മൂന്നാംദിനവും മൂക്കുംകുത്തി സ്വർണം; പവന് 64,000 രൂപയിൽ താഴെ |

കൊച്ചി: സംസ്ഥാനത്ത് സർവകാല റിക്കാർഡിൽനിന്ന് തുടർച്ചയായ മൂന്നാംദിനവും കൂപ്പുകുത്തി സ്വർണവില. ഗ്രാമിന് ഒറ്റയടിക്ക് 80 രൂപയും പവന് 640 രൂപയുമാണ് കുറഞ്ഞത്. ഇതോടെ, ഒരു ഗ്രാമിന് 7,930 രൂപയിലും പവന് 63,440 രൂപയിലുമാണ് വ്യാപാരം പുരോഗമിക്കുന്നത്. 18 കാരറ്റ് സ്വർണവിലയും ഗ്രാമിന് 70 രൂപ കുറഞ്ഞ് 6,520 രൂപയിലെത്തി.

ഈമാസം 25ന് രേഖപ്പെടുത്തിയ പവന് 64,600 രൂപയും ഗ്രാമിന് 8,075 രൂപയുമാണ് കേരളത്തിലെ എക്കാലത്തെയും ഉയർന്ന വില. അടുത്ത ദിവസം തന്നെ 65,000 എന്ന പുതിയ നാഴികക്കല്ല് കടന്ന് സ്വര്‍ണവില കുതിക്കുമെന്ന സൂചനയ്ക്കിടെ ബുധനാഴ്ച 200 രൂപയും വ്യാഴാഴ്ച 320 രൂപയും താഴേക്കു പോകുകയായിരുന്നു. ഇതോടെ, കഴിഞ്ഞ മൂന്നു ദിവസത്തിനിടെ മാത്രം പവന് 1,160 രൂപയും ഗ്രാമിന് 145 രൂപയുമാണ് കുറഞ്ഞത്.

ജനുവരി 22നാണ് പവന്‍ വില ആദ്യമായി 60,000 കടന്നത്. തുടർന്ന് 24ന് 60,440 രൂപയായി ഉയർന്ന് സർവകാല റിക്കാർഡിലെത്തി. 31ന് പവന് ഒറ്റയടിക്ക് 960 രൂപ ഉയർന്ന് 61,000 രൂപയെന്ന പുതിയ ഉയരം താണ്ടിയിരുന്നു.

ഈ മാസം ഒന്നിന് ഒരു പവന്‍ സ്വര്‍ണത്തിന് 61,960 രൂപയായിരുന്നു വില. മൂന്നിന് 320 രൂപ ഇടിഞ്ഞെങ്കിലും പിന്നീട് വീണ്ടും കുതിച്ചു. നാലിന് ഒറ്റയടിക്ക് 840 രൂപയും അഞ്ചിന് 760 രൂപയും ആറിന് 200 രൂപയും ഉയരുകയായിരുന്നു.

തുടർന്ന് ഏഴിന് മാറ്റമില്ലാതെ തുടർന്ന ശേഷം എട്ടിന് 120 രൂപയും 10ന് 280 രൂപയും ഉയർന്ന സ്വർണം പിന്നീട് 64,000 രൂപയും കടന്നു കുതിക്കുന്ന കാഴ്ചയാണ് കണ്ടത്. 11ന് പവന് 64,480 രൂപയെന്ന പുതിയ ഉയരം കുറിച്ചു. വീണ്ടും റിക്കാര്‍ഡ് ഉയരത്തിലേക്ക് മുന്നേറുമെന്ന് തോന്നിപ്പിച്ച ഘട്ടത്തിൽ 15ന് സ്വര്‍ണവില 800 രൂപ ഇടിഞ്ഞു. പിന്നീട് കുതിപ്പ് വീണ്ടെടുത്ത സ്വർണം 20 ന് വീണ്ടും സർവകാല റിക്കാർഡിലെത്തുകയും ചെയ്തു. തുടർന്ന് കയറ്റിറക്കങ്ങൾ‌ക്കൊടുവിൽ 25ന് വീണ്ടും ചരിത്ര റിക്കാർഡിലെത്തുകയായിരുന്നു.

ആഗോള വിപണിയിലെ ചലനങ്ങളും ഡോളര്‍ ശക്തിയാര്‍ജിക്കുന്നത് അടക്കമുള്ള ഘടകങ്ങളുമാണ് സ്വര്‍ണവിലയെ സ്വാധീനിക്കുന്നത്. ഫെബ്രുവരി 25ന് ഔൺസിന് 2,956 ഡോളർ എന്ന സർവകാല റിക്കാർഡ് രേഖപ്പെടുത്തിയ രാജ്യാന്തര സ്വർണവില, വ്യാഴാഴ്ച 2,868 ഡോളറിലേക്ക് കൂപ്പുകുത്തിയതാണ് കേരളത്തിലും വില വൻതോതിൽ കുറയാൻ സഹായിച്ചത്.

അതേസമയം, വെള്ളിയുടെ വിലയും കുറഞ്ഞു. ഒരു ഗ്രാം സാധാരണ വെള്ളിക്ക് ഒരുരൂപ കുറഞ്ഞ് 104 രൂപയിലാണ് വ്യാപാരം നടക്കുന്നത്.