പത്ത് വിക്കറ്റ് വീഴ്ത്തി മിന്നുമണി; മികച്ച പ്രകടനവുമായി ടീം ഇന്ത്യ
Saturday, August 24, 2024 12:07 AM IST
ഗോള്ഡ്കോസ്റ്റ്: ഓസ്ട്രേലിയയിലെ ഗോള്ഡ് കോസ്റ്റില് ഓസ്ട്രേലിയ എ വനിതാ ടീമിനെതിരെ നടക്കുന്ന അനൗദ്യോഗിക മത്സരത്തില് മികച്ച പ്രകടനം നടത്തി മലയാളി താരം മിന്നുമണി. രണ്ട് ഇന്നിംഗ്സുകളിലുമായി താരം പത്ത് വിക്കറ്റ് ഇതുവരെ വീഴ്ത്തി.
രണ്ടാം ദിനത്തിലെ കളി അവസാനിച്ചപ്പോള് ഓസ്ട്രേലിയ എ ടീം ഏഴ് വിക്കറ്റ് നഷ്ടത്തില് 164 റണ്സ് എന്ന നിലയിലാണ്. അഞ്ച് വിക്കറ്റ് വീഴ്ത്തിയ മിന്നുമണിയുടെ ബൗളിംഗിന് മുന്നില് ഓസീസ് ടീമിന് അടിപതറി.
ആദ്യ ഇന്നിംഗ്സിലും താരം അഞ്ച് വിക്കറ്റ് വീഴ്ത്തിയിരുന്നു.പ്രിയ മിസ്രയും സത്ഗാറെയും ഓരോ വിക്കറ്റ് വീതം നേടി.
ആദ്യ ഇന്നിംഗ്സില് 212 റണ്സാണ് ഓസ്ട്രേലിയ എ വനിതാ ടീം നേടിയത്. മറുപടി ബാറ്റിംഗിനിറങ്ങിയ ഇന്ത്യ എ വനിതകള്ക്ക് 184 റണ്സാണ് നേടാനായത്. നിലവില് ഓസ്ട്രേലിയയ്ക്ക് 192 റണ്സ് ലീഡാണുള്ളത്.