നടിയുടെ പരാതിയിൽ കേസ്: മുൻകൂർ ജാമ്യം തേടാൻ രഞ്ജിത്ത്
Tuesday, August 27, 2024 10:18 AM IST
കൊച്ചി: ബംഗാളി നടി ശ്രീലേഖ മിത്രയുടെ പരാതിയിൽ പോലീസ് കേസെടുത്ത സാഹചര്യത്തിൽ മുൻകൂർ ജാമ്യം തേടി കോടതിയെ സമീപിക്കാനൊരുങ്ങി സംവിധായകനും ചലച്ചിത്ര അക്കാദമി മുൻ ചെയർമാനുമായ രഞ്ജിത്ത്.
അതേസമയം, അന്വേഷണം പ്രാഥമിക ഘട്ടത്തിലായതിനാൽ എഫ്ഐആർ റദ്ദാക്കാൻ കോടതിയെ സമീപിക്കുന്നത് തിരിച്ചടിയായേക്കുമെന്നതിനാൽ പോലീസ് നീക്കം കൂടി നിരീക്ഷിച്ച ശേഷമായിരിക്കും തുടർനടപടികൾ സ്വീകരിക്കുക.
എറണാകുളം നോര്ത്ത് പോലീസാണ് 354 ഐപിസി പ്രകാരം രഞ്ജിത്തിനെതിരേ കേസ് രജിസ്റ്റര് ചെയ്തത്. ലൈംഗിക താത്പര്യത്തോടെ സ്പര്ശിച്ചെന്ന് ആരോപിച്ചാണ് നടി പരാതി നൽകിയത്. കടവന്ത്രയിലെ ഫ്ലാറ്റിലാണ് സംഭവം നടന്നതെന്നും ശ്രീലേഖ കൊച്ചി സിറ്റി പോലീസ് കമ്മീഷണർക്ക് നൽകിയ പരാതിയിൽ പറയുന്നു.
സ്ത്രീത്വത്തെ അപമാനിച്ചുവെന്നും ക്രിമിനല് നിയമനടപടി സ്വീകരിക്കണമെന്നും ശ്രീലേഖ മിത്ര അയച്ച ഇമെയില് പരാതിയിൽ പറയുന്നു. ശ്രീലേഖ മിത്രയുടെ വെളിപ്പെടുത്തലിന്റെ പശ്ചാത്തലത്തിൽ രഞ്ജിത്ത് ചലച്ചിത്ര അക്കാദമി ചെയർമാൻ സ്ഥാനം രാജിവച്ചിരുന്നു.