കേരളത്തിന്‍റെ കാലഹിരണ്‍, മ്മടെ സ്വന്തം വിജയൻ

ഋഷി

ഐ.എം. വിജയനെ ഈ പ്രായത്തിൽ കാൽപന്തു കളിയുടെ രാജകുമാരൻ എന്ന് വിശേഷിപ്പിക്കുന്നത് ശരിയാണോ എന്നാർക്കെങ്കിലും സംശയമുണ്ടെങ്കിൽ കളിക്കളങ്ങളിലേക്ക് വരിക. ഇപ്പോഴും വിജയൻ കളിക്കുന്ന ഫുട്ബോൾ കാണുക..

റിട്ടയർമെന്‍റും പ്രായവുമൊക്കെ അക്കങ്ങളിലും കടലാസിലും മാത്രമാണെന്നും കളിക്കളത്തിൽ ചുറുചുറുക്കോടെ കറുത്തമാൻ കുതിച്ചുപായും പോലെ പായുന്ന ഐ.എം.വിജയൻ ഇന്നും ഇനി കുറേക്കാലവും കാൽപന്തു കളിയുടെ രാജകുമാരൻ തന്നെയാണെന്ന് മനസിലാകും.

വർഷങ്ങൾക്കു മുന്പ് അടിച്ച സിസർകട്ട് ഈ പ്രായത്തിലും വിജയനടിക്കാൻ ഒരു ബുദ്ധിമുട്ടുമില്ല. പന്ത് കാലിൽ കിട്ടിയാൽ ഇപ്പോഴും എതിരാളിയുടെ ഗോൾവല ചലിപ്പിച്ചേ വിജയൻ മൈതാനം വിടൂ.

പണ്ട് തൃശൂർ കോലോത്തുംപാടത്ത് ഫുട്ബോളു തട്ടി നടന്ന വിജയനല്ല ഇപ്പോൾ..പത്മശ്രീ വിജയൻ എന്ന തിടന്പേറ്റിയാണ് വിജയൻ ഇനി തൃശൂരിൽ വിലസുക. കുറേക്കൂടി നേരത്തെ കിട്ടേണ്ടിയിരുന്ന ഒരു പുരസ്കാരം വൈകിയെങ്കിലും കൈക്കുന്പിളിലേക്ക് വന്നണഞ്ഞിരിക്കുന്നു.

തൃശൂർക്കാരും വിജയന്‍റെ ലോകമെങ്ങുമുള്ള ആരാധകരും ഓരോ റിപ്പബ്ലിക് ദിനത്തലേന്നും ആകാംക്ഷയോടെ കാത്തിരിക്കാറുള്ള പത്മപുരസ്കാരപ്രഖ്യാപനത്തിനുള്ള ഒരു കാരണം വിജയനായിരുന്നു.

കഷ്ടപ്പാടും ദാരിദ്ര്യവും ഇല്ലായ്മയും എല്ലാം വിജയൻ അനുഭവിച്ചറിഞ്ഞിട്ടുണ്ട്. അതിൽ നിന്നെല്ലാമാണ് ഇന്നത്തെ പത്മശ്രീ ഐ.എം.വിജയനിലേക്ക് ഈ കറുത്ത മുത്ത് തലയെടുപ്പോടെ വളർന്നത്.

പത്മശ്രീ പുരസ്കാരം തന്‍റെ പേരിനൊപ്പം എഴുതിച്ചേർത്തപ്പെടുന്പോൾ ഫുട്ബോൾ മൈതാനങ്ങളിൽ ആവേശത്തിന്‍റെ ഗോൾവലകൾ കുലുക്കിയ ഇന്ത്യകണ്ട ഏറ്റവും മികച്ച ഫുട്ബോൾ മാന്ത്രികനിത് അഭിമാന മുഹൂർത്തം, അതിലേറെ വർഷങ്ങൾ നീണ്ട കാത്തിരിപ്പിനും അധ്വാനത്തിനും ആത്മസമർപണത്തിനും കാലം കാത്തുവെച്ച ആദരം കൂടിയാവുകയാണ്.

