കൊച്ചി: ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്റ്റേഴ്‌സിനു തോൽവി. ഹോം മാച്ചിൽ എഫ്‌സി ഗോവയോട്‌ എതിരില്ലാത്ത ഒരു ഗോളിനാണ് കൊമ്പൻമാർ തോൽവി വഴങ്ങിയത്. നാൽപ്പതാം മിനിറ്റിലാണ് കേരളത്തെ ഞെട്ടിച്ച് ഗോവന്‍ ഗോള്‍ പിറന്നത്.
ഗോവന്‍ പ്രതിരോധനിര താരം ബോറിസ് സിംഗാണ് ലക്ഷ്യം കണ്ടത്. പൊരുതി കളിച്ചിട്ടും ഗോളവസരങ്ങൾ തുറന്നെടുക്കാൻ കഴിയാതിരുന്നതാണ് ബ്ലാസ്റ്റേഴ്സിന് വിനയായത്. ഗോവയാകട്ടെ കിട്ടിയ അവസരം മുതലാക്കുകയും ചെയ്തു.
തോൽവിയോടെ പത്തു മത്സരങ്ങളിൽ നിന്ന് മൂന്ന് ജയവും രണ്ട് സമനിലയും അഞ്ച് തോൽവിയുമായി ബ്ലാസ്റ്റേഴ്സ് ഒമ്പതാം സ്ഥാനത്താണ്. ഒമ്പത് മത്സരങ്ങളിൽ നിന്ന് നാല് ജയവും മൂന്ന് സമനിലയും രണ്ട് തോൽവിയുമായി ഗോവ അഞ്ചാമതാണ്.
ഡിസംബർ ഏഴിന്‌ ബംഗളൂരു എഫ്‌സിയുമായാണ്‌ ബ്ലാസ്റ്റേഴ്സിന്‍റെ അടുത്ത മത്സരം.