പത്തനംതിട്ട: കായിക താരത്തിന്‍റെ വെളിപ്പെടുത്തലിനു പിന്നാലെ രജിസ്റ്റർചെയ്ത പീഡനക്കേസിൽ അറസ്റ്റിലായവരുടെ എണ്ണം 20 ആയി. റാന്നിയിൽ നിന്ന് പിടിയിലായ ആറ് പ്രതികളുടെ അറസ്റ്റുകൂടി ഇന്ന് രേഖപ്പെടുത്തി. നേരത്തേ കേസിൽ 14 പേർ അറസ്റ്റിലായിരുന്നു.
രണ്ട് വാഹനങ്ങളും പോലീസ് കസ്റ്റഡിയിലെടുത്തിട്ടുണ്ട്. അറസ്റ്റിലായവരിൽ മൂന്നു പേർ ഓട്ടോറിക്ഷ തൊഴിലാളികളാണ്.
പിടിയിലായവരിൽ നവവരനും ഉൾപ്പെട്ടിട്ടുണ്ട് എന്നാണ് വിവരം. സംഭവത്തിന്‍റെ കൂടുതൽ വിശദാംശങ്ങളും പോലീസ് പുറത്തുവിട്ടിട്ടുണ്ട്.
ഇന്നലെ അറസ്റ്റിലായ സുബിൻ ആണ് പെൺകുട്ടിയെ ആദ്യം പീഡിപ്പിച്ചത്. പീഡനത്തിന്‍റെ ദൃശ്യങ്ങൾ സുബിൻ മൊബൈൽ ഫോണിൽ പകർത്തി പ്രചരിപ്പിച്ചു.
തുടർന്ന് ഇയാൾ പെൺകുട്ടിയെ സുഹൃത്തുക്കൾക്ക് മുന്നിൽ എത്തിച്ചുവെന്നും പോലീസ് പറയുന്നു. നേരത്തെ കേസിൽ പ്ലസ് ടു വിദ്യാർഥി ഉൾപ്പെടെ 14 പേർ അറസ്റ്റിലായിരുന്നു.
കായികതാരമായ പെണ്‍കുട്ടിയാണ് വെളിപ്പെടുത്തൽ നടത്തിയത്. 13-ാം വയസുമുതല്‍ പീഡനത്തിനിരയായെന്നാണ് പതിനെട്ടുകാരി പറഞ്ഞത്. കഴിഞ്ഞ അഞ്ചുവര്‍ഷത്തിനിടെ 60 പേര്‍ പീഡിപ്പിച്ചെന്ന് പെൺകുട്ടി പറഞ്ഞു.