പുതിയ ജയിംസ് ബോണ്ട് ചിത്രത്തിന്റെ പേര് ലോഞ്ചു ചെയ്തു
Thursday, December 4, 2014 9:57 AM IST
ലണ്ടന്‍: ജയിംസ് ബോണ്ട് 007 പുതിയ ചിത്രത്തിന് പേരിട്ടു. 'സ്പെക്റ്റര്‍' എന്ന ഇരുപത്തിനാലാം ജയിംസ് ബോണ്ട് എഡിഷനില്‍ ഡാനിയേല്‍ ക്രെയ്ഗ് നായകനും വില്ലനായി രണ്ടു തവണ ഒസ്കാര്‍ നേടിയ ക്രിസ്റോഫ് വാല്‍റ്റ്സും ആയിരിക്കുമെന്ന് ചിത്രത്തിന്റെ സംവിധായകനും ഒസ്കാര്‍ വിന്നറുമായ സാം മെന്‍ഡസ് വെളിപ്പെടുത്തി.

അതോടൊപ്പം ചിത്രത്തിലെ അഭിനേതാക്കളുടെയും പേരുകള്‍ പ്രഖ്യാപിച്ചു. ബോണ്ട് ഗേളായി ഇറ്റാലിന്‍ നടി മോനിക്ക ബെലൂസി, ഫ്രഞ്ചു നടിയായ ലിയാ സൈഡൂക്സ് എന്നിവരും അഭിനയിക്കും. ചിത്രത്തില്‍ ഇവരുടെ പേരുകള്‍ യഥാക്രമം ലൂസിയാ സിയാറാ, മെഡലിന്‍ സ്വാന്‍ എന്നിങ്ങനെയാണ്.

നാല്‍പ്പത്തിയാറുകാരനായ ഡാനിയേല്‍ ക്രെയിഗ് ഇത് നാലാം തവണയാണ് ബോണ്ടായി അഭിനയിക്കുന്നത്. കാസിനോ റോയല്‍ (2006), ക്വാണ്ടം ഓഫ് സൊലാസ് (2008), സ്കൈഫാള്‍ (2012) എന്നിവയായിരുന്നു ക്രെയിഗിന്റെ മുന്‍ ബോണ്ട് ചിത്രങ്ങള്‍. സര്‍ സീന്‍ കോണറി, ജോര്‍ജ് ലാസന്‍ബി, സര്‍ റോജന്‍ മോറെ, തിമോത്തി ഡാല്‍ട്ടണ്‍, പിയേഴ്സ് ബ്രോസ്നാം എന്നിവരാണ് സീക്രട്ട് ഏജന്റ് ജയിംസ് ബോണ്ട് 007 എന്ന കഥാപാത്രത്തെ അനശ്വരമാക്കിയത്.

പുതിയ ബോണ്ട് ചിത്രത്തിലെ കാര്‍ അഷ്റ്റോന്‍ മാര്‍ട്ടിന്‍ കമ്പനിയുടെ ഡിബി 10 എന്ന സീരിയലിലുള്ളതാണ്.

പുതിയ ബോണ്ട് ചിത്രം 2015 ഒക്ടോബര്‍ 23 ന് തീയറ്ററുകളിലെത്തും.

റിപ്പോര്‍ട്ട്: ജോസ് കുമ്പിളുവേലില്‍
Copyright @ 2022 , Rashtra Deepika Ltd.