ആലപ്പുഴ: ഇന്നോവ കാറിലെത്തിയ സംഘം യുവാവിനെ തട്ടിക്കൊണ്ടു പോകാൻ ശ്രമിച്ചു. ആലപ്പുഴ ബൈപ്പാസിൽ വച്ച് കൊല്ലം കരുനാഗപ്പള്ളി സ്വദേശി ഷംനാദിനെയാണ് തട്ടിക്കൊണ്ടു പോകാൻ ശ്രമിച്ചത്.
പാതിവഴിയിൽ വെച്ച് യുവാവ് രക്ഷപ്പെട്ടതോടെ സംഘം വാഹനം ഉപേക്ഷിച്ച് രക്ഷപ്പെടുകയായിരുന്നു. യുവാവിനെയും കൊണ്ട് പോകുന്നതിനിടെ ഇവർ സഞ്ചരിച്ച ഇന്നോവ റോഡിന് നടുവിലെ ഡിവൈഡറിൽ ഇടിച്ചു.
ഈ സമയത്ത് കാറിന്‍റെ ചില്ല് തകർത്ത് യുവാവ് വാഹനത്തിൽ നിന്ന് രക്ഷപ്പെടുകയായിരുന്നു. ഇതോടെ വാഹനം ഉപേക്ഷിച്ച തട്ടിക്കൊണ്ടുപോകൽ സംഘം പിന്നാലെ എത്തിയ മറ്റൊരു കാറിൽ കയറി രക്ഷപ്പെട്ടു.
അഞ്ചുപേരാണ് യുവാവിനെ തട്ടിക്കൊണ്ടുപോയ സംഘത്തിലുണ്ടായിരുന്നത്. സാമ്പത്തിക ഇടപാടുകളാണ് സംഭവത്തിന് പിന്നിലെന്നാണ് സംശയം. സിസിടിവി ദൃശ്യങ്ങൾ കേന്ദ്രീകരിച്ച് പോലീസ് അന്വേഷണം ആരംഭിച്ചു.