ADVERTISEMENT

ADVERTISEMENT

അവകാശ സംരക്ഷണത്തിനായി സെക്രട്ടറിയേറ്റ് മാർച്ചും ധർണയും

തിരുവനന്തപുരം: പട്ടികജാതി അവകാശങ്ങൾ ഓരോന്നായി ഇല്ലാതാക്കുന്ന സാഹചര്യത്തിൽ അവകാശ സംരക്ഷണത്തിനായി ചേരമർ ഒന്നായി സമരരംഗത്തേക്ക് അണിനിരക്കുമെന്നു അഖില കേരള ചേരമർ ഹിന്ദു മഹാസഭ സംസ്ഥാന വൈസ് പ്രസിഡന്‍റ് പി.ജി. അശോക്‌ കുമാർ. പാളയം രക്തസാക്ഷി മണ്ഡപത്തിൽനിന്നു സെക്രട്ടേറിയറ്റ് നടയിലേക്ക് നടത്തിയ മാർച്ച് ഫ്ളാഗ് ഓഫ് ചെയ്തു പ്രസംഗിക്കുകയായിരുന്നു അദ്ദേഹം. തുടർന്ന് സെക്രട്ടേറിയറ്റ് പടിക്കൽ സംസ്ഥാന പ്രസിഡന്‍റ് ഇൻ ചാർജ് എം.കെ അപ്പുക്കുട്ടന്‍റെ അധ്യക്ഷതയിൽ നടത്തിയ ധർണ സംസ്ഥാന ജനറൽ സെക്രട്ടറി ഡോ. കല്ലറ പ്രശാന്ത് ഉദ്ഘാടനം ചെയ്തു.
പട്ടികജാതി വിദ്യാർഥികളുടെ നിർത്തലാക്കിയ സ്കോളർഷിപ്പ് പുനഃസ്ഥാപിക്കുക, ഭൂമിയില്ലാത്ത പട്ടികജാതിക്കാർക്ക് ഭൂമി നൽകുക, സ്പെഷൽ റിക്രൂട്ട്മെന്‍റ് പുനഃസ്ഥാപിക്കുക. ജാതി സർട്ടിഫിക്കറ്റ് കാലാവധി ഒരു വർഷമാക്കി സമുദായ സംഘടനകളുടെ സാക്ഷ്യപത്രം നിർബന്ധമാക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു മാർച്ച്.
സംസ്ഥാന ട്രഷറർ കെ. കുട്ടപ്പൻ സെക്രട്ടറി കെ.കൃഷ്ണൻകുട്ടി, എക്സിക്യൂട്ടീവ് അംഗങ്ങളായ ഗോപി മഞ്ചാടിക്കര, ഒ.കെ. സാബു, തങ്കച്ചൻ മ്യാലിൽ, മധു നീണ്ടൂർ, കെ.സി മനോജ്, രാജേഷ് കല്ലൂപ്പാറ, സുനിൽകുമാർ, എ.വി സാബു, എന്നിവർ പ്രസംഗിച്ചു.
വിവിധ സമുദായ സംഘടനകളുടെ നേതാക്കൻമാരായ കെപിഎംഎസ് സംസ്ഥാന ജനറൽ സെക്രട്ടറി പി.എം വിനോദ്, സിഎസ്ഡിഎസ് സംസ്ഥാന ചെയർമാൻ എം.എസ്. സജൻ, ഡിസിയുഎഫ് സംസ്ഥാന ചെയർമാൻ രാജ്മോഹൻ തന്പുരാൻ എന്നിവർപ്രസംഗിച്ചു.

ADVERTISEMENT

കമ്പികള്‍ തുരുമ്പെടുത്തു തുടങ്ങി : ഒപി ബ്ലോക്കിലെ രണ്ടാംനില ഇനിയും യാഥാര്‍ഥ്യമായില്ല

പേരൂര്‍ക്കട: ഗവ. ജില്ലാ ആശുപത്രിയില്‍ ഏഴു വര്‍ഷത്തിനു മുമ്പ് ആരംഭിച്ച ഒപി ബ്ലോക്കിലെ രണ്ടാംനില ഇനിയും യാഥാര്‍ഥ്യ മായില്ല. 2018-19 കാലഘട്ടത്തിലാണ് പുതിയ ഒപി ബ്ലോക്കിന്‍റെ ഉദ്ഘാടനം നടത്തിയത്. കെട്ടിടത്തില്‍ സെല്ലാറില്‍ ലാബ് ഉള്‍പ്പെടെയുള്ള സംവിധാനങ്ങളാണ് പ്രവര്‍ത്തിച്ചുവരുന്നത്. ഒപി സംവിധാനവും ഡോക്ടര്‍മാരുടെ കാബിനുകളുമാണ് താഴ ത്തെ നിലയിൽ‍ പ്രവര്‍ത്തിക്കുന്നത്. അതേസമയം ഓപ്പറേഷന്‍ തിയേറ്ററുകളും വിവിധ സ്ഥലങ്ങളിലായി കിടക്കുന്ന മറ്റു സെക്‌ഷ നുകളുമാണ് രണ്ടാംനിലയിലേക്കു മാറ്റാന്‍ ഉദ്ദേശിച്ചിട്ടുള്ളത്. ഇതില്‍ പാലിയേറ്റീവ് കെയറും പുതിയ നിലയിലേക്ക് മാറ്റാന്‍ തീരുമാനിച്ചിരുന്നു. രണ്ടാംനിലയിലേക്ക് പോകുന്നതിനു ലിഫ്റ്റുകള്‍ നിര്‍മിച്ചിട്ടുണ്ട്. എന്നാൽ ലിഫ്റ്റ് പൂർണമായി പ്രവര്‍ത്തനസജ്ജമായിട്ടുമില്ല. രണ്ടാംനില പണിയുന്നതിനുവേണ്ടി നിര്‍മിച്ചിട്ടുള്ള കോണ്‍ക്രീറ്റ് കമ്പികള്‍ വര്‍ഷങ്ങളായി മഴയും വെയിലുമേറ്റു തുരുമ്പെടുത്ത നിലയിലാണ്. അതിപ്പോള്‍ മാറ്റിപ്പണിതാല്‍ മാത്രമേ രണ്ടാംനില യാഥാര്‍ഥ്യമാക്കാന്‍ സാധിക്കുകയുള്ളൂ. നിലവില്‍ സ്ഥലപരിമിതിമൂലം വീര്‍പ്പുമുട്ടല്‍ അനുഭവിക്കുന്ന അത്യാഹിത വിഭാഗവുമായി ബന്ധപ്പെട്ട സെക്‌ഷനുകള്‍കൂടി പുതിയ നിലയിലേക്കു കൊണ്ടുവരാന്‍ തീരുമാനിച്ചിരുന്നതാണ്. എന്നാല്‍ നീണ്ട ഏഴുവര്‍ഷം പിന്നിട്ടിട്ടും രണ്ടാമത്തെ നില യാഥാര്‍ഥ്യമാക്കുന്നതിനുവേണ്ടിയുള്ള യാതൊരു ചര്‍ച്ചകളും ഉണ്ടായിട്ടില്ല.

ജൈവ പച്ചക്കറിക്കൃഷിയിൽ മൂന്നാംതവണയും നൂറുമേനി വിളവെടുത്ത് കിസാൻസഭ

നെടുമങ്ങാട്: കാർഷിക വൃത്തി പരിപോഷിപ്പിക്കുന്നതിന്‍റെ ഭാഗമായി അഖിലേന്ത്യ കിസാൻസഭ അരുവിക്കര മണ്ഡലം കമ്മിറ്റിയുടെ നേതൃത്വത്തിൽ നടത്തിവരുന്ന ജൈവ പച്ചക്കറി കൃഷിയിൽ തുടർച്ചയായി മൂന്നാം വർഷവും നൂറുമേനി വിളവ്. ആര്യനാട് കൃഷി ഭവൻ പരിധിയിലെ കൊക്കോട്ടേലാ മൈലമൂട്ടിൽ ഒരേക്കർ 10 സെന്‍റ് സ്ഥലത്ത് കിസാൻ സഭ പ്രവർത്തകർ നടത്തിയ പച്ചക്കറി കൃഷിയുടെ വിളവെടുപ്പ് സിപിഐ ജില്ലാ സെക്രട്ടറി മാങ്കോട് രാധാകൃഷ്ണൻ ഉദ്ഘാടനം ചെയ്തു. പച്ചക്കറി ഉല്പാദനത്തിൽ സ്വയം പര്യാപ്തത കൈവരിക്കാനുള്ള സംസ്ഥാന സർക്കാരിന്‍റെയും കൃഷി വകുപ്പിന്‍റെയും പരിശ്രമങ്ങൾക്ക് കരുത്തു പകരുന്നതാണ് ആര്യനാട് കിസാൻ സഭയുടെ തുടർച്ചയായ പച്ചക്കറി കൃഷിയെന്നും ഇതു മാതൃകാപരമാണെന്നും മാങ്കോട് രാധാകൃഷ്ണൻ പറഞ്ഞു. സംസ്ഥാന ക്ഷീര വികസന ബോർഡ് ചെയർമാനും കിസാൻ സഭ ജില്ലാ സെക്രട്ടറിയുമായ വി.പി. ഉണ്ണികൃഷ്ണൻ മുഖ്യാതിഥിയായി. വെള്ളരി, പടവലം, കത്തിരി, പയർ, പാവയ്ക്ക മുതലായവയാണ് വിളവെടുത്തത്. മാതൃകാ കർഷകൻ സുകുമാരന്റെ നേതൃത്വത്തിലായിരുന്നു കൃഷി. മൂന്നാം വർഷമാണ് ഇത്തവണ കൃഷി ചെയ്ത് വിളവെടുക്കുന്നത്. ഉല്പന്നങ്ങൾ ഹോർട്ടി കോർപ്പ് വഴി വില്ലന നടത്തുമെന്ന് സിപിഐ ജില്ലാ കൗൺസിൽ അംഗം ഈഞ്ചപ്പുരി സന്തു അറിയിച്ചു. കിസാൻ സഭ നേതാക്കളായ സുകുമാരൻ, കെ. മഹേശ്വരൻ, ജയകുമാർ, അനിൽകുമാർ തുടങ്ങിയവർ പങ്കെടുത്തു.

അരുവിക്കര കുമ്മിയിൽ മാലിന്യംതള്ളൽ രൂക്ഷം

അരുവിക്കര: പഞ്ചായത്തിലെ കുമ്മിയില്‍ വ്യാപകമായി മാലിന്യം തള്ളുന്നതായി പരാതി. കുമ്മി ജലവിതരണ കേന്ദ്രം, വാട്ടർ ട്രീറ്റ്മെന്‍റ് പ്ലാന്‍റ്, വാട്ടർ അഥോറിറ്റിയുടെ 11 കെവി സബ് സ്റ്റേഷൻ എന്നിവയ്ക്ക് സമീപത്തെ വിവിധ സ്ഥലങ്ങളിലാണ് ഇറച്ചിക്കോഴികളുടെ അവശിഷ്ടങ്ങൾ ഉൾപ്പെടെയുള്ള മാലിന്യങ്ങൾ തള്ളുന്നത്. ഇവിടങ്ങളിൽ കുമിഞ്ഞുകൂടുന്ന മാലിന്യങ്ങൾ നാട്ടുകാർക്ക് ഏറെ ബുദ്ധിമുട്ടുണ്ടാക്കുന്നുണ്ട്. കെട്ടിക്കിടക്കുന്ന മാലിന്യങ്ങളിൽനിന്നും മഴ പെയ്യുമ്പോൾ മലിനജലം ഒലിച്ചിറങ്ങുന്നത് സമീപത്തെ കരമന ആറ്റിലേക്കാണ്. പ്ലാസ്റ്റിക് ചാക്കുകളിലും കവറുകളിലും നിറച്ചു കൊണ്ടുവരുന്ന മാംസാവശിഷ്ടങ്ങളടങ്ങുന്ന പ്ലാസ്റ്റിക് മാലിന്യങ്ങൾ രാത്രി കാലങ്ങളിൽ വാഹനങ്ങളിലെത്തിച്ചാണ് പ്രദേശത്ത് തള്ളുന്നത്‌. കാടുപിടിച്ചു കിടക്കുന്ന കുമ്മി പ്രദേശം പകൽ സമയത്തുപോലും വിജനമാണ്. പേരൂർക്കട, വട്ടിയൂർക്കാവ്, കരകുളം, കാച്ചാണി എന്നിവിടങ്ങളിലുള്ളവർ അരുവിക്കര, വെള്ളനാട് എന്നിവിടങ്ങളിൽ എളുപ്പത്തിൽ എത്തിച്ചേരാൻ യാത്ര ചെയ്യുന്നത് ഇതുവഴിയാണ്. മാലിന്യങ്ങളിൽനിന്നുള്ള ദുർഗന്ധം യാത്രക്കാർക്ക് അസഹനീയമായി. മാലിന്യങ്ങൾ തിന്നാനെത്തുന്ന തെരുവ്നായ്ക്കൾ കാൽനട യാത്രക്കാർക്കും ഇരുചക്ര വാഹനയാത്രക്കാർക്കും ഭീഷണി സൃഷ്ടിക്കുന്നുണ്ട്. കുടിവെള്ളം പമ്പ് ചെയ്യന്ന കുമ്മിയിലെ കരമനയാറ്റില്‍ തെരുവു നായ്ക്കള്‍ മാംസാവശിഷ്ടങ്ങളടങ്ങുന്ന മാലിന്യങ്ങൾ കടിച്ചു വലിച്ചിടുന്നതു കാരണം കുടിവെള്ളവും മലിനമാകുന്നുണ്ട്. കുമ്മിയിൽ സ്ഥിരമായി മാലിന്യം തള്ളിയിരുന്ന കാടുപിടിച്ചു കിടന്ന സ്ഥലത്ത് ആധുനിക രീതിയിൽ 'വാക്ക് വേ' നിർമിച്ചതോടെ സമീപ സ്ഥലങ്ങളിലാണ് ഇപ്പോൾ മാലിന്യം തള്ളൽ വ്യാപകമായിരിക്കുന്നത്. പ്രദേശങ്ങളിൽ നിരീക്ഷണ ക്യാമറകൾ സ്ഥാപിച്ച് മാലിന്യം തള്ളൽ തടയണമെന്ന് നാട്ടുകാർ ആവശ്യപ്പെട്ടു.

സുകുമാർ അഴീക്കോട് സമൂഹനന്മയ്ക്കായി ജീവിതം സമർപ്പിച്ച പ്രതിഭ: മന്ത്രി വി.എന്്. വാസവൻ

തിരുവനന്തപുരം : സമൂഹത്തിന്‍റെ നന്മയ്ക്കായി വാക്കുകളെ സൈന്യമാക്കിയ പ്രതിഭാശാലിയായിരുന്നു സുകുമാർ അഴിക്കോട് എന്ന് മന്ത്രി വി.എൻ. വാസവൻ. ഒരു വർഷം നീണ്ടുനില്ക്കുന്ന അ ഴീക്കോട് ജന്മശതാബ്ദി ആഘോഷത്തിന്‍റെ ഉദ്ഘാടന ചടങ്ങിൽ അധ്യക്ഷത വഹിച്ചു പ്രസംഗിക്കുകയായിരുന്നു മന്ത്രി. സുകുമാർ അഴീക്കോട് ട്രസ്റ്റിന്‍റെ ആഭിമുഖ്യത്തിൽ വൈഎംസിഎ ഹാളിലായിരുന്നു ചടങ്ങ്. ക്രിയാത്മകമായ നിർദേശങ്ങളും അനീതിയ്ക്കെതിരായുള്ള ജാഗ്രതയും തിരമാലകൾ പോലെ ഉയർന്ന അഴീക്കോടിന്‍റെ പ്രഭാഷണങ്ങളിൽ നിറഞ്ഞുനിന്നിരുന്നുവെന്നും മന്ത്രി വി. വാസവൻ ചൂണ്ടിക്കാട്ടി. മഹാത്മാഗാന്ധിയുടെ സന്ദേശങ്ങൾ മാനവരാശിക്കു സമർപ്പിച്ച സുകുമാർ അഴീക്കോട് സാംസ്കാരിക കേരളത്തിന്‍റെ പ്രകാശഗോപുരങ്ങളിൽ ഒന്നാണ്. തത്ത്വമസിയാണ് അഴീക്കോടിനെ ലോകമറിയുന്ന എഴുത്തുകാരനാക്കി മാറ്റിയതെന്നും മന്ത്രി വാസവൻ പറഞ്ഞു. ജന്മശതാബ്ദി ആഘോഷത്തിന്‍റെ ഉദ്ഘാടനം പ്രശസ്ത സംവിധായകൻ അടൂർ ഗോപാലകൃഷ്ണൻ നിർവഹിച്ചു. വേഷത്തിലും ഭാവത്തിലും മാത്രമല്ല ജീവിതത്തിലും നൂറുശതമാനം ഗാന്ധിയൻ ആയിരുന്നു സുകുമാർ അഴീക്കോടെന്ന് അടൂർ പറഞ്ഞു. തിരുവനന്തപുരത്ത് നടന്ന തത്ത്വമസിയുടെ പ്രകാശന ചടങ്ങിൽ വച്ചാണ് അഴീക്കോടിനെ ആദ്യം കാണുന്നത്. മരിക്കുന്നതിനു കുറച്ചുനാൾ മുന്പ് കണ്ടപ്പോൾ രാജ്യം മുഴുവൻ പ്രഭാഷണങ്ങളുമായി നടക്കുന്നകാര്യം വളരെ ഉൗർജസ്വലതയോടെ അദ്ദേഹം പങ്കുവച്ചത്. അഴീക്കോടിന്‍റെ മരണവാർത്ത കേട്ടപ്പോൾ ഒരു തേങ്ങലായിരുന്നു തനിക്ക് ഉണ്ടായത്. ചോദിക്കാനും പറയാനും ഇനി ആരുണ്ട് എന്ന ഒരു വേദനയാണ് ആ വിയോഗം തന്നിൽ തീർത്തത്. ചടങ്ങിൽ സിപിഐ സംസ്ഥാന സെക്രട്ടറി ബിനോയ് വിശ്വം അനുസ്മരണ പ്രഭാഷണം നടത്തി. സുകുമാർ അഴിക്കോടിന്‍റെ മലയാള സാഹിത്യ വിമർശനം എന്ന പുസ്തകത്തിന്‍റെ പുതിയ പതിപ്പിന്‍റെ പ്രകാശനം കവി പ്രഭാവർമ നിർവഹിച്ചു. ചടങ്ങിൽ ട്രസ്റ്റ് സെക്രട്ടറി ഡോ. പോൾ മണലിൽ ആമുഖ പ്രസംഗം നടത്തി. ഡോ. ജേക്കബ് പാറക്കടവിൽ സ്വാഗതം ആശംസിച്ചു. വി. ദത്തൻ നന്ദി പറഞ്ഞു.

