പാലക്കാട്: മണ്ണാർക്കാട് ഭക്ഷണത്തിൽ വിഷം കലർത്തി മുത്തശിയെ കൊലപ്പെടുത്തിയ കേസിൽ കരിന്പുഴ പടിഞ്ഞാറേതിൽ ഫസീല, ഭർത്താവ് ബഷീർ എന്നിവർക്ക് ജീവപര്യന്തം തടവുശിക്ഷ. മണ്ണാര്‍ക്കാട് പട്ടിക ജാതി പട്ടിക വര്‍ഗ പ്രത്യേക കോടതിയുടേതാണ് വിധി.
ഇതിന് പുറമേ, തെളിവ് നശിപ്പിച്ചതിന് ബഷീറിന് ഏഴ് വര്‍ഷം തടവ് ശിക്ഷയും വിധിച്ചു. ഇരുവരും രണ്ട് ലക്ഷം രൂപ പിഴയും ഒടുക്കണം. കൊലപാതകം, തെളിവ് നശിപ്പിക്കല്‍, ഗൂഢാലോചന എന്നീ കുറ്റങ്ങള്‍ പ്രതികള്‍ക്കെതിരേ തെളിഞ്ഞിട്ടുണ്ട്.
ശാസ്ത്രീയ തെളിവുകളും സാഹചര്യ തെളിവുകളുമാണ് കേസില്‍ നിര്‍ണായകമായത്. 2016 ജൂണ്‍ 23നായിരുന്നു തോട്ടര സ്വദേശിനി നബീസ (71) കൊലപ്പെട്ടത്.
പ്രതികൾ താമസിക്കുന്ന വാടക വീട്ടിലേക്ക് നോമ്പ് തുറക്കാനായി നബീസയെ വിളിച്ചു വരുത്തി നോമ്പ് കഞ്ഞിയിൽ വിഷം ചേർത്താണ് കൊലപ്പെടുത്തിയത്. മരണം ഉറപ്പാക്കിയ ശേഷം ചാക്കിൽകെട്ടി മൃതദേഹം ഉപേക്ഷിക്കുകയായിരുന്നു.
മൃതദേഹത്തോടൊപ്പം ലഭിച്ച കുറിപ്പ് കേന്ദ്രീകരിച്ചു നടത്തിയ അന്വേഷണത്തിലാണ് പ്രതികളേക്കുറിച്ചുള്ള വിവരം ലഭിക്കുന്നത്. നേരത്തേ ഭർതൃപിതാവിനെ വിഷം കൊടുത്ത് കൊലപ്പെടുത്താൻ ശ്രമിച്ച കേസിൽ ഒന്നാംപ്രതി ഫസീലയെ കോടതി അഞ്ച് വർഷം കഠിന തടവിന് ശിക്ഷിച്ചിരുന്നു. മുൻ വൈരാഗ്യത്തിന്‍റെ പേരിലായിരുന്നു കൊലപാതകവും കൊലപാതക ശ്രമവും നടന്നത്.