ബ്ലോക്ക്ബസ്റ്ററുകളുടെ കാലമാണ് ഇപ്പോൾ മലയാളസിനിമയ്ക്ക്. തൊട്ടതെല്ലാം പൊന്നാക്കുന്നതുപോലെ റിലീസ് ചെയ്യുന്ന ചിത്രങ്ങളിൽ ഒട്ടുമിക്ക സിനിമകളും കോടികൾ വാരിക്കൂട്ടുന്നു. ഇപ്പോഴിതാ പൃഥ്വിരാജ് - ബേസിൽ ചിത്രം ഗുരുവായൂരന്പലനടയിൽ 81 കോടിയുമാ‌യി കുതിപ്പ് തുടരുകയാണ്.
11 ദിവസം കൊണ്ടാണ് ചിത്രം 80 കോടി കടന്നത്. കേരളത്തിൽ നിന്നു മാത്രം ചിത്രം ഇതുവരെ നേടിയത് 37 കോടിയാണ്. ജിസിസിയിൽ നിന്നും 34 കോടിയും ഇന്ത്യയിലെ മറ്റ് സംസ്ഥാനങ്ങളിൽ നിന്നും 10 കോടിയുമാണ് ഇതുവരെ വാരിയത്.
മേയ് 16ന് റിലീസ് ചെയ്ത ഗുരുവായൂരമ്പല നടയിൽ അഞ്ച് ദിവസം കൊണ്ട് 50 കോടി ക്ലബ്ബിൽ ഇടം നേടിയിരുന്നു. നേരത്തെ പൃഥ്വിരാജിന്‍റെ തന്നെ ആടുജീവിതം ആണ് നാലു ദിവസം കൊണ്ട് 50 കോടി കളക്ഷൻ പിന്നിട്ട് റെക്കോർഡ് സൃഷ്ടിച്ചത്.
ജയജയജയജയ ഹേ എന്ന ചിത്രത്തിന് ശേഷം വിപിൻ ദാസ് സംവിധാനം ചെയ്ത ഈ ചിത്രം പൃഥ്വിരാജ് പ്രൊഡക്ഷൻസിന്‍റെ ബാനറിൽ സുപ്രിയ മേനോൻ, ഇ 4 എന്‍റർടെയ്ൻമെന്‍റിന്‍റെ ബാനറിൽ മുകേഷ് ആർ. മേത്ത, സി.വി. സാരഥി എന്നിവർ ചേർന്നാണ് നിർമിച്ചത്.
അനശ്വര രാജൻ, നിഖില വിമൽ, ജഗദീഷ്, ബൈജു, യോഗി ബാബു, ഇർഷാദ്, പി.വി. കുഞ്ഞികൃഷ്ണൻ തുടങ്ങിയവർ ചിത്രത്തിൽ പ്രധാന വേഷത്തിലെത്തുന്നുണ്ട്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.