കെഎസ്ആർടിസി കണ്ടക്ടർക്ക് മർദനമേറ്റതായി പരാതി

കാട്ടാക്കട: കാട്ടാക്കട കെഎസ്ആർടിസി ഡിപ്പോയിയിലെ കണ്ടക്ടർക്ക് മർദനമേറ്റതായി പരാതി. കണ്ടല മാറനല്ലൂർ ചിറ്റിലകാട് വീട്ടിൽ ഷിബിമോ(36)നെയാണു പൂവച്ചൽ പേഴുംമൂടുവച്ചു കയറിയ യാത്രക്കാരൻ അസഭ്യം വിളിച്ചുകൊണ്ടു മർദിച്ചത്. ഇക്കഴിഞ്ഞ 10നു രാവിലെ 6.50 ഓടെ കാട്ടാക്കട-വ്ലാവെട്ടി ബസിൽ സർവീസ് നടത്തി വരവേയാ യിരുന്നു സംഭവം. ബസ് യാത്ര മുടങ്ങിയതോടെ ഔദ്യോഗിക കൃത്യനിർവഹണത്തിനു തടസം ഉണ്ടാകുകയും ഇതിലൂടെ കെഎസ്ആർടിസിക്ക് 10,000/- രൂപയുടെ നഷ്ടം വരുത്തുകയും ചെയ്തു എന്ന് കാട്ടാക്കട പോലിസിൽ ഷിബിൻ പരാതി നൽകിയിരുന്നു. യാത്രക്കാരൻ അസഭ്യം വിളിച്ചപ്പോൾ ആവർത്തിക്കരുത് എന്ന് ഷിബിൻ വിലക്കി. എന്നാൽ ഇതിൽ പ്രകോപിതനായി സീറ്റിൽ ഇരുന്ന പ്രതി അസഭ്യം വിളിച്ചുകൊണ്ട് ചാടി എണീറ്റു ഷിബിയുടെ ഇടത്ത് കവിളിൽ ശക്തിയായി ഇടിച്ചു. തുടർന്ന് ഇയാൾ സുഹൃത്തിനെ വിളിച്ചു വരുത്തി ബസിൽനിന്ന് ഇറങ്ങി ബൈക്കിൽ കയറി രക്ഷപ്പെടുകയായിരുന്നു. ഷിബിയുടെ മൊഴിയിൽ കണ്ടാൽ അറിയാവുന്ന രണ്ടുപേർക്കെതിരെ കാട്ടാക്കട പോലീസ് കേസെടുത്തു. അതേസമയം സംഭവം നടന്ന ഉടനെ പോലീസിൽ വിളിച്ചു പറഞ്ഞിട്ടും വൈകിയാണ് പോലീസ് എത്തിയതെന്നും ആരോപണമുണ്ട്. ശനിയാഴ്ച പരാതി കൊടുത്തിട്ട് മൂന്നുദിവസം കഴിഞ്ഞു നടപടിയൊന്നും ആയിട്ടില്ലെന്നും ഷിബി പറയുന്നു.

മൊബൈല്‍മോഷ്ടാവ് അറസ്റ്റില്‍

പേരൂര്‍ക്കട: മൊബൈല്‍ഫോണ്‍ മോഷ്ടാവിനെ തമ്പാനൂര്‍ പോലീസ് അറസ്റ്റുചെയ്തു. വലിയതുറ സെന്‍റ് സേവ്യേഴ്‌സ് നഗര്‍ പുതുവല്‍ പുരയിടത്തില്‍ ബഞ്ചമിന്‍ (40) ആണ് അറസ്റ്റിലായത്. ഏപ്രില്‍ 30ന് രാത്രി 8.30നായിരുന്നു സംഭവം. ബാലരാമപുരം സ്വദേശി സീനത്തിന്‍റെ (23) മൊബൈല്‍ഫോണാണ് പ്രതി കവര്‍ന്നത്. സംഭവദിവസം ബാലരാമപുരത്തെ വീട്ടിലേക്കു പോകാന്‍ തമ്പാനൂരില്‍ ബസ് കാത്തുനില്‍ക്കുകയായിരുന്ന സീനത്തില്‍ നിന്നാണ് പ്രതി ഫോണ്‍ കവര്‍ന്ന് രക്ഷപ്പെട്ടത്. സിസിടിവി ദൃശ്യങ്ങളുടെ അടിസ്ഥാനത്തില്‍ ബഞ്ചമിനാണ് പ്രതിയെന്നു പോലീസ് കണ്ടെത്തിയിരുന്നു. കഴിഞ്ഞദിവസം ഇയാള്‍ വീണ്ടും തമ്പാനൂരില്‍ എത്തിയതറിഞ്ഞാണ് ഇയാളെ പോലീസ് കസ്റ്റഡിയിലെടുത്തത്. പ്രതിക്കെതിരേ തമ്പാനൂരില്‍ മാത്രം 25 കേസുകളുണ്ട്. ഇതുകൂടാതെ റെയില്‍വേ പോലീസ്, ഫോര്‍ട്ട്, മ്യൂസിയം, പൂജപ്പുര എന്നിവിടങ്ങളിലും തമിഴ്‌നാട്ടിലെ കന്യാകുമാരി, കുഴിത്തുറ സ്റ്റേഷനുകളിലും സമാനമായ കേസുകള്‍ രജിസ്റ്റര്‍ ചെയ്തിട്ടുണ്ട്. തമ്പാനൂര്‍ സിഐ വി.എം. ശ്രീകുമാര്‍, എസ്ഐ വിനോദ്, എഎസ്ഐ നാസര്‍, ഗ്രേഡ് എസ്‌സിപിഒ ജിസാം എന്നിവരാണ് അന്വേഷണത്തിനും അറസ്റ്റിനും നേതൃത്വം നല്‍കിയത്. പ്രതിയെ കോടതി റിമാന്‍ഡ് ചെയ്തു.

ടൂറിസം വകുപ്പിന് വേണ്ട : മതിപ്പുറത്ത് നോ പാർക്കിംഗ് ബോർഡുകളാൽ സുരക്ഷയൊരുക്കി പോലീസ്

വിഴിഞ്ഞം: സഞ്ചാരികൾക്കു സുരക്ഷയൊരുക്കാൻ അധികൃതർക്ക് മടി. നോ പാർക്കിംഗ് ബോർഡുകൾകൊണ്ട് റോഡ് അടച്ച് വാഹനങ്ങൾ നിയന്ത്രിച്ചു പോലീസ്. എന്നാൽ കടൽ കാണാനെത്തുന്ന സഞ്ചാരികൾക്ക് കാൽ നടയായി ചുറ്റിക്കറങ്ങാം. വിനോദത്തിനായി ദിനംപ്രതി നൂറു കണക്കിന് ആൾക്കാർ വന്നു പോകുന്ന വിഴിഞ്ഞം മതിപ്പുറത്താണ് അധികൃതരുടെ വിചിത്ര നിയന്ത്രണം. പൊട്ടിപ്പൊളിഞ്ഞ നടപ്പാതയും കയർകൊണ്ടു കെട്ടി സുരക്ഷയൊരുക്കിയിരിക്കുന്ന തുരുമ്പിച്ച കമ്പിവേലിയുമെല്ലാം ജനത്തിന്‍റെ പേടി വർധിപ്പിക്കുമ്പോഴും പ്രശ്നം പരിഹരിക്കാനുള്ള ടൂറിസം വകുപ്പ് അധികൃതരുടെ മടി തുടരുന്നു. കോവളം കഴിഞ്ഞാൽ കടലിന്‍റെ മാസ്മരികത ഏറ്റവും കൂടുതൽ അനുഭവിച്ചറിയാൻ കഴിയുന്നതിനുപരി വിഴിഞ്ഞം അന്താരാഷ്ട്ര തുറമുഖവും കപ്പലടുക്കുന്നതുമെല്ലാം നേരിട്ട് കണ്ടറിയാൻ കഴിയുന്ന ഏക തീരംകൂടിയാണ് മതിപ്പുറം. പാറക്കെട്ടുകൾ നിറഞ്ഞു വലിയ അപകടം പതിയിരിക്കുന്ന സ്ഥലത്ത് സഞ്ചാരികളുടെ സുരക്ഷക്കായി നിർമിച്ച വേലിയും നടപ്പാതയും തകർന്നിട്ടു മാസങ്ങളായി. ടൂറിസം വകുപ്പിന്‍റെ മേൽനോട്ടത്തിൽ കോടികൾ ചെലവഴിച്ചു നിർമിച്ച പാർക്കും വഴിവിളക്കുകളും അലങ്കാരങ്ങളുമെല്ലാം തകർന്നു തരിപ്പണമായി. സഞ്ചാരികൾ അപകടം നിറഞ്ഞ പാറക്കെട്ടിലേക്ക് ഇറങ്ങാതിരിക്കാൻ നിർമി ച്ച സുരക്ഷാവേലിയെങ്കിലും പുനഃസ്ഥാപിക്കണമെന്ന നാട്ടുകാരുടെ ആവശ്യവും പരിഗണിച്ചില്ല. വൈകുന്നേരങ്ങളിലെ ഇരുളിന്‍റെ മറവിൽ യുവാക്കൾ അപകടകരമായ രീതിയിൽ വാഹനങ്ങൾ ഓടിച്ചു കയറ്റുന്നതും അഭ്യാസപ്രകടനങ്ങളും പതിവായിട്ടുണ്ട്. ഇതെല്ലാം ജനത്തിന്‍റെ ജീവനു ഭീഷണിയായതോടെ പോലീസ് കടലിൽ റോഡ് സംഗമിക്കുന്നതിനും നൂറു മീറ്ററോളം മറി ഗതാഗതം നിയന്ത്രിച്ചു. ഇതിനായി നിരവധി നോ പാർക്കിംഗ് ബോർഡുകളും നിരത്തി. നിയന്ത്രണം ഫലം കണ്ടെങ്കിലും സുരക്ഷയുടെ കാര്യത്തിൽ തീരുമാനമായില്ല.

സിബിഎസ്ഇ പരീക്ഷാ ഫലം: ജില്ലയിലെ സ്കൂളുകൾക്ക് മികച്ച നേട്ടം

തിരുവനന്തപുരം: സിബിഎസ്ഇ 10,12 ക്ലാസുകളിലെ പരീക്ഷാഫലം പ്രഖ്യാപിച്ചപ്പോൾ ജില്ലയിലെ സ്കൂളുകൾ മികച്ച നേട്ടത്തിന് അർഹരായി. നിരവധി സ്കൂളുകൾ നൂറുമേനി വിജയം സ്വന്തമാക്കി. ശ്രീകാര്യം ലൊയോള സ്കൂളിന് ഉജ്വല വിജയം സിബിഎസ്ഇ പ്ലസ് ടു, 10-ാം ക്ലാസ് പരീക്ഷകളിൽ ശ്രീകാര്യം ലൊയോള സ്കൂളിന് മികച്ച ജയം. പ്ലസ് ടു സയൻസ് വിഭാഗത്തിൽ പരീക്ഷയെഴുതിയ 187 കുട്ടികളിൽ 125 പേർ ഡിസ്റ്റിംഗ്ഷനും 62 പേർ ഫസ്റ്റ് ക്ലാസും നേടി. സയൻസ് വിഭാഗത്തിൽ ദേവ് എസ്. നായർ 98.60 ശതമാനം സ്കൂളിൽ ഒന്നാംസ്ഥാനം നേടി. കെ. ജെ. ശ്രേയ ചന്ദ്ര 97.80 ശതമാനം മാർക്കോടെ രണ്ടാം സ്ഥാനം കരസ്ഥമാക്കി. കൊമേഴ്സ് വിഭാഗത്തിൽ പരീക്ഷയെഴുതിയ 30 കുട്ടികളിൽ 25 പേർ ഡിസ്റ്റിംഗ്ഷനും അഞ്ചു പേർ ഫസ്റ്റ് ക്ലാസും നേടി. കൊമേഴ്സ് വിഭാഗത്തിൽ വി. വൈഗ അയ്യർ 99.40 ശതമാനം മാർക്കുമായി സ്കൂളിൽ ഒന്നാം സ്ഥാനവും ആരോണ്‍ ടോണി 99 ശതമാനവുമായി രണ്ടാം സ്ഥാനവും കരസ്ഥമാക്കി. സി.ബി.എസ്.ഇ. പത്താം ക്ലാസ് പരീക്ഷയെഴുതിയ 58 കുട്ടികളിൽ 54 പേർ ഡിസ്റ്റിംഗ്ഷനും നാലു പേർ ഫസ്റ്റ് ക്ലാസും നേടി. ഋഷി ഗോഗോയ് 99.8 ശതമാനം മാർക്കുമായി സ്കൂൾ ടോപ്പറായി. സി.എസ് ഗൗതം 98.40 ശതമാനം മാർക്കുമായി രണ്ടാം സ്ഥാനം കരസ്ഥമാക്കി. സർവോദയ സെൻട്രൽ വിദ്യാലയത്തിനു മികച്ച നേട്ടം സിബിഎസ്ഇ പന്ത്രണ്ടാംക്ലാസ് പരീക്ഷയിൽ നാലാഞ്ചിറ സർവോദയ സെൻട്രൽ വിദ്യാലയം മികച്ച നേട്ടം കൈവരിച്ചു. പരീക്ഷയെഴുതിയ 156 പേരിൽ 143 പേർ ഡിസ്റ്റിംഗ്ഷൻ നേടി. ജോഷ്വാ ജേക്കബ് തോമസ് 99.6 ശതമാനം മാർക്കോടെ കന്പ്യൂട്ടർ സയൻസ് വിഭാഗത്തിൽ ഒന്നാമതെത്തി. കണക്ക് - ബയോളജി വിഭാഗത്തിൽ ദിവിത് നായർ 99.2 ശതമാനം മാർക്കും ഹ്യൂമാനിറ്റീവ് വിഭാഗത്തിൽ എം.എൽ. ഫാത്തിമ 99.2 ശതമാനം മാർക്കും നേടി ഒന്നാമതെത്തി. 82 പേർക്കു 90 ശതമാനത്തിനു മുകളിൽ മാർക്കു ലഭിച്ചു. 48 വിദ്യാർഥികൾ എല്ലാ വിഷയത്തിലും എ പ്ലസ് നേടി. പത്താംക്ലാസിലും നൂറു ശതമാനം വിജയം നേടി. പരീക്ഷയെഴുതിയ 153 പേരും വിജയിച്ചു. 99 ശതമാനം മാർക്കുനേടിയ എസ്.എസ്. നവനീത് കൃഷ്ണനാണ് ഒന്നാംസ്ഥാനം. 64 കുട്ടികൾ 90 ശതമാനത്തിനു മുകളിൽ മാർക്കുനേടി. 138 പേർക്ക് ഡിസ്റ്റിംഗ്ഷനും 15 പേർക്ക് ഫസ്റ്റ്ക്ലാസും ലഭിച്ചു. നൂറുമേനി നേട്ടവുമായി പട്ടം കേന്ദ്രീയ വിദ്യാലയം കേന്ദ്രീയ വിദ്യാലയ പട്ടം ഷിഫ്റ്റ് ഒന്നിൽ 10-ാം ക്ലാസ് പരീക്ഷ എഴുതിയ 214 വിദ്യാർഥികളിൽ എല്ലാവരും വിജയിച്ചു. 500-ൽ 488 മാർക്ക് നേടിയ പ്രശോഭ് പി നായരാണ് ഷിഫ്റ്റ് ഒന്നിലെ ടോപ്പർ. രണ്ടാം ഷിഫ്റ്റിലും 100 മേനി വിജയമാണ്. 147 വിദ്യാർഥികൾ പരീക്ഷയെഴുതി എല്ലാവരും വിജയം നേടി. 492 മാർക്ക് നേടിയ വി. നിവേദ്യ ഒന്നാമതെത്തി. 12-ാം ക്ലാസ് ഷിഫ്റ്റ് ഒന്നിൽ 201 വിദ്യാർഥികൾ പരീക്ഷയെഴുതി എല്ലാവരും വിജയം നേടി. സയൻസ് സ്ട്രീമിൽ എസ് ദേവനന്ദ 98.2 ശതമാനം മാർക്കുമായി ഒന്നാമതെത്തി. കൊമേഴ്സിൽ എ ആർ. േ.ദവിക വി കെ അമ്രിൻ എന്നിവർ 95 ശതമാനം മാർക്ക് നേടി ടോപ്പ് സ്കോർ പങ്കിട്ടു. ഹ്യുമാനിറ്റീസിൽ കെ.എസ് ഗോപിക 98.6 ശതമാനം മാർക്കുമായി ഒന്നാം സ്ഥാനംനേടി. ഷിഫ്റ്റ് രണ്ടിലും നൂറുമേനി വിജയമാണ്. 116 വിദ്യാർഥികൾ പരീക്ഷ എഴുതി. എല്ലാവരും വിജയിച്ചു. സയൻസ് വിഭാഗത്തിൽ ഗായത്രി പ്രമീള സിബ 96 ശതമാനം മാർക്കുമായി ഒന്നാംസ്ഥാനം നേടി. കൊമേഴ്സ് വിഭാഗത്തിൽ വി. ആകാശ് ഈശ്വർ 97.4 ശതമാനം മാർക്കുമായി ഒന്നാം സ്ഥാനം നേടി. വിജയത്തിളക്കവുമായി ലൂർദ് മൗണ്ട് പബ്ലിക് സ്കൂൾ സിബിഎസ്ഇ പരീക്ഷയിൽ നൂറുമേനിയുടെ വിജയം നേടി വെമ്പായം ലൂർദ് മൗണ്ട് പബ്ലിക് സ്കൂൾ. പരീക്ഷ എഴുതിയ മുഴുവൻ വിദ്യാർഥികളും മികച്ച വിജയം കരസ്ഥമാക്കി. 46 വിദ്യാർഥികൾ പരീക്ഷ എഴുതിയതിൽ 28 പേർക്ക് ഡിസ്റ്റിംഗ്ഷനും, 16 പേർക്ക് ഫസ്റ്റ്ക്ലാസും ലഭിച്ചു. എസ്. നിരഞ്ജന, ബി.ആർ. ഗൗതം, അഥീന കെ. ജോർജ്, ബി.എസ്. സുബിഷ്ണ എന്നിവർ 90 ശതമാനത്തിനു മുകളിൽ വിജയം നേടി. സീനിയർ സെക്കൻഡറി പരീക്ഷയിലും വിദ്യാർഥികൾ ഉന്നത വിജയം നേടി. അഭിമാനകരമായ വിജയം സമ്മാനിച്ച എല്ലാ വിദ്യാർഥികളെയും സ്കൂൾ മാനേജർ റവ. ബ്രദർ പീറ്റർ വാഴപ്പറമ്പിൽ, പ്രിൻസിപ്പൽ ഡോ. ഷാഫി തോംസൺ തുടങ്ങിയവർ അഭിനന്ദിച്ചു.

കാട്ടാന ആക്രമണത്തിൽ വീട് തകർന്ന് വീട്ടമ്മയ്ക്കു പരിക്ക്

കാലടി: മലയാറ്റൂർ ഇല്ലിത്തോടിൽ കാട്ടാനക്കൂട്ടത്തിന്‍റെ ആക്രമണത്തിൽ വീട് തകർന്നു. വീടിന്‍റെ ഭിത്തി ഇടിഞ്ഞുവീണ് വീട്ടമ്മയ്ക്ക് പരിക്കേറ്റു. ക്ഷീരകർഷകനായ ഇല്ലിത്തോട് സ്വദേശി പുലയിരുംകുടി ശശിയുടെ വീടിനുനേരേയാണ് തിങ്കളാഴ്ച രാത്രി 11 ഓടെ കാടിറങ്ങി വന്ന ആനകൾ ആക്രമണം നടത്തിയത്. വീടിന്‍റെ ഭിത്തി ഇടിഞ്ഞു ശശിയുടെ ഭാര്യ വിജിയുടെ ദേഹത്തേക്കു വീഴുകയായിരുന്നു. പരിക്കേറ്റ വിജിയെ പോലീസും വനപാലകരും വാർഡ് മെംബർ ലിജിയും ചേർന്ന് ആശുപത്രിയിലെത്തിച്ചു. കൂട്ടമായി എത്തിയ ആനകളിൽ ഒന്നാണ് വീടിനുനേരേ തിരിഞ്ഞത്. വീട് തള്ളി മറിച്ചിടാനുള്ള ശ്രമത്തിനിടയിൽ വാതിലിന്‍റെ കട്ടിള ശശിയുടെ തലയിൽ വീണു. പിന്നാലെയാണ് മുൻഭാഗത്തെ ഭിത്തി ഇടിഞ്ഞുവീണത്. ഇതിനുശേഷം ആനകൾ പിൻവാങ്ങി. സംഭവമറിഞ്ഞ് എത്തിയ വനപാലകരും നാട്ടുകാരും ചേർന്ന് ശബ്‌ദമുണ്ടാക്കി ആനക്കൂട്ടത്തെ വനത്തിലേക്ക് തിരിച്ചുവിട്ടു. കാലങ്ങളായി ഈ പ്രദേശത്ത് കാട്ടാനശല്യം രൂക്ഷമാണ്. കാടിറങ്ങി വരുന്ന ആനകൾ പലപ്രാവശ്യം ആക്രമണമഴിച്ചുവിടുകയും കാർഷികവിളകൾ വ്യാപകമായി നശിപ്പിക്കുകയും ചെയ്തിട്ടുണ്ട്.

