാന്തര വിപണിയിലെ മാറ്റങ്ങളുമാണ് വിപണിയില്‍ പ്രതിഫലിക്കുന്നത്. ഒട്ടുമിക്ക രാജ്യങ്ങൾക്കുംമേൽ പകരച്ചുങ്കം 90 ദിവസത്തേക്ക് മരവിപ്പിച്ചിട്ടും ചൈനയ്ക്ക് ഇളവ് നൽകാത്ത യുഎസ് പ്രസിഡന്‍റ് ഡോണൾഡ് ട്രംപിന്‍റെ തീരുമാനമാണ് സ്വർണവില കുതിച്ചുകയറാൻ വഴിയൊരുക്കിയത്.

രാജ്യാന്തരവില ഔൺസിന് ഒറ്റയടിക്ക് 150 ഡോളറിനടുത്താണ് കയറിയത്. ഒറ്റദിവസം ഇത്രയും വലിയ കയറ്റം ചരിത്രത്തിലാദ്യമാണ്. ബുധനാഴ്ച 3,000 ഡോളർ നിലവാരത്തിലായിരുന്ന വില ഇപ്പോഴുള്ളത് 117 ഡോളർ ഉയർന്ന് 3,129 ഡോളറിലാണ്. കഴിഞ്ഞയാഴ്ച കുറിച്ച 3,169.99 ഡോളറാണ് റിക്കാർഡ്.

അതേസമയം, വെള്ളിയുടെ വിലയും ഉയർന്നിട്ടുണ്ട്. ഒരു ഗ്രാം സാധാരണ വെള്ളിക്ക് മൂന്നു രൂപ ഉയർന്ന് 105 രൂപയിലാണ് വ്യാപാരം പുരോഗമിക്കുന്നത്.