വിജയനെ സ്നേഹിക്കുന്നവർക്ക് ആഹ്ലാദത്തിന്‍റെ ഗോൾവർഷവും... വിജയന്‍റെ അച്ഛനമ്മമാരായ അയനിവളപ്പിൽ മണിയും ഭാര്യ കൊച്ചമ്മുവും ഇപ്പോൾ താമരത്തിളക്കത്തിൽ തങ്ങളുടെ പൊന്നുമോൻ തിളങ്ങുന്നതുകണ്ട് നക്ഷത്രങ്ങളുടെ ലോകത്തിരുന്ന് പൊന്നോമനയുടെ നേട്ടങ്ങൾക്കുമേൽ അനുഗ്രഹം ചൊരിയുന്നുണ്ടാകും.

ഒരുപാട് കാത്തിരിപ്പുകൾക്കൊടുവിൽ

കഴിഞ്ഞ കോവിഡ് കാലത്താണു കോലോത്തുംപാടത്തെ ഫുട്ബോൾ ചരിത്രപുരുഷനെത്തേടി പത്മപുരസ്കാര നോമിനേഷൻ ആദ്യമായെത്തിയത്. തൃശൂർക്കാർക്കു മാത്രല്ല ഐ.എം. വിജയനെ ചെറിയ പരിചയം മാത്രമുള്ളവർക്കുപോലും അതു ത്രില്ലടിപ്പിക്കുന്ന സംഗതിയായിരുന്നു.

പക്ഷെ പ്രതീക്ഷകളും സ്വപ്നങ്ങളും നോമിനേഷനിൽ മാത്രമൊതുങ്ങി.. 2003ൽ അർജുന അവാർഡ് നൽകി രാജ്യം ആദരിച്ചിരുന്നു. പക്ഷേ ഇപ്പോൾ സ്വർണപാദുകമണിഞ്ഞ പ്രിയപ്പെട്ട കളിക്കാരനു പദ്മദളങ്ങൾ കോർത്ത പുരസ്കാരഹാരമണിയിക്കാൻ കാലം അവസരമൊരുക്കിയിരിക്കുന്നു.

ശീതള പാനീയങ്ങൾ വിറ്റുനടന്ന ബാല്യം

തൃശൂർ മുൻസിപ്പൽ സ്റ്റേഡിയത്തിൽ ഫുട്ബോൾ മത്സരങ്ങൾക്കിടെ ശീതളപാനീയങ്ങൾ വിറ്റുനടന്നിരുന്ന വിജയൻ എന്ന പയ്യനിലേക്കൊരു ഫ്ളാഷ്ബാക്ക് കട്ട്. ഒരു സുപ്രഭാതത്തിൽ വിജയൻ നേടിയെടുത്ത സൗഭാഗ്യങ്ങളോ നേട്ടങ്ങളോ അല്ല ഒന്നും.

അച്ഛൻ മണി വാഹനാപകടത്തിൽ മരിച്ചശേഷം ജീവിതം കഷ്ടപ്പാടുകൾ നിറഞ്ഞതായിരുന്നുവെന്നു വിജയൻ പലപ്പോഴും പറയാറുണ്ട്. അമ്മ കൂലിവേല എടുത്താണ് മക്കളെ വളർത്തിയത്.

പഠിപ്പല്ല, പട്ടിണിയുടെ ഫസ്റ്റ് ക്ലാസും ഡിസ്റ്റിംഗഷുമായിരുന്നു വിജയന്‍റെ കാലങ്ങൾ. വയറിലൊന്നുമുണ്ടാകാറില്ലെങ്കിലും മനസു നിറയെ പന്തുകളിയായിരുന്നു. തൃശൂർ സിഎംഎസ് സ്കൂളിൽ പഠിക്കുന്പോൾ അഞ്ചിൽ അഞ്ചു തവണ തോറ്റ വിജയൻ പന്തുകളിയിൽ തന്‍റെ പ്രതിഭ പുറത്തെടുത്തു.

ജില്ല, സംസ്ഥാനതല ഫുട്ബോൾ മത്സരങ്ങളിൽ വരാൻ പോകുന്ന കൊടുങ്കാറ്റിന്‍റെ ശീൽക്കാരം കളിക്കളത്തിൽ നിറഞ്ഞു. ജോസ് പറന്പനാണു തന്‍റെ കഴിവ് ആദ്യം തിരിച്ചറിയുന്നതെന്നു വിജയൻ പറഞ്ഞിട്ടുണ്ട്.