തദ്ദേശ തെരഞ്ഞെടുപ്പിൽ പരീക്ഷണത്തിനില്ല : ഉദ്യോഗസ്ഥർ പോളിംഗ് സാധനങ്ങൾ നേരിട്ടെത്തിത്തന്നെ ഏറ്റുവാങ്ങണം

തിരുവനന്തപുരം: തെരഞ്ഞെടുപ്പു ചുമതലയുള്ള ഉദ്യോഗസ്ഥരുടെ ഭാരം ലഘൂകരിക്കാൻ ഉപതെരഞ്ഞെടുപ്പുകളിൽ നടത്തിയ പരീക്ഷണം തദ്ദേശ തെരഞ്ഞെടുപ്പിൽ നടപ്പാക്കില്ല. പോളിംഗ് ഉദ്യോഗസ്ഥർ വിതരണകേന്ദ്രങ്ങളിലെത്തി തെരഞ്ഞെടുപ്പു സാമഗ്രികൾ ഏറ്റുവാങ്ങുന്ന പരമ്പരാഗത സമ്പ്രദായം മാസങ്ങൾക്കുള്ളിൽ നടക്കാനിരിക്കുന്ന തദ്ദേശ തെരഞ്ഞെടുപ്പിലും തുടരും. തെരഞ്ഞെടുപ്പ് ഉദ്യോഗസ്ഥർക്ക് പോളിംഗ് സ്റ്റേഷനുകളിൽ സാധനങ്ങൾ എത്തിച്ചു നൽകി, ഉദ്യോഗസ്ഥരുടെ ജോലി ഭാരം കുറയ്ക്കുന്ന നടപടി കഴിഞ്ഞ തദ്ദേശ ഉപതെരഞ്ഞെടുപ്പുകളിൽ പരീക്ഷണാടിസ്ഥാനത്തിൽ നടപ്പാക്കിയിരുന്നു. എന്നാൽ, ഒട്ടേറെ പോരായ്മകൾ കണ്ടെത്തിയ സാഹചര്യത്തിൽ തദ്ദേശ തെരഞ്ഞെടുപ്പിൽ ഇത് അപ്രായോഗികമാണെന്ന വിലയിരുത്തലുണ്ടായി. വിതരണ കേന്ദ്രത്തിൽ നിന്ന് ഏറെ അകലെയുള്ള പോളിംഗ് ബൂത്തിന്‍റെ ചുമതലയുള്ള ഉദ്യോഗസ്ഥന് അത്യാവശ്യമായി എത്തിച്ചേരാൻ കഴിയാതെ വന്നാൽ പകരം റിസർവ് ഉദ്യോഗസ്ഥരെ നിയോഗിക്കുന്നത് അടക്കം പ്രതിസന്ധി സൃഷ്‌ടിക്കുമെന്ന വിലയിരുത്തലിന്‍റെ അടിസ്ഥാനത്തിലാണു നടപടി. ഉപതെരഞ്ഞെടുപ്പുകളിൽ ഒരു നിശ്ചിത പ്രദേശത്തേക്കു നിയോഗിക്കുന്ന സെക്ടറൽ ഓഫീസർമാർ ഇലക‌്ട്രോണിക്സ് വോട്ടിംഗ് മെഷീൻ അടക്കമുള്ള പോളിംഗ് സാമഗ്രികൾ പോളിംഗ് ബൂത്തുകളിൽ എത്തിക്കുന്നതായിരുന്നു മാറ്റം. പോളിംഗ് ഓഫീസർമാർക്ക് നേരിട്ടു പോളിംഗ് സ്റ്റേഷനുകളിൽ എത്തിയാൽ മതിയായിരുന്നു. വോട്ടെടുപ്പിനു ശേഷം സെക്ടറൽ ഓഫീസർമാർ തെരഞ്ഞെടുപ്പു സാമഗ്രികൾ പോളിംഗ് സ്റ്റേഷനിലെത്തി ഏറ്റുവാങ്ങുന്നതോടെ പോളിംഗ് ഉദ്യോഗസ്ഥരുടെ ചുമതല കഴിയുമായിരുന്നു. ഇതാണ് ഉപതെരഞ്ഞെടുപ്പുകളിൽ പരീക്ഷിച്ചത്. എന്നാൽ, വരുന്ന തദ്ദേശ തെരഞ്ഞെടുപ്പിലും പോളിംഗ് ഉദ്യോഗസ്ഥർ നേരത്തേ വിതരണ കേന്ദ്രത്തിലെത്തി സാധനങ്ങൾ ഏറ്റു വാങ്ങുകയും അതീവ സുരക്ഷാ നടപടിക്രമങ്ങൾ പാലിച്ചു തിരിച്ചെത്തിക്കുകയും വേണം. ഇതുകഴിഞ്ഞു രാത്രിയോടെ മാത്രമേ വനിതകൾ അടക്കമുള്ള ഉദ്യോഗസ്ഥർക്കു മടങ്ങാനാകൂ.

ജൂണിയർ അഭിഭാഷകയ്ക്കു സീനിയറിന്‍റെ ക്രൂരമർദനം

തിരുവനന്തപുരം: ജൂണിയർ അഭിഭാഷകയെ സീനിയർ അഭിഭാഷകൻ അതിക്രൂരമായി മർദിക്കുകയും ഓഫീസിനുള്ളിൽ അടിച്ചു വീഴ്ത്തുകയും ചെയ്തു. മുഖത്തു ക്രൂരമായി മർദനമേറ്റു വഞ്ചിയൂർ കോടതിക്കു സമീപമുള്ള ഓഫീസിൽ കുഴഞ്ഞു വീണ അഭിഭാഷക പാറശാല കരുമാനൂർ കോട്ടുവിള പുതുവൽ പുത്തൻവീട്ടിൽ ശ്യാമിലി ജസ്റ്റിനെ ജനറൽ ആശുപത്രിയിൽ പ്രവേശിപ്പിച്ചു. മർദനത്തെ തുടർന്നു മുഖത്തു നേരിയ പൊട്ടലേറ്റ ശ്യാമിലിയെ വിദഗ്ധ ചികിത്സയ്ക്കായി വൈകുന്നേരത്തോടെ തിരുവനന്തപുരം മെഡിക്കൽ കോളജ് ആശുപത്രിയിലേക്ക് റഫർ ചെയ്തു. അതിക്രൂര മർദനവുമായി ബന്ധപ്പെട്ടു വഞ്ചിയൂർ കോടതിയിലെ അഭിഭാഷകൻ പൂന്തുറ ദാസ് ഭവനിൽ വൈ. ബെയ്‌ലിൻ ദാസിനെതിരേ വഞ്ചിയൂർ പോലീസ് കേസെടുത്തു. ഇന്നലെ ഉച്ചയ്ക്ക് 12.30നോടെ വഞ്ചിയൂർ കോടതിക്കു സമീപമുള്ള ബെയ്‌ലിൻ ദാസിന്‍റെ ഓഫീസിലായിരുന്നു സംഭവം. സംഭവം സംബന്ധിച്ചു പോലീസ് പറയുന്നത്: കഴിഞ്ഞ മൂന്നര വർഷമായി ശ്യാമിലി, ബെയ്‌ലിൻ ദാസിന്‍റെ ജൂണിയറായി ജോലിനോക്കുകയായിരുന്നു. കഴിഞ്ഞ ബുധനാഴ്ച ശ്യാമിലിയോട് ഇനി ഓഫീസിലേക്കു വരേണ്ടതില്ലെന്നു പറഞ്ഞു. പിന്നീട് വെള്ളിയാഴ്ച വിളിച്ച് ഓഫീസിൽ എത്താൻ നിർദേശിച്ചു. ഇതേത്തുടർന്ന് ഇവർ തിങ്കളാഴ്ച വക്കീൽ ഓഫിസിലെത്തി. ഇന്നലെ രാവിലെ കോടതിയിൽ ഹിയറിംഗ് കഴിഞ്ഞ് ഉച്ചയോടെ വക്കീൽഓഫീസിലെത്തിയ ഇവർ തന്നോടു ഓഫീസിൽ വരേണ്ടെന്നു പറയാനുള്ള കാരണമെന്തെന്നു ബെയ്‌ലിൻ ദാസിനോടു ചോദിച്ചു. ഇതുമായി ബന്ധപ്പെട്ടു ഇരുവരും തമ്മിൽ തർക്കമുണ്ടായി. ഇതിനിടയിൽ ബെയ്‌ലിൻ ദാസ് ശ്യാമിലിയുടെ മുഖത്ത് അടിച്ചു. തുടർച്ചയായ മർദനത്തെ തുടർന്ന് ഇവർ താഴെ വീഴുകയായിരുന്നു. തുടർന്ന് മറ്റ് അഭിഭാഷകർ ചേർന്ന് ഇവരെ ജനറൽ ആശുപത്രിയിൽ പ്രവേശിപ്പിക്കുകയായിരുന്നു. വിദഗ്ധ പരിശോധനയിൽ ഇവരുടെ മുഖത്തെ എല്ലിനു നേരിയ പൊട്ടലുണ്ടായതായി ആശുപത്രി അധികൃതർ അറിയിച്ചു. ആറു മാസം പ്രായമുള്ള കുട്ടിയുള്ളതിനാൽ ശ്യാമിലി ഇന്നലെ വൈകുന്നേരത്തോടെ വീട്ടിലേക്കു മടങ്ങി. വിദഗ്ധ ചികിത്സയ്ക്കായി ഇന്നു തിരുവനന്തപുരം മെഡിക്കൽ കോളജ് ആശുപത്രിയിൽ എത്തും. ബെയ്‌ലിൻ ദാസിനെ ബാർ അസോസിയേഷൻ സസ്പെൻഡ് ചെയ്തു തിരുവനന്തപുരം: ജൂണിയർ അഭിഭാഷകയെ മർദിച്ച വൈ. ബെയ്‌ലിൻ ദാസിനെ ബാർ അസോസിയേഷൻ സസ്പെൻഡ് ചെയ്തതായി ഭാരവാഹികൾ അറിയിച്ചു. പ്രാഥമികാന്വേഷണത്തിന്‍റെ അടിസ്ഥാനത്തിലാണു നടപടി. വിശദ അന്വേഷണത്തിനു ശേഷം തുടർ നടപടി സ്വീകരിക്കുമെന്നും അവർ അറിയിച്ചു.

ജീവപര്യന്തം തടവ് ശിക്ഷ വിധിച്ചതിൽ തൃപ്തിയെന്നു പ്രോസിക്യൂഷൻ

തിരുവനന്തപുരം: കേഡൽ ജീൻസണ്‍ രാജയ്ക്ക് ജീവപര്യന്തം തടവുശിക്ഷ ലഭിച്ചതിൽ തൃപ്തിയുണ്ടെന്ന് പ്രോസിക്യൂഷൻ. ജീവപര്യന്തത്തിനൊപ്പം വീടിനു തീ വച്ചതിനു ഏഴു വർഷത്തെ കഠിന തടവും തെളിവ് നശിപ്പിച്ചതിന് അഞ്ചു വർഷം തടവുമാണ് വിധിച്ചിട്ടുള്ളതെന്നും ഈ രണ്ടു തടവുകളും ചേർത്തിട്ടുള്ള 12 വർഷത്തെ ശിക്ഷ ആദ്യം തന്നെ അനുഭവിക്കണമെന്നുമുള്ള കോടതി വിധി ഏറെ തൃപ്തി നല്കുന്നതുമാണെന്നു പ്രോസിക്യൂട്ടർ അഡ്വ. ദിലീപ് സത്യൻ പറഞ്ഞു. ശിക്ഷാ കാലാവധി കഴിഞ്ഞു മാത്രമേ ജീവപര്യന്തം തടവ് ആരംഭിക്കുകയുള്ളൂ. ഏതെങ്കിലും തരത്തിലുള്ള ഇളവ് ലഭിച്ചില്ലെങ്കിൽ 30 വർഷത്തോളം കേഡലിന് ജയിൽ ശിക്ഷ അനുഭവിക്കേണ്ടി വരുമെന്ന് അഡ്വ. ദിലീപ് സത്യൻ പറഞ്ഞു. അർഹിക്കുന്ന ശിക്ഷ ലഭിച്ചതായി അന്വേഷണ ഉദ്യോഗസ്ഥനായിരുന്ന കെ.ഇ.ബൈജുവും പറഞ്ഞു. 12 വർഷം തടവിനു ശേഷം മാത്രമേ ജീവപര്യന്തം തുടങ്ങൂ എന്നത് ഏറെ സ്വാഗതാർഹമാണെന്നും അന്നത്തെ അന്വേഷണ ഉദ്യോഗസ്ഥനും ഇപ്പോൾ കോഴിക്കോട് റൂറൽ എസ്പിയുമായ കെ.ഇ. ബൈജു പറഞ്ഞു.

കൊലപാതകങ്ങളുടെ വീട്

തോമസ് വർഗീസ് തിരുവനന്തപുരം: പെറ്റമ്മയേയും പിതാവിനേയും സ്വന്തം സഹോദരി ഉൾപ്പെടെയുള്ളവരേയും മഴുകൊണ്ട് വെട്ടിക്കൊലപ്പെടുത്തിയ ശേഷം തീയിട്ടു കത്തച്ച കേഡൽ ജീൻസണ്‍ രാജയുടെ വീടിന്‍റെ ചുവരുകളിൽ എട്ടു വർഷം മുന്പത്തെ കൊടും പാതകത്തിന്‍റെ ഓർമകൾ ചാലിച്ചുവച്ചപ്പോലെ കരിയും മാറാലയും പടർന്നു കിടക്കുന്നു. ഒരു കുടുംബത്തെ മുഴവൻ ഇല്ലാതാക്കിയ കൊടും ക്രിമിനൽ കേഡൽ ജീൻസൻ രാജയ്ക്ക് ഇന്നലെ കോടതി ജീവപര്യന്തം ശിക്ഷ വിധിച്ചപ്പോൾ നന്ദൻകോടിലെ ദുരന്ത വീട് കാടുവളർന്ന് ഇഴജന്തുക്കളുടെ താവളവുമായി മാറി. പിതാവ് പ്രഫ. രാജ തങ്കം, മാതാവ് ഡോ. ജീൻ പദ്മ, സഹോദരി കരോലിൻ, ബന്ധുവായ ലളിത എന്നിവരെയാണ് ജീൻസണ്‍ കൊലക്കത്തിക്ക് ഇരയാക്കിയത്. എട്ടുവർഷം മുന്പ് നിരവധി രോഗികൾ ചികിത്സയ്ക്കായി ഓരോ ദിവസവും വന്നിരുന്ന വീട്. ഇന്ന് വീടിന്‍റെ ഏറ്റവും താഴത്തെ നിലയിലെ കതകിന്‍റെ മുകളിലായി നൊന്പരപ്പെടുത്തുന്ന ഓർമയായി ഒരു ബോർഡ് -ഡോ.ജീൻ പത്മ . ആ ബോർഡ് ഇന്നും അവിടെ തൂങ്ങിക്കിടക്കുന്നു. നന്ദൻകോട് ബെയൻസ് കോന്പൗണ്ടിലെ 117-ാം നന്പർ വീട് ഒരു പ്രേതാലയത്തിനു സമമായാണ് കിടക്കുന്നത്. മേഖലയിലെ തന്നെ ഏറ്റവും വലിയ വീടുകളിലൊന്നായ വീട്ടിൽ കഴിഞ്ഞ എട്ടുവർഷമായി ആളനക്കമില്ല. വീട്ടിലുണ്ടായിരുന്ന എല്ലാവരേയും മൃഗീയമായ കൊന്നൊടുക്കിയ കൊലപാതകി ജയിലിൽ ആയതോടെ വീട് അനാഥമായി. റോഡിനു ഇരു വശത്തു നിന്നും വീട്ടിലേക്ക് കയറാനുള്ള ഗേറ്റുകൾ പൂട്ടിയിട്ട് വർഷങ്ങളുടെ പഴക്കം. പൂട്ടാനുപയോഗിച്ച ചങ്ങലയെല്ലാം തുരുന്പെടുത്ത സ്ഥിതിയിൽ. ഗേറ്റുകളും തുരുന്പെടുത്ത് ജീർണിച്ച സ്ഥിതിയിലാണ്. വീട്ടിലേക്കുള്ള വഴിയ പൂർണമായും കാടു പിടിച്ചു കിടക്കുകയാണ്. ഇഴ ജന്തുക്കളുടെ വിഹാര കേന്ദ്രമായി മാറിയിരിക്കയാണ് ചെറുവഴികൾ. വർഷങ്ങൾക്ക് മുന്പ് ജീൻസണിന്‍റെ മാതാവ് ഡോ. ജീൻ പത്മ നട്ടു വളർത്തിയ റന്പുട്ടാൻ വീടിന്‍റെ ഒരു വശത്ത് കായിച്ചു നില്ക്കുന്നു. തൊട്ടപ്പുറത്തായി ജാതി മരവും വിളഞ്ഞു നില്ക്കുന്നു. ജാതിമരം വളർന്ന് അതിന്‍റെ ചില്ലകൾ വീടിനു മുകളിലേക്ക് ചാഞ്ഞു കിടക്കുന്നു. ബഹുനില മന്ദിരത്തിന്‍റെ ഏറ്റവും മുകൾ നിലയിലെ വശത്തെ മുറിയിൽ തീപിടുത്തത്തിന്‍റെ ഓർമകൾ അവശേഷിപ്പിച്ചുകൊണ്ട് ഭിത്തിയിൽ പുകയുടെയേും കരിയുടെയും പാടുകൾ. വള്ളിപ്പടർപ്പുകൾ വീടിനുള്ളിലേക്ക് വളർന്നു കിടക്കുകയാണ്. മുകൾ നിലയിലെ ജനാലകളും വാതിലും തീപിടുത്തത്തിൽ കത്തിനശിച്ച നിലയിൽ. താഴത്തെ നിലകളിലെ വാതികലുകളും ജനാലകളുമെല്ലാം അടഞ്ഞു കിടക്കുകയാണ്. കൂടപ്പിറപ്പുകളെ കൊന്നൊടുക്കിയ ശേഷം കത്തിച്ചു ചാന്പലാക്കാൻ ശ്രമിച്ചപ്പോൾ വീടിന്‍റെ സിമിന്‍റു പാളികൾ വിണ്ടുകീറിയ നിലയിലും കാണാം. ക്ലിഫ് ഹൗസ് കോന്പൗണ്ട് ഉൾപ്പെടെയുള്ളവ സ്ഥിതി ചെയ്യുന്നതിനു സമീപത്തായുള്ള ബഹുനില മന്ദിരം വെയിലും മഴയുമേറ്റ് പായലും ചെളിയും പിടിച്ച സ്ഥിതിയിലാണ്. ഇന്ന് സമീപ വാസികൾ പോലും വീട്ടിലേക്ക് തിരിഞ്ഞുനോക്കാറില്ല. അത്രയധികം ഭീതിയാണ് കേഡൽ ജീൻസണ്‍ രാജ നിഷ്ഠൂര കൊലപാതകത്തിലൂടെ വീട് നാട്ടുകാർക്ക് സമ്മാനിച്ചത്. ജീൻസന് പരമാവധി ശിക്ഷ ലഭിക്കണമെന്ന അഭിപ്രായമാണ് സമീപവാസികൾ ഓരോരുത്തരും പങ്കുവച്ചത്.

