വിധി വിധിപോലെ; തത്വചിന്തകനായി സ്റ്റൈൽമാൻ സൽമാൻ ഖാൻ : Deepika.com National News |

Click here for detailed news of all items

വിധി വിധിപോലെ; തത്വചിന്തകനായി സ്റ്റൈൽമാൻ സൽമാൻ ഖാൻ

Friday, March 28, 2025 12:36 AM IST

മുംബൈ: ലോറൻസ് ബിഷ്ണോയി സംഘത്തിൽനിന്നുള്ള വധഭീഷണിയെ തത്വചിന്താപരമായി നേരിട്ട് ബോളിവുഡ് സൂപ്പർ സ്റ്റാർ സൽമാൻ ഖാൻ. ജീവിതം എന്താണോ വിധിക്കുന്നത് അത് സംഭവിക്കുമെന്ന് സൽമാൻ പറഞ്ഞു.

ദൈവത്തിന്‍റെ ഇഷ്ടമാണ്. ജീവിതം എന്താണോ വിധിക്കുന്നത് അത് സംഭവിക്കും. അത്ര തന്നെ- സൽമാൻ തത്വചിന്തകനായി. സുരക്ഷാക്രമീകരണങ്ങൾ തന്‍റെ ദൈനംദിന ജീവിതത്തെ ബാധിച്ചിട്ടുണ്ടെന്നും ബോളിവുഡ് സ്റ്റൈൽമാൻ കൂട്ടിച്ചേർത്തു.

ഞായറാഴ്ച റിലീസ് ചെയ്യുന്ന തന്‍റെ ‘സിക്കന്ദർ’ എന്ന സിനിമയുടെ പ്രമോഷന്‍റെ ഭാഗമായി മാധ്യമങ്ങളുമായി സംസാരിക്കുകയായിരുന്നു അദ്ദേഹം. 2018ൽ ലോറൻസ് ബിഷ്ണോയി സൽമാനെ വധിക്കുമെന്ന് ഭീഷണി മുഴക്കിയിരുന്നു.

കഴിഞ്ഞ വർഷം ഏപ്രിലിൽ ബിഷ്ണോയി സംഘത്തിൽപ്പെട്ടവർ സൽമാന്‍റെ ബാന്ദ്രയിലെ വസതിക്കു നേരേ വെടിയുതിർത്തിരുന്നു. ഇതിനുശേഷം, വീടിന്‍റെ ബാൽക്കണിയിൽ ബുള്ളറ്റ് പ്രൂഫ് ഗ്ലാസുകളും റോഡിൽ നിരീക്ഷണത്തിനായി സിസിടിവി കാമറകളും സ്ഥാപിച്ച് സുരക്ഷ വർധിപ്പിച്ചു.

സൽമാന്‍റെ അടുത്ത സുഹൃത്തായി അറിയപ്പെടുന്ന ബാബ സിദ്ദിഖിയുടെ കൊലപാതകത്തെത്തുടർന്ന് നടന്‍റെ സുരക്ഷ കൂടുതൽ കർശനമാക്കി.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.