പത്തനംതിട്ട: 26 മുതൽ പാരീസിൽ നടക്കുന്ന ഒളിമ്പിക്സിന് മുന്നോടിയായുള്ള വാരാഘോഷത്തിന് ജില്ലയിൽ തുടക്കം. വാരാഘോഷത്തിന് വിളംബരം കുറിച്ച് ഘോഷയാത്ര നടന്നു. ജില്ലാ ഒളിമ്പിക് അസോസിയേഷന്റെയും ജില്ലാ ഭരണകേന്ദ്രത്തിന്റെയും ജില്ലാ സ്പോർട്സ് കൗൺസിലിന്റെയും സംയുക്താഭിമുഖ്യത്തിലാണ് വിളംബര ഘോഷയാത്ര നടത്തിയത്.
ജില്ലാ പോലീസ് മേധാവി വി. അജിത് ദേശീയ കായികതാരങ്ങളായ അതുൽ പ്രസൂൺ, രേവതി എസ്.നായർ എന്നിവർക്ക് ദീപശിഖ കൈമാറി. ഘോഷയാത്ര ഫ്ലാഗ് ഓഫും ചെയ്തു. സെന്റ് പീറ്റേഴ്സ് ജങ്ഷനിൽ നിന്ന് ആരംഭിച്ച ഘോഷയാത്ര നഗരം ചുറ്റി ഹെഡ് പോസ്റ്റ് ഓഫീസിന് സമീപം സമാപിച്ചു.
മുത്തുക്കുടകളാലും വാദ്യമേളങ്ങളാലും വർണാഭമായി ഘോഷയാത്രയിൽ സംസ്ഥാന, ദേശീയ കായിക താരങ്ങൾ, എൻസിസി, എൻഎസ്എസ്, നഴ്സിംഗ്, റോളർ സ്കേറ്റിംഗ്, സ്റ്റുഡന്റ് പൊലീസ് കേഡറ്റ്, സ്കൗട്ട്, റെഡ് ക്രോസ്, കരാട്ടെ, കളരിപ്പയറ്റ് താരങ്ങൾ, സ്കൂൾ-കോളജ് വിദ്യാർഥികൾ, പൊതുജനങ്ങൾ അടക്കം ആയിരക്കണക്കിനാളുകളാണ് അണിനിരന്നത്. നഗരത്തിൽ കളരിപ്പയറ്റ്, റോളർ സ്കേറ്റിംഗ് പ്രകടനങ്ങളും അരങ്ങേറി.
റാലിയിൽ മികച്ച പങ്കാളിത്തവും പ്രകടനവും കാഴ്ചവച്ച സ്കൂളുകൾക്ക് നഗരസഭാ ചെയർമാൻ ടി. സക്കീർ ഹുസൈൻ സമ്മാനം വിതരണം ചെയ്തു. ജില്ലാ സ്പോർട്സ് കൗൺസിൽ പ്രസിഡന്റ് കെ. അനിൽകുമാർ, ഒളിമ്പിക് അസോസിയേഷൻ പ്രസിഡന്റ് കെ. പ്രകാശ് ബാബു, സെക്രട്ടറി ആർ. പ്രസന്നകുമാർ,
ട്രഷറർ ഡോ. ചാർലി ചെറിയാൻ, മുൻ ഫുട്ബോൾ താരം കെ.ടി. ചാക്കോ, ബിൻസി സൂസൻ ടൈറ്റസ്, ജോയ് പൗലോസ്, എൻ. ചന്ദ്രൻ, കെ. ചന്ദ്രശേഖരപിള്ള, റെജിനോൾഡ് വർഗീസ് തുടങ്ങിയവർ നേതൃത്വം നൽകി.