നമുക്ക് നടക്കാം; സ്വാഗതസംഘം രൂപീകരിച്ചു

നെടുമങ്ങാട്: അഴിമതിക്കും ലഹരിക്കും വർഗീയതയ്ക്കുമെതിരേ നമുക്ക് നടക്കാം എന്ന മുദ്രാവാക്യവുമായി യൂത്ത് കോൺഗ്രസ് ജില്ലാ പ്രസിഡന്‍റ് നേമം ഷജീർ നയിക്കുന്ന ജില്ലാ പദയാത്ര വിജയിപ്പിക്കുന്നതിനായി നെടുമങ്ങാട് മണ്ഡലം കമ്മിറ്റിയുടെ നേതൃത്വത്തിൽ വിപുലമായ സ്വാഗതസംഘം രൂപീകരിച്ചു. രക്ഷാധികാരികളായി മഹേഷ് ചന്ദ്രൻ,ചിറമുക്ക് റാഫി,രജീഷ് എന്നിവരെയും ചെയർമാനായി കെ. ജെ. ബിനുവിനെയും തെരഞ്ഞെടുത്തു. 20 വരെ നടക്കുന്ന പദയാത്രയിൽ 15-ാം തീയതി നെടുമങ്ങാട് നിയോജകമണ്ഡലം തലത്തിൽ നടക്കുന്ന പദയാത്രയിലും സമാപന സമ്മേളനത്തിലും മണ്ഡലം കമ്മിറ്റിയുടെ നേതൃത്വത്തിൽ 500 പേരെ പങ്കെടുപ്പിക്കാൻ തീരുമാനിച്ചു. യോഗം യൂത്ത് കോൺഗ്രസ് സംസ്ഥാന സെക്രട്ടറി അഭിജിത്ത് എസ്. കെ. ഉദ്ഘാടനം ചെയ്തു. നിയോജകമണ്ഡലം ചെയർമാൻ കല്ലയം സുകു,നെട്ടിറച്ചിറ ജയൻ, റ്റി. അർജുനൻ, അഡ്വ. എൻ. ബാജി, അഡ്വ.എസ്. അരുൺ കുമാർ, താഹിർ നെടുമങ്ങാട്,ശരത് ശൈലേശ്വരൻ,ഷിനു നെട്ടയിൽ,സജാദ് മന്നൂർക്കോണം,അഫ്സൽ വാളിക്കോട്,ജെറിൻ ജയൻ, അഭിജിത്ത് നെടുമങ്ങാട് എന്നിവർ പ്രസംഗിച്ചു.

അനധികൃത പന്നിഫാമുകളിൽ പരിശോധന

പൂവച്ചൽ: പൂവച്ചൽ പഞ്ചായത്തിലെ അനധികൃത പന്നിഫാമുകളിൽ പഞ്ചായത്ത് ആരോഗ്യവകുപ്പ്, പോലീസ് എന്നിവരുടെ പരിശോധന. എട്ട് ഫാമിൽ പരിശോധന നടത്തിയ സംഘം പന്നികളെ പിടികൂടി കൂത്താട്ടുകുളം മീറ്റ് പ്രോഡക്ട്‌സ് അധികൃതർക്ക് കൈമാറി. 70ലേറെ പന്നികൾ ഉള്ള അനധികൃതമായി പ്രവർത്തിക്കുന്ന പൊന്നെടുത്തകുഴി വാർഡിലെ ഫാമിൽ കോടതി ഉത്തരവുള്ളതിനാൽ പന്നികളെ പിടികൂടാൻ സാധിച്ചില്ലെന്ന് പഞ്ചായത്ത് അധികൃതർ പറഞ്ഞു. കാട്ടാക്കട താലൂക്കിലെ പൂവച്ചൽ പഞ്ചായത്തിൽ അടക്കം പ്രവർത്തിക്കുന്ന അനധിക്യത പന്നിഫാമുകൾ അടച്ചുപൂട്ടാൻ ബാലാവകാശ കമ്മീഷൻ ഉത്തരവിട്ടിരുന്നു. ആർഡിഒ, കലക്ടർ, ആരോഗ്യവകുപ്പ്, തദ്ദേശ വകുപ്പ് തുടങ്ങി ബാലാവകാശ കമ്മിഷൻ വരെ പഞ്ചായത്തിലെ അനധികൃത ഫാമുകൾക്കെതിരേ കർശന നടപടി നിർദേശിച്ചിരുന്നു. പല വട്ടം ഫാമുകളിൽ പരിശോധന നടത്തി പന്നികളെ പിടികൂടിയെങ്കിലും അനധികൃതമായി പ്രവർത്തിക്കുന്ന ഫാമുകളുടെ പ്രവർത്തനം നിർത്തലാക്കാൻ അധികൃതർക്കായില്ല.

ലഹരി വിരുദ്ധ കാമ്പയിനും ബോധവത്കരണ സെമിനാറും

നെടുമങ്ങാട്: റസിഡന്‍സ് അപ്പക്‌സ് കൗണ്‍സിലിന്‍റെ നേതൃത്വത്തില്‍ താലൂക്കിലെ 18-പഞ്ചായത്തുകളിലേയും നഗരസഭയിലെ 39-വാര്‍ഡുകളിലേയും റസിഡന്‍സ് അസോസിയേഷനുകളെ ഉള്‍പ്പെടുത്തി ലഹരിവിരുദ്ധ കാമ്പയിനും സെമിനാറും സംഘടിപ്പിച്ചു. രാസലഹരിയുടെ വ്യാപനം സമൂഹത്തില്‍ വരുത്തുന്ന വിപത്തുകളെ പറ്റി വൈവിധ്യമായ പരിപാടികള്‍ സംഘടിപ്പിച്ചു. ടൗണ്‍ വാര്‍ഡ് കൗണ്‍സിലര്‍ സിന്ധു കൃഷ്ണകുമാര്‍ ഉദ്ഘാടനം ചെയ്തു. പ്രസിഡന്‍റ് കെ.ശശിധരന്‍നായര്‍ അധ്യക്ഷനായി. എക്‌സൈസ് ഇന്‍സ്‌പെക്ടര്‍ വി.അനില്‍കുമാറും വനിതാ ശിശു വികസന ജില്ലാ പ്രോഗ്രാം ഓഫീസര്‍ കവിതാറാണി രഞ്ജിത്തും ക്ലാസുകള്‍ നയിച്ചു. സെക്രട്ടറി പി.എസ് പ്രജു, ബാബുവട്ടപ്പറമ്പില്‍, എസ്.സതീഷ്ചന്ദ്രന്‍ നായര്‍, ഡോ.പ്രീതാകുമാരി, ഉഷാസ്റ്റീഫന്‍, അംബിക എന്നിവര്‍ പ്രസംഗിച്ചു.

മെൻസ്ട്രൽ കപ്പ് വിതരണോദ്ഘാടനം

നെടുമങ്ങാട്: നഗരസഭ 2024-25 വാർഷിക പദ്ധതിയുടെ ഭാഗമായി സ്ത്രീകൾക്ക് 16 ലക്ഷം രൂപ ചെലവഴിച്ച് വാങ്ങിയ മെൻസ്ട്രൽ കപ്പിന്‍റെ വിതരണ ഉദ്ഘാടനം നഗരസഭ ചെയർപേഴ്സൺ സി.എസ്. ശ്രീജ നിർവഹിച്ചു. നെടുമങ്ങാട് നഗരസഭ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ബി. സതീശൻ, ആരോഗ്യ സ്റ്റാൻഡിങ് കമ്മിറ്റി ചെയർപേഴ്സൺ അജിത , വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ വസന്തകുമാരി, കൗൺസിലർമാരായ പ്രിയ, സുമയ്യമനോജ്, ഷീജ സജിത, ശ്യാമള,സിന്ധു കൃഷ്ണകുമാർ, ഷീജ, ആദിത്യവിജയകുമാർ, ലളിത തുടങ്ങിയവർ പ്രസംഗിച്ചു.

കേരള വ്യാപാര വ്യവസായി 10 ലക്ഷം രൂപ വിതരണം ചെയ്തു

വെള്ളറട: കേരള വ്യാപാര വ്യവസായി ഏകോപന സമിതി വെള്ളറട യൂണിറ്റ് മരണാനന്തര കുടുംബ സുരക്ഷാ പദ്ധതി അനുസരിച്ചു 10 ലക്ഷം രൂപ വിതരണം ചെയ്തു. യൂണിറ്റ് വെള്ളറട പ്രസിഡന്‍റ് രാജേന്ദ്രന്‍റെ അധ്യക്ഷതയില്‍ കൂടിയ യോഗം ജില്ലാ പ്രസിഡന്‍റ് സി. ധനീഷ് ചന്ദ്രന്‍ ഉദ്ഘാടനം ചെയ്തു. 10 ലക്ഷം രൂപയുടെ ചെക്ക് വിതരണം സംസ്ഥാന സെക്രട്ടറി വൈ. വിജയന്‍ നിര്‍വഹിച്ചു.

വൈദ്യുതി കമ്പിയിൽ റബര്‍ മരം വീണ് വൈദ്യുതി നിലച്ചു

വെള്ളറട: ഇന്നലെ വൈകുന്നേരം നാലോടെ ചാറ്റല്‍ മഴക്കൊപ്പം ശക്തമായി വീശി അടിച്ച ചുഴലികാറ്റില്‍ വൈദ്യുതി കമ്പിയിൽ റബര്‍ മരം വീണ് കറന്‍റ് പോയി. അഞ്ചു മരം കാല വാര്‍ഡില്‍ അണ മുഖത്താണ് സംഭവം. ഇതുവഴിയുള്ള വാഹനഗതാഗതവും തടസപ്പെട്ടിട്ടുണ്ട്. ഇന്നലെ വൈകുന്നേരം ചാറ്റല്‍ മഴക്കൊപ്പമാണ് ശക്തമായ ചുഴലിക്കാറ്റ് ആഞ്ഞ് വീശിയത്. അണ മുഖത്ത് മാത്രമല്ല പരിസരപ്രദേശങ്ങളിലും വ്യാപകമായി മരങ്ങള്‍ കടപുഴകി വീണു. മരം മുറിച്ചുമാറ്റി വൈദ്യുതി ബന്ധം പുനസ്ഥാപിക്കണമെന്ന് പ്രദേശവാസികള്‍ ആവശ്യപ്പെട്ടു.

വേനൽ അവധി; നീന്തൽ പരിശീലനത്തിന് തിരക്ക്

നെടുമങ്ങാട്: നഗരസഭയുടെ കീഴിൽ പ്രവർത്തിക്കുന്ന അന്താരാഷ്‌ട്ര നീന്തൽ പരിശീലന കേന്ദ്രത്തിൽ വേനൽ അവധിക്ക് പരിശീലനം പൊടിപൊടിക്കുന്നു. നെടുമങ്ങാട് നഗരസഭയും അക്വാറ്റിക്ക് സെന്‍ററും സംയുക്തമായി ആണ് നീന്തൽ പരിശീലനം നൽകുന്നത്. 2022 ൽ പ്രവർത്തനം ആരoഭിച്ച പരീശീലന കേന്ദ്രത്തിൽ നിരവധി പേർ ആണ് നീന്തൽ പഠിയ്ക്കുവാൻ എത്തുന്നത്. വേനൽ അവധി യോടനുബന്ധിച്ചു 500ഓളം കുട്ടികൾ നീന്തൽ പരിശീലനത്തിനായി എത്തുന്നു. കുട്ടികൾക്ക് പുറമേ മുതിർന്നവർക്കും സ്ത്രീകൾക്കും ജീവിത ശൈലി രോഗങ്ങൾക്ക് അടിപ്പെടാതിരിക്കുവാൻ നീന്തൽ പരിശീലനം നൽകുന്നുണ്ട്. റിട്ട. ആർമി ഉദ്യോഗസ്ഥൻ ജിതേഷിന്‍റെ നേതൃത്വത്തിൽ രണ്ട് വനിതകളും മൂന്ന് പുരുഷൻമാരുമാണ് പരിശീലനം നൽകുന്നത്. വിവിധ സായുധ സേനയിലേയ്ക്കുള്ള ഉദ്യോഗാർഥികൾക്കായി പ്രത്യേക പരിശീലനവും ഇവിടെ നൽകുന്നു.

സ്വീവേറേജ് ലൈനിന് 124 കോടി അനുവദിച്ചു

പേരൂര്‍ക്കട: തിരുവനന്തപുരം നഗരസഭ തീരദേശ മേഖല ഉള്‍പ്പെടെയുള്ള പ്രദേശങ്ങളില്‍ സ്വീവറേജ് ലൈന്‍ സ്ഥാപിക്കുന്നതിനായി 124.35 കോടി രൂപ അനുവദിച്ചു. മുട്ടത്തറ, ബീമാപ്പള്ളി, ബീമാപ്പള്ളി ഈസ്റ്റ്, മാണിക്യവിളാകം, ചാക്ക, പേട്ട, പെരുന്താന്നി, കടകംപള്ളി വാര്‍ഡുകള്‍ ഉള്‍പ്പെടെ ആകെ 42.7 കിലോമീറ്റര്‍ സ്വീവറേജ് ലൈന്‍ സ്ഥാപിക്കുന്നതിനാണ് തുക.

ഓക്‌സിജന്‍ കോണ്‍സന്‍ട്രേറ്റര്‍ നല്‍കി

പാലോട്: നന്ദിയോട് കേന്ദ്രമായി പ്രവര്‍ത്തിക്കുന്ന പെയിന്‍ ആൻഡ് പാലിയേറ്റീവ് സൊസൈറ്റിയുടെ നേതൃത്വത്തില്‍ അവശത അനുഭവനിക്കുന്ന രോഗികള്‍ക്ക് ഓക്‌സിജന്‍ കോണ്‍സന്‍ട്രേറ്റര്‍ ഉള്‍പ്പെടുള്ള മെഡിക്കല്‍ ഉപകരണങ്ങള്‍ വിതരണം ചെയ്തു. സാന്ത്വന പരിചരണ പദ്ധതികളുടെ ഭാഗമായി കിടപ്പുരോഗികള്‍ ഉള്‍പ്പെടെയുള്ളവര്‍ക്കാണ് ഉപകരണങ്ങള്‍ വിതരണം ചെയ്തത്. ശനിയാഴ്ചകളിൽ നന്ദിയോട് ഗ്രീന്‍ ഓഡിറ്റോറിയത്തില്‍ രോഗികളെ സൗജന്യമായി പരിശോധിക്കുന്നത് കൂടാതെ, ബുധനാഴ്ചകളില്‍ കിടപ്പുരോഗികളുടെ വീട്ടിലെത്തി ഡോക്ടര്‍മാര്‍ രോഗികള്‍ക്ക് ചികിത്സയും നല്‍കുന്നുണ്ട്. നന്ദിയോട് നടന്ന ചടങ്ങില്‍ പച്ച വട്ടപ്പുല്ലില്‍ വസന്ത എന്ന രോഗിക്ക് ഓക്‌സിജന്‍ കോണ്‍സന്‍ട്രേറ്റര്‍ നല്‍കി ഉദ്ഘാടനം ചെയ്തു. സൊസൈറ്റി സെക്രട്ടറി പാലുവള്ളി ശശി, ഡോ.അന്ന, കെ.ശിവദാസന്‍, സത്യന്‍, കെ.ചക്രപാണി, ഭാസ്‌ക്കരന്‍നായര്‍, ചന്ദ്രശേഖരന്‍നായര്‍, വിജയകുമാരി തുടങ്ങിയവര്‍ പങ്കെടുത്തു.

വെള്ളക്കടലാസില്‍ വിരിയുന്നു, വിശ്വപ്രസിദ്ധരുടെ മുഖങ്ങള്‍

നെയ്യാറ്റിന്‍കര : നെല്‍സണ്‍ മണ്ഡേല മുതല്‍ സ്റ്റീഫന്‍ ന്‍ ഹോക്കിംഗ്സ് വരെയും മിസ്റ്റര്‍ ബീന്‍ മുതല്‍ മഞ്ജു വാര്യര്‍ വരെയും ആഷിക്കിന്‍റെ വരകളില്‍ തെളിയുന്പോള്‍ കാഴ്ചക്കാരന്‍ തീര്‍ച്ചയായും ചിത്രകാരനെ അനുമോദിക്കും. ഇമേജ് ചിത്രകലാ വിദ്യാലയം സംഘടിപ്പിച്ചിരിക്കുന്ന ഇമേജോത്സവിലാണ് ആഷിക്കിന്‍റെ പെന്‍സില്‍ ഷെയ്ഡ് ചിത്രങ്ങള്‍ ശ്രദ്ധേയമാകുന്നത്. കുളത്തൂര്‍ പറയംവിള വിജയ് ഭവനില്‍ വിജയകുമാറിന്‍റെയും ഗീതയുടെയും മകന്‍ ആഷിക് വിജയ് നാലാം ക്ലാസ് മുതൽ വരയുടെ ലോകത്ത് സജീവമാണ്. നിറക്കൂട്ടുകളാല്‍ കാഴ്ചയുടെ വിസ്മയം വിരിയിക്കുന്നതിനെക്കാള്‍ ആഷിക്കിന് താത്പര്യം ഗ്രാഫൈറ്റ് പെന്‍സിലിന്‍റെ സഹായത്തോടെയുള്ള ഷെയ്ഡിംഗ് രീതിയാണ്. വിരാലി എല്‍എംഎസ് സ്കൂള്‍, വിമല ഹൃദയ സ്കൂള്‍, കുളത്തൂര്‍ ഗവ. എച്ച് എസ്എസ് എന്നിവിടങ്ങളില്‍ പഠിച്ചിരുന്നപ്പോഴൊക്കെയും വരകളോട് വല്ലാത്ത ഹൃദയാഭിമുഖ്യം പുലര്‍ത്തി. മറ്റു ചിത്രകലാ രീതികളിലും ആഷിക് ഒട്ടും പിറകിലല്ല. കെഎസ്ആര്‍ടിസി പൂവാര്‍ ഡിപ്പോയില്‍ കണ്ടക്ടറായ പിതാവും വിരാലി സിഎസ്ഐ നഴ്സറി സ്കൂൾ സ്റ്റാഫായ മാതാവും സഹോദരങ്ങളായ ആഷിനും ആന്‍ജിയയും ആഷിക്കിനെ കലയില്‍ പ്രോത്സാഹിപ്പിക്കാറുണ്ട്. ആഷിനും മികച്ച ചിത്രകാരനാണ്.

നിർത്തലാക്കിയ സർവീസുകൾ പുന:സ്ഥാപിക്കണം; നിവേദനം നൽകി

നെടുമങ്ങാട്: കെഎസ്ആർടിസി നെടുമങ്ങാട് ഡിപ്പോയിൽനിന്ന് വർഷങ്ങളായി രാത്രി എട്ടുമണിക്ക് സർവീസ് നടത്തിയിരുന്ന വേങ്കവിള- വേട്ടംപള്ളി - മൂഴി സർവീസും, നെടുമങ്ങാട് നിന്ന് പുത്തൻ പാലം വഴി മുതുവിളയിലേക്ക് ഉണ്ടായിരുന്ന നിർത്തലാക്കിയ സ്റ്റേ സർവീസിനു പകരം പനവൂരിലേക്ക് രാത്രി ഒൻപതിനു പുതിയ സർവീസ് ആരംഭിക്കണമെന്നു ആവശ്യപ്പെട്ടുകൊണ്ട് മൂഴി ടിപ്പു കൾച്ചറൽ സൊസൈറ്റിയുടെയും ഗാന്ധിയൻ കർമ്മവേദിയുടെയും ആഭിമുഖ്യത്തിൽ സൊസൈറ്റി ചെയർമാൻ മൂഴിയിൽ മുഹമ്മദ് ഷിബുവിന്‍റെ നേതൃത്വത്തിൽ കെഎസ്ആർടിസി നെടുമങ്ങാട് എടിഒ ഷെസിൻ ആർജെയ്ക്ക് നിവേദനം നൽകി. നിവേദക സംഘത്തിൽ മുൻ നെടുമങ്ങാട് മുനിസിപ്പൽ ചെയർമാൻ കെ. സോമശേഖരൻ നായർ, പുലിപ്പാറ യൂസഫ്, നെടുമങ്ങാട് ശ്രീകുമാർ, നിബിൻ, ജഗൻ, വി.നിബിൻ എന്നിവരും ഉണ്ടായിരുന്നു.

