തിയേറ്ററുകളിൽ വൻ ഹിറ്റായി മുന്നേറുന്ന അമൽ നീരദ് ചിത്രം ബോഗയ്ൻവില്ലയുടെ സക്സസ് ടീസർ പുറത്തുവിട്ട് അണിയറപ്രവർത്തകർ. സിനിമയിലെ ചില ശ്രദ്ധേയ രംഗങ്ങൾ ടീസറിൽ ചേർത്തിട്ടുണ്ട്.
ലാജോ ജോസും അമൽ നീരദും ചേർന്നൊരുക്കിയ കഥയിൽ അടിമുടി ദുരൂഹത നിഴലിക്കുന്ന ദൃശ്യങ്ങളും അളന്നുമുറിച്ച സംഭാഷണങ്ങളുമായാണ് ചിത്രം പ്രേക്ഷകരിലേക്ക് എത്തിയിരിക്കുന്നത്. 11 വർഷങ്ങൾക്ക് ശേഷം അഭിനയത്തിലേക്കുള്ള മടങ്ങിവരവിൽ ജ്യോതിർമയി ഞെട്ടിച്ചിട്ടുണ്ടെന്നാണ് സിനിമ കണ്ടിറങ്ങുന്നവർ പറയുന്നത്. ഒപ്പം കുഞ്ചാക്കോ ബോബന്റേയും ഫഹദിന്റേയും മികവുറ്റ പ്രകടനങ്ങളും സിനിമയുടെ മാറ്റ് കൂട്ടുന്നു.
ആദ്യമായാണ് അമൽ നീരദ് ചിത്രത്തിൽ കുഞ്ചാക്കോ ബോബൻ അഭിനയിക്കുന്നത്. ഷറഫുദ്ദീൻ, വീണ നന്ദകുമാർ, ശ്രിന്ദ തുടങ്ങിയവരും ചിത്രത്തിൽ സുപ്രധാന വേഷങ്ങളിൽ എത്തുന്നുണ്ട്. നവാഗതനായ ലാജോ ജോസിനൊപ്പം സംവിധായകൻ കൂടി ചേർന്നാണ് ചിത്രത്തിന്റെ രചന.
അമൽ നീരദ് പ്രൊഡക്ഷൻസ്, ഉദയ പിക്ചേഴ്സ് എന്നിവയുടെ ബാനറിൽ ജ്യോതിർമയിയും കുഞ്ചാക്കോ ബോബനും ചേർന്നാണ് ചിത്രത്തിന്റെ നിർമാണം. ആനന്ദ് സി. ചന്ദ്രനാണ് ദൃശ്യങ്ങൾ പകർത്തിയിരിക്കുന്നത്. എഡിറ്റിംഗ് വിവേക് ഹർഷനും പ്രൊഡക്ഷൻ ഡിസൈൻ ജോസഫ് നെല്ലിക്കലും നിർവഹിക്കുന്നു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.