Latest News
""ലഹരിക്കടത്തുകാരനെ പങ്കെടുപ്പിക്കില്ല''; ഷാനവാസിനെതിരെ ആലപ്പുഴ നഗരസഭാ കൗൺസിലിൽ പ്രതിഷേധം
Tuesday, February 14, 2023 12:22 PM IST
ആലപ്പുഴ: ആലപ്പുഴ നഗരസഭാ കൗണ്‍സില്‍ യോഗത്തില്‍ പ്രതിപക്ഷ പ്രതിഷേധം. ലഹരിക്കടത്ത് കേസില്‍ ആരോപണവിധേയനായ കൗണ്‍സിലര്‍ ഷാനവാസ് യോഗത്തില്‍ പങ്കെടുക്കുന്നതിനെതിരെയാണ് പ്രതിഷേധം.

ലഹരിക്കടത്തുകാരനെ കൗണ്‍സിലില്‍ ഇരിക്കാന്‍ അനുവദിക്കില്ലെന്ന് പ്രതിപക്ഷ നേതാവ് പറഞ്ഞതോടെ അദ്ദേഹത്തിന്‍റെ മൈക്ക് ഓഫ് ചെയ്തു. ഇതിന് പിന്നാലെയാണ് പ്രതിപക്ഷം നടുത്തളത്തിലിറങ്ങി പ്രതിഷേധിച്ചത്. പ്രതിപക്ഷം ബഹളം തുടര്‍ന്നതോടെ അജണ്ടകള്‍ പാസാക്കി യോഗം വേഗത്തില്‍ പിരിഞ്ഞു.

കരുനാഗപ്പള്ളിയില്‍ ഒരു കോടിയിലധികം രൂപയുടെ ലഹരിക്കടത്ത് നടത്തിയത് ഷാനവാസിന്‍റെ ഉടമസ്ഥതയിലുള്ള വാഹനത്തിലാണ്. ഇയാള്‍ക്കെതിരെ ആരോപണം ഉയര്‍ന്നതിന് പിന്നാലെ ഷാനവാസിനെ പാര്‍ട്ടി പ്രാഥമിക അംഗത്വത്തില്‍നിന്ന് സിപിഎം സസ്‌പെന്‍ഡ് ചെയ്തിരുന്നു.

ഇതിന് ശേഷം നടക്കുന്ന രണ്ടാമത്തെ കൗണ്‍സില്‍ യോഗമാണ് ഇന്നത്തേത്. മുമ്പ് നടന്ന കൗണ്‍സിലില്‍ പ്രതിഷേധ സാധ്യത കണക്കിലെടുത്ത് ഷാനവാസ് പങ്കെടുത്തിരുന്നില്ല.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.
Copyright @ 2018 , Rashtra Deepika Ltd.