മല്ലു ഹിന്ദു വാട്‌സ് ആപ്പ് ഗ്രൂപ്പ്: സൈബർ പോലീസ് അന്വേഷണം പുരോഗമിക്കുന്നു |

തിരുവനന്തപുരം : ഹിന്ദു ഐഎഎസ് ഉദ്യോഗസ്ഥരെ ഉൾപ്പെടുത്തി വാട്‌സ് ആപ്പ് ഗ്രൂപ്പ്‌ രൂപീകരിച്ച സംഭവത്തിൽ വാണിജ്യ വ്യവസായ വകുപ്പ് ഡയറക്ടർ കെ. ഗോപാലകൃഷ്‌ണന്‍റെ പരാതിയിൽ പോലീസ് അന്വേഷണം ആരംഭിച്ചു. തന്‍റെ മൈബൈൽ ഫോൺ ആരോ ഹാക്ക് ചെയ്താണ് ഇത്തരത്തിൽ വാട്സ്‌ ആപ്പ് ഗ്രൂപ്പ്‌ ഉണ്ടാക്കിയതെന്നും ഇതേക്കുറിച്ച് അന്വേഷിക്കണമെന്നും ആവശ്യപ്പെട്ട് ഗോപാലകൃഷ്ണൻ സിറ്റി പോലീസ് കമ്മീഷണർക്ക് നൽകിയ പരാതി നൽകിയിരുന്നു.

സൈബർ പോലീസാണ് പരാതിയെക്കുറിച്ച് അന്വേഷണം നടത്തുന്നത്. ഗോപാലകൃഷ്ണന്‍റെ മൊബൈൽ ഫോൺ വിശദ പരിശോധനക്ക് ഹാജരാക്കാൻ പോലീസ് നിർദേശിച്ചിട്ടുണ്ട്. പ്രാഥമിക അന്വേഷണം നടത്തിയ ശേഷം മാത്രമേ ഈ വിഷയത്തിൽ കേസ് എടുക്കാൻ സാധ്യതയുള്ളൂ എന്നാണ് ലഭിക്കുന്ന വിവരം.

അതേസമയം സംഭവത്തിൽ വകുപ്പ് തലത്തിലുള്ള അന്വേഷണവും നടക്കും. വിശദമായ റിപ്പോർട്ടിന്‍റെ അടിസ്ഥാനത്തിൽ മാത്രമേ ഇക്കാര്യത്തിൽ നടപടി എടുക്കുകയുള്ളൂ എന്നാണ് ലഭിക്കുന്ന സൂചന. ദീപാവലിയുടെ തലേന്നാണ് വ്യവസായ വകുപ്പ് ഡയറക്ടര്‍ ഗോപാലകൃഷ്ണന്‍ ഗ്രൂപ്പ് അഡ്മിനായി ഹിന്ദു ഐഎഎസ് ഉദ്യോഗസ്ഥരുടെ വാട്സ് ആപ്പ് ഗ്രൂപ്പ് രൂപീകരിക്കപ്പെട്ടത്.

ഒരു മതവിഭാഗത്തില്‍ പെട്ടവരെ മാത്രമാണ് ഗ്രൂപ്പില്‍ ചേര്‍ത്തിരുന്നത്. എന്നാല്‍ സംഭവം വിവാദമായതോട ഗ്രൂപ്പ് ഡിലീറ്റ് ചെയ്തു. ഐഎഎസ് ഉദ്യോഗസ്ഥരെ അമ്പരിപ്പിച്ചുകൊണ്ടാണ് കഴിഞ്ഞ ദിവസം ഇത്തരത്തല്‍ ഒരു വാട്സ് ആപ്പ് ഗ്രൂപ്പുണ്ടാക്കിയത്.

ഗോപാലകൃഷ്ണന്‍ അഡ്മിന്‍ ആയ ഗ്രൂപ്പില്‍ സര്‍വീസിലെ മുതിര്‍ന്ന ഉദ്യോഗസ്ഥര്‍ അടക്കമുള്ള അംഗങ്ങള്‍ ആഡ് ചെയ്യപ്പെട്ടു. അധികം വൈകാതെ ഗ്രൂപ്പ് ഡിലീറ്റാകുകയും ചെയ്തു. ഗ്രൂപ്പില്‍ അംഗങ്ങള്‍ ആയിരുന്നവര്‍ക്ക് പിന്നീട് ഗോപാലകൃഷ്ണന്‍റെ സന്ദേശവും എത്തി.

തന്‍റെ ഫോണ്‍ ആരോ ഹാക്ക് ചെയ്തുവെന്നും ഫോണ്‍ കോണ്‍ടാക്ടിലുള്ളവരെ ചേര്‍ത്ത് 11 ഗ്രൂപ്പുകള്‍ ഉണ്ടാക്കിയെന്നുമായിരുന്നു സന്ദേശം. മാന്വലി ഗ്രൂപ്പുകളെല്ലാം ഡിലീറ്റ് ചെയ്തെന്നും ഉടന്‍ ഫോണ്‍ മാറ്റുമെന്നും സഹപ്രവര്‍ത്തകര്‍ക്ക് അറിയിപ്പും നല്‍കി.

മല്ലു ഹിന്ദു ഗ്രൂപ്പില്‍ അംഗങ്ങളാക്കപ്പെട്ടതെല്ലാം ഒരു മതവിഭാഗത്തില്‍പെട്ട ഉദ്യോഗസ്ഥര്‍ മാത്രമായതാണ് വലിയ വിവാദങ്ങള്‍ക്ക് തുടക്കമിട്ടത്. ഫോണ്‍ ഹാക്ക് ചെയ്യപ്പെട്ടെങ്കില്‍ അതും അതീവ ഗുരുതരമായ വിഷയമാണ്.

ഉന്നത ഉദ്യോഗസ്ഥന്‍റെ ഫോണ്‍ ഹാക്ക് ചെയ്ത് സാമുദായിക സ്പര്‍ധ ഉണ്ടാക്കും വിധത്തില്‍ ഗ്രൂപ്പുകളുണ്ടാക്കിയത് ആരാണെന്നു കണ്ടെത്തണം. അതല്ല, ഗോപാലകൃഷണന്‍ തന്നെയാണ് ഗ്രൂപ്പ് ഉണ്ടാക്കിയതെങ്കില്‍ അത് സര്‍വീസ് ചട്ടങ്ങളുടെ ലംഘനമാണെന്നും ചൂണ്ടിക്കാട്ടപ്പെടുന്നു.