നെല്ലിക്ക തിന്നാല്‍ ആദ്യം കയ്ക്കും പിന്നെ മധുരിക്കും എന്നാണല്ലോ പഴമൊഴി. വായുടെ രുചിവച്ചാണ് ഇങ്ങനെ പറയുന്നതെങ്കിലും നെല്ലിക്ക കഴിക്കുന്നത് നിരവധി ആരോഗ്യ ഗുണങ്ങള്‍ക്ക് വഴിതെളിക്കും.
അതായത് വായുടെ രുചിമാത്രമല്ല, ശരീരത്തിന് മുഴുവന്‍ മധുരതരമാണ് നെല്ലിക്ക എന്നു ചുരുക്കം. ഉയര്‍ന്ന വിറ്റാമിന്‍ സി ഉള്‍പ്പെടെയുള്ള ആന്‍റിഓക്‌സിഡന്‍റ് ഗുണങ്ങള്‍ നെല്ലിക്കയില്‍ അടങ്ങിയിരിക്കുന്നു.
പ്രതിരോധശേഷി, ദഹനം, ഹൃദയാരോഗ്യം, ചര്‍മ ആരോഗ്യം തുടങ്ങി നിരവധി ഗുണങ്ങള്‍ നെല്ലിക്ക കഴിക്കുന്നതിലൂടെ ലഭിക്കും. നെല്ലിക്ക കഴിക്കുന്നതിന്‍റെ ഗുണങ്ങള്‍ ഇവയാണ്...
വിറ്റാമിന്‍ സി, പ്രതിരോധം
ഫ്രീ റാഡിക്കലുകളെ നിര്‍വീര്യമാക്കാന്‍ സഹായിക്കുന്ന ശക്തമായ ആന്‍റിഓക്‌സിഡന്‍റായ വിറ്റാമിന്‍ സിയുടെ സമ്പന്നമാണ് നെല്ലിക്ക. രോഗപ്രതിരോധ പ്രവര്‍ത്തനം ശക്തിപ്പെടുത്തുകയും കൊളാജന്‍ ഉല്‍പാദനം ഉത്തേജിപ്പിച്ച് ചര്‍മത്തിന്‍റെ ആരോഗ്യം പ്രോത്സാഹിപ്പിക്കുകയും ചെയ്യും.
അതുപോലെ ഇരുമ്പ് ആഗിരണം ചെയ്യാനും ഇത് സഹായകമാണ്. വിറ്റാമിന്‍ സി, ആന്‍റിഓക്‌സിഡന്‍റുകള്‍, ആന്‍റി-ഇന്‍ഫ്‌ളമേറ്ററി സംയുക്തങ്ങള്‍ എന്നിവ ശരീരത്തിലെ രോഗപ്രതിരോധ സംവിധാനത്തെ ശക്തിപ്പെടുത്തുന്നു.
അണുബാധകളോട് പോരാടാനും വീക്കം കുറയ്ക്കാനും രോഗങ്ങളില്‍ നിന്ന് ശരീരത്തെ മുക്തമാക്കാനും ഇതിലൂടെ സാധിക്കും.
ഹൃദയാരോഗ്യം, ദഹനം
നെല്ലിക്കയില്‍ ഡയറ്ററി ഫൈബര്‍ അടങ്ങിയിട്ടുണ്ട്. ഇത് ദഹനത്തിന് സഹായിക്കുകയും കൃത്യമായി മലവിസര്‍ജ്ജനം സാധ്യമാക്കുകയും ചെയ്യും. മലബന്ധം തടയുക, കുടലിന്‍റെ ആരോഗ്യം മെച്ചപ്പെടുത്തുക, പോഷകങ്ങളുടെ ആഗിരണം വര്‍ധിപ്പിക്കുക എന്നിവ ഇതിലൂടെ സാധിക്കും.
മാത്രമല്ല, കൊളസ്ട്രോളിന്റെ അളവ് കുറയ്ക്കാനും ചീത്ത കൊളസ്ട്രോളിന്റെ ഓക്‌സീകരണം തടയാനും നെല്ലിക്ക സഹായിക്കുന്നു. രക്തസമ്മര്‍ദം കുറയ്ക്കാനും മൊത്തത്തിലുള്ള ഹൃദയ ആരോഗ്യത്തെ സംരക്ഷിക്കാനും ഇത് വഴിയൊരുക്കുന്നു.
