കോൺക്രീറ്റ് മിക്സർ ലോറി പാഞ്ഞുകയറി അപകടം; ബൈക്ക് യാത്രികൻ മരിച്ചു
Monday, September 2, 2024 10:31 AM IST
മലപ്പുറം: പുത്തനത്താണിയിൽ കോൺക്രീറ്റ് മിക്സർ ലോറിയിടിച്ച് ബൈക്ക് യാത്രികനായ യുവാവിന് ദാരുണാന്ത്യം. പരേതനായ കൂളിയാട്ട് മൊയ്തുണ്ണിയുടെ മകൻ ശിഹാബ് (42) ആണ് മരിച്ചത്.
ഞായറാഴ്ച രാത്രി 8.30 ഓടെയാണ് അപകടം. കോട്ടക്കൽ സ്വകാര്യ ആശുപത്രിയിലുള്ള ബന്ധുവിനെ കാണാൻ ബൈക്കിൽ പോകുന്പോൾ എതിരേ വന്ന ലോറിയിൽ ഇടിക്കുകയായിരുന്നു.
ദേശീയപാതയുടെ നിർമാണ പ്രവർത്തനങ്ങൾക്ക് ഉപയോഗിക്കുന്ന വാഹനമാണിതെന്നാണ് വിവരം. ബൈക്ക് അല്പദൂരം വലിച്ചുകൊണ്ട് പോയ വാഹനം ശിഹാബിന്റെ ശരീരത്തിൽ കയറിയിറങ്ങി. ഇടിയുടെ ആഘാതത്തിൽ റോഡിലേക്ക് തെറിച്ചുവീണ ഇയാളുടെ ഭാര്യ ഹൈറുന്നീസ പരിക്കേൽക്കാതെ രക്ഷപെട്ടു.
ഫാത്തിമയാണ് ശിഹാബിന്റെ മാതാവ്. മക്കൾ: മുസ്ലിഹ്, മുഹ്സിൻ. സഹോദരങ്ങൾ: നിയാസ്, ഫെബിന. ഖബറടക്കം തിങ്കളാഴ്ച വൈകുന്നേരം മന്ദലാംകുന്ന് ജുമ മസ്ജിദ് ഖബർസ്ഥാനിൽ നടക്കും.