ഉന്നതങ്ങളിൽ സഡന് ബ്രേക്കിട്ട് സ്വര്ണം; പവന് കുറഞ്ഞത് 240 രൂപ
Thursday, August 22, 2024 12:44 PM IST
കൊച്ചി: വൻ കുതിപ്പിനിടെ സഡൻബ്രേക്കിട്ട് സ്വർണവില. പവന് 240 രൂപയും ഗ്രാമിന് 30 രൂപയുമാണ് കുറഞ്ഞത്. ഇതോടെ ഒരു പവന് സ്വര്ണത്തിന് 53,440 രൂപയിലും ഗ്രാമിന് 6,680 രൂപയിലുമാണ് വ്യാപാരം പുരോഗമിക്കുന്നത്. ഒരു ഗ്രാം 18 കാരറ്റ് സ്വര്ണത്തിന്റെ വില 5,530 രൂപയാണ്.
ബുധനാഴ്ച പവന് 400 രൂപ ഉയർന്ന് ഈ മാസത്തെ ഏറ്റവും ഉയര്ന്ന നിലവാരത്തില് എത്തിയശേഷമാണ് സ്വര്ണവില ഇന്ന് തിരിച്ചിറങ്ങിയത്.
കഴിഞ്ഞ മാസം 17ന് സ്വര്ണവില 55,000 രൂപയായി ഉയര്ന്ന് ജൂലൈയിലെ ഏറ്റവും ഉയര്ന്ന നിലവാരത്തില് എത്തിയിരുന്നു. എന്നാല് കേന്ദ്ര ബജറ്റില് കസ്റ്റംസ് തീരുവ കുറച്ചതോടെ സ്വര്ണവിലയില് വലിയ ഇടിവ് ഉണ്ടായി. 4500 രൂപയോളമാണ് താഴ്ന്നത്.
പിന്നീട് തിരിച്ചുകയറിയ സ്വര്ണവില പത്തുദിവസത്തിനിടെ 2,500ലധികം രൂപ വര്ധിച്ചാണ് വീണ്ടും 53,000ന് മുകളില് എത്തിയത്. രണ്ടാഴ്ചയ്ക്കിടെ 2900 രൂപ വര്ധിച്ച ശേഷമാണ് ഇന്ന് താഴ്ന്നത്.
അതേസമയം, വെള്ളിയുടെ വില ഇന്ന് മാറ്റമില്ലാതെ തുടരുന്നു. ഗ്രാമിന് 92 രൂപയും എട്ടു ഗ്രാമിന് 736 രൂപയുമാണ് നിരക്ക്.