ചര്‍മം, ഷുഗര്‍
നെല്ലിക്കയിലെ ആന്‍റിഓക്‌സിഡന്‍റുകള്‍ ചര്‍മകോശങ്ങളെ ഓക്‌സിഡേറ്റീവ് സമ്മര്‍ദത്തില്‍ നിന്ന് സംരക്ഷിക്കും. കൊളാജന്‍ ഉത്പാദനത്തെ ഉത്തേജിപ്പിക്കും. ഇത് ചര്‍മത്തില്‍ ചുളിവുകളും നേര്‍ത്ത വരകളും കുറയ്ക്കാനും ആരോഗ്യകരമായ ചര്‍മം നിലനിര്‍ത്താനും സഹായിക്കും.
മാത്രമല്ല, കാര്‍ബോഹൈഡ്രേറ്റ് മെറ്റബോളിസം നിയന്ത്രിക്കാനും ഇന്‍സുലിന്‍ സെന്‍സിറ്റിവിറ്റി മെച്ചപ്പെടുത്താനും സഹായിക്കുന്ന ക്രോമിയം നെല്ലിക്കയില്‍ അടങ്ങിയിട്ടുണ്ട്.
ഇത് രക്തത്തിലെ പഞ്ചസാരയുടെ അളവ് സ്ഥിരപ്പെടുത്തുകയും പ്രമേഹ സാധ്യത കുറയ്ക്കുകയും ചെയ്യും.
ശരീരഭാരം, കരള്‍ സംരക്ഷണം
നെല്ലിക്കയിലെ നാരുകളുടെ ഉള്ളടക്കം കൂടുതല്‍ നേരം വിശപ്പില്ലാതിരിക്കാനും മൊത്തത്തിലുള്ള കലോറി ഉപഭോഗം കുറയ്ക്കാനും സഹായകമാണ്. അങ്ങനെ ശരീരഭാരം കുറയ്ക്കാന്‍ സഹായിക്കുകയും അമിതഭക്ഷണം തടയുകയും ചെയ്യും.
കരളിനെ വിഷാംശം ഇല്ലാതാക്കാനും അതിന്‍റെ പ്രവര്‍ത്തനം മെച്ചപ്പെടുത്താനും സഹായിക്കുന്ന ഗുണങ്ങളും നെല്ലിക്കയിലുണ്ട്. നെല്ലിക്ക കരളിന്‍റെ ആരോഗ്യം വര്‍ധിപ്പിക്കുകയും വിഷാംശം ഇല്ലാതാക്കാന്‍ സഹായിക്കുകയും ചെയ്യുന്നു.
ക്വെര്‍സെറ്റിന്‍, ഗാലിക് ആസിഡ് തുടങ്ങിയ സംയുക്തങ്ങള്‍ നെല്ലിക്കയില്‍ അടങ്ങിയിട്ടുണ്ട്. ഇത് ശരീരത്തിലെ വിട്ടുമാറാത്ത വീക്കം കുറയ്ക്കുകയും സന്ധിവാതം പോലെയുള്ള രോഗസാധ്യത കുറയ്ക്കുകയും ചെയ്യുന്നു.
കാഴ്ചശക്തി
നെല്ലിക്കയിലെ കരോട്ടിന്‍ കാഴ്ച ശക്തി മെച്ചപ്പെടുത്താന്‍ സഹായകമാണ്. പ്രായവുമായി ബന്ധപ്പെട്ട മാക്യുലര്‍ ഡീജനറേഷന്‍ സാധ്യത കുറയ്ക്കാന്‍ ഇതിനു സാധിക്കും.
ഓക്‌സിഡേറ്റീവ് സമ്മര്‍ദത്തില്‍ നിന്ന് കണ്ണുകളെ സംരക്ഷിച്ച് മൊത്തത്തിലുള്ള കണ്ണിന്‍റെ ആരോഗ്യം വര്‍ധിപ്പിക്കാന്‍ നെല്ലിക്കയ്ക്ക് സാധിക്കും.