മലയോര സംരക്ഷണ സമിതി കര്‍ഷക മഹാസംഗമം നടത്തും : Deepika.com Nattu Visesham

PATHANAMTHITTA

മലയോര സംരക്ഷണ സമിതി കര്‍ഷക മഹാസംഗമം നടത്തും

Saturday, April 20, 2024 3:51 AM IST

കോട്ടയം: വന്യജീവിശല്യം ശാശ്വതമായി പരിഹരിക്കണമെന്നാവശ്യപ്പെട്ട് ഇടുക്കി, പത്തനംതിട്ട മണ്ഡലങ്ങളിലെ മൂന്നു മുന്നണി സ്ഥാനാര്‍ഥികളെയും പങ്കെടുപ്പിച്ചു മലയോര സംരക്ഷണ സമിതി കര്‍ഷക മഹാസംഗമം നടത്തും.

കോരുത്തോട് സെന്‍റ് ജോര്‍ജ് സ്റ്റേഡിയത്തില്‍ നാളെ നടക്കുന്ന സംഗമത്തില്‍ കോരുത്തോട്, എരുമേലി, പെരുന്നാട്, പെരുവന്താനം, മുണ്ടക്കയം, കൊക്കയാര്‍ പഞ്ചായത്തുകളിലെ സ്ഥലവാസികള്‍ പങ്കെടുക്കും. മലയോരമേഖലയിലും വനാതിര്‍ത്തിയിലും താമസിക്കുന്ന കര്‍ഷകര്‍ നേരിടുന്ന വന്യജീവിശല്യം, മരം മുറിക്കലുമായി ബന്ധപ്പെട്ട വിഷയങ്ങള്‍, പട്ടയസംബന്ധമായ പ്രതിസന്ധികള്‍ എന്നിവ സ്ഥാനാര്‍ഥികളുമായി ചര്‍ച്ച ചെയ്യും.

തുടര്‍ച്ചയായി വന്യജീവി ആക്രമണത്തില്‍ മനുഷ്യരും വളര്‍ത്തുമൃഗങ്ങളും കൊല്ലപ്പെടുകയും കൃഷികള്‍ നശിപ്പിക്കപ്പെടുകയും ചെയ്യുന്ന സാഹചര്യമാണു നേരിടുന്നത്. കാര്‍ഷികവൃത്തിയില്‍ ഏര്‍പ്പെടുന്നതിനും ദൈനംദിന ആവശ്യങ്ങള്‍ക്കും ജനങ്ങള്‍ക്ക് പുറത്തിറങ്ങി നടക്കാന്‍ പറ്റാത്ത സാഹചര്യം മാറണം.

ജനവാസ മേഖലയില്‍ ജീവഭയം കൂടാതെ സഞ്ചരിക്കുന്നതിനും ഭീതി കൂടാതെ കൃഷി ചെയ്യുന്നതിനും സാധിക്കുന്ന വിധത്തില്‍ വന്യമൃഗങ്ങള്‍ വനത്തില്‍നിന്നു പുറത്തുവരാന്‍ സാധിക്കാത്തതും വനവും വന്യജീവികളും സംരക്ഷിക്കപ്പെടുന്നതുമായ നടപടി ഉണ്ടാകാനുള്ള നിര്‍ദേശങ്ങള്‍ സംഗമത്തില്‍ നിര്‍ദേശിക്കും.

മൃഗങ്ങളെ വനത്തിനുള്ളില്‍ നിയന്ത്രിക്കുന്ന സംവിധാനവും വനാതിര്‍ത്തിയിലൂടെ ഒരു സഞ്ചാരപാതയും ഉണ്ടായാല്‍ വലിയ ടൂറിസം സാധ്യതകൂടി മേഖലയില്‍ സൃഷ്ടിക്കപ്പെടുമെന്ന നിര്‍ദേശവും കര്‍ഷകര്‍ മുന്നോട്ട് വയ്ക്കുന്നു.

പത്രസമ്മേളനത്തില്‍ മലയോര സംരക്ഷണ സമിതി ജനറല്‍ കണ്‍വീനര്‍ സണ്ണി വെട്ടുകല്ലേല്‍, ചെയര്‍മാന്‍ പി.ജെ. സെബാസ്റ്റ്യന്‍, ദിവാകരന്‍ പുത്തന്‍പുരയ്ക്കല്‍, ഷിബു കുറുമ്പനക്കല്‍, ജോഷി മാത്യു പൂവക്കുളം എന്നിവര്‍ പങ്കെടുത്തു.