ആദിവാസി മഹാസഭ സംസ്ഥാന സമ്മേളനം

നെടുമങ്ങാട്: പട്ടികവര്‍ഗ ഭൂമിയുടെ പട്ടയം പട്ടികവര്‍ഗക്കാരുടെ പേരില്‍ മാത്രം നല്‍കണമെന്നും സംസ്ഥാനത്ത് വനാവകാശ നിയമപ്രകാരം കൈവശാവകാശ രേഖ ലഭിച്ച 28, 587 കുടുംബങ്ങളുടെ 37488.87 ഹെക്ടര്‍ ഭൂമിക്ക് അടിയന്തരമായി പട്ടയം നല്‍കണമെന്നും ആദിവാസി മഹാസഭ സംസ്ഥാന സമ്മേളനം ആവശ്യപ്പെട്ടു. സമ്മേളനം സംഘടനാ പ്രസിഡന്‍റ് മോഹനന്‍ ത്രിവേണി ഉദ്ഘാടനം ചെയ്തു. എസ്. കുട്ടപ്പന്‍ കാണി അധ്യക്ഷത വഹിച്ചു. കെ. ശശികുമാര്‍ റിപ്പോര്‍ട്ട് അവതരിപ്പിച്ചു. മുന്‍ ചീഫ് സെക്രട്ടറി എസ്. എം. വിജയാനന്ദ് ആദിവാസികളുടെ അവകാശങ്ങളെ സംബന്ധിച്ച് മുഖ്യപ്രഭാഷണം നടത്തി. പുതിയ ഭാരവാഹികളായി മോഹനന്‍ ത്രിവേണി (സംസ്ഥാന പ്രസിഡന്‍റ്) കെ. ശശികുമാര്‍ ( ജന.സെക്രട്ടറി) ജി. മധുസൂദനന്‍ (വൈ.പ്രസിഡന്‍റ്) ആര്‍.ബിനു (ജോ. സെക്രട്ടറി) എസ്. കുട്ടപ്പന്‍ കാണി (രക്ഷാധികാരി) എന്നിവരെ തെരഞ്ഞെടുത്തു.

ഇന്ത്യന്‍ സേനയ്ക്ക് ദീപം തെളിയിച്ച് ഐക്യദാര്‍ഢ്യം

തിരുവനന്തപുരം: പാക്കിസ്ഥാനിലെ ഭീകര ത്താവളങ്ങള്‍ ലക്ഷ്യമാക്കി ഓപ്പറേഷന്‍ സിന്ദൂ റിലൂടെ ആക്രമണം നടത്തിയ ഇന്ത്യന്‍ സേനയ്ക്ക് അഭിവാദ്യവും ഐക്യദാര്‍ഢ്യവും പ്രഖ്യാപിച്ച് ദീപം തെളിയിച്ചു. പ്രേംനസീര്‍ സുഹൃത് സമിതി പാളയം രക്ത സാക്ഷി മണ്ഡപത്തില്‍ നടത്തിയ ഐക്യദാര്‍ഢ്യചടങ്ങ് മുന്‍മന്ത്രി വി.എസ്. ശിവകുമാര്‍ ഉദ്ഘാടനം ചെയ്തു. ഡോ.എം.ആര്‍. തമ്പാന്‍ പ്രതിജ്ഞാവാചകം ചൊല്ലി കൊടുത്തു. സമിതി ഭാരവാഹികളായ തെക്കന്‍ സ്റ്റാര്‍ ബാദുഷ, പനച്ചമൂട് ഷാജഹാന്‍, ഷംസ് ആബ്ദീന്‍, സൈനുല്‍ ആബ്ദിന്‍, അജിത് കുമാര്‍, അലോഷ്യസ് പെരേര ,നാസര്‍ കിഴക്കതില്‍, അജയ് വെള്ളരിപ്പണ, ഡോ. വാഴമുട്ടം ചന്ദ്രബാബു, അഡ്വ. ഫസിഹ, സോനു, ഗൗരീ കൃഷ്ണ, സുദര്‍ശന്‍, രാജ്കുമാര്‍, വിനോദ്,അനിത,സുഗത, ജെ. ലത, സി.കെ. റാണി, നസീറ , ശോഭന തുടങ്ങിയവര്‍ പങ്കെടുത്തു. പ്രേംസിം സിംഗേര്‍സ് ഗായകര്‍ ദേശഭക്തി ഗാനങ്ങളും ആലപിച്ചു.

സ്മാര്‍ട്ടാകാൻ പുളിമൂട് അങ്കണവാടി

നെടുമങ്ങാട്: ഉഴമലയ്ക്കല്‍ ഗ്രാമപഞ്ചായത്തിലെ പുളിമൂട് 37 -ാം നമ്പര്‍ അങ്കണവാടി സ്മാര്‍ട്ടാക്കുന്നതിന്‍റെ നിര്‍മാണ ഉദ്ഘാടനം ജി.സ്റ്റീഫന്‍ എംഎല്‍എ നിര്‍വഹിച്ചു. സംസ്ഥാനത്തെ എല്ലാ അങ്കണവാടികളും സ്മാര്‍ട്ടാക്കുകയാണ് സര്‍ക്കാര്‍ ലക്ഷ്യമെന്നും, പേരില്‍ മാത്രമല്ല പ്രവൃത്തിയിലും അങ്കണവാടി സ്മാര്‍ട്ട് ആകുമെന്നും എംഎല്‍എ പറഞ്ഞു ജി.സ്റ്റീഫന്‍ എംഎല്‍എയുടെ ആസ്തിവികസന ഫണ്ടില്‍ നിന്നും 30 ലക്ഷം രൂപ വിനിയോഗിച്ചാണ് അങ്കണവാടി നിര്‍മിക്കുന്നത്. ഉഴമലയ്ക്കല്‍ ഗ്രാമ പഞ്ചായത്ത് പ്രസിഡന്‍റ് ജെ. ലളിത, വാര്‍ഡ് മെമ്പര്‍ ആര്‍. ബിന്ദു, ജില്ലാ പഞ്ചായത്ത് അംഗം മിനി. എ, ഐ.സി.ഡി.എസ് സൂപ്പര്‍വൈസര്‍ ടി.സി.സന്ധ്യ, അങ്കണവാടി അധ്യാപകര്‍, കുട്ടികള്‍ തുടങ്ങിയവര്‍ ചടങ്ങില്‍ പങ്കെടുത്തു.

നിർമാണം കഴിഞ്ഞിട്ട് ആറുമാസം; പാർക്കിലെ കോഫി ഷോപ്പ് അടഞ്ഞുതന്നെ

പേരൂര്‍ക്കട: നിർമാണം പൂര്‍ത്തീകരിച്ച് ആറുമാസം പിന്നിട്ടിട്ടും കോഫി ഷോപ്പ് തുറന്നു കൊടുക്കുന്നില്ല. പൂജപ്പുര ജംഗ്ഷനില്‍ ഭഗത്‌സിംഗ് പാര്‍ക്കിനുള്ളില്‍ സ്ഥാപിച്ച കോഫി ഷോപ്പാണ് അടഞ്ഞുകിടക്കുന്നത്. ആറുമാസത്തിനു മുന്പ് പാർക്ക് നവീകരിച്ചപ്പോഴാണ് ഇവിടെ കോഫീഷോപ്പ് നിർമിച്ചത്. കുട്ടികൾക്കായുള്ള കളിക്കോപ്പുകളും വയോധികര്‍ ഉള്‍പ്പെടെയുള്ളവര്‍ക്ക് ഇരിക്കുന്നതിനുള്ള ഇരിപ്പിടങ്ങളും വിശാലമായ മണ്ഡപവും നിർമിച്ചിട്ടുണ്ട്. ടോയ്‌ലെറ്റുകള്‍ ഉള്‍പ്പെടെയുള്ളവയും നവീകരിച്ചിട്ടുണ്ട്. തിരുവനന്തപുരം നഗരസഭയുടെ നിയന്ത്രണത്തിലുള്ളതാണ് പാര്‍ക്കും കോഫി ഷോപ്പും. ടെന്‍ഡര്‍ നടപടികള്‍ പൂര്‍ത്തീകരിച്ച് കോഫി ഷോപ്പ് ഉടന്‍ തുറന്നുനല്‍കണമെന്നു വിവിധ കോണുകളില്‍ നിന്ന് ആവശ്യമുയര്‍ന്നിരുന്നുവെങ്കിലും ഇനിയും നടപ്പാക്കപ്പെട്ടിട്ടില്ല. പൊതുജനങ്ങള്‍ക്കു പ്രയോജനപ്പെടുംവിധം കോഫി ഷോപ്പ് ഉടന്‍ തുറന്നുനല്‍കുന്നതിനുള്ള നടപടികള്‍ സ്വീകരിക്കണമെന്നു പൂജപ്പുര ചാടിയറ റസി. അസോസിയേഷന്‍ പ്രസിഡന്‍റ് കെ. ശശികുമാര്‍ ആവശ്യപ്പെട്ടു.

മെഡിക്കല്‍ കോളജിൽ മോഷണം പതിവ്

മെഡിക്കല്‍ കോളജ്: തിരുവനന്തപുരം മെഡിക്കല്‍കോളജ് ആശുപത്രിയില്‍ ഇരുചക്ര വാഹനങ്ങളും മൊബൈല്‍ഫോണുകളും പണവും കവര്‍ച്ച ചെയ്യപ്പെടുന്നത് സ്ഥിരം സംഭവമാകുന്നു. കഴിഞ്ഞ രണ്ടുമാസത്തിനിടെ ഇവിടെ നടന്ന കവര്‍ച്ചയുടെ ഏകദേശ കണക്ക് ആരെയും ഞെട്ടിക്കുന്നതാണ്. 10-ഓളം ഇരുചക്ര വാഹനങ്ങളും ഏകദേശം 20 മൊബൈല്‍ ഫോണുകളുമാണ് മോഷ്ടിക്കപ്പെട്ടത്. ഇതുകൂടാതെ രോഗികളുടെയും കൂട്ടിരിപ്പുകാരുടെയും പണം നഷ്ടപ്പെട്ട സംഭവങ്ങളും നിരവധിയാണ്. 10 പേര്‍ ഇത്തരം സംഭവങ്ങള്‍ക്ക് ഇരയാകുമ്പോള്‍ അതില്‍ പരാതി നല്‍കാന്‍ ഒരാള്‍പോലും തയാറാകാത്തതാണ് മോഷ്ടാക്കള്‍ക്ക് അനുഗ്രഹമാകുന്നത്. പാവപ്പെട്ടവരുടെ ആതുരാലയമായ തിരുവനന്തപുരം മെഡിക്കല്‍കോളജില്‍ ദിനംപ്രതി ആയിരക്കണക്കിന് രോഗികളാണ് എത്തുന്നത്. ഇവര്‍ക്ക് സഹായികളായി എത്തുന്ന കൂട്ടിരിപ്പുകാരുടെ വസ്തുവകകളാണ് മോഷ്ടാക്കള്‍ പ്രധാനമായും ലക്ഷ്യംവയ്ക്കുന്നത്. സുരക്ഷാജീവനക്കാര്‍ ഈ ഭാഗത്ത് വളരെ കുറവാണ്. ഇവരുടെ കണ്ണുവെട്ടിച്ച് മോഷണം നടത്തി മടങ്ങാന്‍ വിരുതുള്ളവര്‍ മാത്രമേ ഇവിടെ കവര്‍ച്ചയ്ക്ക് എത്താറുള്ളൂ. പുതിയ കെട്ടിടം കെട്ടാനെന്ന പേരില്‍ സൂപ്പര്‍സ്‌പെഷ്യാലിറ്റിക്കു സമീപത്തുനിന്നുള്ള 16, 17, 18, 19 എന്നീ വാര്‍ഡുകളിലുള്ള രോഗികളെക്കൂടി ഇപ്പോള്‍ 14, 28 തുടങ്ങിയ വാര്‍ഡുകളിലേക്ക് എത്തിച്ചിട്ട് ഒരുവര്‍ഷം കഴിഞ്ഞു. അതുകൊണ്ടുതന്നെ വാര്‍ഡുകളില്‍ രോഗികള്‍ തിങ്ങിഞെരുങ്ങിയാണ് കഴിഞ്ഞുവരുന്നത്. ഇത് മോഷ്ടാക്കള്‍ക്ക് കൂടുതല്‍ അനുഗ്രഹമാകുന്നു. സുരക്ഷാജീവനക്കാരുടെ ശക്തമായ സാന്നിദ്ധ്യം രാത്രി ഒൻപതു പിന്നിടുന്നതോടുകൂടി കുറയുന്നു. വാര്‍ഡുകളിലേക്ക് എളുപ്പത്തില്‍ എത്താമെന്നതും പണമോ മൊബൈലോ കൈക്കലാക്കി ഈസിയായി രക്ഷപ്പെടാമെന്നതുമാണ് കവര്‍ച്ചകള്‍ വര്‍ദ്ധിച്ചുവരാന്‍ കാരണമെന്നാണു സൂചന. വാഹനപാര്‍ക്കിംഗ് സ്ഥലങ്ങളില്‍ എപ്പോഴും തിരക്കാണ്. ആരാണ്, എപ്പോഴാണ് വാഹനം എടുത്തുകൊണ്ടു പോകുന്നതെന്ന് ശ്രദ്ധിക്കാന്‍ നാമമാത്രമായുള്ള സുരക്ഷാജീവനക്കാര്‍ക്ക് സാധിക്കാറില്ല. കൂടുതല്‍ സുരക്ഷാജീവനക്കാരെ നിയമിച്ചും സിസിടിവി കാമറകള്‍ വ്യാപകമായി സ്ഥാപിച്ചും കവര്‍ച്ചകള്‍ക്ക് അറുതിവരുത്താന്‍ അധികൃതര്‍ തയാറാകണമെന്നതാണ് ആവശ്യം.

പാലോട് മേഖലയിലും മികച്ച വിജയം

പാലോട്: എസ്എസ്എൽസി പരീക്ഷയിൽ പാലോട് മേഖലയിലെ സ്കൂളുകൾക്ക് മികച്ച വിജയം. ജവഹർ കോളനി ഗവ. എച്ച്എസ്, പെരിങ്ങമ്മല എൻഎസ്എസ് സ്കൂൾ, ഇടിഞ്ഞാർ ട്രൈബൽ എച്ച്എസ് എന്നീ സ്കൂളുകൾ 100% വിജയം നേടി. ഇതിൽ ജവാഹർ കോളനി ഗവ.എച്ച് എസ്19 എ പ്ലസ് നേടി. ഇവിടെ 102 കുട്ടികൾ എഴുതിയത് മുഴുവൻ പേരും വിജയിച്ചു. എ പ്ലസുകളുടെ എണ്ണത്തിൽ എസ്കെവി ഹയർ സെക്കൻഡറി സ്കൂൾ മുന്നിലാണ്. ഇവിടെ 33 എ പ്ലസ് ലഭിച്ചു.

അമ്പൂരി സെന്‍റ് തോമസ് എച്ച്എസ്എസ് രജത ജൂബിലി

അമ്പൂരി: എസ്എസ്എൽസി പരീക്ഷയിൽ നൂറ് ശതമാനം വിജയം വരിച്ച അന്പൂരി സെന്‍റ് തോമസ് ഹയർ സെക്കൻഡറി സ്കൂളിന്‍റെ രജത ജൂബിലി ആഘോഷം ഇന്ന് നടക്കും. ഈ വർഷം 125 കുട്ടികൾ പരീക്ഷ എഴുതിയതിൽ 125 പേരും വിജയിച്ചു. 1956-ൽ സ്ഥാപിതമായ സ്കൂളിന്‍റെ രജതജൂബിലി ആഘോഷം ഇന്ന് രാവിലെ 10 ന് മാലിപ്പറമ്പിൽ പാരീഷ് ഹാളിൽ സ്കൂൾ മാനേജർ ഫാ. സോണി കരുവേലിയുടെ അധ്യക്ഷതയിൽ അമ്പൂരി പഞ്ചായത്ത് പ്രസിഡന്‍റ് വൽസലാ രാജു ഉദ്ഘാടനം ചെയ്യും. പ്രിൻസിപ്പൽ സി. സൂസൻ എംജെ, പ്രഥമ പ്രിൻസിപപ്പലായിരുന്ന അംബ്രോസീസ് നൈനാൻ, റിട്ട.പ്രിൻസിപപ്പൽ ടോമി ജോസഫ്, പഞ്ചായത്ത് മെമ്പർമാരായ ലാലി ജോൺ, ബിന്ദു ബിനു, ജനറൽ കൺവീനർ അർച്ചന, അധ്യാപക അനധ്യാപക, വിദ്യാർഥി പ്രതിനിധികൾ തുടങ്ങിയവർ പ്രസംഗിക്കും.

ഗ്രാമീണ മേഖലയിൽ മികച്ച വിജയം

നെടുമങ്ങാട് : എസ്എസ്എൽസി പരീക്ഷയിൽ ഗ്രാമീണ മേഖലയിലെ സ്കൂളുകളിൽ മികച്ച വിജയം.വെള്ളനാട് ഗവ. വൊക്കേഷണൽ ആൻഡ് ഹയർ സെക്കൻഡറി സ്കൂളിൽ ആകെ പരീക്ഷ എഴുതിയ 479 പേരിൽ 472 പേർ വിജയിച്ചു. 56 പേർ മുഴുവൻ വിഷയങ്ങളിലും എ പ്ലസ് നേടി. അരുവിക്കര ഗവ. ഹയർ സെക്കൻഡറി സ്കൂൾ നൂറു ശതമാനം വിജയം നേടി. 174 കുട്ടികളാണ് പരീക്ഷ എഴുതിയത്. 17 പേർ എല്ലാവിഷയത്തിലും എപ്ലസ് നേടി.പൂവത്തൂർ ഹയർ സെക്കൻഡറി സ്കൂൾ നൂറുമേനി വിജയം നേടി. ഇവിടെ 68പേർ പരീക്ഷ എഴുതി. മൂന്ന് പേർക്ക് മുഴുവൻ വിഷയത്തിലും എപ്ലസുണ്ട്. നെടുമങ്ങാട് ദർശന സ്കൂളും നൂറു ശതമാനം നേടി.146 പേരാണ് ഇവിടെ വിജയിച്ചത്. 30പേർ എല്ലാ വിഷയത്തിലും എ പ്ലസ് നേടി. ഏറ്റവും കൂടുതൽ വിദ്യാർഥികൾ പരീക്ഷ എഴുതിയ നെടുമങ്ങാട് ഗവ. ഗേൾസ് ഹയർ സെക്കൻഡറി സ്കൂളിൽ 369 പേർ വിജയിച്ചു. ഒരാൾ മാത്രമാണ് തോൽവിയറിഞ്ഞത്.69 വിദ്യാർഥികൾക്ക് എല്ലാ വിഷയത്തിലും എ പ്ലസുണ്ട്. പെരിങ്ങമ്മല ഇക്ബാൽ ഹയർ സെക്കൻഡറി സ്കൂളിൽ പരീക്ഷ എഴുതിയ 129 പേരിൽ 128 പേർ വിജയിച്ചപ്പോൾ 12പേർക്ക് എല്ലാ വിഷയത്തിലും എ പ്ലസുണ്ട്. നന്ദിയോട് എസ്കെവി ഹൈസ്കൂളിൽ പരീക്ഷ എഴുതിയ 250 വിദ്യാർഥികളിൽ 245 പേർ വിജയിച്ചു. 33വിദ്യാർഥികൾക്ക് എല്ലാ വിഷയത്തിലും എ പ്ലസ് ഉണ്ട്. കരിപ്പൂർ ഹൈസ്കൂളിൽ 123 പേർ പരീക്ഷ എഴുതിയതിൽ 122 പേർ വിജയിച്ചു. 11 വിദ്യാർഥികൾക്ക് എല്ലാ വിഷയത്തിലും എ പ്ലസുണ്ട്. കരകുളം ഹയർ സെക്കൻഡറി സ്കൂളിൽ പരീക്ഷ എഴുതിയ 70 പേരിൽ 68 പേർ വിജയിച്ചു. ആറുപേർക്ക് എല്ലാ വിഷയത്തിലും എ പ്ലസുണ്ട്.

