കോട്ടയം: കനത്ത മഴയിൽ റോഡിൽ നിന്ന് തെന്നിമാറിയ സ്വകാര്യ ബസ് കെഎസ്ആര്‍ടിസി ബസിലിടിച്ചു. കോട്ടയം കൊടുങ്ങൂരിന് സമീപം പതിനേഴാംമൈലിൽ ആയിരുന്നു അപകടം.
മുണ്ടക്കയം ഭാഗത്തേക്ക്‌ പോകുകയായിരുന്ന സ്വകാര്യ ബസാണ് മഴയത്ത് തെന്നിമാറി മതിലിൽ ഇടിച്ചതിനുശേഷം കെഎസ്ആര്‍ടിസി ബസിലിടിച്ച് നിന്നത്. അപകടത്തിൽ ബസിൽ യാത്ര ചെയ്ത ആർക്കും പരിക്കില്ല.
കെഎസ്ആര്‍ടിസി ബസിന്‍റെ പിന്നിൽ ഇടിച്ച് ബൈക്ക് യാത്രക്കാരന് പരിക്കേറ്റു. സ്വകാര്യ ബസ് പതിനേഴാം മൈലിലെ വളവ് തിരുയുന്നതിനായി വേഗത കുറച്ചപ്പോള് റോഡിൽ നിന്ന് തെന്നിമാറി മതിലില്‍ ഇടിക്കുകയായിരുന്നു.
ഇതോടെ ബസിന്‍റെ പിൻഭാഗം വെട്ടിതിരിഞ്ഞ് എതിര്‍ഭാഗത്ത് നിന്നും വരുകയായിരുന്ന കെഎസ്ആര്‍ടിസി ബസിന്‍റെ മുൻഭാഗത്തും ഇടിക്കുകയായിരുന്നു. അപകടത്തെ തുടർന്ന കെകെ റോഡിൽ വൻ ഗതാഗത കുരുക്ക് അനുഭവപ്പെട്ടു. പോലീസ് സ്ഥലത്ത് എത്തി മേൽ നടപടികൾ സ്വീകരിച്ചു.