വിജയനെ ആദ്യമായി മൂന്നുവർഷത്തെ ഫുട്ബോൾ ക്യാന്പിൽ ചേർത്തതു ജോസ് പറന്പനായിരുന്നു. അന്നു വിജയനെ പരിശീലിപ്പിച്ചത് മുൻ അന്താരാഷ്ട്ര താരം ടി.കെ. ചാത്തുണ്ണിയും. എട്ടാം ക്ലാസിൽ പഠിക്കുന്പോൾ വിജയൻ പോലീസിൽ കയറി.

അന്നു വിജയന് വയസ് പതിനേഴ് കഴിഞ്ഞിരുന്നു. തോറ്റുതോറ്റ് എട്ടിൽ പതിനേഴാം വയസു പിന്നിട്ടപ്പോൾ കേരള പോലീസിൽ പണി കിട്ടി. പതിനെട്ടു തികയാനായി ആറു മാസം പോലീസ് ടീമിൽ ഗസ്റ്റ് കളിച്ചു. തികഞ്ഞതോടെ പോലീസ് ടീമിൽ ഔദ്യോഗിക ഇടം പതിച്ചുകിട്ടി. പിന്നെ വിജയനു തിരിഞ്ഞുനോക്കേണ്ടി വന്നിട്ടില്ല.

സൂപ്പർ പെർഫോമെൻസുകളുടെ കാൽപ്പന്തുകാലം

കേരളംവിട്ടു ടീം മാറിക്കളിച്ചപ്പോൾ പരിഭവങ്ങളുണ്ടായിരുന്നെങ്കിലും ആരാധകർ തങ്ങളുടെ മുത്തിനെ ഹൃദയത്തിൽനിന്ന് പടിയിറക്കിയില്ല. ഏതൊരു കായികതാരത്തേയുമെന്ന പോലെ വിജയനും കരിയറിൽ കയറ്റങ്ങൾപോലെത്തന്നെ ഇറക്കങ്ങളുമുണ്ടായിട്ടുണ്ട്. ഏങ്കിലും ഫുട്ബോൾ വിജയങ്ങൾ ഐ.എം. വിജയനനെ നിത്യഹരിത നായകനാക്കി.

തൃശൂർ കോർപറേഷൻ സ്റ്റേഡിയത്തിൽ രാവിലെ ഇടയ്ക്കുള്ള ജോഗിംഗിന് എത്തി വെറുതെ പന്തുതട്ടാൻ തുടങ്ങുന്പോൾ വിജയനു ചുറ്റും ഇന്നും ആൾക്കൂട്ടം നിറയും. വെറുതെ ഒരു പാസാണെങ്കിൽപോലും അതിനുണ്ട് കാലം മോഹിക്കുന്ന വിജയൻ ടച്ച്!

വർഷങ്ങൾക്കുമുന്പ് സന്തോഷ് ട്രോഫി മത്സരങ്ങൾക്കിടയിൽ കാണികൾക്ക് സോഡ വിറ്റു നടന്ന ആ പയ്യന്‍റെ പേരിൽ ഇന്ന് അതേ നഗരത്തിനരികെ ഒരു സ്റ്റേഡിയസമുച്ചയം ഒരുങ്ങിയിരിക്കുന്നു. അതു കാലം കാത്തുവച്ച കൗതുകം.

വെള്ളിത്തിരയിൽ ശാന്തനായും എതിരാളിയെ വിറപ്പിക്കുന്ന വില്ലനായും വിജയൻ ആരാധകർക്കു മുന്പിലെത്തി.

ഗോൾ അക്കൗണ്ട് സന്പന്നം

1992ൽ ഇന്ത്യൻ ഫുട്ബോൾ ടീമിനായി കളിക്കാനിറങ്ങിയ 72 മത്സരങ്ങളിൽ നിന്ന് 29 ഗോൾ നേടി. 1992 മേയ് ഒന്പതിന് പാകിസ്താനെതിരേയായിരുന്നു ആദ്യഗോൾ. 2003ൽ ഉത്തരകൊറിയക്കെതിരേ കളിച്ചാണ് അന്താരാഷ്ട്ര ഫുട്ബോളിൽനിന്ന് വിരമിച്ചത്.

മൂന്ന് തവണ സാഫ് ചാന്പ്യൻഷിപ്പ് നേടിയ ടീമിൽ അംഗമായി. 1993 നെഹ്റുകപ്പിൽ മികച്ച താരത്തിനുള്ള പുരസ്കാരം നേടി. അഖിലേന്ത്യാ ഫുട്ബോൾ ഫെഡറേഷന്‍റെ മികച്ചതാരത്തിനുള്ള പുരസ്കാരം മൂന്നു തവണ നേടി.