പേയാട് കണ്ണശയ്ക്ക് നൂറുമേനി വിജയം

പേയാട്: എസ്എസ്എൽസി പരീക്ഷയിൽ പേയാട് കണ്ണശ മിഷൻ ഹൈസ്കൂളിന് ഇത്തവണയും നൂറുമേനി വിജയം. തുടർച്ചയായി പതിനേഴാം വർഷമാണ് സ്കൂൾ നൂറു ശതമാനം വിജയം കരസ്ഥമാക്കുന്നത്. പരിക്ഷ എഴുതിയ 125 വിദ്യാർഥികളും തിളക്കമാർന്ന വിജയം കരസ്ഥമാക്കി. 81 ആൺകുട്ടികളും, 44 പെൺകുട്ടികളുമാണ് ഇക്കുറി എസ്എസ് എൽസി പരീക്ഷയിൽ മാറ്റുരച്ചത്. ഇവരിൽ 34 കുട്ടികൾ എല്ലാ വിഷയങ്ങൾക്കും എ പ്ലസ് നേടി. 20 കുട്ടികൾ ഒൻപത് വിഷയങ്ങളിൽ എപ്ലസ് കരസ്ഥമാക്കി. മികവാർന്ന വിജയത്തിലൂടെ നാടിന്‍റെ അഭിമാനങ്ങളായി മാറിയ വിദ്യാർഥികൾ ഫലമറിഞ്ഞയുടൻ സ്കൂളിലെത്തി. മധുരം വിളമ്പി സ്കൂളിന്‍റെ ചുണക്കുട്ടികൾ ആഹ്ലാദം പങ്കിട്ടു. സ്കൂൾ മാനേജർ ആനന്ദ് കണ്ണശ, ഹെഡ്മിസ്ട്രസ് റിൻസി സെബാസ്റ്റ്യൻ എന്നിവർ ചേർന്ന് വിജയികൾക്ക് മധുരം നൽകി അനുമോദിച്ചു.

100 മേനി കൊയ്ത് സ്കൂളുകൾ

തിരുവനന്തപുരം: എസ്എസ്എൽസി ഫലം ഇന്നലെ പ്രഖ്യാപിച്ചപ്പോൾ ജില്ലയിലെ നിരവധി സ്കൂളുകളാണ് 100 മേനി വിജയം കൈവരിച്ചത്. നൂറില്‍ നൂറ് സർക്കാർ സ്കൂളുകൾ ഗവ. എച്ച്എസ്എസ് അരുവിക്കര, ഗവ. ട്രൈബൽ എച്ച്എസ് മീനാങ്കൽ, ഗവ. ബോയ്സ് എച്ച്എസ് ആറ്റിങ്ങൽ, ഗവ. എച്ച്എസ്എസ് ഫോർ ഗേൾ‌സ് ആറ്റിങ്ങൽ, എസ്എൻവി ഗവ. എച്ച്എസ്എസ് കടയ്ക്കാവൂർ, ഗവ. ഗേൾസ് എച്ച്എസ്എസ് മിതൃമല, ഗവ. വിഎച്ച്എസ്എസ് നെടുമങ്ങാട്, ഗവ. എച്ച്എസ് പൂവത്തൂർ, ജിഎം എച്ച്എസ് നടയറ, ഗവ. എച്ച്എസ്എസ് തൊളിക്കോട്, വി കെ കാണി ഗവ. എച്ച്എസ് പനക്കോട്, ഗവ. എച്ച്എസ്എസ് വെട്ടൂർ, ഗവ. എച്ച്എസ് ചെറുന്നിയൂർ, ഗവ. എച്ച്എസ് നഗരൂർ, ഗവ. ട്രൈബൽ എച്ച്എസ് ഇടിഞ്ഞാർ, ഗവ. എച്ച്എസ് അയിലം, ഗവ. എച്ച്എസ് ജവഹർ കോളനി, ജിഎച്ച്എസ് ചെറ്റച്ചൽ, ഗവ. എച്ച്എസ് കുടവൂർകോണം, ഗവ. എച്ച്എസ് ഫോർ ഗേൾസ് കന്യാകുളങ്ങര, ഗവ. എച്ച്എസ്എസ് നെടുവേലി, ഗവ. എച്ച്എസ് മണ്ണന്തല, ഗവ. എച്ച്എസ് കട്ടച്ചക്കോണം, ഗവ. മെഡിക്കൽ കോളേജ് എച്ച്എസ്എസ് തിരുവനന്തപുരം, ഗവ. സിറ്റി വിഎച്ച്എസ്എസ് തിരുവനന്തപുരം, ഗവ. ഗേൾസ് വിഎച്ച്എസ്എസ് പേട്ട, ഗവ. എച്ച്‌എസ് വഞ്ചിയൂർ‌, ഗവ. എച്ച്എസ്എസ് പേട്ട, ജിവി രാജ സ്പോർട്സ് സ്കൂൾ, ഗവ. സംസ്കൃത എച്ച്എസ് ഫോർട്ട്, ഗവ. റീജണൽ ഫിഷറീസ് ടെക്നിക്കൽ എച്ച്എസ് ആൻഡ് വിഎച്ച്എസ്എസ്, ഗവ. എച്ച്എസ്എസ് ഫോർ ബോയ്സ് കരമന, ഗവ. ഗേൾസ് എച്ച്എസ്എസ് പുന്നമൂട്, ഗവ. ഗേൾസ് എച്ച്എസ്എസ് കരമന, ഗവ. മോഡൽ എച്ച്എസ്എസ് ഫോർ ബോയ്സ് ചാല, ഗവ. തമിഴ് എച്ച്എസ്എസ് ചാല, ഗവ. സെൻട്രൽ എച്ച്എസ് അട്ടക്കുളങ്ങര, ഗവ. മോഡൽ ബിഎച്ച്എസ്എസ് തൈക്കാട്, ഗവ. എച്ച്എസ് ജഗതി, ഡോ. എഎംഎംആർഎച്ച്എസ്എസ് ഫോർ ഗേൾസ് കട്ടേല, ഗവ. വിഎച്ച്എസ്എസ് പൂവാർ, എൻകെഎം ഗവ. എച്ച്എസ്എസ് ധനുവച്ചപുരം, ഗവ. എച്ച്എസ് ഫോർ ഗേൾസ് ധനുവച്ചപുരം, ഗവ. വിഎച്ച്എസ്എസ് പരണിയം, ഗവ. എച്ച്എസ് കാഞ്ഞിരംകുളം, ഗവ. എച്ച്എസ്എസ് കുളത്തുമ്മൽ, ഗവ വിഎച്ച്എസ്എസ് കുളത്തൂർ, ഗവ. എച്ച്എസ്എസ് വിളവൂർക്കൽ, ഗവ. എച്ച്എസ് കണ്ടല, ഗവ. എച്ച്എസ്എസ് മാരായമുട്ടം, ഗവ. വിഎച്ച്എസ്എസ് കോട്ടുകാൽ, ഗവ. എംടിഎച്ച്എസ് ഊരൂട്ടുകാല, ഗവ. എച്ച്എസ്എസ് ഫോർ ഗേൾസ് നെയ്യാറ്റിൻകര, ഗവ. കെവി ഹൈസ്കൂൾ അയിര, ഗവ. എച്ച്എസ്എസ് നെയ്യാർ ‍ഡാം, ഗവ. വിഎച്ച്എസ്എസ് പരുത്തിപ്പള്ളി, ഗവ. എച്ച്എസ്എസ് മൈലച്ചൽ, ഗവ. എച്ച്എസ്എസ് കീഴാറൂർ, ഗവ. എച്ച്എസ് പ്ലാവൂർ, ഗവ. എച്ച്എസ് പെരുംപഴുതൂർ, ഗവ. എച്ച്എസ്എസ് ആനാവൂർ, ഗവ. എച്ച്എസ് തിരുപുറം. എയ്ഡഡ് സ്കൂൾ എസ്-സിവിഎച്ച്എസ് ഫോർ ബോയ്സ് ചിറയിൻകീഴ്, സെന്‍റ് ജോസഫ്സ് എച്ച്എസ്എസ് അഞ്ചുതെങ്ങ്, ആർആർവി ബോയ്സ് വിഎച്ച്എസ്എസ് കിളിമാനൂർ, എൻഎസ്എസ്എച്ച്എസ് പാലോട്, എസ്കെവിഎച്ച്എസ് കടമ്പാട്ടുകോണം, എൽഎംഎസ്എച്ച്എസ് വട്ടപ്പാറ, വിഎച്ച്എസ്എസ് കരവാരം, മുളമന വിഎച്ച്എസ് ആനാകുടി, ദേവസ്വം ബോർഡ് ഹൈസ്കൂൾ കാരേറ്റ്, ആർആർവിഎച്ച്എസ്എസ് ഫോർ ഗേൾസ് കിളിമാനൂർ, എകെഎംഎച്ച്എസ് കുടവൂർ, മുസ്ലിം എച്ച്എസ്എസ് ഫോർ ഗേൾസ് കണിയാപുരം, പള്ളിത്തുറ എച്ച്എസ്എസ്, സെന്‍റ്് മൈക്കിൾസ് എച്ച്എസ് കഠിനംകുളം, എസ്എൻജിഎച്ച്എസ്എസ് ചെമ്പഴന്തി, സെന്‍റ് ജോൺസ് മോഡൽ എച്ച്എസ്എസ് നാലാഞ്ചിറ, സാൽവേഷൻ ആർമി എച്ച്എസ്എസ് കവടിയാർ, ആർകെഡിഎൻഎസ്എസ് എച്ച്എസ്എസ് ശാസ്തമംഗലം, സെന്‍റ് ജോസഫ്സ് എച്ച്എസ്എസ് തിരുവനന്തപുരം, എൻഎസ്എസ് എച്ച്എസ്എസ് പാൽക്കുളങ്ങര, ഫോർട്ട് ബോയ്സ് എച്ച്എസ്, ഹാജി സിഎച്ച്എംകെഎം വിഎച്ച്എസ്എസ്, സെന്‍റ് റോക്ക്സ് എച്ച്എസ് തോപ്പ്, സെന്‍റ്് ഫിലോമിനാസ് ഗേൾസ് എച്ച്എസ് പൂന്തുറ, സിഎംജിഎച്ച്എസ് പൂജപ്പുര, എസ്എസ്എസ് എച്ച്എസ്എസ് കേശവദാസപുരം, എംവിഎച്ച്എസ്എസ് അരുമാനൂർ, എച്ച് എസ് ബാലരാമപുരം, എൻഎസ്എസ്ജിഎച്ച്എസ്എസ് ധനുവച്ചപുരം, പികെഎസ്എച്ച്എസ്എസ് കാഞ്ഞിരകുളം, സെന്‍റ് ക്രിസ്റ്റോസ്റ്റം എച്ച്എസ് ഫോർ ഗേൾസ് നെല്ലിമൂട്, സെന്‍റ് ഹെലൻസ് ഗേൾസ് എച്ച്എസ് ലൂർദുപുരം, സെന്‍റ് തോമസ് എച്ച്എസ്എസ് അമ്പൂരി, എസ്എസ്എസ്എച്ച്എഎസ് ചൊവ്വല്ലൂർ, എംജിഎംഎച്ച്എസ് പൂഴനാട്, പിജിഎവിഎച്ച്എസ്എസ് മരുതൂർകോണം, സെന്‍റ് മേരീസ് എച്ച്എസ്എസ് വിഴിഞ്ഞം, സെന്‍റ് മേരീസ് എച്ച്എസ്എസ് കമുകിൻകോട്, സെന്‍റ് മാത്യൂസ് എച്ച്എസ് പൊഴിയൂർ. അൺ എയ്ഡഡ് സ്‌കൂളുകൾ നവഭാരത് ഇഎം എച്ച്എസ് ആറ്റിങ്ങൽ, സിഎസ്‌ഐഇഎം എച്ച്എസ്എസ് ആറ്റിങ്ങൽ, ലിറ്റിൽ ഫ്ലവർ ഇഎം എച്ച്എസ്എസ് ഇടവ, ദർശന എച്ച്എസ്എസ് നെടുമങ്ങാട്, വികാസ് ഭവൻ എച്ച്എസ് മിത്രനികേതൻ, സീതി സാഹിബ് മെമ്മോറിയൽ എച്ച്എസ്എസ് കൊച്ചാലുംമൂട്, വിദ്യാധിരാജ ഇഎം എച്ച്എസ് ആറ്റിങ്ങൽ, ക്രെസെന്‍റ് എച്ച്എസ് നെടുമങ്ങാട് , ജെംനോ മോഡൽ എച്ച്എസ്എസ് വർക്കല, കെടിസിടി ഇഎംആർ എച്ച്എസ് കടുവയിൽ, എസ്എച്ച്‌സി എച്ച്എസ് അഞ്ചുതെങ്ങ്, അമലഗിരി എംഇ സ്‌കൂൾ കുളപ്പട, ഡെയിൽവ്യൂ എച്ച്എസ് പുനലാൽ, അൽ ഉദുമൻ എച്ച്എസ്എസ് കഴക്കൂട്ടം, ഔവർ ലേഡി ഒഫ് മെർസി എച്ച്എസ് പുതുക്കുറിച്ചി, ലൂർദ് മൗണ്ട് എച്ച്എസ് വട്ടപ്പാറ, എസ്എൻവി എച്ച്എസ് ചേങ്കോട്ടുകോണം, ജ്യോതിനിലയം ഇഎം എച്ച്എസ്എസ് കഴക്കൂട്ടം, ഹോളി ട്രിനിറ്റി എച്ച്എസ് അലത്തറ, സർവോദയ വിദ്യാലയ നാലാഞ്ചിറ, സെന്‍റ്് തോമസ് എച്ച്എസ്എസ് മുക്കോലക്കൽ, ക്രൈസ്റ്റ് നഗർ ഇംഗ്ലീഷ് ഹയർ സെക്കൻഡറി സ്‌കൂൾ, നിർമല ഭവൻ ഗേൾസ് എച്ച്എസ്എസ്, ഹോളി എയ്ഞ്ചൽസ് കോൺവന്‍റ് എച്ച്എസ്എസ് വഞ്ചിയൂർ, കാർമൽ ഗേൾസ് എച്ച്എസ്എസ് തിരുവനന്തപുരം, ചിന്മയ വിദ്യാലയ വഴുതക്കാട്, കൊർദോവ ഇഎം എച്ച്എസ് പൂന്തുറ, മൗലാനാ ആസാദ് സ്‌കൂൾ ചാന്നാങ്കര, മേരിഗിരി സ്‌കൂൾ കുടപ്പനക്കുന്ന്, തുഞ്ചൻ സ്മാരക ഇഎം എച്ച്എസ് ഐരാണിമുട്ടം, ലിറ്റിൽ ഫ്‌ളവർ കോൺവന്‍റ് സ്‌കൂൾ, മാർ ഗ്രാഗോറിയസ് സ്‌കൂൾ, റോസ്മിനി ഇംഗ്ലീഷ് മീഡിയം സ്‌കൂൾ ചെറിയതുറ, സെന്‍റ് തെരേസസ് കോൺവന്‍റ്് ഗേൾസ് എച്ച്എസ്എസ് നെയ്യാറ്റിൻകര, റോസാ മിസ്റ്റിക്കാ എച്ച്എസ്എസ്, സെന്‍റ് ഫിലിപ് സാദു സംരക്ഷണ കേന്ദ്ര സ്‌കൂൾ, എൻഎസ്എസ് ഇഎം സ്‌കൂൾ ധനുവച്ചപുരം, നസ്രറത്ത് ഹോം ഇഎം എച്ച്എസ് ബാലരാമപുരം, ശ്രീ വിദ്യാദിരാജ വിദ്യാനിലയം എച്ച്എസ്എസ് നെയ്യാറ്റിൻകര, ഓക്‌സിലിയം എച്ച്എസ് വാഴിച്ചാൽ, ട്രിനിറ്റി എച്ച്എസ് സ്‌കൂൾ ഇടക്കോട്, കണ്ണശമിഷൻ എച്ച്എസ് പേയാട്, നിയോ ഡെയിൽ സെക്കൻഡറി സ്‌കൂൾ, എയ്ഞ്ചൽസ് എച്ച്എസ് പൂവാർ, ഗുഡ് ഷെപ്പേർഡ് ഇഎം സ്‌കൂൾ മണപ്പുറം, സെന്‍റ് മേരീസ് എച്ച്എസ് മരിയാപുരം, നീലകേശി വിദ്യാപീഠം കുന്നത്തുകാൽ.

എസ്എസ്എൽസി : ജില്ലയില്‍ വിജയം 98.59 ശതമാനം

തിരുവനന്തപുരം: എസ്എസ്എല്‍സി പരീക്ഷാ ഫലം പ്രഖ്യാപിച്ചപ്പോള്‍ വിജയശതമാനം ഏറ്റവും കുറവുള്ള ജില്ലയായി തിരുവനന്തപുരം. 98.59 ശതമാനമാണ് തിരുവനന്തപുരം ജില്ലയിലെ വിജയശതമാനം. 17313 ആണ്‍കുട്ടികളും 17001 പെണ്‍കുട്ടികളും ഉള്‍പ്പെടെ പരീക്ഷയെഴുതിയ 34314 വിദ്യാര്‍ഥികളില്‍ 33831 വിദ്യാര്‍ഥികള്‍ ഉപരിപഠനത്തിന് അര്‍ഹത നേടി. 17039 ആണ്‍കുട്ടികളും 16792 പെണ്‍കുട്ടികളുമാണ് ഉപരിപഠനത്തിന് അര്‍ഹത നേടിയത്. ആറ്റിങ്ങല്‍ വിദ്യാഭ്യാസ ഉപജില്ലയില്‍ 13047 വിദ്യാര്‍ഥികള്‍ പരീക്ഷയെഴുതിയപ്പോള്‍ ഇതില്‍ 12822 വിദ്യാര്‍ഥികളും തിരുവനന്തപുരം ഉപജില്ലയില്‍ 10808ല്‍ 10663ഉം നെയ്യാറ്റിന്‍കര ഉപജില്ലയില്‍ 10459ല്‍ 10346ഉം വിദ്യാര്‍ഥികള്‍ ഉപരി പഠനത്തിന് അര്‍ഹത നേടി. ആറ്റിങ്ങല്‍ ഉപജില്ലയില്‍ 98.28ഉം തിരുവനന്തപുരം ഉപജില്ലയില്‍ 98.66ഉം നെയ്യാറ്റിന്‍കര ഉപജില്ലയില്‍ 98.92 ഉം ആണ് വിജയശതമാനം. സംസ്ഥാനത്ത് വിജയശതമാനം ഏറ്റവും കുറവുള്ള വിദ്യാസജില്ല ആറ്റിങ്ങല്‍ ആണ്. പട്ടം സെന്‍റ് മേരീസ് സ്‌കൂള്‍ ആണ് സംസ്ഥാനത്ത് ഏറ്റവും കൂടുതല്‍ വിദ്യാര്‍ഥികളെ പരീക്ഷയ്ക്കിരുത്തിയ രണ്ടാമത്തെ സ്‌കൂള്‍. 1562 വിദ്യാര്‍ഥികളാണ് ഇവിടെ ഇത്തവണ പരീക്ഷയെഴുതിയത്. എടരിക്കോട് പികെഎംഎംഎച്ച്എസ്എസ് ആണ് സംസ്ഥാനത്ത് ഏറ്റവും അധികം വിദ്യാര്‍ഥികളെ പരീക്ഷയെഴുതിച്ചത്. 2017 വിദ്യാര്‍ഥികളാണ് ഇവിടെ പരീക്ഷയെഴുതിയത്. സംസ്ഥാനത്ത് ഏറ്റവും കുറവ് കുട്ടികള്‍ പരീക്ഷയെഴുതിയ സ്‌കൂളും തിരുവനന്തപുരത്താണ്. ഫോര്‍ട്ട് ഗവ. സംസ്‌കൃതം എച്ച്എസ്എസില്‍ ഒരു വിദ്യാര്‍ഥി മാത്രമാണ് പത്താം ക്ലാസ് പരീക്ഷയെഴുതിയത്. കട്ടച്ചക്കോണം ഗവണ്‍മെന്‍റ് ഹൈസ്‌കൂളില്‍ ഏഴും പേട്ട ഗേള്‍സ് വിഎച്ച്എസ്എസിലും വഞ്ചിയൂര്‍ ഗവണ്‍മെന്‍റ്് ഹൈസ്‌കൂളിലും ആറു വീതവും വിദ്യാര്‍ഥികള്‍ മാത്രമാണ് പരീക്ഷയെഴുതിയത്.

