ഡര്‍ബന്‍: ദക്ഷിണാഫ്രിക്കയ്ക്കെതിരായ ഒന്നാം ടി20യിൽ ഇന്ത്യയ്ക്ക് കൂറ്റൻ സ്കോർ. ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ സഞ്ജു സാംസണിന്‍റെ തകർപ്പൻ സെഞ്ചുറി മികവിൽ എട്ടു വിക്കറ്റ് നഷ്ടത്തിൽ 202 റൺസ് നേടി.
50 പന്തില്‍ 10 സിക്സും ഏഴ് ഫോറും പറത്തി 107 റണ്‍സെടുത്ത സഞ്ജുവാണ് ഇന്ത്യയുടെ ടോപ് സ്കോറര്‍. ഏഴു റൺസ് മാത്രമെടുത്ത അഭിഷേക് ശർമയെ തുടക്കത്തിൽ തന്നെ നഷ്ടമായെങ്കിലും സഞ്ജു ടീമിനെ മികച്ച സ്കോറിലേക്ക് നയിച്ചു.
ക്യാപ്റ്റൻ സൂര്യകുമാർ യാദവ് (17 പന്തിൽ 21), തിലക് വർമ (18 പന്തിൽ 33) എന്നിവരും ബാറ്റിങ്ങിൽ തിളങ്ങി. റിങ്കു സിംഗ് (11) അക്ഷർ പട്ടേൽ (ഏഴ്), ഹാർദിക് പാണ്ഡ്യ (രണ്ട്), അർഷ്ദീപ് സിംഗ് (അഞ്ച്), രവി ബിഷ്ണോയി (ഒന്ന്) എന്നിങ്ങനെയാണ് മറ്റ് ഇന്ത്യൻ താരങ്ങളുടെ സ്കോറുകൾ. ദക്ഷിണാഫ്രിക്കക്കായി ജെറാള്‍ഡ് കോയെറ്റ്സെ മൂന്ന് വിക്കറ്റെടുത്തു.