Latest News
സ്വകാര്യ ടെലികോം കമ്പനികള്‍ ‘കീശ കാലിയാക്കുന്നു'; കളം പിടിക്കാന്‍ ബിഎസ്എന്‍എല്‍
Thursday, February 2, 2023 11:08 AM IST
സ്വന്തം ലേഖകൻ
കോഴിക്കോട്: സ്വകാര്യ ടെലികോം കമ്പനികള്‍ ഉപയോക്താക്കളുടെ കീശകാലിയാക്കാന്‍ ഒരുങ്ങുമ്പോള്‍ ‘സാഹചര്യം' മുതലാക്കി കുതിപ്പ് നടത്താന്‍ ബിഎസ്എന്‍എൽ. പുതിയതായി 1,198 രൂപയുടെ പ്രീപെയ്ഡ് പ്ലാൻ അവതരിപ്പിച്ചുകൊണ്ടാണ് ബിഎസ്എൻഎൽ സ്വകാര്യ കമ്പനികളുടെ നിരക്ക് വർധനയ്ക്ക് വെല്ലുവിളി ഉയർത്തിയിരിക്കുന്നത്.

കുറഞ്ഞ നിരക്കിൽ മുടക്കുന്ന തുകയ്ക്ക് മൂല്യമുള്ള സേവനമാണ് ഈ ബിഎസ്എൻഎൽ പ്ലാൻ നൽകുന്നത്. 1,198 രൂപയുടെ പുതിയ ബിഎസ്എൻഎൽ പ്ലാൻ 365 ദിവസ വാലിഡിറ്റിയുമായാണ് എത്തുന്നത്. അതിനാൽത്തന്നെ നിരവധി പേർക്ക് ഈ പ്ലാൻ ഗുണം ചെയ്യും. ഇടയ്ക്കിടയ്ക്ക് റീച്ചാർജ് ചെയ്യേണ്ട ബുദ്ധിമുട്ട് ഒഴിവാകുകയും ചെയ്യും.

സാധാരണക്കാരായ ആളുകളാണ് ബിഎസ്എൻഎൽ സിം കൂടുതലായും ഉപയോഗിച്ചുവരുന്നത്. അതുതന്നെയാണ് ബിഎസ്എന്‍എല്‍ ലക്ഷ്യം വയ്ക്കുന്നതും. 365 ദിവസത്തെ വാലിഡിറ്റിയിൽ പ്രതിമാസം 300 മിനിറ്റ് വരെ സൗജന്യ കോളിംഗ്, 3 ജിബി ഡാറ്റ, 30 എസ്എംഎസ് എന്നിവയാണ് ഈ ബിഎസ്എൻഎൽ പ്ലാൻ വാഗ്ദാനം ചെയ്യുന്നത്.

12 മാസവും ഈ ഓഫർ തുടരുന്നതിനാൽത്തന്നെ വർഷം മുഴുവൻ അത്യാവശ്യം കോളിംഗ്, ഡാറ്റ, എസ്എംഎസ് ആവശ്യങ്ങൾ നിറവേറും. വർഷം 36 ജിബി ഡാറ്റയും 3,600 മിനിറ്റ് കോളിംഗും ഈ പ്ലാൻ നൽകും. നിലവില്‍ മറ്റ് കമ്പനികളുടെ നിരക്കിനേക്കാൾ കുറവാണിത്.
RELATED NEWS
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.
Copyright @ 2018 , Rashtra Deepika Ltd.