ആംബുലൻസ് മറിഞ്ഞ് യുവാവ് മരിച്ചു

വെള്ളറട: ബൈക്ക് അപകടത്തില്‍ പരിക്കേറ്റ് ആശുപത്രിയിലേക്ക് കൊണ്ടുപോകും വഴി ആംബുലന്‍സ് മറിഞ്ഞ് വീണ്ടും പരിക്കേറ്റ ലോറി ഡ്രൈവർ മരിച്ചു. കോവില്ലൂര്‍ ലീലാവിലാസത്തില്‍ ഡാനി കെ. സാബു (38) ആണ് മരിച്ചത്. കഴിഞ്ഞ ചൊവ്വാഴ്ച വൈകുന്നേരം നെട്ട ശങ്കരന്‍ കടവിലായിരുന്നു അപകടം. സവാരി കഴിഞ്ഞ് ലോറി കുലശേഖരത്ത് പാർക്ക് ചെയ്തശേഷം ബൈക്കില്‍ കോവില്ലൂര്‍ വീട്ടിലേക്ക് മടങ്ങുന്നതിനിടെ നിയന്ത്രണം വിട്ട ബൈക്ക് ശങ്കരന്‍ കടവിന് സമീപം അപകടത്തില്‍പ്പെടുകയായിരുന്നു. റോഡിലേക്ക് തെറിച്ച് വീണ ഡാനിയുടെ കാലിനും തലയ്ക്കും ഗുരുതരമായി പരിക്കേറ്റു. തുടര്‍ന്ന് ആംബുലന്‍സില്‍ കാരക്കോണം മെഡിക്കല്‍ കോളജ് ആശുപത്രിയിലേക്ക് കൊണ്ടുപോകുന്നതിനിടയില്‍ പനച്ചമൂട്ടില്‍ നിയന്ത്രണംവിട്ട ആംബുലന്‍സ് റോഡുവക്കില്‍ കിടന്ന മറ്റൊരു ആംബുലന്‍സിനെ മറികടക്കുന്നതിനിടെ ഡാനിയുമായെത്തിയ ആംബുലന്‍സ് റോഡില്‍ മറിയുകയായിരുന്നു. വീണ്ടും പരിക്കേറ്റ് ഗുരുതരാവസ്ഥയിലായ ഡാനിയെ കാരക്കോണം മെഡിക്കല്‍ കോളജിലും തുടര്‍ന്ന് തിരുവനന്തപുരം മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. അവിടെ തീവ്രപരിചരണ വിഭാഗത്തില്‍ ചികിത്സയില്‍ കഴിയുന്നതിനിടെ ഇന്നലെ രാത്രിയോടെ മരിച്ചു. സാബു കുര്യന്‍റെയും അനിലാ സാബു കുര്യന്‍റെയും മകനാണ്. സഹോദരങ്ങള്‍: ഡോണ്‍ കെ. സാബു, ഷീന കെ. സാബു.

ടൂറിസ്റ്റ് ബസ് ബൈക്കിലിടിച്ച് വിദ്യാർഥി മരിച്ചു

പാറശ്ശാല: കാരോട് മുക്കോല ബൈപ്പാസില്‍ ടൂറിസ്റ്റ് ബസ് ബൈക്കിന് പിന്നില്‍ ഇടിച്ചുണ്ടായ അപകടത്തില്‍ ബൈക്ക് യാത്രികനായ പ്ലസ് ടു വിദ്യാര്‍ഥി മരിച്ചു. വെള്ളറട കൂതാളി കരിപ്പുവാലി റോഡരികത്ത് വീട്ടില്‍ ഷാജിയുടെയും സിന്ധുവിന്‍റെയും മകന്‍ സോനു റസല്‍ (17) ആണ് മരിച്ചത്. വ്യാഴാഴ്ച രാത്രി 8.30 ന് കാരോട് മുക്കോല ബൈപ്പാസില്‍ കീഴ്മാങ്കത്തിന് സമീപത്തായിരുന്നു അപകടം. സോനു റസലും സുഹൃത്ത് സോളമനും വിവാഹത്തില്‍ പങ്കെടുക്കുന്നതിനായി ഇരുചക്ര വാഹനത്തില്‍ പാറശാലയില്‍ നിന്ന് വിഴിഞ്ഞത്തേക്ക് വരുമ്പോഴായിരുന്നു ഇവര്‍ സഞ്ചരിച്ച ഇരുചക്ര വാഹനത്തിന് പിന്നില്‍ അമിത വേഗതയിലെത്തിയ ടൂറിസ്റ്റ് ബസ് ഇടിക്കുകയായിരുന്നു. ഇടിയുടെ ആഘാതത്തില്‍ ബൈക്കിന് പിന്നില്‍ ഇരുന്ന സോനു റസല്‍ റോഡിലേക്ക് തെറിച്ച് വീണു. അപകടശബ്ദം കേട്ട് ഓടി കൂടിയ പ്രദേശവാസികള്‍ സോനുവിനെയും സോളമനെയും പാറശാല താലൂക്ക് ആശുപത്രിയിലേക്ക് മാറ്റിയെങ്കിലും സോനുവിനെ രക്ഷിക്കാന്‍ കഴിഞ്ഞില്ല. ഗുരുതരമായി പരിക്കേറ്റ സോളമനെ വിദഗ്ധ ചികിത്സയ്ക്കായി തിരുവനന്തപുരം മെഡിക്കല്‍ കോളജ് ആശുപത്രിയിലേക്ക് മാറ്റി. സോനു വെള്ളറട വിപിഎംഎ ച്ച്എസ് ലെ പ്ലസ് ടു വിദ്യാർഥിയാണ്.

നിർത്തലാക്കിയ സർവീസുകൾ പുനഃസ്ഥാപിക്കണമെന്ന് ആവശ്യം

നെടുമങ്ങാട്: കെഎസ്ആർടിസി നെടുമങ്ങാട് ഡിപ്പോയിൽനിന്ന് വർഷങ്ങളായി രാത്രി എട്ടുമണിക്ക് ഉണ്ടായിരുന്ന വേങ്കവിള- വേട്ടംപള്ളി - മൂഴി സർവീസും, നെടുമങ്ങാടുനിന്നു പുത്തൻ പാലം വഴി മുതുവിളയിലേക്ക് ഉണ്ടായിരുന്ന സർവീസും പുനരാരംഭിക്കണമെന്നാവശ്യപ്പെട്ട് മൂഴി ടിപ്പു കൾച്ചറൽ സൊസൈറ്റിയുടെയും ഗാന്ധിയൻ കർമ്മവേദിയുടെയും ആഭിമുഖ്യത്തിൽ സൊസൈറ്റി ചെയർമാൻ മൂഴിയിൽ മുഹമ്മദ് ഷിബുവിന്‍റെ നേതൃത്വത്തിൽ കെഎസ്ആർടിസി നെടുമങ്ങാട് എടിഒ ആർ.ജെ. ഷെസിനു നിവേദനം നൽകി. നിവേദക സംഘത്തിൽ നെടുമങ്ങാട് മുനിസിപ്പൽ മുൻ ചെയർമാൻ കെ. സോമശേഖരൻ നായർ, പുലിപ്പാറ യൂസഫ്, നെടുമങ്ങാട് ശ്രീകുമാർ, നിബിൻ, ജഗൻ, വി. നിബിൻ എന്നിവരും ഉണ്ടായിരുന്നു.

കുളമ്പുരോഗ പ്രതിരോധം: പഞ്ചായത്തുതല ഉദ്ഘാടനം

നെടുമങ്ങാട്: ദേശീയ ജന്തുരോഗ നിയന്ത്രണ പദ്ധതി - ആറാം ഘട്ട കുളമ്പുരോഗ പ്രതിരോധ കുത്തിവയ്പ്പിന്‍റെ പഞ്ചായത്തുതല ഉദ്ഘാടനം ആനാട് വെറ്ററിനറി ഡിസ്പെൻസറിയിൽ ആനാട് പഞ്ചായത്ത് പ്രസിഡന്‍റ് എൻ. ശ്രീകല, ലൈവ്സ്റ്റോക്ക് ഇൻസ്പെക്ടറായ സരിതയ്ക്ക് വാക്സിൻ കൈമാറിക്കൊണ്ട് നിർവഹിച്ചു. വെറ്ററിനറി സർജൻ ഡോ. എ.ജെ. കീർത്തി പദ്ധതി വിശദീകരണം നടത്തി. പഞ്ചായത്ത്‌ വൈസ് പ്രസിഡന്‍റ് പാണയം നിസാർ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ വേങ്കവിള സജി, ആരോഗ്യ വിദ്യാഭ്യാസ സ്റ്റാൻഡിംഗ് കമ്മറ്റി ചെയർപേഴ്സൺ കെ. ലീലാമ്മ എന്നിവർ സംസാരിച്ചു.

"മെഡിക്കല്‍ കോളജിലെ സിടി സ്‌കാനിംഗ് പഴയ പടിയാക്കണം'

മെഡിക്കല്‍കോളജ്: തിരുവനന്തപുരം മെഡിക്കല്‍ കോളജ് ആശുപത്രിയിലെ റേഡിയോ ഡയഗ്‌നോസിസ് വകുപ്പും ന്യൂറോളജി വകുപ്പും തമ്മില്‍ നിലനില്‍ക്കുന്ന പ്രശ്‌നം പരിഹരിച്ച് നേരത്തെ ഉണ്ടായിരുന്നതുപോലെ ദിവസം 60 പേര്‍ക്ക് സ്‌കാനിംഗ് നടത്താനുള്ള നടപടി സ്വീകരിക്കണമെന്ന് മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റിസ് അലക്‌സാണ്ടര്‍ തോമസ്. എടുത്ത നടപടികള്‍ മൂന്നാഴ്ചക്കകം മെഡിക്കല്‍ വിദ്യാഭ്യാസ ഡയറക്ടര്‍ കമ്മീഷനില്‍ സമര്‍പ്പിക്കണം. ആരോഗ്യവകുപ്പ് അഡീഷണല്‍ ചീഫ് സെക്രട്ടറിയും വിഷയത്തില്‍ ഇടപെട്ട് മൂന്നാഴ്ചയ്ക്കകം റിപ്പോര്‍ട്ട് സമര്‍പ്പിക്കണം. മെഡിക്കല്‍ കോളജ് സൂപ്രണ്ടും റിപ്പോര്‍ട്ട് നല്‍കണമെന്നും ജസ്റ്റിസ് അലക്‌സാണ്ടര്‍ തോമസ് വ്യക്തമാക്കി. കമ്മീഷന്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി. രോഗികള്‍ സ്‌കാനിംഗിന് വേണ്ടി മാസങ്ങള്‍ കാത്തിരിക്കേണ്ടതായ ദുരവസ്ഥയിലാണെന്ന് പരാതിയുണ്ട്.

ബൈക്ക് മോഷണക്കേസ്: യുവാവിനെ അറസ്റ്റ് ചെയ്തു

പേരൂര്‍ക്കട: തിരുമല ഷോ പ്പിംഗ് കോംപ്ലക്‌സിനു മുന്‍വശത്തു പാര്‍ക്ക് ചെയ്തിരുന്ന ബൈക്ക് മോഷ്ടിച്ചയാളെ പൂജപ്പുര പോലീസ് അറസ്റ്റുചെയ്തു. തിരുമല സൗമ്യ തിയറ്ററിന് എതിര്‍വശം ഓടാങ്കുഴി ലെയിന്‍ ടി.സി 8/533 (3) മേലെ പുത്തന്‍വീട്ടില്‍ രഞ്ജിത്ത് (40) ആണ് അറസ്റ്റിലായത്. ബുധനാഴ്ച രാവിലെയാണ് സംഭവം. വേട്ടമുക്ക് അബു മന്‍സിലില്‍ അബുവിന്‍റെ ബൈക്കാണ് കവര്‍ച്ച ചെയ്യപ്പെട്ടത്. സിസിടിവി പരിശോധിച്ചപ്പോള്‍ മോഷണബൈക്കുമായി സഞ്ചരിക്കുന്ന രഞ്ജിത്തിന്‍റെ ദൃശ്യങ്ങള്‍ പോലീസിനു ലഭിച്ചു. തിരുവനന്തപുരം സിറ്റിയിലെ ഒരു ആക്രിക്കടയില്‍ ബൈക്ക് വില്‍പ്പനയ്ക്ക് കൊണ്ടുവന്ന രഞ്ജിത്തിനെ ഇവിടെവച്ചാണ് പിടികൂടിയത്. ബൈക്ക് മോഷണത്തിന് ഇയാളെ മുമ്പും പോലീസ് പിടികൂടിയിട്ടുണ്ട്. പൂജപ്പുര സിഐ ഷാജിമോന്‍റെ നേതൃത്വത്തില്‍ എസ്ഐ അഭിജിത്ത്, എസ്സിപിഒ അനുരാഗ്, സിപിഒമാരായ അരുണ്‍, ഉണ്ണികൃഷ്ണന്‍ എന്നിവര്‍ അന്വേഷണ സംഘത്തില്‍ ഉണ്ടായിരുന്നു. കോടതി പ്രതിയെ റിമാ ൻഡു ചെയ്തു.

ലഹരിക്കെതിരെ തീരദേശത്ത് പൊതുജന സമ്പര്‍ക്ക പരിപാടി

പാറശാല: തീരദേശ മേഖലകളില്‍ ഉള്‍പ്പെടെയുള്ള ജനങ്ങള്‍ക്ക് ലഹരിക്കെതിരെയുള്ള സന്ദേശവുമായി പോലീസ് സംഘടിപ്പിച്ച പൊതുജന ബോധവത്കരണ പരിപാടി ശ്രദ്ധേയമായി. തിരുവനന്തപുരം റൂറല്‍ ജില്ലാ പോലീസിന്‍റെ കീഴിലെ പൂവാര്‍ തീരദേശ പോലീസിന്‍റെ നേതൃത്വത്തില്‍ ആയിരുന്നു പരിപാടി. കാഞ്ഞിരംകുളം, പൊഴിയൂര്‍ , പൂവ്വാര്‍ പോലീസ് സ്റ്റേഷനുകളിലെ ജീവനക്കാരും പരിപാടിക്ക് നേതൃത്വം നല്‍കി. തിരുവനന്തപുരം റൂറല്‍ ജില്ലാ മേധാവി കെ.എസ്. സുദര്‍ശനന്‍ ഉദ്ഘാടനം ചെയ്ത പരിപാടിയില്‍ നെയ്യാറ്റിന്‍കര ഡിവൈഎസ്പി ഷാജി അധ്യക്ഷനായി. സ്‌പെഷല്‍ ബ്രാഞ്ച് ഡിവൈഎസ്പി ജയകുമാര്‍, പൂവാര്‍ പഞ്ചായത്ത് പ്രസിഡന്‍റ് ലോറന്‍സ്, കരിംകുളം പഞ്ചായത്ത് പ്രസിഡന്‍റ് ഫ്രീഡാ സൈമണ്‍, കുളത്തൂര്‍ പഞ്ചായത്ത് പ്രസിഡന്‍റ് ഗീതാ സുരേഷ്, ബ്ലോക്ക് പഞ്ചായത്ത് അംഗം ജനറ്റ്, എസ്എച്ചുമാരായ കെ. കണ്ണന്‍, ആസാദ് അബ്ദുല്‍ കലാം, ടി.കെ. മിഥുന്‍. എസ്ഐമാരായ ആല്‍ഫിന്‍ റസല്‍, സാജന്‍ തുടങ്ങിയ ഉദ്യോഗസ്ഥന്മാരും ജനപ്രതിനിധികളും, മത്സ്യത്തൊഴിലാളികളും, മര്‍ച്ചന്‍റ്സ് അസോസിയേഷന്‍ ഭാരവാഹികളും, ബോട്ട് ക്ലബ് പ്രതിനിധികളും പരിപാടിയില്‍ പങ്കെടുത്തു. തുടര്‍ന്നു നടന്ന ചര്‍ച്ചയില്‍ ഭാവി നടപടിക്രമങ്ങള്‍ തീരുമാനിക്കുകയും, നിലവിലെ പരാതികള്‍ കേട്ടു പരിഹാരം കാണുന്നതിനുവേണ്ടിയുള്ള നടപടി കൈക്കൊള്ളുകയും ചെയ്തു. അവധിക്കാലങ്ങള്‍ അവസാനിച്ച് സ്‌കൂള്‍ കോളജുകള്‍ സജീവമാകാന്‍ പോകുന്ന പശ്ചാത്തലത്തില്‍പോലീസിന്‍റെ ഭാഗത്തുനിന്നും ഉള്‍പ്പെടെ കൂടുതല്‍ പരിശോധനകളും പെട്രോളിംഗുകളും ശക്തിപ്പെടുത്താനും പൊതുജന സമ്പര്‍ക്ക പരിപാടിയിലൂടെ തീരുമാനിച്ചു.

എംഎല്‍എ റോഡില്‍ പൈപ്പ് പൊട്ടി ജലം പാഴാകുന്നു

പേരൂര്‍ക്കട: കുടപ്പനക്കുന്ന് എംഎല്‍എ റോഡില്‍ കുടിവെള്ള പൈപ്പ് പൊട്ടി ജലം പാഴാകുന്നു. പേരൂര്‍ക്കടയില്‍നിന്ന് കുടപ്പക്കുന്ന് വഴി പാതിരിപ്പള്ളിയിലേക്കും പേരാപ്പൂര് ഭാഗത്തേക്കും ജലമെത്തിക്കുന്ന പൈപ്പാണ് പൊട്ടിയതെന്നാണു സൂചന. എംഎല്‍എ റോഡിലൂടെ ഏകദേശം നാലു പൈപ്പുകള്‍ കടന്നുപോകുന്നുണ്ട്. ഇതില്‍ പ്രിമോ പൈപ്പും ഉള്‍പ്പെടുന്നു. പ്രിമോയാണോ പിവിസി ലൈനാണോ പൊട്ടിയൊഴുകുന്നതെന്നു വ്യക്തമായിട്ടില്ല. ജോയിന്‍റിലാണ് ലീക്കുണ്ടായതെന്നു കരുതുന്നതായി വാട്ടര്‍ അഥോറിറ്റി വ്യക്തമാക്കി. മൂന്നുദിവസം മുമ്പാണു പൈപ്പ് പൊട്ടിയതെന്നും വാട്ടര്‍ അഥോറിറ്റിയില്‍ അറിയിച്ചിട്ടു നടപടിയുണ്ടാകുന്നില്ലെന്നുമാണ് നാട്ടുകാരുടെ പരാതി. ആഴ്ചകള്‍ക്കുമുമ്പ് കുടപ്പനക്കുന്ന് ജംഗ്ഷനില്‍ പ്രിമോ പൈപ്പ് രണ്ടുതവണ പൊട്ടി കുടിവെള്ളം പൂര്‍ണമായി മുടങ്ങിയിരുന്നു. അതിനിടെയാണു വീണ്ടുമൊരു പൈപ്പ് പൊട്ടല്‍. ടാറിനു മുകളിലൂടെ ജലം പേരാപ്പൂര് റോഡിലേക്കാണു നിലവില്‍ ഒഴുകിക്കൊണ്ടിരിക്കുന്നത്. അടുത്തിടെയാണ് എംഎല്‍എ റോഡ് പൂര്‍ണമായും റീടാര്‍ ചെയ്തത്. വിഷയം ശ്രദ്ധയില്‍പ്പെട്ടിട്ടുണ്ടെന്നും ടാര്‍ കട്ട്‌ചെയ്യുന്നതിനു പി.ഡബ്ല്യുഡിയുടെ അനുമതി ലഭിച്ചിട്ടില്ലെന്നും അതു കിട്ടിയാലുടന്‍ അറ്റകുറ്റപ്പണി ആരംഭിക്കുമെന്നും വാട്ടര്‍ അഥോറിറ്റി പേരൂര്‍ക്കട സെക്ഷന്‍ എഇ അറിയിച്ചു.

