ചങ്ങനാശേരി: സാന്ത്വന പരിചരണരംഗത്ത് സന്നദ്ധസംഘടനകളുടെ നിസ്വാര്‍ഥ സേവനം മാതൃകാപരമാണെന്ന് ധനമന്ത്രി ഡോ.തോമസ് ഐസക്. ചെത്തിപ്പുഴ സര്‍ഗക്ഷേത്ര കലാസാംസ്കാരിക കേന്ദ്രത്തിന്‍റെ പുതിയ ഓഫീസ് മന്ദിരത്തിന്‍റെയും മുതിര്‍ന്ന പൗരന്മാര്‍ക്കായുള്ള ഡേ കെയര്‍ സെന്‍ററിന്‍റെയും ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. സര്‍ക്കാരിനു ചെയ്യാന്‍ കഴിയാത്ത നിരവധി ജീവകാരുണ്യ പ്രവര്‍ത്തനങ്ങള്‍ സന്നദ്ധ സംഘടനകള്‍ക്കു ചെയ്യാന്‍ കഴിയുമെന്നും ഇത്തരം ശ്രമങ്ങളെ സര്‍ക്കാര്‍ പിന്തുണയ്ക്കുമെന്നും മന്ത്രി പറഞ്ഞു.
ഉദ്യോഗത്തില്നിന്നു വിരമിക്കുന്നവരുടെ കഴിവുകളും സേവനങ്ങളും വിനിയോഗിക്കാന്‍ സമൂഹത്തിനു കഴിയണം. അവകാശങ്ങള്‍ ചോദിക്കാന്‍ കഴിവില്ലാത്ത മാനസിക ശാരീരിക ന്യൂനതയുള്ളവരും വയോജനങ്ങളും അവഗണിക്കപ്പെടരുതെന്നും കീഴ്പ്പെടുത്തുന്ന സമീപനത്തില്‍നിന്നു പരിപാലിക്കുന്ന സമീപനത്തിലേക്ക് നാം മാറണമെന്നും മന്ത്രി തോമസ് ഐസക് കൂട്ടിച്ചേര്‍ത്തു.
സമ്മേളനത്തിനു മുമ്പ് ആര്‍ച്ച്ബിഷപ് മാര്‍ ജോസഫ് പെരുന്തോട്ടം കെട്ടിടത്തിന്‍റെ ആശീര്‍വാദകര്‍മം നിര്‍വഹിച്ചു. സിഎംഐ തിരുവനന്തപുരം പ്രൊവിന്ഷ്യാള് ഫാ. സിറിയക് മഠത്തില്‍ സമ്മേളനത്തില്‍ അധ്യക്ഷത വഹിച്ചു. മുന്‍ മുഖ്യമന്ത്രി ഉമ്മന്‍ ചാണ്ടി മുഖ്യപ്രഭാഷണം നടത്തി. സൂര്യ കൃഷ്ണമൂര്‍ത്തി മുഖ്യാതിഥിയായിരുന്നു. സീനിയര്‍ സിറ്റിസണ്‍സിനുള്ള ഡേകെയറിലെ അംഗത്വ വിതരണം സി.എഫ്.തോമസ് എംഎല്‍എ നിര്‍വഹിച്ചു. ഡേ കെയര്‍ സെന്‍ററിനായി ടോമിച്ചന്‍ മുളകുപ്പാടം സമ്മാനിച്ച വാഹനത്തിന്‍റെ താക്കോല്‍ദാനം അദ്ദേഹം ഫാ. ആന്‍റണി ഇളന്തോട്ടത്തിനു നല്‍കി നിര്‍വഹിച്ചു. ഫാ. ജയിംസ് മുല്ലശേരി മീഡിയാഹാള്‍ ഉദ്ഘാടനവും ജില്ലാപഞ്ചായത്ത് പ്രസിഡന്‍റ് ജോഷി ഫിലിപ്പ് ഉപഹാരസമര്‍പ്പണവും നിര്‍വഹിച്ചു.
വാഴപ്പള്ളി പഞ്ചായത്ത് പ്രസിഡന്‍റ് സണ്ണി മാത്യു ചങ്ങങ്കരി കര്‍മപദ്ധതി പ്രകാശനം ചെയ്തു. എന്‍എസ്എസ് ഡയറക്ടര്‍ ബോര്‍ഡംഗം ഹരികുമാര്‍ കോയിക്കല്‍, വടക്കേക്കര ജമാഅത്ത് ഇമാം അബ്ദുള്‍ സലാം മൗലവി, എസ്എന്‍ഡിപി താലൂക്കു സെക്രട്ടറി പി.എം. ചന്ദ്രന്‍, സര്‍ഗക്ഷേത്ര രക്ഷാധികാരി റവ.ഡോ. പോള്‍ താമരശേരി, ഡയറക്ടര്‍ ഫാ. അലക്സ് പ്രായിക്കളം, കണ്‍വീനര്‍ ജിജി ജോര്‍ജ,് പഞ്ചായത്ത് വൈസ് പ്രസിഡന്‍റ് ലാലിമ്മ ടോമി, സെക്രട്ടറി വര്‍ഗീസ് ആന്‍റണി, ഡോ.ആന്‍റണി തോമസ് എന്നിവര്‍ പ്രസംഗിച്ചു. ഫാ. ജയിംസ് തയ്യില്‍, ഫാ.തോമസ് ചൂളപ്പറമ്പില്‍, ഫാ. തോമസ് ചേന്നാട്ടുശേരി, ഫാ. ജോസ് പൂവാട്ടില്‍, ഫാ. സ്കറിയ എതിരേറ്റ്, ഫാ. ജോഷി ചീരാംകുഴി, ഫാ. ലുദ്വിക് പാത്തിക്കല്‍ എന്നിവര്‍ പരിപാടികള്‍ക്കു നേതൃത്വം നല്‍കി.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.