കേരള പോലീസ്, മോഹൻ ബഗാൻ, ജെ.സി.ടി. മിൽസ് ടീമുകൾക്കൊപ്പം ഫെഡറേഷൻ കപ്പും കേരളം, ബംഗാൾ ടീമുകൾക്കൊപ്പം സന്തോഷ് ട്രോഫിയും നേടി. എഫ്.സി.കൊച്ചിൻ, ഈസ്റ്റ് ബംഗാൾ, ചർച്ചിൽ ബ്രദേഴ്സ് ക്ലബ്ബുകൾക്കായും കളിച്ചു.

കാൽപന്തുകളിയിൽ രാജകുമാരൻ

വീട്ടിൽ കൊച്ചുമക്കളുടെ അപ്പൂപ്പൻ തൃശൂർക്കാരുടെ ചുള്ളൻ പ്രയോഗം ഏറ്റവും ചേരുക ഐ.എം.വിജയനാണെന്ന് പറയാറുണ്ട്. ഫുട്ബോൾ ഗ്രൗണ്ടിൽ കാൽപന്തുകളിയുടെ രാജകുമാരൻ എന്ന് വിശേഷിപ്പിക്കുന്ന വിജയൻ വീട്ടിൽ കൊച്ചുമക്കളുടെ പ്രിയങ്കരനായ അപ്പൂപ്പനാണ്.

പക്ഷേ കണ്ടാൽ അപ്പൂപ്പനായെന്ന് ആരും പറയില്ല. കാവിമുണ്ടും കറുപ്പോ കടുംകളർ ഷർട്ടോ ധരിച്ച് നെറ്റിയിൽ കുങ്കുമക്കുറിയണിഞ്ഞ് നിറചിരിയോടെ വിജയൻ തൃശൂരിലൂടെ പോകുന്പോൾ ന്താ ചുള്ളാ എന്ന് ചോദിക്കുന്നവരുണ്ട്...

ശാന്തം സിനിമയിൽ അഭിനയിക്കുന്പോൾ വിജയന്‍റെ കഥാപാത്രം കൈത്തണ്ടയിൽ കറുത്ത ചരട് കെട്ടിയിരുന്നു. ഷൂട്ടിംഗ് കഴിഞ്ഞ് ചരട് അഴിച്ചപ്പോൾ ചരടു കെട്ടിയ ഭാഗം വെളുത്തിരുന്നു. ഇത് കണ്ട് വിജയൻ സംവിധായകൻ ജയരാജിനോടു പറഞ്ഞത്രെ - ജയരാജേട്ടാ ഇങ്ങനെ വെളുക്കുമെങ്കിൽ ദേഹം മുഴുവൻ ചരടു കെട്ടായിരുന്നു...

ഏപ്രിലിലാണ് റിട്ടയർമെന്‍റ്

മലപ്പുറം എംഎസ്പിയിൽ കമാൻഡായ ഐ.എം.വിജയൻ ഈ വരുന്ന ഏപ്രിലിൽ സർവീസിൽ നിന്ന് വിരമിക്കും.പോലീസ് സേനയിൽ തന്‍റെ അവസാനത്തെ റിപ്പബ്ലിക് ദിന പരേഡിന് ഒരുങ്ങുന്പോഴാണ് പത്മപുരസ്കാരത്തിന്‍റെ ആഹ്ലാദകരമായ പ്രഖ്യാപന വാർത്ത വിജയനെ തേടിയെത്തിയത്.

കഴിഞ്ഞ ഞായറാഴ്ച പോലീസ് സേനയ്ക്കൊപ്പമുള്ള അവസാന റിപ്പബ്ലിക് പരേഡിനു തയാറെടുക്കുന്പോഴാണ് പുരസ്കാരവാർത്ത അറിയുന്നത്. എനിക്കിത് ഇരട്ടിമധുരമാണ്. ഏപ്രിലിൽ സർവീസിൽനിന്ന് വിരമിക്കുന്നതിന് മുന്പ് കിട്ടിയതിൽ സന്തോഷം - വിജയന്‍റെ പ്രതികരണം അതായിരുന്നു.