അധ്യാപക അവാർഡ് ജേതാവിന് കർഷക കോൺഗ്രസിന്‍റെ ആദരം

നെടുമങ്ങാട്: കൃഷിയിൽ നൂറുമേനി വിളയിച്ച അധ്യാപക അവാർഡ് ജേതാവ് കൂടിയായ റിട്ട. ഹെഡ്മാസ്റ്റർ സത്യജോസിനു കർഷക കോൺഗ്രസ് അരുവിക്കര നിയോജക മണ്ഡലം കമ്മിറ്റിയുടെ നേതൃത്വത്തിൽ ആദരവ് നൽകി. വീടിനു സമീപത്തെ രണ്ടര ഏക്കറിൽ തെങ്ങ്, വാഴ ഇഞ്ചി, കുരുമുളക്, കപ്പ ചേന, മഞ്ഞൾ, ഫല വൃക്ഷങ്ങൾ, കരിമ്പ്, രാമച്ചം തുടങ്ങിയ എല്ലാത്തരം കൃഷികളും ചെയ്തുവരുന്നു. ഒപ്പം കോഴി വളർത്തലും താറാവ് വളർത്തലും കൂടിയുണ്ട്. കർഷക കോൺഗ്രസ്‌ അരുവിക്കര നിയോജകമണ്ഡലം കമ്മിറ്റി പ്രസിഡന്‍റ് പുതുക്കുളങ്ങര മണികണ്ഠന്‍റെ അധ്യക്ഷതയിൽ, ജില്ലാ പ്രസിഡന്‍റ് തോംസൺ ലോറൻസ് സത്യജോസിനെ പൊന്നാട അണിയിച്ച് ആദരിച്ചു. വെള്ളനാട് പഞ്ചായത്ത് മെമ്പർ കടുവാക്കുഴി ബിജു, കർഷക കോൺഗ്രസ്‌ അരുവിക്കര നിയോജക മണ്ഡലം ജനറൽ സെക്രട്ടറി കെ.എസ്. ബിനു, കർഷക കോൺഗ്രസ് വെള്ളനാട് മണ്ഡലം പ്രസിഡന്‍റ് വാളിയറ രാജേഷ്, കർഷക കോൺഗ്രസ് പൂവച്ചൽ മണ്ഡലം പ്രസിഡന്‍റ് രാജഗോപാലൻ നായർ, കർഷക കോൺഗ്രസ് വെള്ളനാട് മണ്ഡലം കമ്മിറ്റി സെക്രട്ടറി കാർത്തികേയൻ തുടങ്ങിയവർ സംസാരിച്ചു.

നാട്യാഞ്ജലി വാര്‍ഷിക ആഘോഷപരിപാടി

പാറശാല: പ്ലാമൂട്ടുകട നാട്യഞ്ജലി ഡാന്‍സ് അക്കാദമിയുടെ എട്ടാം വാര്‍ഷിക ആഘോഷ പരിപാടികള്‍ കെ. ആന്‍സലന്‍ എംഎല്‍എ ഉദ്ഘാടനം ചെയ്തു. ആറയൂര്‍ ഇടവക വികാരി ഫാ. വി.പി. ജോസ് അധ്യക്ഷത വഹിച്ച യോഗത്തില്‍ ഫാ. ഷൈന്‍ അഗസ്റ്റിന്‍, പ്ലാമൂട്ടുക്കട സാംസ്‌കാരിക കൂട്ടായ്മ ചെയര്‍മാന്‍ പി.എസ്. മേഘവര്‍ണന്‍, വിനു ജോസ്, ജോസ് വിക്ടര്‍, ജോണസ് ക്രിസ്റ്റഫര്‍, വത്സല, ശ്രീകുമാര്‍ എന്നിവര്‍ പ്രസംഗിച്ചു.

സിവിള്‍ ഡിഫന്‍സ് മോക്ഡ്രില്‍ നടത്തി അഗ്നിരക്ഷാ സേനയും പോലീസും

വെഞ്ഞാറമൂട്: സിവിള്‍ ഡിഫന്‍സ് മോക്ഡ്രില്‍ നടത്തി അഗ്നിരക്ഷാ സേനയും പോലീസും. വെഞ്ഞാറമൂട് അഗ്നി രക്ഷാ സേനയും കിളിമാനൂര്‍ പോലീസും ചേര്‍ന്നു ചേര്‍ന്ന് കിളിമാനൂര്‍ സിവിള്‍ സ്റ്റേഷനിലാണ് മോക് ഡ്രില്‍ സംഘടിപ്പിച്ചത്. നാലു മണിക്ക് സൈറന്‍ മുഴങ്ങിയതോടെ സർവസജ്ജരായ അഗ്നി രക്ഷാസേനയും കിളിമാനൂര്‍ പോലീസും സിവിൽ സ്റ്റേഷനിലെത്തി. ഇതിനിടയില്‍ പ്രത്യേക സ്ഥലത്ത് ഒത്തുകൂടിയവരില്‍ നിന്നും കൂട്ടത്തിലാരെയെങ്കിലും കാണാതായിട്ടുണ്ടോ എന്ന് അന്വേഷിക്കുന്നതും കൂടി നിന്നവരില്‍ നിന്നും ഒരാളെ കാണാതായിട്ടുണ്ടെന്ന മറുപടിയുടെ അടിസ്ഥാനത്തില്‍ സംഘത്തില്‍ നിന്നും തെരഞ്ഞെടുക്കപ്പെട്ടവര്‍ കെട്ടിടത്തിനുള്ളിലേക്ക് ഓടിക്കയറി അപകടത്തില്‍പെട്ടു കിടക്കുന്നയാളെ സ്ട്രച്ചറില്‍ പുറത്തെത്തിച്ച് നേരത്തെ അറിയിപ്പ് കൊടുത്തു സജ്ജമാക്കിയ ആശുപത്രിയിലേക്ക് ആംബുലന്‍സില്‍ കയറ്റി കൊണ്ടു പോകുന്നതുമാണ് മോക്ഡ്രില്ലില്‍ ഉണ്ടായിരുന്നത്. വെഞ്ഞാറമൂട് അഗ്നിരക്ഷാ നിലയത്തിലെ സ്റ്റേഷന്‍ ഓഫീസര്‍ അനില്‍കുമാര്‍, അസിസ്റ്റന്‍റ് സ്റ്റേഷന്‍ ഓഫീസര്‍, ഫയര്‍ ആൻഡ് റെസ്‌ക്യൂ ഓഫീസര്‍മാര്‍, ഹോം ഗാര്‍ഡ്മാര്‍, സിവില്‍ ഡിഫന്‍സ് അംഗങ്ങള്‍, കിളിമാനൂര്‍ എസ്എച്ച്ഒ ജയന്‍, മറ്റ് പോലീസ് ഉദ്യോഗസ്ഥര്‍, സിവില്‍ സ്റ്റേഷനിലെ വിവിധ വിഭാഗങ്ങളിലെ ജീവനക്കാര്‍ എന്നിവര്‍ മോക് ഡ്രില്ലിന്‍റെ ഭാഗമായി.

കരമനയാറ്റിൻ തീരത്ത് മാലിന്യം തള്ളൽ രൂക്ഷം

കുറ്റിച്ചൽ: കുടിവെള്ള സോത്രസ്സായ കരമനയാറ്റിൻ തീരത്തു മാലിന്യനിക്ഷേപം. കുറ്റിച്ചൽ-ആര്യനാട് പഞ്ചായത്തുകളുടെ അതിർത്തി പ്രദേശമായ അണിയിലകടവ് പാലത്തിനു സമീപമാണ് മാലിന്യനിക്ഷേപം നടത്തുന്നത്. അറവുശാലയിലെ മാലിന്യങ്ങളും ഹോട്ടൽ വേസ്റ്റുകളും നിക്ഷേപിക്കുന്നത് നിത്യസംഭവമായിരിക്കുന്നു. വിജനമായ ഈ പ്രദേശത്ത് പുതിയ പാലത്തിനോടു ചേർന്നു കാടുള്ളതിനാൽ ഇവിടെ രാത്രികാലങ്ങളിൽ വിദൂര സ്ഥലങ്ങളിൽ നിന്നും വാഹനങ്ങളിലാണ് ഇത്തരം വേസ്റ്റ് കൊണ്ടിടുന്നത്. അഴുകിയ ഇറച്ചി വേസ്റ്റും എല്ലിൻ കഷണങ്ങളും തെരുവു നായ്ക്കൾ പ്രധാന റോഡിൽ കൊണ്ടിടുകയാണ്. ഇതു കാരണം ഇരുചക്രവാഹനങ്ങൾ അപകടത്തിലാകുന്നത് നിത്യസംഭവമാണ്. പകൽ സമയങ്ങളിൽ തെരുവുനായ്ക്കൾ കൂട്ടംകൂടി കടിപിടികൂടുന്നത് കാരണം വിദ്യാർഥികൾക്ക് സ്‌കൂളിൽ പോകാൻ ഭയമാണ്. ഇറച്ചി മാലിന്യങ്ങൾ കാക്കകൾ കൊത്തിവലിച്ചു സമീപത്തെ കുടിവെള്ള കിണറുകളിലും കരമനയാറ്റിലും കൊണ്ടിടാറുണ്ട്. അണിയിലകടവിലെ പഴയ കമ്പിപ്പാലത്തിനടിയിലൂടെ ചാക്കിൽ കെട്ടിയ ഇറച്ചി വേസ്റ്റ് ഇടുന്നത്. ദിവസങ്ങൾ കഴിഞ്ഞ് അഴുകി കരമനയാറ്റിലേക്കെത്തുന്നത് ഗുരുതരമായ ആരോഗ്യ പ്രശ്‌നങ്ങൾ സൃഷ്ടിക്കുന്നുണ്ട്. പഞ്ചായത്തുകൾ അടിയന്തിരമായി പാലത്തിനു സമീപം നിരീക്ഷണ ക്യാമറയും മുന്നറിയിപ്പു ബോർഡുകളും സ്ഥാപിക്കണമെന്നുമാണ് നാട്ടുകാരുടെ ആവശ്യം. വിജനമായ ഇവിടെ രാത്രി കാലങ്ങളിൽ സാമൂഹ്യ വിരുദ്ധരുടെ ശല്യവും കൂടുതലാണ്. രാത്രി കാലങ്ങളിൽ പോലീസ് പട്രോളിംഗ് ശക്തമാക്കണമെന്നും സമീപവാസികൾ ആവശ്യപ്പെടുന്നു.

ഓടിക്കൊണ്ടിരുന്ന ബസിനു മുകളില്‍ കൂറ്റൻ മരംവീണു

പേരൂര്‍ക്കട: ഓടിക്കൊണ്ടിരുന്ന ബസിനു മുകളില്‍ മരം വീണു. ബസിനു കേടുപാടുകള്‍ സംഭവിച്ചുവെങ്കിലും ബസിലുണ്ടായിരുന്ന കുട്ടികളെ സുരക്ഷിത സ്ഥാനത്തേക്കു മാറ്റി. ജവഹര്‍ ബാലഭവനിലെ അവധിക്കാല ക്യാമ്പില്‍ പങ്കെടുപ്പിക്കുന്നതിനു കുട്ടികളുമായി സഞ്ചരിക്കുകയായിരുന്ന മിനി ബസിനു മുകളിലാണ് തണല്‍മരത്തിന്‍റെ വന്‍ ശിഖരങ്ങള്‍ വീണത്. ദേവസ്വം ബോര്‍ഡില്‍നിന്ന് കുറവന്‍കോണത്തേക്കു തിരിയുന്ന റോഡില്‍നിന്ന തണല്‍മര ശിഖരങ്ങളാണ് ബസിനു മുകളില്‍ വീണത്. ബസിനുള്ളില്‍ ഡ്രൈവറെയും സഹായിയെയും കൂടാതെ 20-ഓളം കുട്ടികളാണ് ഉണ്ടായിരുന്നത്. തിരുവനന്തപുരം ഫയര്‍‌സ്റ്റേഷനില്‍നിന്നു സീനിയര്‍ ഫയര്‍ ആൻഡ് റസ്‌ക്യൂ ഓഫീസര്‍ സുധീഷ് ചന്ദ്രന്‍റെ നേതൃത്വത്തില്‍ എഫ്ആര്‍ഒമാരായ ദിനുമോന്‍, ഷഹീര്‍, ഷിബിന്‍, എഫ്ആര്‍ഒ ഡ്രൈവര്‍ നന്ദന്‍ എന്നിവരാണ് പ്രവര്‍ത്തനങ്ങള്‍ ഏകോപിപ്പിച്ചത്. ഒരുമണിക്കൂറിലേറെ നീണ്ട പ്രവര്‍ത്തനങ്ങള്‍ക്കുശേഷം ബസ് സംഭവസ്ഥലത്തുനിന്നു നീക്കി.

വാഗ്ദാനത്തിലൊതുങ്ങി നെയ്യാർ ആയുർവേദ വില്ലേജ്

നെയ്യാർഡാം: സംസ്ഥാന സർക്കാർ നടപ്പിലാക്കാൻ ഉദ്ദേശിച്ചിരുന്ന ബജറ്റ് വാഗ്ദാനമായിരുന്ന ആയുർവേദ വില്ലേജ് ഇനിയും യാഥാർഥ്യമായില്ല. 2016 ലും 2021ലും 2024 ലും ബജറ്റ് വാഗ്ദാനമായിരുന്നു നെയ്യാർ ആയുർവേദ വില്ലേജ്. വിശദമായ പഠന റിപ്പോർട്ട് തയാറാക്കി ഇതിനായി നടപടികൾ സ്വീകരിക്കുമെന്നായിരുന്നു വാഗ്ദാനം. ഔഷധ സസ്യങ്ങളുടെ കലവറ എന്നു വിശേഷിപ്പിക്കുന്ന അഗസ്ത്യമലയ്ക്ക് അടിവാരത്തു തന്നെ ആയുർവേദ വില്ലേജ് സ്ഥാപിക്കണമെന്ന വിദഗ്ധ നിർദേശം സർക്കാരിന് മുന്നിൽ സമർപ്പിച്ചിരുന്ന പശ്ചാത്തലത്തിലാണ് പ്രഖ്യാപനം വന്നത്. നെയ്യാർവന്യജീവി സങ്കേതത്തിൽപ്പെടുന്ന അപൂർവവും വംശനാശം നേരിടുന്നതുമായ സസ്യങ്ങളെ സംരക്ഷിക്കാനും നട്ടുവളർത്താനും അതു പുറംനാട്ടിൽ വിൽക്കാനും പഠന-ഗവേഷങ്ങൾക്കുമാണ് പദ്ധതി തയാറാക്കിയത്. അഗസ്ത്യമലയിലെ അപൂർവസസ്യങ്ങൾ ശേഖരിക്കുകയും ആദിവാസികളായ കാണിക്കാരുടെ സഹായത്തോടെ അത് നട്ടുവളർത്താനുമായിരുന്നു പദ്ധതി. ഇതു പ്രകാരം നിരവധി സസ്യങ്ങളാണ് കണ്ടെത്തിയത്. ഇതിനായി ഏതാണ്ട് അഞ്ചു ഹെക്ടറോളം സ്ഥലം വേർതിരിക്കുകയും അവിടെ കമ്പിവേലി കെട്ടി സുരക്ഷിതമാക്കാനും നിർദേശം നൽകിയെങ്കിലും അതു പ്രാഥമിക നടപടിയിൽ തന്നെ നിലച്ചു. കാണിക്കരെ നിയോഗിച്ച് കാട്ടിൽനിന്നും ഔഷധങ്ങളെ കണ്ടെത്തി നാട്ടുകാരെ കൂടി ഉൾപ്പെടുത്തിയുള്ള പദ്ധതിക്കാണ് പ്ലാനിട്ടത്. നിരവധി തൊഴിൽ അവസരങ്ങൾ വാഗ്ദാനം ചെയ്ത പദ്ധതിയായിരുന്നു ഇത്. ആയുർവേദ ഔഷധനിർമാതക്കളെ സമീപിച്ച് ഔഷധങ്ങളുടെ കച്ചവടവും ഉറപ്പിച്ചു. പഠിക്കാനും ഗവേഷണം നടത്താനും പദ്ധതി രേഖയിലുണ്ട്. എന്നാൽ മുടക്കിയ പണം പാഴായി എന്നു മാത്രം. വില്ലേജ് നെയ്യാർവന്യജീവി സങ്കേതത്തിൽ മതിയെന്നു കേന്ദ്ര സർക്കാരും നിഷ്‌കർശിച്ചിരുന്നു. ആ പദ്ധതിയാണ് ഫയലിൽ ഉറങ്ങുന്നത്. ആയുർവേദ വില്ലേജിനായി വേണ്ടത്ര സ്ഥലം ഇവിടെ തന്നെയുണ്ട്. അതിനായി ഭൂമി ഏറ്റെടുക്കേണ്ട കാര്യവുമില്ല. അഗസ്ത്യമലയിലെ അപൂർവവും എന്നാൽ ഔഷധ ഗുണവുമുള്ള മരുന്നു ചെടികൾ നശിക്കുകയും അതു അശാസ്ത്രീയമായി പറിച്ചെടുത്ത് കടത്തുകയും ചെയ്യുകയാണ് ഇപ്പോൾ. അത് ഒഴിവാക്കാൻ കഴിയുമായിരുന്ന പദ്ധതിയാണ് ഇല്ലാതെയായത്. ടൂറിസത്തിനും മുതൽകൂട്ടാകുന്ന ഒന്നായിരുന്നു ആയുർവേദ വില്ലേജ്.

ഹോട്ടലിൽ അതിക്രമം: പരാതി നൽകി

വിളപ്പിൽശാല: യുവതി ഉൾപ്പെടെയുള്ള മൂന്നംഗസംഘം വിളപ്പിൽശാലയിലെ ഹോട്ടലിൽ അതിക്രമം നടത്തിയതായി പരാതി. രാത്രി ഏഴുമണിയോടെയായിരുന്നു സംഭവം. ഹോട്ടലിൽ എത്തിയ യുവതിയും രണ്ട് യുവാക്കളും അടങ്ങിയ സംഘം ജീവനക്കാരോട് തട്ടിക്കയറുകയായിരുന്നു. ഹോട്ടലിലെ ജീവനക്കാരൻ യുവതിക്ക് നൽകിയ പണം തിരികെ ചോദിച്ചതായിരുന്നു പ്രകോപനത്തിനു കാരണം. പിന്നാലെ ജീവനക്കാരനെ മർദിക്കുകയും ഹോട്ടലിലെ സാധനസാമഗ്രികൾ നശിപ്പിക്കുകയും ചെയ്തു. സംഭവത്തിൽ ഇവർക്കെതിരെ കടയുടമ പോലീസിൽ പരാതി നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]