ആലപ്പുഴയിൽ ജ്വല്ലറിയിൽ മോഷണം
Tuesday, August 27, 2024 6:36 AM IST
ആലപ്പുഴ: മുല്ലയ്ക്കലിൽ ജ്വല്ലറിയിൽ മോഷണം. എട്ട് കിലോയോളം വെള്ളി ആഭരണങ്ങളും സ്വർണം പൊതിഞ്ഞ ആറ് ലക്ഷം രൂപയോളം വിലവരുന്ന ആഭരണങ്ങളും മോഷണം പോയി. ഏകദേശം 13 ലക്ഷം രൂപയുടെ നഷ്ടം സംഭവിച്ചതായി സ്ഥാപന ഉടമ പറഞ്ഞു.
ജ്വല്ലറിയുടെ ഓടിളക്കിയാണ് കള്ളൻ അകത്തുകയറിയത്. സിസിടിവി ദൃശ്യങ്ങൾ കേന്ദ്രീകരിച്ചാണ് പോലീസ് അന്വേഷണം.
ഞായറാഴ്ച പുലര്ച്ചെ കടയുടെ പിന്നിലൂടെ മേൽക്കൂരയിലെ ഓടുകൾ ഇളക്കി കയറുന്ന കള്ളന്റെ സിസിടിവി ദൃശ്യങ്ങൾ ലഭിച്ചു. മുഖംമൂടിയും കൈയുറകളും ധരിച്ചിരിക്കുന്നതിനാൽ ആളെ തിരിച്ചറിയാനായിട്ടില്ല. അലമാരയിൽ പ്രദർശിപ്പിച്ചിരുന്ന ആഭരണങ്ങളാണു മോഷണം പോയത്.