ഒരു ചപ്പാത്തിക്ക് 17 രൂപ: അധികവിലയുടെ 250 ഇരട്ടി നഷ്ടപരിഹാരം നല്‍കാന്‍ ഉത്തരവ്
Friday, May 17, 2013 12:10 AM IST
പത്തനംതിട്ട: ചപ്പാത്തിക്ക് അമിതവില ഈടാക്കിയ ഹോട്ടല്‍ ഉടമ ഉപഭോക്താവില്‍ നിന്ന് കൂടുതല്‍ വാങ്ങിയ വിലയും നഷ്ടപരിഹാരവും കോടതി ചെലവും നല്‍കണമെന്ന് പത്തനംതിട്ട ഉപഭോക്തൃ തര്‍ക്കപരിഹാര ഫോറം ഉത്തരവിട്ടു.

കോഴഞ്ചേരി ആര്യഭവനില്‍ നിന്നും അയിരൂര്‍ കാഞ്ഞീറ്റുകര വലിയകാലായില്‍ മോഹനന്‍ നായര്‍ കഴിഞ്ഞ മാര്‍ച്ചില്‍ കറികള്‍ ഇല്ലാതെ പാഴ്സലായി വാങ്ങിയ പത്ത് ചപ്പാത്തിക്ക് 170 രൂപ ഈടാക്കി. സമീപത്തുള്ള സമാനമായ ഹോട്ടലുകളില്‍ അഞ്ച്മുതല്‍ ഏഴ് രൂപ വരെ വില വാങ്ങുകയുള്ളൂവെന്നും അതിനാല്‍ കൂടുതല്‍ വാങ്ങിയ പണം തിരികെ നല്‍കണമെന്നും ഹോട്ടല്‍ മാനേജരോട് ആവശ്യപ്പെട്ടിട്ടും ഇയാള്‍ ഇതിനു തയാറായില്ല. പ്രശ്നപരിഹാരത്തിനായി ഹോട്ടല്‍ ഉടമയെ ഒന്നാം എതിര്‍ കക്ഷിയാക്കി ഫയല്‍ ചെയ്ത കേസിലാണ് ജേക്കബ് സ്റീഫന്‍ അധ്യക്ഷനും കെ.പി.പത്മശ്രീ അംഗവുമായ ഫോറത്തിന്റെ ഉത്തരവ്.

അധിക വിലയായ 100 രൂപയും നഷ്ടപരിഹാരമായി 2500 രൂപയും കേസ് ചെലവിലേക്ക് 500 രൂപയും ഹോട്ടല്‍ ഉടമ ഹര്‍ജിക്കാരന് പത്തു ദിവസത്തിനകം നല്‍കണം. വീഴ്ച വരുത്തിയാല്‍ പത്തു ശതമാനം പലിശയോടെ എതിര്‍കക്ഷിയില്‍ നിന്നും ഈടാക്കുന്നതിനും അനുവദിച്ചു.

ജില്ലാ ഭരണകൂടം നിശ്ചയിച്ചിട്ടുള്ള വിലകളില്‍ കൂടുതല്‍ വില ഹോട്ടലുകളില്‍ ഭക്ഷണസാധനങ്ങള്‍ക്ക് ഈടാക്കുന്നില്ലെന്ന് ഉറപ്പുവരുത്താന്‍ ആവശ്യമായ പരിശോധന നടത്തണമെന്നും ആവശ്യമെങ്കില്‍ കുറ്റക്കാര്‍ക്ക് എതിരെ കര്‍ശന നടപടി സ്വീകരിക്കണമെന്നും ബന്ധപ്പെട്ട അധികാരികളോട് ഫോറം നിര്‍ദേശിച്ചു.